ЯҢАЛЫКЛАР

20-21 ноябрь көннәрендә Татарстан Республикасы Сәнәгать һәм сәүдә министрлыгында тематик “түгәрәк өстәл”ләр оештырылды, аларда катнашучылар агач эшкәртү, азык-төлек һәм җиңел сәнәгать, машина төзелеше, оборона сәнәгате комплексы тармакларында техник җайга салу мәсьәләләре хакында фикер алышты.

21-22 ноябрь көннәрендә Татарстан Республикасына эш визиты белән Литва Республикасы делегациясе килде. Делегациянең җитәкчесе – Литваның Россия Федерациясендәге Гадәттән тыш һәм Тулы вәкаләтле Илчесе Ренатас Норкус. 21 ноябрьдә Татарстан Республикасы Сәнәгать һәм сәүдә министрлыгында министрның беренче урынбасары Р.Кәбиров әлеге делегация белән очрашты. Очрашуда сүз Татарстан Республикасы һәм Литва Республикасы арасындагы ике як өчен дә файдалы хезмәттәшлек турында барды.

20 ноябрьдә Чаллы шәһәрендә Татарстан Республикасында яшьләр һәм балаларның техник иҗатын үстерүгә багышланган киңәшмә булды, анда Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов, министрлыклар һәм ведомстволар вәкилләре, муниципаль берәмлек башлыклары, республиканың сәнәгать предприятиеләре һәм уку йортлары җитәкчеләре катнашты.

20 ноябрьдә Чаллы шәһәрендә предприятиеләр белән идарә итүгә мәгълүмат технологияләрен кертү мәсьәләләренә багышланган киңәшмә булды. Анда Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов, Татарстан Республикасы Сәнәгать һәм сәүдә министрлыгы хезмәткәрләре, Чаллы муниципаль берәмлеге, сәнәгать предприятиеләре вәкилләре катнашты.

20 ноябрьдә Алабугада Татарстан Республикасы Сәнәгать һәм сәүдә министрлыгының, республиканың сәнәгать предприятиеләре һәм оешмаларының эшче һәм инженер һөнәрләренең абруен арттыру буенча уртак эшчәнлеге, шулай ук республикада “Сакчыл җитештерү” методикасын кертү буенча ведомствоара эшче төркем эшчәнлеге кысаларында “Флагман” проекты старт алды. Ул хезмәт җитештерүчәнлеген арттыруга юнәлдерелгән.

Татарстан Республикасы тегү сәнәгате предприятиеләре арасында “тегүче” һөнәре буенча 17 ноябрьдә үткән һөнәри осталык конкурсында 1 урынны Светлана Богатова ("Меркурий"ҖЧҖ), 2 урынны - Фиалка Газизова ("ГИАРА" ҖЧҖ), 3 урынны Альбина Андреева ("Кукмара тегү фабрикасы" ААҖ) яулады.
Республика конкурсында 8 предприятие вәкиле катнашты, алар үз фабрикаларында җиңү яулаган хезмәткәрләр. Республика конкурсында катнашучылар ысулый һәм гамәли күнекмәләр күрсәтте. Җиңүчеләр Мактау грамоталары һәм акчалата призлар белән бүләкләнде.
Мәгълүмат өчен:
2012 елның 9 аенда тегү сәнәгатендә 2,7 млрд. сумлык продукция җитештерелде. Сәнәгать җитештерү индексы 112% тәшкил итте.

15 ноябрьдә “КЭТЗ” ААҖтә семинар-киңәшмә булды, анда Татарстан Республикасының сәнәгать һәм сәүдә министры урынбасары Г. Әхмәдиева, Татарстан Республикасы предприятиеләре һәм эшкуарлары ассоциациясе җитәкчелеге, Татарстан Республикасының машина төзелеше, авиатөзелеш һәм нефть химиясе комплексы тармагындагы 33 сәнәгать предприятиесеннән 50 баш инженер катнашты.

17 ноябрьдә Татарстан Республикасы тегү сәнәгате предприятиеләре арасында “тегүче” һөнәре буенча һөнәри осталык конкурсы үткәреләчәк. Конкурсның максаты – эшче һөнәрләрнең абруен арттыру, тармак хезмәткәрләре арасында алдынгы тәҗрибәне тарату.

14 ноябрьдә Новороссийск шәһәрендә хәрби диңгез флоты базасында 21980 проектлы катерны дәүләт сынаулары үткәрүгә кабул итеп алу турындагы актка имза салынды. Шулай итеп, “Грачонок” серияле “А.М. Горький исемендәге Зеленодольск заводы” ААҖ эшләп чыгарган өченче катер Россия Федерациясе Хәрби диңгез флотына тапшырылды.

14 ноябрьдә Казан шәһәрендә Татарстан-Финляндия бизнес-форумы ачылды. Аны ачу тантанасында Татарстан Республикасы Премьер-министры И. Халиков, Финляндиянең Европа эшләре һәм тышкы сәүдә министры Александер Стубб катнашты.
Форум эшендә Татарстан һәм Финляндиянең министрлыклар һәм ведомстволар җитәкчеләре, Татарстан предприятиеләреннән һәм төрле тармакларда эшләүче 30 фин компаниясеннән вәкилләр катнашты.
Бизнес-форумда катнашучыларны сәламләү сүзендә И. Халиков, форумның ике яклы хезмәттәшлекнең динамик үсеше чорында үткәрелүен билгеләп үтте. 2012 елның июнендә Татарстан Республикасы Президенты Р. Миңнеханов Санкт-Петербургта Финляндия Президенты Саули Нийнисте белән очрашкан иде, Премьер-министр И.Халиков Финляндиядә үткәрелгән III Россия-Европа инновация форумында катнашты. 2012 елның беренче яртыеллыгында Татарстан Республикасы һәм Финляндия арасында тышкы сәүдә әйләнеше 406,2 млн. доллар тәшкил итте.
Финляндиянең Европа эшләре һәм тышкы сәүдә министры Александер Стубб әфәнде үзенең чыгышында Финляндиянең инновация потенциалы хакында бәян итте. Аның әйтүенчә, әлеге форумда катнашучы фин компанияләре Татарстан белән тагын да тыгызрак хезмәттәшлеккә өметләнә.

Эшлекле форум кысаларында Татарстан Республикасы сәнәгать һәм сәүдә министры беренче урынбасары Р. Кәбиров Татарстан Республикасының инновация һәм сәнәгать потенциалын презентацияләде, ике яклы сәүдә-икътисадый хезмәттәшлекнең перспектив якларын атады.
15 ноябрьдә әлеге форум кысаларында Финляндия һәм Татарстан Республикасы арасында икътисадый хезмәттәшлек итү буенча эшче төркем утырышы уздырылачак.