«Туполев» ААҖ юбилее

2012 елның 2 ноябрендә Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов “Туполев” ААҖ 90 еллык юбилеена багышланган тантаналы чарада катнашты. Ул Татарстан Республикасы Хөкүмәте исеменнән предприятие коллективын бу истәлекле дата белән котлады. “Туполев” ачык акционер җәмгыяте Россиянең танылган авиаконструкторы һәм илдә авиация сәнәгатенә нигез салган Андрей Николаевич Туполев тарафыннан 1922 елда оештырылган предприятие эшен дәвам итә.
Әлеге оешмада 300 дән артык төрле билгеләнештәге очу аппараты, аэрочаналар һәм кече суднолар проектлары эшләнде, шуларның 90 якыны сынау үткән конструкцияләрдә гамәлгә ашырылды, 40 күпләп эшләп чыгарылды. 18 меңнән артык “Ту” маркалы очкычлар җитештерелде, шуларның 2000 – пассажирлар ташу өчен. Меңнән артык очкыч чит илләргә озатылды, дөньяның егерме илендә кулланылды.
Дөнья һәм илнең авиация төзелеше тарихында Туполев самолетлары: ТБ-1, ТБ-3, СБ һәм ТБ-7 бомбардировщиклары, гигант самолет АНТ-20 «Максим Горький», АНТ-25, Ту-2, сугыштан соңгы реактив бомбардировщиклар Ту-16, Ту-95 һәм Ту-22, реактив пассажир самолетлары Ту-104, Ту-124, Ту-134, Ту-154, шулай ук пассажир самолеты Ту-144 тирән эз калдырды.
Бүген предприятие киң профильле һәм күпкырлы авиация техникасы эшләп чыгару өлкәсендә илдә һәм дөньяда әйдәп баручылар рәтендә, бу аның дөнья стандартларына туры килерлек техника эшләп чыгарырга сәләтле булуын раслый.
Равил Зарипов “Туполев” ААҖ хезмәт коллективына исәнлек, бәхет һәм яңадан-яңа уңышларга ирешүне теләде.
Мәгълүмат өчен:
А.Н. Туполев тарафыннан 100 артык төрдәге самолетлар эшләнде, шуларның 70 күпләп чыгарылды. Бу самолетларда 78 дөнья рекорды куелды, 28 уникаль очышлар ясалды. Алар арасында АНТ-4 самолетында “Челюскин” пароходы экипажын коткару, В.П. Чкалов һәм М.М. Громов экипажларының Төньяк полюс аша АКШка тукталышсыз очышы, И.Д. Папанин җитәкчелегендә “Төньяк полюс” фәнни экспедициясе бар.