ЯҢАЛЫКЛАР

Саклык банкының эшлекле аралашу зонасында оештырылган Sbertalk сессиясендә Татарстан Республикасы Президенты Рөстәм Миңнеханов катнашты. Әңгәмә темасы – төбәкләрнең ESG трансформациясе.

Очрашу «Россия – Ислам дөньясы: KazanSummit 2021» XII халыкара икътисадый саммиты кысаларында узды.

ESG – социаль, экологик һәм идарә җаваплылыгы өлкәсендә принципларның һәм алымнарның билгеле бер җыелмасы.

Рөстәм Миңнеханов билгеләп үткәнчә, ESG принциплары Татарстанның кайбер эре предприятиеләрендә гамәлгә кертелгән инде. «КАМАЗ», «Татнефть», «Казаноргсинтез» һәм «Таиф-НК» Россия компанияләре ESG-рейтингына керә. Бу трендны гамәлгә кертү, Татарстан Республикасы Президенты фикеренчә, дәүләт дәрәҗәсендәге мөһим мәсьәлә булырга мөмкин. Бу «яшел» проектларга инвестицияләр кертү отышлырак булган банкларга да кагыла.

«Безнең банклар да ESG стандартына кушыла. Ак Барс Банк Татарстанда социаль проектларга ярдәм итү аша тотрыклы үсеш принципларын алга этәрә. «Ак Барс Страхование – Россиядә ESG-рейтинг алган беренче иминият компаниясе», - диде ТР Президенты.

Ул хәбәр иткәнчә, Татарстан ESG кертә торган алдынгы дөнья брендлары белән хезмәттәшлек итә. Мәсәлән, Coca Cola компаниясе республикада экология өлкәсендәге проектларны тормышка ашыра.

Президент билгеләп үткәнчә, Татарстан Сбербанк белән иң тыгыз эш алып барырга җыена, ул – яңа трендларны гамәлгә кертү локомотивларының берсе, шул исәптән ESG өлкәсендә дә.

Сәүдә-сәнәгать палаталары бизнес, җәмгыять һәм хакимиятнең эшкуарлык эшчәнлегенә ярдәм итү, илнең тотрыклы социаль-икътисадый үсешен тәэмин итү буенча конструктив диалогында мөһим роль уйный. Бүген бу хакта Татарстан Республикасы Президенты Рөстәм Миңнеханов Сәүдә һәм сәнәгать палаталарының халыкара системасы эшчәнлегенә багышланган пленар дискуссиядә хәбәр итте.

Чара «Казан Экспо» мәйданчыгында «Россия – Ислам дөньясы: KazanSummit 2021» XII халыкара икътисадый саммиты кысаларында узды.

Рөстәм Миңнеханов билгеләп үткәнчә, бүген Татарстан Сәүдә-сәнәгать палатасы – республиканың эре һәм абруйлы бизнес-җәмәгатьчелеге, анда ике меңнән артык әгъза тора. Пандемия вакытында Палата үзен бизнеска ярдәм итүнең нәтиҗәле коралы буларак күрсәтте, хакимият органнарының әлеге институт белән хезмәттәшлегенең мөһимлеген тагын бер кат раслады.

ТР Президенты ассызыклаганча, Татарстан – Россиянең алдынгы һәм икътисадый яктан алга киткән төбәкләренең берсе. Республика актив тышкы икътисадый эшчәнлек алып бара. Узган ел Татарстанның сәүдә партнерлары арасында160ка якын ил бар иде.

«Сәүдә-сәнәгать палатасы республиканың тышкы икътисадый эшчәнлеге үсешендә мөһим урын алып тора. Ул безнең бизнесның дөньякүләм хуҗалык элемтәләре системасына интеграцияләнүенә ярдәм итә, товарлар экспортына булыша, эшлекле миссияләр оештыра. Мондый тыгыз эш алга таба да дәвам итәр, дип ышанам», - диде Рөстәм Миңнеханов.

ТР Президенты билгеләп үткәнчә, чит ил Сәүдә-сәнәгать палаталарының эш тәҗрибәсе Татарстан өчен кызыклы. «Без чит ил партнерлары белән иң киң хезмәттәшлеккә әзер. Бүгенге дискуссия нәтиҗәле һәм уңышлы булыр дип өметләнәм», - дип өстәде Рөстәм Миңнеханов.

Чарада Россия ССП вице-президенты Владимир Падалко, Татарстан Республикасы Сәүдә-сәнәгать палатасы идарәсе рәисе Шамил Агиев, Ислам сәүдә-сәнәгать һәм авыл хуҗалыгы палатасы (ICCIA) генераль секретаре Йосыф Хәсән Хәлави, Төркия сәүдә палаталары һәм сәүдә биржалары берлеге президенты Рифат Хисарҗыклыоглу һәм кайбер илләрнең ССП җитәкчеләре катнашты.

Дискуссиядә катнашучылар үзләренең Сәүдә-сәнәгать палаталарының эшчәнлеге, бизнес белән хезмәттәшлек итү тәҗрибәсе, коронавирус пандемиясе чорында эшкуарларга ярдәм итүнең яңа чараларын эшләү, шулай ук эшлекле элемтәләрне яңарту буенча агымдагы эш турында сөйләделәр.

Бүген Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов һәм «Россия экспорт үзәге» АҖ генераль директоры Вероника Никишина экспорт юнәлешенә ярдәм итү мәсьәләләре һәм экспорт потенциалын үстерү перспективалары турында фикер алышты.

Очрашу «Казан Экспо» күргәзмә үзәгендә барган «Россия – Ислам дөньясы: KazanSummit 2021» XII халыкара икътисадый саммиты кысаларында узды. 

Татарстан Республикасы «Халыкара кооперация һәм экспорт» илкүләм проектын актив тормышка ашыра.

1992 елда Яр Чаллы шәһәрендә, Татарстан Республикасында, «КАМАЗ» махсус техникасына заказларны оператив үтәү өчен, «Хезмәт җитештерүчәнлеге» илкүләм проектында актив катнашучы «РИАТ» ҖЧҖ (автомобиль техникасын эшләп чыгару һәм әзерләү) предприятиесе төзелә.

2001 елның 23 гыйнварында «РИАТ» ҖЧҖ, үзгәртеп кору нәтиҗәсендә, «РИАТ» ачык акционерлык җәмгыяте итеп үзгәртелә. Заманча менеджмент һәм дөрес төзелгән стратегия предприятиегә актив рәвештә үсәргә һәм үз эшчәнлегенең кырын даими киңәйтергә мөмкинлек биргән. Бүген «РИАТ» ААҖ катлаулы производство һәм оештыру мәсьәләләрен хәл итәргә сәләтле ышанычлы, яхшы көйләнгән механизм.

2019 елда Татарстан Республикасы Төбәк компетенцияләр үзәгенең адреслы ярдәмендә үрнәкләр агымы булдырылган. Хезмәт җитештерүчәнлеген алга таба арттыру максатында, «РИАТ» ААҖ өчен өстәмә акча кертү таләп ителә һәм «РИАТ» ААҖ Сәнәгатьне үстерү фондыннан 5 елга 1% белән ташламалы займ алуга гариза тапшыра. 2020 ел ахырында Сәнәгатьне үстерү фондының Эксперт советы «РИАТ» ААҖ инвестиция проектын хуплый һәм «Хезмәт җитештерүчәнлеге» программасы буенча 300 млн.сумлык займ бүлеп бирә, аңа компания җиһазлар сатып ала, сакчыл җитештерү принципларын һәм методларын исәпкә алынган эшчәнлек процессларын оештыра һәм яңа модернизацияләнгән корпуста елына 2 мең берәмлеккә кадәр төрле махсус автомобильләр, тагылма автотехника, махсус җайланмалар, автомобиль шассилары һәм тагылмалар җитештерәчәк. «РИАТ» ААҖ шәхси кертемнәре белән бергә проектның гомуми бюджеты 780 млн.сум тәшкил итәчәк. Займ акчасына әзерләү, механик эшкәртү, эретеп ябыштыру, җыю һәм буяу җиһазлары комплекслары сатып алына. 

«Үткәрелгән чаралар нәтиҗәсендә, 2024 елга предприятиедә хезмәт җитештерүчәнлеген 40% ким булмаган күләмдә арттыру планлаштырыла», – дип нәтиҗә ясады Татарстан Республикасы Төбәк компетенцияләр үзәгеннән проект җитәкчесе Марат Мәхмүтов.

Бүген Казан Кремлендә Татарстан Республикасы Президенты Рөстәм Миңнеханов Ислам сәүдә-сәнәгать һәм авыл хуҗалыгы палатасы (ICCIA) генераль секретаре Йосыф Хәсән Хәләви белән очрашты.

Татарстанга визиты кысаларында Йосыф Хәсән Хәләви «Россия – Ислам дөньясы: KazanSummit 2021» XII халыкара икътисадый саммиты чараларында катнаша.

Рөстәм Миңнеханов ассызыклаганча, Татарстанның икътисадый һәм мәдәни өлкәләрдә күп кенә ислам илләре белән үзара файдалы элемтәләре җайга салынган. Республика Ислам Хезмәттәшлеге Оешмасы, Ислам үсеш банкы белән уңышлы хезмәттәшлек итә. «Без ислам финанслары секторын һәм хәләл индустриясен үстерү буенча актив эш алып барабыз», - диде ул.

Татарстан Республикасы Президенты сүзләренчә, «Россия – Ислам дөньясы» стратегик караш төркеме мөселман дөньясы белән уртак эшнең нәтиҗәле механизмнарының берсе булып тора. Рөстәм Миңнеханов хәбәр иткәнчә, төркемнең төп бурычлары арасында – Россиянең Ислам дөньясы белән мәдәни-инсани нигездә якынаюына һәрьяклап ярдәм итү, икътисадый хезмәттәшлекне җайга салу, яшьләр һәм иҗтимагый оешмаларның үзара хезмәттәшлеген киңәйтү.

Рөстәм Миңнеханов билгеләп үткәнчә, республика Ислам сәүдә-сәнәгать һәм авыл хуҗалыгы палатасы белән хезмәттәшлек итәргә тели. Агросәнәгать комплексын үстерү буенча Татарстан Россиянең алдынгы төбәкләре арасына керә. Авыл хуҗалыгы продукциясен, шул исәптән хәләл стандартлар буенча җитештерелгән продукцияне экспорт белән тәэмин итү җайга салынган. ICCIA белән хезмәттәшлек Татарстан Сәүдә-сәнәгать палатасы линиясе буенча җайга салынырга мөмкин.

Ислам Сәүдә-сәнәгать һәм авыл хуҗалыгы палатасы ИХОның ярдәмче оешмасы булып тора һәм 57 ислам иленең шәхси секторын тәкъдим итә. Оешма эшчәнлеге сәүдә, коммерция, мәгълүмати технологияләр, иминият/иминиятләштерү, суднолар йөреше, банк эшчәнлеге, инвестицион мөмкинлекләрне үстерү һәм уртак предприятиеләр булдыру өлкәсендә хезмәттәшлекне киңәйтүгә юнәлдерелгән.

Бүген Татарстан Республикасы Президенты Рөстәм Миңнеханов Гагаузия (Молдова Республикасы) автономияле-территориаль берәмлеге башлыгы Ирина Влах белән очрашты. Казан Кремлендә узган очрашуда Татарстан Республикасы Премьер-министры урынбасары - Татарстан Республикасы сәнәгать һәм сәүдә министры Альберт Кәримов һәм Татарстан Республикасы Премьер-министры урынбасары Ләйлә Фазлыева катнашты.

Татарстанга визиты кысаларында Ирина Влах «Россия – Ислам дөньясы: KazanSummit 2021» XII халыкара икътисадый саммиты чараларында катнаша.

Рөстәм Миңнеханов билгеләп үткәнчә, соңгы елларда Татарстан белән Гагаузия арасында хезмәттәшлек актив үсә. 2019-2021 елларга Уртак чаралар планы имзаланды, сәүдә-сәнәгать палаталары линиясе буенча эш алып барыла.

«Татарстан вәкилләре инвестицион форумнарда катнашалар һәм Гагаузия территориясендә мәдәни чараларда катнашалар. Сезнең төбәк делегацияләре безнең тәҗрибәне өйрәнәләр, эшлекле элемтәләрне җайга салалар», - диде ТР Президенты.

Татарстан Гагаузиягә машина төзелеше предприятиеләре продукциясен, химия һәм нефть химиясе товарларын китерергә әзер. Хезмәттәшлекне үстерү өчен перспектив юнәлешләр арасында Татарстан Республикасы Президенты шулай ук агросәнәгать комплексы, медицина һәм фармацевтика, мәгариф, мәдәният һәм туризм өлкәсен билгеләде.

Рөстәм Миңнеханов Гагаузия делегациясенә Татарстанга игътибары һәм KazanSummit - 2021дә катнашуы өчен рәхмәт белдерде. «Без хезмәттәшлекнең киләчәк үсешенә әзер», - дип өстәде ул.

Бүген Татарстан Республикасы Президенты Рөстәм Миңнеханов Кыргызстан Республикасы делегациясе белән очрашты. Очрашу «Казан Экспо» күргәзмә үзәгендә «Россия – Ислам дөньясы: KazanSummit 2021» XII халыкара икътисадый саммиты кысаларында узды.

ТР Президенты билгеләп үткәнчә, соңгы вакытта Татарстан белән Кыргызстан арасындагы элемтәләр сизелерлек киңәя. Агымдагы елның февралендә Мәскәүдә Рөстәм Миңнехановның Кыргызстан Республикасы Президенты Садыйр Җаппаров, ә апрель аенда Премьер-министр Улукбәк Марипов белән очрашты. Узган ел Россия һәм Кыргызстан арасындагы аралашу елы булды, бу икътисадый һәм гуманитар элемтәләрне ныгытуга ярдәм итте.

Узган ел Татарстан белән Кыргызстан арасында товар әйләнеше 41 млн. доллардан артып киткән, сәүдә-икътисадый өлкәдә хезмәттәшлекне киңәйтергә кирәк, дип билгеләп үтте Рөстәм Миңнеханов. Уртак эш өчен өстенлекле юнәлешләр арасында – нефть эшкәртү һәм нефть химиясе, машина төзелеше, ИТ, медицина һәм фармацевтика, фән, мәгариф.

Рөстәм Миңнеханов кыскача Татарстан, төбәк икътисадының төп тармаклары турында сөйләде. «Без авыл хуҗалыгын, кече һәм урта бизнесны, инновацион инфраструктураны үстерүгә зур игътибар бирәбез. Татарстан – инвестицион климат буенча Россия лидерларының берсе», - диде Президент.

Ул билгеләп үткәнчә, Татарстан Кыргызстан коллегалары белән төрле өлкәләрдә тәҗрибә уртаклашырга әзер.

Очрашу барышында яклар цифрлаштыру, мәгариф һәм туризм инфраструктурасын үстерү өлкәсендә хезмәттәшлек перспективалары турында фикер алыштылар.

Татарстан Президенты Рөстәм Миңнеханов Ислам хезмәттәшлеге оешмасы әгъзалары булган илләрнең Гадәттән тыш һәм Тулы вәкаләтле илчеләре белән очрашты. Очрашу «Казан Экспо» күргәзмә үзәгендә «Россия – Ислам дөньясы: KazanSummit 2021» XII халыкара икътисадый саммиты кысаларында узды.

Рөстәм Миңнеханов илчеләргә Kazansummitта катнашулары өчен рәхмәт белдерде. «Әлеге чара елдан-ел абруй казана, анда катнашучыларның географиясе киңәя. Без сезгә Форумда ярдәм иткәнегез өчен рәхмәтлебез», - дип мөрәҗәгать итте ул очрашуда катнашучыларга.

ТР Президенты билгеләп үткәнчә, күп милләтле һәм күп конфессияле Россия өчен Ислам дөньясы белән хезмәттәшлек тышкы сәясәтнең мөһим векторларының берсе булып тора. «Бүген Татарстан – Россиянең чит илләрдәге Ислам дөньясы белән хезмәттәшлеге буенча нәтиҗәле мәйданчыкларның берсе. Безнең республика – илнең сәнәгате алдынгы үсеш алган һәм инновацион төбәкләрнең берсе. Без мөселман компанияләре һәм инвесторлары белән хезмәттәшлек авангардында торабыз», - диде ТР Президенты.

Ул билгеләп үткәнчә, «Россия – Ислам дөньясы» стратегик караш төркеме мөселман дөньясы белән бергәләшеп эшләүнең нәтиҗәле механизмнарының берсе булып тора. 2014 елдан башлап Оешманы Рөстәм Миңнеханов җитәкли. Төркемнең төп бурычлары арасында – Россиянең Ислам дөньясы белән алга таба якынаюына һәрьяклап ярдәм итү, икътисадый хезмәттәшлекне җайга салу, яшьләр һәм иҗтимагый оешмаларның үзара хезмәттәшлеген киңәйтү. Шулай ук Россия мөселман халыкларының традицион кыйммәтләрен алга этәрү буенча да эш алып барыла.

Рөстәм Миңнеханов билгеләп үткәнчә, Татарстан киләчәктә ИХО илләре белән хезмәттәшлекне ныгытырга тели. «Без йөк автомобильләре, вертолетлар, йөк пассажир суднолары, нефть химиясе продукциясе, нефть-газ чыгару җиһазлары, компрессорлар, азык-төлек һәм авыл хуҗалыгы товарларын китереп торулар белән кызыксынабыз. Сезнең компанияләрне республикабызның инвестицион проектларында катнашырга чакырабыз», - дип билгеләп үтте Рөстәм Миңнеханов.

«Без хезмәттәшлек өчен ачык һәм сезнең ил компанияләре белән уртак үзара файдалы проектлар буенча эшләргә шат булачакбыз», - дип өстәде ТР Президенты.

Татарстан Россия-Әмирлекләр мөнәсәбәтләре кысаларында БГӘ партнерлары белән хезмәттәшлекнең югары бәяли. Бүген бу хакта Татарстан Республикасы Президенты Рөстәм Миңнеханов Берләшкән Гарәп Әмирлекләренең Тышкы сәүдә мәсьәләләре буенча дәүләт министры Тани бән Әхмәд Әл Зәйүди белән очрашуда хәбәр итте. Очрашуда шулай ук БГӘ Илчесе Мөхәммәд Әл Җәбәр дә катнашты.

Очрашу «Казан Экспо» мәйданчыгында «Россия – Ислам дөньясы: KazanSummit 2021» XII халыкара икътисадый саммиты кысаларында узды.

Рөстәм Миңнеханов билгеләп үткәнчә, Россия белән БГӘ арасында икътисадый һәм мәдәни-гуманитар өлкәләрдә элемтәләр киңәя. Көн тәртибендәге актуаль мәсьәләләр буенча координацияләү дәвам итә. Сәүдә һәм инвестицион багланышлар үсә бара.

Татарстан үз дәрәҗәсендә Россия-Әмирлек мөнәсәбәтләрен ныгытуга актив ярдәм итә, дип ассызыклады ТР Президенты. БГӘ – икътисадый элемтәләрне үстерү өчен иң кызыклы партнерларның берсе. «Сезнең илнең эшлекле даирәләре Россия һәм ИХО илләренең «KazanSummit» икътисадый саммитында даими катнашучылар булып торалар. Без, үз чиратыбызда, БГӘ территориясендә оештырылучы төрле форумнарда һәм күргәзмәләрдә катнашабыз», - диде Рөстәм Миңнеханов.

Татарстан белән БГӘ арасында товар әйләнеше узган ел $18 млн. тәшкил итте, дип билгеләп үтте Президент, Берләшкән Гарәп Әмирлекләре белән берничә Татарстан предприятиесе хезмәттәшлек итә. Аерым алганда, республика компанияләре IDEX халыкара оборона күргәзмәсендә берничә тапкыр катнаштылар.

Агымдагы елның май ахырында Алабугада «Аурус» автомобильләрен серияле җитештерүне эшләтеп җибәрү тантанасы булды. Проект «Тавазун» Әмирлекләр холдингы белән берлектә гамәлгә ашырылды.

Рөстәм Миңнеханов билгеләп үткәнчә, киләсе елда Россиядә Идел Болгары дәүләтендә Ислам динен кабул итүгә 1100 ел булачак. Бу – Россия тарихында мөһим вакыйга, ул халыкара мәдәни һәм сәүдә-икътисадый элемтәләрне үстерүгә ярдәм итте, дип ассызыклады ТР Президенты. Ул БГӘ вәкилләрен Татарстанга бәйрәм тантаналарында катнашырга чакырды.

Очрашу кысаларында яклар киләчәк хезмәттәшлек өчен аеруча перспектив юнәлешләр, шул исәптән машина төзелеше, агросәнәгать комплексы, туризм, үзара товар китерүләр күләмнәрен киңәйтү турында фикер алыштылар.

Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов бүген Бәһрәйн Сәүдә-сәнәгать палатасы рәисе Е.П. Самир Габдулла Әхмәд Насс белән очрашты. 

Очрашу «Россия – Ислам дөньясы: KazanSummit 2021» XII халыкара икътисадый саммиты кысаларында узды.

Очрашу барышында яклар конструктив мөнәсәбәтләрне үстерү перспективаларын һәм республика белән корольлек арасындагы хәзерге торышны уңай бәяләде, шулай ук сәүдә-икътисад өлкәсендәге багланышларны үстерүдә алга таба да хезмәттәшлек итәргә әзер булулары турында белдерелде.