ЯҢАЛЫКЛАР

9 ноябрьдә Татарстан Республикасы Сәнәгать һәм сәүдә министрлыгында Рашат Фәттахов арзанлы рестораннар төзү һәм 2013 елның җәендә стационар булмаган сәүдә объектлары урнаштыру мәсьәләләренә багышланган киңәшмә үткәрде.

2012 елның 7 ноябрендә Зеленодольск шәһәрендә Россия машина төзүчеләре берлегенең Татарстан бүлекчәсе беренчел оешмалары координаторларының семинар-киңәшмәсе булды. Форум эшендә Татарстан бүлекчәсе составына керә торган предприятиеләр вәкилләре катнашты. Алар арасында «КАМАЗ» ААҖ, «ПОЗиС» ААҖ, «Казан вертолет заводы» ААҖ, «А.М.Горький исемендәге Зеленодольск заводы» ААҖ, «Элекон заводы» ААҖ, «ГИПО» ФҖБ» ААҖ, «Шимко ис. радиоэлектроника ФҖБ» ААҖ һ.б бар иде. Киңәшмәдә киләсе елга эш планнары һәм дәүләт органнары, фән, бизнес даирәләре белән нәтиҗәле хезмәттәшлек итү мәсьәләләре каралды.

2012 елның 5-9 ноябрь көннәрендә Татарстан Республикасында эшче визит белән Иске Шәһәр провинциясе делегациясе булды. Кадыйр Кочдемир әфәнде җитәкчелегендәге төрек делегациясе составына Иске Шәһәр провинциясе җитәкчелеге, сәнәгать палатасы, «Форд Отосан» компанисе һәм әлеге провинциянең эшлекле даирәләре вәкилләре кергән.
Татарстан Республикасында булу программасы кысаларында Иске Шәһәр делегациясе Татарстан Республикасы Президенты Р. Миңнеханов белән очрашты, Чаллы шәһәрендә, Алабуга муниципаль районында булды.

5-6 ноябрьдә Татарстан Республикасында Казахстанның «Атамекен» берлеге» Милли икътисадый палатасы Президиумы Рәисе Тимур Кулибаев җитәкчелегендә бизнес даирәләр делегациясе булды. Очрашуларда сүз Татарстан һәм Казахстан арасында хезмәттәшлек итүне үстерү перспективалары хакында барды. Эшлекле визит кысаларында Татарстан Республикасы Президенты Р.Н. Миңнеханов белән очрашу, Татарстанның икътисадый һәм инвестиция потенциалын презентацияләү булды. Татарстан Республикасының Сәнәгать һәм сәүдә министрлыгында делегация Татарстан Республикасының Сәнәгать һәм сәүдә министры беренче урынбасары Руслан Кәбиров белән очрашты. Кунаклар шулай ук «Химград» технополисында, «Казан вертолет заводы» ААҖ, «Танеко» ААҖ, «КАМАЗ» ААҖ, «ЕЛАЗ» ҖБ» ААҖ булдылар.

1-2 ноябрь көннәрендә Татарстан Республикасының Сәнәгать һәм сәүдә министрлыгы "Ягулык-энергетика комплексы җитәкчеләренең һәм белгечләренең квалификацияләрен күтәрү институты" ФГАОУ ДПО белән берлектә Россия Федерациясе Энергетика министрлыгы каршында "Ягулык-энергетика комплексы объектларын категорияләүне һәм паспортизацияләүне оештыру һәм үткәрү тәртибе" юнәлеше буенча квалификация күтәрү курслары үткәрде.
Әлеге мәсьәләгә игътибар итү "Ягулык-энергетика комплексы объектларының иминлеге турында" 2011 елның 21 июлендәге 256-ФЗ номерлы Федераль законны үтәү барышында килеп туган күпсанлы сорауларга бәйле.

2012 елның 2 ноябрендә Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов “Туполев” ААҖ 90 еллык юбилеена багышланган тантаналы чарада катнашты. Ул Татарстан Республикасы Хөкүмәте исеменнән предприятие коллективын бу истәлекле дата белән котлады. “Туполев” ачык акционер җәмгыяте Россиянең танылган авиаконструкторы һәм илдә авиация сәнәгатенә нигез салган Андрей Николаевич Туполев тарафыннан 1922 елда оештырылган предприятие эшен дәвам итә.

Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов сәнәгать предприятиеләренең, сәүдә һәм хезмәт күрсәтү предприятиеләренең хезмәт коллективларын Халыклар бердәмлеге көне белән котлады:
«4 ноябрь – Халыклар бердәмлеге көне! Бу көнне без олы илдә – Россиядә яшәвебезне аермачык тоябыз. Яшькә, дингә, һөнәргә, тормыштагы максатларыбызга карамастан, без илебез язмышы өчен җаваплылык тоеп яшәүче халык.
Һәркемгә көчле, үсешкә һәм бөтенлеккә йөз тоткан бердәм дәүләт кирәк. Кешеләргә ышанычлы иминлек гарантияләүче, алар хезмәттә дә, иҗатта да үз мөмкинлекләрен гамәлгә ашыра алырлык заманча граждан җәмгыятен уртак тырышлык белән генә төзи алачакбыз.
Халыклар бердәмлеге көне белән чын күңелдән котлыйм! Исәнлек-саулык, иминлек, тынычлык һәм һәр өйгә бөтенлек телим! Бу бәйрәм Татарстан һәм Россиянең үсеше һәм киләчәге хакына барыбызны да берләштерсен иде!

2012 елның 1 ноябрендә Татарстан Республикасының сәнәгать һәм сәүдә министры урынбасары Рашат Фәттахов “Мода һәм стиль атнасы” җиңел һәм текстиль сәнәгате товарларының 24 нче махсус күргәзмәсен ачу тантанасында катнашты. Җиңел һәм текстиль товарлары күргәзмәсе илебездә җитештерелә торган товарларны кулланучыларга таныту, куллану базарын булдыру буенча җитди адым булып тора. Быел әлеге күргәзмәдә Россиянең 50 шәһәреннән 200 компания катнаша.

“Казан вертолет заводы” ачык акционер җәмгыятьтә ел саен һөнәри осталык конкурсы үткәрелә. Эшчеләр һәм белгечләр арасында үткәрелә торган әлеге конкурс аларның теоретик белемнәрен һәм гамәли күнекмәләрен бәяләргә, иң оста белгечне билгеләргә, заводта эшче һөнәренең абруен арттырырга мөмкинлек бирә. Бу конкурсларда катнашучы белгечләргә төрле өстенлекләр бирелә, алар хезмәт хакы күләменә дә йогынты ясый.

14 ноябрьдә Татарстан-Финляндия бизнес форумы үтәчәк, анда Татарстан Республикасы Премьер-министры И. Халиков, Финляндиянең Европа эшләре һәм тышкы сәүдә министры Александр Стубба катнашачак. 31 октябрьдә Татарстан Республикасы Сәнәгать һәм сәүдә министрлыгында әлеге чараны оештыру буенча киңәшмә булды. Киңәшмә эшендә Татарстан Республикасының сәнәгать һәм сәүдә министры беренче урынбасары Руслан Кәбиров, Финляндия-Россия сәүдә палатасының Екатеринбургтагы вәкиллеге директоры Людмила Сафина, Татарстан Республикасы Сәнәгать һәм сәүдә министрлыгының структур бүлекчәләре җитәкчеләре катнашты.