ИТ-технологияләрнең предприятиеләр белән идарә итүдәге мөмкинлекләре

20 ноябрьдә Чаллы шәһәрендә предприятиеләр белән идарә итүгә мәгълүмат технологияләрен кертү мәсьәләләренә багышланган киңәшмә булды. Анда Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов, Татарстан Республикасы Сәнәгать һәм сәүдә министрлыгы хезмәткәрләре, Чаллы муниципаль берәмлеге, сәнәгать предприятиеләре вәкилләре катнашты.
Киңәшмәдә катнашучыларны Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов сәламләде, ул бу киңәшмәнең үткән ел уздырылган IT-форумның һәм бер ел дәвамында эшләнгән эшләрнең дәвамы булуын билгеләп үтте.
Равил Зарипов сүзләренчә, республиканың кайбер предприятиеләренә тармакта ирешелгән казанышларны кертү эше – корпоратив мәгълүмат системалары аутсорсингы, заманча ERP-системаларны кертү бара. Җитештерүне модернизацияләү белән бер үк вакытта эре IT-үзәк төзү барлык предприятиеләр өчен мөмкин эш түгел. Шуңа күрә IT-парк мәйданында бердәм мәгълүмат кыры булдыру, IT-технологияләр аутсорсингы турында сүз бара.
“Татарстан Республикасында ИT-парк һәм ИТ-инфраструктура: республика предприятиеләре өчен өстенлекләр” турында доклад белән «Югары технологияләр өлкәсе технопаркы«ИT-парк» ДАУ директоры Динар Насыйров чыгыш ясады. “КАМАЗ” ААҖнең Мәгълүмат һәм телекоммуникация технологияләре үзәге директоры М. Носов регионнарга тапшырылган вәкаләтләр ярдәмендә мәгълүмат технологияләренә чыгымнарны киметү хакында бәян итте.
Киңәшмәне йомгаклап, Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов предприятиеләрдә мәгълүмат технологияләренә кагылышлы төп мәсьәләләрне чишүнең актуаль булуын, кадрларның бу юнәлештә квалификациясен арттыру кирәклеге хакында сөйләде. Ул шулай ук Татарстан Республикасы мәгълүмат технологияләре өлкәсендә лидер буларак, бу өлкәләрдәге алдынгы эшләнмәләрне һәм тәҗрибәләрне куллануның зарурлыгын, уртак эш ярдәмендә тагын да уңышлырак нәтиҗәләргә ирешү мөмкинлеген ассызыклады.