ЯҢАЛЫКЛАР

2016 елның 4 июлендә Татарстан Премьер-министры урынбасары – Татарстан сәнәгать һәм сәүдә министры Алберт Кәримов Татарстан Республикасы буенча “ГЕММА - иң яхшы товарлар һәм хезмәтләр” Халыкара конкурсында җиңүчеләрне бүләкләде.

Татарстан сәнәгать һәм сәүдә министрлыгы җитәкчесе “ГЕММА - иң яхшы товарлар һәм хезмәтләр” Халыкара конкурсы 2002 елдан бирле уздырыла (баштарак регионара конкурс буларак узган). Конкурс югары күрсәткечле сыйфатка ия товарлар һәм иң яхшы сыйфатлы хезмәт күрсәтүгә ия булган оешмаларны барлауга юнәлдерелгән, Россия һәм чит ил базарларында хезмәт күрсәтүне һәм продукцияне алга этәрү максаты белән уздырыла. 2010 елда “ГЕММА – Себернең иң яхшы товарлары һәм хезмәтләре” Регионара конкурсы халыкара Проект составына керде. 

2016 елның 4 июлендә Татарстан Республикасы Президенты Рөстәм Миңнеханов "Татхимфармпрепараты" ААҖ булды, анда ул стериль күзгә сөртә торган мазьләр, тамчылар һәм стериль булмаган тышкы мазьләр, гельләр ясаучы яңа җитештерү белән танышты. Президентка цехта урнаштырылган яңа җиһазларны, продукцияне җитештерү һәм төрү буенча автоматлаштырылган яңа линияне күрсәттеләр.

"Татхимфармпрепараты" ААҖ җитәкчелеге мәгълүматларына караганда, яңа җитештерү өлешчә үз акчаларына һәм бурычка алынган акчаларга төзелгән. Бүгенге көндә илебездә бу бердәнбер стериль күз мазьләре, тамчылары җитештерүче оешма. Проектның подрядчы компаниясе Чехиядән.

Татарстан Республикасы Президентын Татарстан Премьер-министры урынбасары – Татарстан сәнәгать һәм сәүдә министры Алберт Кәримов, ТР икътисад министры Артем Здунов, "Связьинвестнефтехим" ААҖ генераль директоры Владимир Сорокин, Казан Идел буе Федераль Университеты ректоры Илшат Гафуров, КДМУ ректоры Алексей Созинов һәм башкалар озатып йөрделәр.             

2016 елның 2 июлендә ТР Премьер-министры урынбасары – ТР сәнәгать һәм сәүдә министры Алберт Кәримов Татарстан Республикасы Президенты Рөстәм Миңнехановның Россия Федерациясендә Нидерланд Корольлегенең Гадәттән Тыш һәм Тулы Вәкаләтле Илчесе Рон Ван Дартел белән очрашуында катнашты. Очрашу Казан Кремленең Губернаторлар Сараенда-Татарстан Республикасы Президентының эш резиденциясендә үтте.

Кунакларны сәламләп Рөстәм Миңнеханов Россия-Голландия мөнәсәбәтләре кысаларында хезмәттәшлекне үстерү мөмкинлеген югары бәяләвен хәбәр итте. Бу сезнең Татарстанга өченче кабат килүегез, диде Рөстәм Миңнеханов, Илчегә мөрәҗәгать итеп, әлеге сәфәр дә Нидерланд Корольлеге делегациясе әгъзалары өчен кызыклы һәм файдалы булуына ышануын белдерде (элгәре Рон Ван Дартел әфәнде Казанга 2013 һәм 2015 елларда булган иде).

2016 елның 1 июлендә Казанда Татарстан Республикасы сәнәгать һәм сәүдә министрлыгы һәм "Татмедиа"  матбугат һәм массакүләм коммуникацияләр буенча Республика Агентлыгы ярдәме белән регион һәм милли массакүләм мәгълүмат чаралары VI Форумы кысаларында "Инженер белгечлекләре һәм эшче һөнәрләр престижы" журналист премиясе лауреатларын һәм җиңүчеләрен бүләкләү тантанасы булып узды.

Бүләкләү тантанасында Татарстан Республикасы Дәүләт Киңәшчесе Минтимер Шәймиев, ТР Премьер-министры урынбасары - Татарстан Республикасы  сәнәгать һәм сәүдә министры Алберт Кәримов, "Казан вертолет заводы" генераль директоры Вадим Лигай катнаштылар.

Искә төшереп үтик, 2013 елда "Казан вертолет заводы" тарафыннан Республиканың сәнәгать һәм сәүдә министрлыгы һәм “Татмедиа” Республика Агентлыгы ярдәме белән инженер һәм эшче һөнәрләрне популярлаштыруда иң яхшы эш өчен  журналист премиясе булдырылган иде. Конкурсның төп максаты –эшче һәм инженерларның уңай имиджын формалаштырган, матбугатта яктырткан  иң яхшы журналистларны бүләкләү һәм иң яхшы журналист эшен ачыклау.

2016 елның 1 июлендә Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Алберт Кәримов рәислегендә Россия субъектларында һәм чит илләрдә Татарстан Республикасы Вәкиллекләре белән видеоконференцэлемтә режимында киңәшмә узды.

Киңәшмә эшендә республика министрлыклары, ведомстволары һәм иҗтимагый оешма вәкилләре катнашты.

Булып узган киңәшмә барышында Татарстан Республикасы Вәкиллекләренең 2016 елның 1 яртыеллыгындагы эш нәтиҗәләре, сәүдә-икътисадый һәм инвестицион хезмәттәшлек үсеше өлкәсендәге агымдагы сораулар, ватандашлар белән эшләү мәсьәләләре, перспектив эш планнары каралды.

Татарстан һәм Тыва Республикасының хезмәттәшлекне үстерү өчен мөмкинлекләре күп. Бу хакта Татарстан Республикасы Президенты Рөстәм Миңнеханов 2016 елның 1 июлендә Тыва Республикасы башлыгы вазыйфаларын вакытлыча башкаручы Шолбан Кара-оол белән очрашуында белдерде. Очрашу Рөстәм Миңнеханов башлыгындагы Татарстан делегациясенең Кызыл шәһәренә (Тыва) эш визиты кысаларында үтте.

Татарстан делегациясен сәламләп, Шолбан Кара-оол Тыва Республикасы Татарстан белән хезмәттәшлекне киңәйтүдә кызыксына. "Бүген без мөмкинлекләре җитәрлек дәрәҗәдә ачылмаган регион булып торабыз. Татарстан исә, үз чиратында, күп төрле юнәлешләр буенча алдынгы урыннарны били. Татарстан Республикасы нефть химиясе һәм нефть чыгару тармаклары, авыл хуҗалыгы, машина төзелеше өлкәсендәге үсешләре белән билгеле", - диде Тыва башлыгы вазыйфаларын вакытлыча башкаручы. 

2016 елның 30 июнендә Татарстан Республикасы Президенты Р.Н.Миңнеханов һәм Хакасия Республикасы башлыгы Виктор Зимин Татарстан Республикасы һәм Хакасия Республикасы арасында сәүдә-икътисади, фәнни-техник, социаль һәм мәдәни хезмәттәшлек турында Килешүгә кул куйдылар.

Тантана Татарстан делегациясенең Хакасияга эш визиты кысаларында үтте.

Рөстәм Миңнеханов билгеләп үткәнчә, ике республиканы уртак тарихи тамырлар бәйли. Ул тарихи мирасны саклауда Хакасия җитәкчелеге эшен югары бәяләде.

Татарстан һәм Хакасиянең үзара файдалы хезмәттәшлекне үстерү өчен зур потенциалы бар, диде Татарстан Республикасы Президенты. Аерым алганда, сүз дәүләт хакимияте һәм идарә органнары системасы арасындагы элемтәләрне ныгыту турында бара. Бу яктан һәр регионның үз эшләнмәләре байтак, муниципалитетлар белән эшләү тәҗрибәсе җитәрлек, диде Рөстәм Миңнеханов.

Ул өстәгәнчә, Килешү документы җентекләп язылачак һәм аны гамәлгә ашыруның төгәл планы билгеләнәчәк. Моннан тыш, Татарстан һәм Хакасия территорияләрендә дуслык мөнәсәбәтләрен киңәйтүгә ярдәм итәчәк чаралар уздыру турында алдан килешеп сөйләшенде.  

(ТР Президенты Матбугат хезмәте материаллары кулланылды)

2016 елның 29 июнендә Татарстан Президенты Рөстәм Миңнеханов «Татнефтехиминвест-холдинг» ААҖ директорлар Советы утырышын үткәрде. Утырышта Татарстан һәм Башкортстан нефть-газ-химия комплекслары (НГХК) арасында хезмәттәшлекне үстерү концепциясенең проекты тыңланды.

Концепция ике республика башлыгы йөкләмәсе буенча «Татнефтехиминвест-холдинг» ААҖ һәм Башкортстан Республикасы сәнәгать һәм инновацион сәясәт министрлыгы тарафыннан эшләнгән. Проектның презентациясен  «Татнефтехиминвест-холдинг» ААҖ генераль директоры Рафинат Яруллин һәм "Башкортстан Республикасы үсеш Корпорациясе" ААҖ генераль директоры урынбасары Денис Фомин үткәрделәр.

Татарстанда НГХК өлешенә сәнәгый җитештерүнең 57 проценты, ә Башкортстанда - 40 проценты туры килә. Соңгы елларда ике республиканың хезмәттәшлеге барлык юнәлешләр буенча үстерелә.

Концепцияне эшләүнең максатлары итеп хезмәттәшлекне үстерүнең өстенлекле юнәлешләрен билгеләү, ике якка да җибәрү өчен булган продукциянең төрләрен һәм күләмнәрен билгеләү, бергә тормышка ашыру өчен проектлар сайлап алу, проектларның кабатлануына юл куймау аталды. Документта эре компания планнары төп урынны алып тора.

Башкорт хезмәттәшләр белән яхшы элемтәләр урнаштырган "Татнефть" компаниясе скважиналарны бораулаганда яңа технологияләр кертүгә басым ясый, иярчен нефть газын куллануның күләмен арттыру, югары үзлекле нефть, табигый битум, сланец нефте чыганакларын табуга игътибарын юнәлтә. 2019 елга кадәр "Татнефть" компаниясе "ТАНЕКО" нефть эшкәртү заводының берничә яңа җайланмасын файдалануга тапшырырга, нефтьне беренчел эшкәртү егәрлеген 6 млн тоннага кадәр арттырырга, авыр нефтьне эшкәртү буенча җайланма төзергә планлаштыра.

"ТАИФ-НК" нефть эшкәртү заводының өстенлекле проекты итеп авыр калдыкларны тирәнтен эшкәртү буенча комплекс төзү аталган. "Түбән Кама нефтехим" предприятиесенең төп стратегик проекты булып яңа олефин комплексы төзелеше тора.

Концепция проектында Башкортстанда нефть эшкәртү үсешендәге төп чикләүләрнең берсе итеп чимал белән тәэмин итү җитәрлек булмавы аталган. "Башнефть" компаниясе нефть табуны арттыруны максат итеп куйган, моңа алар Архангель өлкәсенең Ненец автономияле округындагы чыганаклар хисабына ирешергә телиләр.

Документта НГХКның бөтен юнәлешләре буенча ике республиканың хезмәттәшлек нокталары билгеләнгән. Аларның потенциаллары чиксез зур булуы әйтелгән. Мәсәлән, нефтехимия өлкәсендә импортны алыштыру өчен консорциум булдыру мөмкинлеге һәм Россия, халыкара базарларда эре нефть-газ эшкәртү производстволары төзү  тәҗрибәсен куллану турында әйтелә.

Совет чорында республикаларның нефть-газ-химия комплекслары тыгыз хезмәттәшлек итсә дә, соңыннан күп кенә мөмкинлекләр кулдан ычкындырылган, диде Рөстәм Миңнеханов.

ТР Президенты ике республиканың хезмәттәшлеген киңәйтү ягында. "Без зур компетенцияләргә ия, шул исәптән нефть эшкәртүдә төзелеш буенча да, аларны сатырга кирәк", - дип искәртте ул.

Рөстәм Миңнеханов хезмәттәшлек планын җентекләп язырга, юнәлешләр буенча эшче төркемнәр булдырырга, кварталга кимендә бер тапкыр очрашулар үткәрергә йөкләде.

(“Татар-информ” МА материаллары буенча)

2016 елның 28 июнендә Татарстан Республикасы Президенты Рөстәм Миңнеханов Корея Республикасының Россия Федерациясендә Гадәттән тыш һәм Тулы вәкаләтле Илчесе Пак Ро Бёк белән очрашты.

Рөстәм Миңнеханов Илче һәм аны озата йөрүче затларның Казанга ике көнлек сәфәрләре кызыклы һәм вакыйгаларга бай булыр дигән ышанычын белдерде.

"Узган атнада без сезнең илегездә булдык, - диде Рөстәм Миңнеханов, Илче әфәндегә мөрәҗәгать итеп. - Күп төрле файдалы очрашулар үтте, без Татрстан-Корея бизнес-форумын уздырдык, шулай ук, Чхунчхон-Пукто провинциясе губернаторы белән очраштык. Безнең фикеребезчә, бүгенге көндә регионнар дәрәҗәсендә актив эшләү бик мөһим".

Очрашуда Рөстәм Миңнеханов һәм Пак Ро Бёк әфәнде Татарстан Республикасы белән Корея арасында файдалы хезмәттәшлекне җайлау мөмкин булырлык тармаклар турында фикерләштеләр.

Яклар ике яклы хезмәттәшлек өчен югары потенциал һәм яхшы мөмкинлекләр булуын ассызыкладылар.

"Корея Республикасына сәфәрегез барышында ирешелгән килешүләрне гамәлгә ашыру өчен мин Корея бизнесы вәкилләре белән сезнең регионга килдем, - диде Корея Республикасының Россия Федерациясендә Гадәттән тыш һәм Тулы вәкаләтле Илчесе. –Мин ышанам, без тыгыз хезмәттәшлек итәрбез һәм бизнесны үстерү өчен яңа юнәлешләр табарбыз. Минем визит сезнең регионыгыз үсеше турындагы күрсәткечләрне раслады, һәм минемчә, сезнең акыллы җитәкчелек итүегез, алдан күрә алу сәләтегез биредә зур уңышларга ирешергә ярдәм итә. Безнең бизнес вәкилләребез биредә уңайлы шартларда эш итә алыр, дигән уйда калам".

Пак Ро Бёк әфәнде бу сәфәргә Кореянең эре компания вәкилләрен, финанс һәм банк институтлары вәкилләрен Татарстан Республикасы белән багланышларны алга этәрү өчен чакыруын хәбәр итте.

"Сезнең сәүдә-икътисадый өлкәдә генә түгел, ә фән, мәгариф һәм мәдәният өлкәсендә дә хезмәттәшлек итәргә теләгәнегезне беләм. Без сезнең инициативаларыгызны хупларбыз һәм төрле юнәлешләрдә үзара хәрәкәт итүне дәвам итәрбез", - диде ул.

( ТР Президенты Матбугат хезмәте материаллары файдаланылды)

2016 елның 28 июнендә Татарстан Республикасы сәнәгать һәм сәүдә министрлыгында ТР Премер-министр урынбасары – ТР сәнәгать һәм сәүдә министры каршында коррупциягә каршы тору сораулары буенча комиссия һәм мәнфәгатьләр конфликтын җайга салу һәм дәүләт граждан хезмәткәрләренең хезмәт вазифалары тәртибе таләпләрен үтәү буенча комиссиянең уртак утырышы булып узды.

Утырыш эшендә ТР сәнәгать һәм сәүдә министры урынбасары Алмаз Хусаинов, ТР Президент Аппараты вәкилләре һәм ТР сәнәгать һәм сәүдә министрлыгы вәкилләре катнашты.

Утырыш барышында 2015 елга коррупциягә каршы мониторинг материаллары һәм Татарстан Республикасында коррупциягә каршы сәясәтне гамәлгә ашыру нәтиҗәлелеген бәяләү турында мәгълүмат каралды, коррупция белән бәйле гаепле гамәлләр кылган өчен дәүләт хезмәткәрләрен дисциплинар җаваплылыкка тарту белән бәөле булган бәхәсләр тикшерелде.