ЯҢАЛЫКЛАР

2016 елның 5 сентябрендә Республикасы Президенты Рөстәм Миңнеханов Харбин шәһәре халык хөкүмәте мэры Сун Сибинь әфәнде башлыгындагы Кытай делегациясе белән очрашты.

Казан Кремлендә узган очрашуда Татарстан ягыннан ТР Премьер-министры урынбасары -ТР сәнәгать һәм сәүдә министры Алберт Кәримов, ТР Президенты ярдәмчесе Радик Гыйматдинов, ТР инвестиция үсеше Агентлыгы җитәкчелеге катнашты.

Сәламләү сүзендә Рөстәм Миңнеханов белдергәнчә, Татарстанның Кытай белән хәзерге мөнәсәбәтләренең югары дәрәҗәдә булуын бәяли һәм Россия белән Кытай арасындагы дустанә мөнәсәбәтләрне һәм хезмәттәшлекне ныгытуга юнәлдерелгән һәртөрле элемтәләрне киңәйтүгә зур игътибар бирә. 

2016 елның 5 сентябрендә ТР Премьер-министры урынбасары – ТР сәнәгать һәм сәүдә министры Алберт Кәримов Татарстан Республикасы Президенты Рөстәм Миңнехановның Россия Федерациясендә Корея Халык-Демократик Республикасының Гадәттән Тыш һәм Тулы Вәкаләтле илчесе Ким Хен Джун белән очрашуында катнашты.

Рөстәм Миңнеханов 2014 елда Төньяк Кореягә булган визитын искә төшерде. Ул вакытта Татарстан делегациясе илнең җитәкчелеге белән берничә рәсми очрашу уздырдылар һәм Төньяк Кореянең әйдәп баручы предприятиеләрендә булдылар. 

Рөстәм Миңнеханов фикеренчә, делегацияләрнең үзара визитлары һәм эшлекле элемтәләргә ярдәм итү Россия-Төньяк Корея мөнәсәбәтләре кысаларында КХДР һәм Татарстан арасында дустанә мөнәсәбәтләрне алга таба ныгуга һәм үстерүгә  ярдәм итәчәк. 

(Татарстан Республикасы Президенты Матбугат үзәге материаллары буенча)

2016 елның 5 сентябрендә "Татар-информ" МА Татарстанда "Бергә матуррак һәм кызыклырак итеп" энергияне сак тоту  Фестивален уздыру сораулары буенча  матбугат конференциясе булып узды.  

Фестивальнең программасы һәм максатлары турында хәбәрчеләргә ТР сәнәгать һәм сәүдә министры урынбасары Алексей Сергеев һәм Казан шәһәре Башкарма Комитеты икътисади үсеш Комитеты рәисе Илдар Шакиров сөйләделәр. 

Яшьләр инициативасы кысаларында һәм Россия энергетика министрлыгы, "Торак-Коммуналь Хуҗалыкны реформалауда ярдәм итү Фонды” Дәүләт корпорациясе, Россия мәгариф һәм фән министрлыгы, "Глобаль энергия" премиясе лауреатлары һәм башка оешмалар ярдәме белән агымдагы елның сентябрендә Россиядә “Бергә матуррак һәм кызыклырак итеп" энергияне сак тоту масштаблы фестивале узачак.

2016 елның 4 сентябрендә Әлмәт шәһәрендә Татарстан Республикасы Президенты Рөстәм Миңнеханов катнашында Нефть-газ сәнәгате хезмәткәрләре Көненә һәм Шәһәр Көненә багышланган тантаналы чара узды.

Үзенең сәламләү чыгышында Рөстәм Миңнеханов нефть һәм газ сәнәгате предприятиеләре хезмәткәрләрен һәм ветераннарын һөнәри бәйрәмнәре һәм Шәһәр көне белән котлады.

Ул билгеләгәнчә, республиканың нефть һәм газ сәнәгате хезмәткәрләре һөнәри бәйрәмнәрен зур хезмәт казанышлары белән каршы алалар. Аерым әйтсәк, нефть чыгару күләмен арттыру һәм углеводородлар чималы запасларын үстерү тәэмин ителгән. Газны һәм нефть, нефть продуктларын кулланучыларга өзлексез җиткерү эше көйләнгән.

Илнең нефть эшкәртү сәнәгате өчен мөһим вакыйгалар булды. Рөстәм Миңнеханов сүзләренчә, "ТАНЕКО" нефть эшкәртү һәм нефть химиясе Комплексында акрынайтылган кокслау җайланмасын эшләтеп җибәрү һәм эшкәртүнең тирән дәрәҗәгә ирешү. Моннан тыш, "Татнефть" компаниясенең  нефть химиясе, энергетика предприятиеләрендә һәм ваклап сату челтәрендә җитештерүдә югары нәтиҗәләргә ирешеп булды.

2016 елның 3 сентябрендә Татарстанда кыска вакытлы визит белән Испания Хөкүмәте Рәисе вазыйфаларын башкаручы Мариано Рахой булды.

"Казан" халыкара аэропортында Испания Хөкүмәте Рәисе вазыйфаларын башкаручы Мариано Рахой җитәкчелегендәге Испания делегациясе белән ТР Премьер-министры урынбасары – ТР сәнәгать һәм сәүдә министры Алберт Кәримов очрашты.

Алберт Кәримов делегация әгъзаларына Татарстанның инвестицион һәм сәнәгать потенциалы презентациясен тәкъдим итте.

2016 елның 2 сентябрендә ТР Премьер-министры урынбасары – ТР сәнәгать һәм сәүдә министры Алберт Кәримов рәислегендә видеоконференция режимында Россия Федерациясе субъектларында һәм чит илләрдәге  Татарстан Республикасы Вәкиллекләре белән киңәшмә булып узды.

Киңәшмә эшендә республиканың министрлык, ведомство, иҗтимагый оешма  җитәкчелеге вәкилләре катнашты.

Утырыш барышында Россия Федерациясе субъектларында һәм чит илләрдәге  Татарстан Республикасы Вәкиллекләренең 2016 елның июль-август айларындагы эш нәтиҗәләре тикшерелде, ТР Вәкиллекләренең агымдагы эшчәнлеге мәсьәләләре каралды. Шулай ук, ТР Вәкиллекләренең ватандашлар белән эшләү, сәүдә-икътисадый һәм инвестицион хезмәттәшлекне үстерү  өлкәсендә перспектив эш планы һәм бурычлары билгеләнде.

2016 елның 2 сентябрендә ТР Премьер-министры урынбасары – ТР сәнәгать һәм сәүдә министры Алберт Кәримов Fastems Oy Ab (Финляндия) һәм  «Пумори-төньяк-көнбатыш» ҖЧҖ (Санкт-Петербург шәһәре) компаниясе  делегациясе белән очрашты.

Очрашуда Fastems Oy Ab  фин компаниясе вице-президенты Сеппо Лехтонен,  «Пумори-төньяк-көнбатыш» ҖЧҖ генераль директоры Сергей Сухов,  «Пумори-төньяк-көнбатыш» ҖЧҖ Региональ вәкиле Владимир Михайлов, ТР сәнәгать һәм сәүдә министрлыгы вәкилләре катнашты.

Узган очрашу барышында Fastems компаниясенең презентациясе үтте, Россия һәм Татарстанда компания тарафыннан гамәлгә ашырыла торган проектлар каралды, «Fastems Oy Ab» компаниясе һәм Татарстан Республикасының машина төзелеше комплексы предприятиеләре арасында эшләнүче «Юл картасы» кысаларында хезмәттәшлекне үстерү сораулары хакында фикер алышынды.  

2016 елның 2 сентябрендә Татарстан Президенты Рөстәм Миңнеханов Израильнең Россия Федерациясендәге Гадәттән Тыш һәм Тулы Вәкаләтле Илчесе Цви Хейфец белән очрашты. Очрашу Татарстан Республикасы Хөкүмәте Йортында узды. Анда ТР вице-премьеры – ТР сәнәгать һәм сәүдә министры Алберт Кәримов та катнашты.

Әңгәмә барышында яклар Россия-Израиль мөнәсәбәтләре кысаларында Израиль һәм Татарстан арасында хезмәттәшлекне үстерү перспективалары  турында сөйләштеләр. 

Рөстәм Миңнеханов килгән кунакка кыскача республиканың икътисади, инвестиция, туристик потенциалы турында сөйләде. Үзара файдалы элемтәләр төзерлек берничә юнәлеш бар, дип ассызыклады ТР Президенты. Аерым ул  нефть химиясе, сәламәтлекне саклау, авыл хуҗалыгы, мәдәният һәм башка өлкәләрне атады.

(ТР Президенты Матбугат хезмәте материаллары буенча)

2016 елның 1 сентябрендә Тукай муниципаль районында "Сетевая компания" ААҖ яңа энергия объекты - Бигеш 220 кВ подстанциясе рәсми рәвештә эшләтеп җибәрелде.  

Чарада Татарстан Республикасы Президенты Рөстәм Миңнеханов, ТР Премьер-министры урынбасары – ТР сәнәгать һәм сәүдә министры Алберт Кәримов, ТР Түбән Кама муниципаль районы башлыгы Айдар Метшин, "Сетевая компания" ААҖ генераль директоры Илшат Фәрдиев, ТР министрлыклары һәм ведомстволары җитәкчеләре, төрле производство вәкилләре катнашты. 

Яңа подстанция төзүнең төп максаты - Түбән Кама энергорайонында нефть-химия комплексын электр белән тәэмин итүнең ышанычлы булуын арттыру. Яңа объект сафка басу белән энергия белән тәэмин итүдә тайпылышлар булу сәбәпле авария очраклары кимеячәк. 

2016 елның 1 сентябрендә Татарстан Республикасы Президенты Рөстәм Миңнеханов Чаллыга эш визиты кысаларында "КАМАЗ" ГАҖ һәм Daimler уртак проекты - SFTP кабина каркаслары җитештерүче завод төзелеше барышы белән танышты. Рөстәм Миңнехановны ТР Премьер-министры урынбасары – ТР сәнәгать һәм сәүдә министры Алберт Кәримов, ТР икътисад министры Артем Здунов, "КАМАЗ" ГАҖ генераль директоры Сергей Когогин озата йөрделәр. 

Яңа буын "КАМАЗ" автомобильләре өчен кабина каркаслары җитештерүче завод төзелеше быел март аенда башланды. Әлеге проект кабина каркаслары  җитештерүнең тулы циклын оештыруны күз алдында тота, моңа эретеп ябыштыру һәм буяу дә кергән.

Предприятие автомобиль заводының җитештерү объектлары территориясендә төзелә. Әзер продукция Чаллы автогигантының баш конвейерына һәм Mercedes-Benz авыр йөк машиналары җыючы производствосына җибәреләчәк. 

(ТР Президенты Матбугат хезмәте материаллары кулланылды)