ЯҢАЛЫКЛАР

Бүген ТР Премьер-министры урынбасары - Татарстан Республикасы сәнәгать һәм сәүдә министры Алберт Кәримов Ютазы район советының XI утырышында катнашты. Чарада депутатлардан тыш, район советы рәисе - район башлыгы Рөстәм Нуриев, ТР сәламәтлек саклау министры урынбасары Владислав Виниченко, «ТР Гарантия фонды» коммерциячел булмаган оешма директоры Сергей Болотаев һәм башкалар катнашты.

2017 елның 3 мартында ТР сәнәгать һәм сәүдә министрлыгында Россия һәм чит илләрдә Татарстан Республикасы Вәкиллекләре белән видеоконференция режимында киңәшмә узды.

Киңәшмә эшендә министрлык һәм ведомство, шулай ук, иҗтимагый оешма вәкилләре дә катнашты.

Утырыш барышында узган атнаның эш нәтиҗәләре каралды һәм алдагы атнага бурычлар билгеләнде. Моннан тыш, катнашучылар Татарстан Республикасы дәүләт заказы, инвестиция эшчәнлеге һәм төбәкара элемтәләр Агентлыгы вәкиленең чыгышын тыңладылар. Чыгышның темасы Россия Федерациясе субъектларыннан эшлекле партнерларның электрон сәүдә мәйданчыгы (zakazrf.ru) белән хезмәттәшлегенә багышланды.

Чара ахырында Татарстан Республикасы Вәкиллекләре эшчәнлегенең агымдагы сораулары каралды һәм фикер алышу узды.

3 мартта ТР Премьер-министры урынбасары - Татарстан Республикасы  сәнәгать һәм сәүдә министры Альберт Кәримов Түбән Кама химия-технология институты хезмәткәрләре белән очрашты.

Институтка килү белән министр директор Виталий Елизаров белән берлектә химия кафедрасында заманча Mitsubishi Electric лабораториясен карады һәм югары уку йортының техник җиһазлану хәле белән танышты. Министр заманча җиһазлануның ни дәрәҗәдә актуальлеген һәм студентлар өчен никадәр гамәли файдалы булуы белән кызыксынды. Виталий Елизаров лабораторияләрдә дөньядагы иң алдынгы җиһазларның  урнаштырылган булуына басым ясады һәм Түбән Кама шәһәре предприятиеләрендә  аналог җайланмалар булу сәбәпле эшләүнең җайлы булуын әйтеп үтте. Мондый лабораторияләрдә институт студентлары күнекмәләрен шомартуларын билгеләп үтте.

Институт коллективы каршындагы чыгышында Альберт Кәримов Түбән Кама химия технология институтының Татарстан Республикасы предприятиеләре өчен кадрлар коючы булуын ассызыклады. Моннан тыш, Татарстан Республикасы сәнәгате өчен кадрлар темасының мөһим булуын хәбәр итте.  Бүгенге көндә ресурс үзәкләр оештырыла һәм актив рәвештә алар эшләп килә. Бүген аларның саны 20гә җитә. 2020 елга кадәр тагын 13 үзәк оештыру күздә тотыла.  Бу предприятиеләрнең кадрлар санын үстерүнең нәтиҗәле коралы. Республикада предприятие заказлары өчен махсус кадрлар әзерләүгә юнәтелгән кафедралар булдырыла. 

 Очрашу азагында министр сәнәгать һәм сәүдә предприятиеләре өчен кадрлар әзерләүдә нәтиҗәле хезмәтләре өчен Виктор Елизаровка һәм Дилшат Латыповка Рәхмәт хатларын тапшырды.

Бүген ТР Түбән Кама муниципаль районының 28нче гомуми урта белем бирү мәктәбендә экология дәресе узды.  "Экология, сәнәгать, шәһәр" дип иссемләнгән дәрес Россиядә уза торган экология Елына багышланды.

Тугызынчы класс укучылары өчен дәресне Балалар экология һәм биология үзәге педагоглары һәм "Экоград" фәнни җәмгыять укучылары үткәрде.

Экспертлар ролендә ТР Премьер-министры урынбасары – Татарстан Республикасы сәнәгать һәм сәүдә министры Альберт Кәримов һәм ТР Түбән Кама муниципаль районы Башлыгы, шәһәр Мэры Айдар Метшин чыгыш ясадылар.

Мәктәп укучыларына үз яшьтәшләре алып барган дәресләр хәтта күбрәк ошый. Бүген дә баш спикерлар булып Тимур Порываев һәм Алина Гәрәева чыгыш ясадылар. Беренче доклад "ТАНЕКО" АҖ табигатьне саклау технологияләре темасына багышланды. Алина исә "Аккош" күле территориясе табигате турында сөйләде.

28нче мәктәп укучылары өчен бүген предприятиеләрнең табигатьне саклау эшчәнлеге турында республиканың рәсми затларыннан ишетергә мөмкинлек туды һәм алар бу форсатны ычкындырмадылар. Укучылар җитәкчеләргә сораулар яудырдылар. Альберт Кәримов нинди һөнәрне сайларга дигән сорауга, финансистларның җитәрлек булуын һәм сәнәгать белән тормышын бәйләргә теләүчеләргә инженер белгечлеген сайларга тәкъдим итте, чөнки җитештерүдә мондый белгечләр җитешми, ә эшләү шартлары заманча җиһазландырыла. Шулай ук, ул укучыларны актив рәвештә Worldskills чемпионатында катнашырга чакырды.

Очрашу  җылы һәм позитив узды.

Иң яхшы уйлап табу, рационализаторлык һәм патент-лицензия эшләре нәтиҗәләре буенча "Татнефть" компаниясе "2016 елның уйлап табу һәм рационализаторлык эшләре буенча иң яхшы предприятиесе" дип табылды һәм Зур Кубокка лаек булды. Сынауларны Татарстан Республикасы уйлап табучылар һәм рационализаторлар җәмгыяте оештырды.

ТР уйлап табучылары һәм рационализаторлары җәмгыяте Рессоветының Мактаулы исеме һәм Зур кубогы "Татнефть" компаниясенә инновация эшчәнлегендә югары күрсәткечләре өчен бирелде. 

Кичә Казан Кремлендә Татарстан Республикасы Президенты Рөстәм Миңнеханов Венгрия милли үсеш министры Миклош Шестак белән очрашты.

Чарада ТР Премьер-министры Илдар Халиков, ТР Премьер-министры урынбасары - Татарстан Республикасы сәнәгать һәм сәүдә министры Алберт Кәримов, ТР транспорт һәм юл хуҗалыгы министры Ленар Сафин һәм башкалар катнашты.

Үзенең сәламләү сүзендә Татарстан Республикасы Президенты Россия һәм Венгрия җитәкчелегенә төбәкара хезмәттәшлекне үстерү мәсьәләләренә игътибарлары өчен рәхмәтен белдерде. Рөстәм Миңнеханов сүзләренә караганда, Татарстан күп еллар дәвамында Венгрия партнерлары белән хезмәттәшлек итә. Моның тарихи алшартлары да бар. Венгрия һәм татар халыклары арасында тыгыз туганлык элемтәләре безнең эраның беренче меңьеллыгы уртасында һәм Бөек Болгар заманында башланган. Моннан тыш, белгечләр фикеренчә, 6-7 гасырларда ук булган Тәтеш шәһәрлеге, нәкъ менә венгр борынгылары тарафыннан нигезләнгән дигән фараз бар. 

2017 елның 2 мартында «Мавыктыргыч фән һәм техника Йорты» Boeing компаниясе һәм «Яшьләрнең Казанышлары» (Junior Achievement Russia) Төбәкара иҗтимагый оешмасы белән берлектә авиация тематикасына лекцияләр оештырды.

Семинарны яшь проектлаучылар – модельләштерү һәм инженерия белән кызыксынучы укучылар тыңлады. Boeing белгечләрен тыңлау өчен яшьләр проект сайтында «А дан Я га кадәр Авиация» тестын уздылар.

«А дан Я га кадәр Авиация» тесты – Boeing компаниясе һәм «Яшьләрнең Казанышлары» (Junior Achievement Russia) Төбәкара иҗтимагый оешмасының Россия мәктәп укучылары һәм студентлар өчен уртак белем бирү программасы. Программаның максаты – авиация өлкәсендә үсеп килүче яшь буынның белем дәрәҗәсен күтәрү һәм  яшь һәм талантлы белгечләрнең  игътибарын  аэрокосмик тармакка җәлеп итү.

Чара кысаларында Boeing-Россия/СНГ компаниясеннән яңа самолетлар проектлау бүлекчәсенең директор урынбасары Александр Гвимрадзе, «Интерьерлар» инженер бүлекчәсенең баш инженер урынбасары Алексей Шуваев, оешманың операцион эшчәнлегенә ярдәм итү буенча белгеч Алексей Иванов, хөкүмәт структуралары һәм стратегик партнерлар белән хезмәттәшлек итү эше буенча менеджер Татьяна Лебедева чыгыш ясадылар.

Программа башында сәламләү сүзе белән Татарстан Республикасы сәнәгать һәм сәүдә министры урынбасары Алмаз Хөсәенов чыгыш ясады. Алга таба Boeing компаниясе белгечләре мәктәп укучыларын һәм студентларны гражданлык авиациясе үсеше тарихы, самолетлар очышы һәм аларның  төп очыш принциплары  белән таныштырдылар

Исегезгә төшерик, «А дан Я га кадәр Авиация» программасы рәсми рәвештә 2015 елның апрелендә эшли башлады. Программасы берничә этапны үз эченә ала: интерактив тест, Boeing компаниясе белгечләреннән авиация тематикасына дәресләр һәм башкалар. Программага, шулай ук, экскурсия һәм интерактив-практик дәресләр дә кергән: Жуковский шәһәрендә Халыкара Аэрокосмик Салонны карау, чын авиа-тренажерда очу, авиация музейларына экскурсия һәм махсус лекцияләр. Программа эшли башлаганнан бирле анда 2000нән артык Россия мәктәп укучылары һәм студентлары катнашты.

Бүген Татарстан Республикасы Хөкүмәте Йортында ТР Президенты Рөстәм Миңнеханов Red Bull Air Race генераль директоры Эрих Вольф белән очрашты.

Чарада ТР Премьер-министры урынбасары - Татарстан Республикасы сәнәгать һәм сәүдә министры Альберт Кәримов, ТР яшьләр эшләре һәм спорт министры Владимир Леонов, “Спорт һәм социаль проектлар Дирекциясе" Коммерцияле булмаган автоном оешмасы генераль директоры Азат Кадыров һәм башкалар катнашты.

2017 елның июлендә Red Bull Air Race ярышлары тарихта беренче тапкыр Казанда узачак. Очрашу кысаларында яклар ярышларны оештыру һәм уздыру мәсьәләләре хакында фикерләштеләр.

Сөйләшүләр барышында Рөстәм Миңнеханов ярышларга әзерлек һәм аларны Казанда уздыру югары дәрәҗәдә булачагына ышаныч белдерде. Халыкара дәрәҗәдәге масштаблы чаралар үткәрүдә зур тәҗрибәбез бар, һава шартлары аяк чалмаса, тамашачылар бу ярышларны лаеклы бәяләрләр дип ышанам, - диде ул.

Үз чиратында, Red Bull Air Race генераль директоры Эрик Вульф, оештыручылар Казанның матур күренешле яңа җирендә ярышлар уздыру мөмкинлекләренә бик шат булуын, билгеләп үтте. "Россиядә узачак этапны аеруча кызыксынып көтәбез, яңа тамашачыларга бик зур тизлек белән түбән югарылыкта ярышларны бик теләп күрсәтәчәкбез", - дип өстәде ул.

Red Bull Air Race катнашучылар командалары һәм аны оештыручылар Казанга ярышлар трассасын һәм техниканы әзерләү өчен 6-7 июльдә килә башлаячаклар.

Чемпионатның ярыш трассасы Кремль яр буенда Казансу елгасы акваториясендә урнашачак, ә очып китү-очып төшү полосасы "KazanRing" автодромы территориясендә булачак.

Моннан тыш, яклар, шулай ук, ярышлар үткәрү вакытында тамашачыларның куркынычсызлыгын тәэмин итү, телеканаллардан ярышларның ТВ-трансляциясен оештыру мәсьәләләрен, башка оештыру мәсьәләләрен карадылар.

Очрашу азагында Казанда 2017 елда Red Bull Air Race һава юлында узышу дөнья чемпионаты этабын оештыру һәм үткәрү турында  килешү имзаланды.  2017, шулай ук,  2018 -2019 елларга да килешү төзелде.

«Татспиртпром» 2017 елның март аенда АКШ беренче 25,4 мең. шешә аракы җибәрүне планлаштыра.

"АКШна Russian Value Platinum (күләме 0,75 -1,0-1,75 л) маркалы аракы партиясе җибәрү планлаштырыла. Беренче партиядә 25,4 мең шешә (барлыгы 23,4 мең литр) җибәрү карала. Алкоголь продукциясен җибәрү 2017 елның март аенда башланыр дип көтелә. АКШ территориясендә безнең продукция бу елның апрель - май айларында сатыла башлар дип уйлыйбыз", - дип сөйләделәр берләшмәнең  матбугат хезмәтендә.

Барлыгы «Татспиртпром» 2017 елда АКШна алда сүзгә алынган аракы маркасын 50 мең шешә (45 мең литр) җибәрергә уйлый. Компания продукциясен җибәрү  эре импортер Savas Spirits International (Лас-Вегас) аша алып барыла.

2016 елда  «Татспиртпром»  Татарстаннан читкә сатуларны 154%ка арттырган. Шулай итеп, компаниянең чит илгә продукция сатулары беренче тапкыр ил эчендә сатуларга караганда артып киткән. «Татспиртпром» мәгълүматларына караганда, беренче яртыеллыкта Россия төбәкләренә продукция сату - 2,5 тапкыр, ә чит илгә — өч тапкыр арткан.

Россия экспорт үзәге Россия Федерациясе сәнәгать һәм сәүдә министрлыгы белән берлектә тармакның экспорт эшчәнлеген стимуллаштыру программасын формалаштырдылар.