ЯҢАЛЫКЛАР

Бүген Казанның С.Сәйдәшев исемендәге ЗКЗ бинасында ТР Президенты Рөстәм Миңнехановның Татарстан Республикасы Дәүләт Советына еллык юлламасы гамәлгә ашырылды. Утырышта ТР Дәүләт киңәшчесе Минтимер Шәймиев, ТР Премьер-министры Алексей Песошин, ТР сәнәгать һәм сәүдә министры Альберт Кәримов, чит илләрдә һәм Россия төбәкләрендә Татарстан Республикасының даими вәкилләре, ТР министрлыклары һәм ведомстволары җитәкчеләре, муниципаль берәмлекләрнең башлыклары, сәнәгать предприятиеләре, югары уку йортлары җитәкчеләре, иҗади интеллигенция, иҗтимагый оешмаларның вәкилләре – барлыгы 600 тирәсе кеше катнашты.

Үзенең юлламасында ТР Президенты киләсе елда Татарстанда профессиональ осталык буенча  WorldSkills Kazan 2019 дөнья чемпионатының узачагы турында искәртте. Турнир август аенда узачак, республика башкаласына 70 артык илдән вәкилләр киләчәк, алар 50 әйдәп баручы компетенция буенча көч сынашачак.

"Ләкин чемпионатның үзе генә түгел, ә без алачак дөньякүләм эш тәҗрибәсе, технологияләр һәм күнекмәләр дә, киләчәктә соралачак һөнәрләр өчен җәмгыятьнең һәм бизнесның игътибарын җәлеп итү, аларның популярлык дәрәҗәсен үстерү, югары профессиональ стандартлар раслау өчен шартлар тудыру мөмкинлеге дә кыйммәтле булып тора", – дип билгеләде Президент.

Киләсе 2019 ел Татарстан Республикасы оешуның 100 еллыгына әзерлектә төп этапка әверелергә тиеш. Татарстан үзенең үткәненә һәрчак игътибарлы булды. 1920 елда Татар Автоном Совет Социалистик Республикасын төзү иң әһәмиятле тарихи вакыйга булды.

Татарстан Республикасы социаль-икътисадый үсеш дәрәҗәсе буенча Россия төбәкләре арасында лидерларның берсе булып тора. Болар белән берлектә икътисадның хәзерге үсеш темпларыннан без канәгать түгел. Булган барлык резервларны эшкә җигәргә, шул исәптән зур инвестиция проектларын җәлеп итәргә һәм гамәлгә ашырырга, җитештерүнең нәтиҗәлелеген һәм эшлекле активлык дәрәҗәсен арттырырга, товар базарларына катнашу өлешен җәелдерергә кирәк. Биредә безнең, шул исәптән барлык процессларны тирәнтен цифрлаштыруга нигезләнгән, яңа технологик көйләнешкә күчү өчен әзер булуыбыз әһәмиятле фактор булып тора. Цифрлаштыру гамәлдәге нәтиҗәләргә кыйбла тотарга тиеш, әйтик предприятиеләрнең җитештерү һәм оештыру процессларын үтәли цифрлаштыруга...

Республика икътисадын үстерүдә төп үсеш ноктасы, ышанычлы нигез булып нефть-газ-химия комплексы тора. Быел Татарстанда нефть табыла башлауга 75 ел тулды. Шушы елларда җир астыннан 3 300 млн тонна кара алтын табылды. Бу хәл республиканың һәм илнең икътисадын үстерүдә әһәмиятле роль уйнады. Бүген Татарстан элеккегечә илдә нефть табуда һәм нефть запаслары буенча перспективада төп үзәкләрнең берсе булып тора.

Быелның гыйнварында Россия Федерациясе Президенты Владимир Владимирович Путин катнашында "ТАНЕКО"да югары октанлы, экологик чиста автобензин компонентларын чыгару буенча ике яңа эш тармагы эшли башлады. Ә июль аенда 1 600 мең тонна дизель ягулыгы һәм 500 мең тоннадан артык авиакеросин куәтенә исәпләнгән ике яңа производство сафка басты. Әлеге проектларның гомуми суммасы 23 млрд сум тәшкил итте.

"Нижнекамскнефтехим"да изопренлы каучук чыгаруны модернизацияләү һәм куәтләрне арттыру буенча күләмле программа төгәлләнеп килә. Асылда, 18.5 млрд сумлык ике этап төгәлләнде, формальдегид, изобутилен чыгару буенча ике производство эшли башлады. Бу ел азагына кадәр өченче этапны тормышка ашыру нәтиҗәсендә изопренлы каучукны 330 мең тоннага кадәр чыгару мөмкинлеге барлыкка киләчәк.

Россия Федерациясендә нефть сәнәгатендә технологик лидерларның берсе буларак "Татнефть" компаниясенең позициясен ныгыту актуаль мәсьәлә булып кала. Моны, беренче чиратта, нык ябышкак нефтьләр табуны арттыру һәм гамәлдәге чыганакларның нефть бирү дәрәҗәсен күбәйтү, нефть алу коэффициентын иң яхшы дөнья тәҗрибәләренә җиткерү хисабына эшләргә мөмкин.

Республиканың нефть-газ-химия комплексында стратегик бурычлар: "ТАНЕКО" комплексында яңа ЭЛОУ-АВТ-6 җайланмасын эшләтеп җибәрү һәм нефть эшкәртү куәтен 14 млн тоннага кадәр җиткерү, "Евро-5" классына караган автомобиль бензиннарын җитештерә башлау, шулай ук "Нижнекамскнефтехим"да 600 мең тоннага кадәр куәт белән этилен җитештерүгә бәйле яңа эш тармагын һәм аңа бәйле производстволарны төзү проектларын тормышка ашыру.

Моннан тыш, уку елы азагына кадәр "ТАИФ-НК" авыр нефть калдыкларын эшкәртү комплексында эшләтеп-көйләп җибәрү эшләрен төгәлләргә һәм аны гамәлгә кертергә кирәк. Проектның бәясе 1 700 млн АКШ доллары тәшкил итә.

"Казаньоргсинтез"ның этилен заводында яңа пиролиз мичләрен эксплуатациягә кертү бурычы тора.

Соңгы 5 ел дәвамында республиканың нефть-газ-химия комплексы предприятиеләрендә алгарышлы, югары технологияле инновация проектларын үстерүгә инвестиция кертү дәрәҗәсенең тотрыклы үсеше саклана. Бу уңай динамиканы саклау мөһим.

Тулаем алганда, Татарстанның нефть-газ-химия комплексын үстерүдә яңа Программа эшләү һәм аны кабул итү актуаль мәсьәлә булып тора. Максатларны һәм бурычларны киләсе 5 елга билгеләүдән тагын да дәвамлырак перспективага күчәргә кирәк. Үсештә сыйфатлы алга китешне формалаштыру буенча тармак идеологиясе кирәк. Нефтьне нефть химиясе өчен аеруча кыйммәтле чимал буларак файдалану проектлары өстенлекле булырга тиеш.

Үзебезнең илдә һәм чит ил базарларында гади генә булмаган вәзгыятькә карамастан, машина төзү комплексы тотрыклы үсештә.

КАМАЗ – Россия Федерациясенең йөк машиналары базарында №1 компания һәм дөньядагы җитештерүчеләрнең топ-20 исемлегенә керә.

Автогигант 100 млрд сумнан артык күләмдәге инвестицияләр белән автомобильләрнең модельләр рәтен үстерүгә бәйле зур проектны тормышка ашыра. Аның кысаларында республика өчен беренче махсус инвестиция контракты төзелде.

Киләсе елның икенче кварталында заводта яңа кабиналар һәм К5 гаиләсенә караган йөк машиналары серияләп җитештерелә башлаячак.

А.М.Горький исемендәге Яшел Үзән заводы бүген илдәге һәр өченче хәрби корабны җитештерә. Граждани суднолар төзелешен җәелдерү, шул исәптән Татарстанның туристлык потенциалын үстерү мәнфәгатьләрендә, яңа бурыч булып тора.

Быелгы ел Казан авиация заводы тормышында берничә әһәмиятле вакыйга белән истә калачак, алар дәвамлы киләчәктә предприятиенең тотрыклы үсешен тәэмин итәргә тиеш булачак: Россия Федерациясе Президенты каршында яңа стратегик ракета йөртүче  Ту-160 очкычы һавада демонстрацияле очыш ясады һәм Россия Федерациясе Оборона министрлыгы ихтыяҗлары өчен 10 самолет китертүгә контракт төзелде, шулай ук беренче модернизацияләнгән ракета йөртүче-бомбага тотучы Ту-22М3М очкычын эшләтеп карау тантанасы узды.

Казан вертолет заводында тирәнтен модернизация уздырыла. Санитар авиация өчен 104 "Ансат" вертолеты китертүгә зур контракт төзелде. Предприятиене алга таба үстерү өчен яңа стратегик һәм конструктор карарларын кабул итәргә кирәк.

Кече авиация үсеш ала. "МВЕН" компаниясе безнең стратегик партнер булган "Ростех" дәүләт корпорациясе белән хезмәттәшлектә авиахимэшләр башкару өчен һава судносына сертификат алды. Бу хәзерге Россия тарихында авыл хуҗалыгы билгеләнешендәге беренче сертификатлы очкыч.

Шушы көннәрдә ПОЗиСта яңартылган җитештерү комплексы ачылды. Биредә кертелгән цифрлы технологияләр хезмәт җитештерүчәнлеген 20%ка арттыру мөмкинлеген бирәчәк.

"Бетар" компаниясе, исәпкә алу җиһазларын җитештерүдән тыш, республикада соралучы станоклар төзелешен уңышлы гына үзләштереп килә: шәхси җитештерелгән робот-манипуляторлар инде сынау аша узган һәм предприятие эшенә кертелгән.

"Вакууммаш" заводы актив үсеш ала, бүген ул үз продукциясенең 40%тан артык өлешен экспортка озата.

Республиканың динамикалы рәвештә үсеш алуы энергия белән тәэмин итүнең дә тиешле дәрәҗәдә булуын тәэмин итә.

"Татэнерго"да гомуми куәте 450 мегаватт булган пар-газ җайланмаларын төзү буенча ДПМ программасы кысаларында ике зур проект тормышка ашырылды.

Бүгенге көндә компаниянең әһәмиятле бурычы – колоссаль икътисадый һәм социаль әһәмияткә ия булган Зәй ГРЭСын модернизацияләү буенча тагын бер зур проектны тормышка ашыру. Хөкүмәткә объектны җылылык станцияләрен модернизацияләүнең яңа федераль программасына кертү мәсьәләсен эшкәртергә кирәк.

"ТАИФ" компаниясе Түбән Кама ҖЭҮ-2 һәм Казан ҖЭҮ-3 предприятиеләрендә 738 мегаваттка исәпләнгән яңа куәтләрне гамәлгә кертте, 2021 елга "Нижнекамскнефтехим"да өстәмә 495 мегаватт кертергә планлаштыра.

Тулаем алганда, республиканың энергия системасында автоматлаштыруның, диагностикалауның һәм энергетика челтәрләренең торышына идарә итүнең заманча чараларыннан файдаланып, алдынгы технологияләр актив кертелә.

Республикадагы цифрлы энергетиканың генерацияләүне, тапшыруны һәм сатуны үз эченә алган бердәм структурасын формалаштыру бурычы тора.

Азактан Президнт болай дип ассызыклады: "Мин ышанам, киләчәктә без хәзер уйландыра башлаган иң кыю алгарышлы планнарны тормышка ашырырбыз. Иң мөһиме – үз-үзеңә ышанырга, үзгәрешләрдән курыкмаска һәм максатка таба хәрәкәт итәргә! Уңышка ирешү өчен, без стандарт булмаганча фикерләргә, белемнәребезне камилләштерергә, хәл иткеч итеп эш йөртергә тиеш. Ирешелгәннәрдә беркайчан да тукталып калмагыз! Һәрвакыт алга барыгыз!"

Тулырак: http://president.tatar.ru/rus/index.htm/news/1288497.htm

Түгәрәк дата инновацияле технопарк ачылышы белән данлыклы булды, ә студентларны һәм укытучыларны КДЭУ ректоры белән бергә ТР Премьер-министры Алексей Песошин тәбрикләде. Премьер-министр иң югары дәрәҗәдәге барлык бурычларны хәл иткәндә яңа уңышлар теләде һәм 50 еллык эш чорының таң калырлык дата булуы хакында билгеләде. Бу еллар артында йөзләрчә укытучының фидакарь тырышлыгы, дистәләрчә мең чыгарылышның уңышлы тәҗрибә эшчәнлеге ята.

Ярты гасырлык тарихында университет 50 меңнән артык белгеч әзерләп чыгарган. Аларның күбесе хәзерге вакытта илнең энергетика базары объектларында эшли. Ректор сүзләренә караганда, КДЭУ тәмамлап чыгучылар арасында – атаклы галимнәр, гамәлчеләр, Татарстан һәм Россиянең әйдәп баручы предприятиеләре җитәкчеләре, аларның барысы да ил икътисадын үстерүгә зур өлеш кертә.  Алар рәтендә энергетика, төзелеш, ТКХ өлкәсендәге инженерлар, предприятиеләрнең җитәкчеләре: "Миңа кирәкле әйберләрнең барысын да биргән өчен, мин КДЭУ бик рәхмәтлемен. Хәзер мин ТКХ өлкәсендә эшлим һәм югары белем бирү йорты бу өлкәдә ярдәм итә: белгечләр белән дә, яңа проектлар белән дә. Бу шәһәр өчен дә, республика өчен дә бик әһәмиятле", – дип ассызыклады Казан ш. Башкарма комитетының ТКХ комитеты рәисе Искәндәр Гыйниятуллин.

КДЭУ технопаркы – классик типта булмаган яңа фәнни-технологик комплекс, чөнки аңа техник һәм гамәлгә кертү белән берлектә, мәгариф үзәкләре дә керә. Биредә яшьләр өчен бизнес-инкубатор эшли, быел ул "Россия-Кытай яшьләр бизнес-инкубаторы" халыкара проектын тормышка ашыра. Тантаналы чарада шулай ук атаклы укытучылар, кафедра җитәкчеләре һәм Казан дәүләт энергетика университеты галимнәре бүләкләнде. 11 кеше дәүләт бүләкләре һәм мактаулы исемнәр алды.

Ростех дәүләт корпорациясенең "Техмаш" концерны составына керүче "ПОЗиС" АҖдә Махсус машина төзү үзәген ачу тантанасы булды.

Бу объект "ПОЗиС" АҖдә эш тармакларын үзгәртеп кору һәм техник яктан яңача җиһазлау проектын тормышка ашыру нәтиҗәсе булып тора, аның гомуми суммасы 4 млрд сумнан артык. Проект 2011 елда 2020 елга кадәр илнең оборона-сәнәгать комплексын үстерү буенча ФМП кысаларында старт алды.

"ПОЗиС" АҖнең Махсус машина төзү үзәге алдынгы югары технологияле җайланмалар белән тәэмин ителгән, алар махсус продукцияне серияләп югары нәтиҗәле дәрәҗәдә җитештерүнең автоматлаштырылган тулы циклына берләштерү мөмкинлеген бирә.

Ачылыш тантанасында Татарстан Республикасы Президенты Рөстәм Миңнеханов, Ростех дәүләт корпорациясе генераль директоры С.В.Чемезов, ТР сәнәгать һәм сәүдә министры Альберт Кәримов һәм башка рәсми затлар катнашты.

"POZIS – илнең бай тарихы һәм зур киләчәге булган әйдәп баручы ОСК предприятиеләренең берсе.  2018 елда предприятие 120 еллыгын билгеләп үтә һәм Махсус машина төзү үзәген ачу – завод өчен әһәмиятле һәм символик вакыйга. Объектта әлеге производствоны сафка кертү – ул Россиянең оборона сәләтен ныгытуга зур өлеш", – дип билгеләде POZIS генераль директоры Радик Хәсәнов.

"ПОЗиС" АҖ матбугат хезмәте материаллары нигезендә

Машина төзүчесе көне алдыннан "А.М.Горький исемендәге Яшел Үзән заводы" АҖдә эшчеләр арасында "Токарь" һөнәре буенча чираттагы еллык һөнәри осталык бәйгесе узды.

Бу көнне завод эшчеләрен котларга һәм бәйгедә катнашучыларга көч биреп торырга "Ак Барс" холдинг компаниясе" АҖ генераль директорының гомуми мәсьәләләр буенча урынбасары  Елена Алешина, "Ак Барс" судно төзелеше корпорациясе" АҖ генераль директоры Ренат Мистахов, Татарстан Республикасы Сәнәгать һәм сәүдә министрлыгының корпоратив идарә бүлеге башлыгы Андрей Федоров,  "А.М.Горький исемендәге Яшел Үзән заводы"  генераль директоры Александр Карпов һәм башкалар килгән иде.

Конкурста заводның барлыгы 13 эшчесе катнашты, алар ел дәвамында бәйгегә җаваплы төстә әзерләнгән һәм югары җитештерү күрсәткечләренә ирешкән.

Конкурс ярышларның команда һәм шәхси этапларында гамәли һәм теоретик сынаулардан гыйбарәт иде. Әүвәл конкурсантлар теоретик өлештәге белемнәрен күрсәтте. Моның өчен турыдан-туры һөнәрләренә кагылышлы, шулай ук хезмәт саклау һәм куркынычсызлык техникасы буенча сораулар әзерләнгән. Аннары ярышларның иң мөһим өлешенә - гамәли биремнәр үтәүгә күчтеләр. Эш барышында токарьларның тизлекләрен һәм осталыкларын күрсәтергә тырышуы көн кебек ачык иде: бер генә артык хәрәкәт тә, көндәш ягына бер караш ташлау да булмады. Нәтиҗәдә, урыннар түбәндәгечә бүленде:

Бригада конкурсында:

III урынны 9нчы цех командасы алды

II урын - 4нче цех командасы

I урын - 26нчы цех командасы

Шәхси бәйгедә:

III урынны 26нчы цех токаре Роман Попов алды

II урын - 8нче цех токаре Артем Полонеев

I урын - 26нчы цех токаре Илгиз Каюмов

Барлык җиңүчеләргә истәлекле бүләкләр һәм дипломнар тапшырылды. Призлы урын алмаган конкурсантлар катнашучы дипломнары белән билгеләп үтелде.

Бүген Горький исемендәге Үзәк мәдәният һәм ял паркында #ВместеЯрче-2018 Бөтенроссия энергияне сак тоту фестивале үтәчәк.  Фестиваль гомумшәһәр гаилә бәйрәме буларак ниятләнгән, ул энергияне сак тотуны һәм табигатькә сак карашны популярлаштыруга багышланган.

Чара башланганда ТР сәнәгать һәм сәүдә министры Альберт Кәримов сәламләү сүзе белән чыгыш ясады. "Энергияне сак тоту һәм энергия нәтиҗәлелеге - ул безнең икътисадның көндәшлеккә сәләтле булуының нәтиҗәлелеген арттыруның иң мөһим юнәлешләре. Инде бүген үк республикада без 17 млрд. кубометрга якын газ, 20 млрд. киловатт-сәгать электр энергиясе һәм 34 млн. Гкал җылылык кулланабыз. Сәнәгать предприятиеләрендә генә түгел, Татарстанның һәр кешесенең ресурсларның ни дәрәҗәдә кыйммәтле булуын аңлавы зарур. Ышанам ки, сезнең һәркайсыгыз әлеге ресурсларны ничек саклап калырга һәм бездә булган казанышлардан ничек нәтиҗәле файдаланырга дип уйларга кирәклегенә инаныр”.

Чарада шулай ук Татарстан Республикасы Премьер-министры урынбасары Ләйлә Фазлыева, Казан шәһәре Башкарма комитеты җитәкчесе урынбасары Илдар Шакиров, "Казан дәүләт энергетика университеты" югары белем бирүче федераль дәүләт бюджет мәгариф учреждениесе ректоры Эдвард Габдуллаҗанов, Татарстан Республикасы яшьләр эшләре министры урынбасары Анна Захматова, эре энергетика предприятиеләре җитәкчеләре һәм башка рәсми затлар катнашты.

Ачылыш тантанасы алдыннан предприятиеләр һәм студентлар парады үтте, Татарстанның ягулык-энергетика комплексы предприятиеләре арасында мини-футбол буенча турнир уздырылды, җиңүче исеме Казан ҖЭҮ-3  «ТГК -16» ААҖ бирелде.

Бәйрәм мәйданчыгында "Энергия нәтиҗәлелеге бульвары"н хасил иткән энергетика компанияләре экспозицияләре тәкъдим ителде, анда яңа технологияләрне, энергия нәтиҗәлелеген тәэмин итүче җиһазларны, тармак компанияләренең кызыклы проектларын, профильле югары уку йортлары студентларының эшләнмәләрен күрергә мөмкин иде. Парк территориясе уен, күңел ачу, энергияне сак тотуга багышланган тематик зоналарга бүленде. Аеруча кызыксынучан кунаклар өчен фәнни-популяр тамашалар һәм энергия табигатен чагылдыручы тәҗрибәләр, энергетика һәм энергияне сак тоту өлкәсендә кызыклы фактлар һәм ачышлар тәкъдим ителде. Традиция буенча, "Вместе ярче" фестивале мәйданчыгында теләгән бар кеше гадәти лампочкаларны энергияне сак тота торганнарына алыштырды.

Моннан тыш, фестиваль кысаларында "Голос" проекты финалисткасы, ТР атказанган артисткасы Эльмира Кәлимуллинага энергия нәтиҗәлелеге илчесе  исеме бирелде.

Горький исемендәге Үзәк мәдәният һәм ял паркында #ВместеЯрче-2018 Бөтенроссия энергияне сак тоту фестивалендә катнашучылар флешмоб үткәрде. Флешмобта Татарстан Республикасы ягулык-энергетика комплексы предприятиеләре эшчеләре, шәһәр кешеләре һәм Казанның тугыз югары уку йорты - Казан федераль университеты, Казан дәүләт энергетика университеты, А.Н.Туполев исемендәге Казан илкүләм тикшеренү университеты һәм Казан илкүләм тикшеренү университетының (КХТИ) студентлар парадында узган, 400 дән артык студенты катнашты. Флешмоб "Вместе ярче" бердәм шигаре һәм энергияне сак тотуга һәм кулланыла торган ресурсларга сак карашка өндәмәләр астында техник һәм гуманитар вузларның төрле юнәлешләре студентларын берләштерде.

Бәйрәм Татарстан эстрадасы йолдызы Эльмира Кәлимуллина һәм Россия шоу-бизнесы вәкиле Олег Майами катнашында кичке концерт һәм дәртле биюләр белән тәмамланды.

Сәнәгатьне үстерү фонды Эксперт советы "КАМАЗ" ГАҖнең КАМАЗ автомобильләре өчен "Комплект эшләнмәләр" программасы буенча яңа модельләр рәтенә алюминий ягулык баклары җитештерү проектына 230,6 млн сум күләмендә заем хуплады.

"КАМАЗ" ГАҖ проекты импорт алюминий бакларын китертүдән баш тарту һәм аларны үзебездә җитештерелгән баклар белән алмаштыру максатында гамәлгә ашырыла.

Алюминий ягулык бакларын (300-700 литр сыйдырышлы) һәм корыч ягулык бакларын (210-500 литр сыйдырышлы) җитештерүне оештыру "КАМАЗ" ГАҖ Тыгызлап бастыру-рам заводы җирләрендә башкарыла.

Алюминий һәм корыч ягулык бакларын җитештергәндә электр дугасы белән эретеп ябыштыруның заманча MIG/MAG технологиясе кулланыла. Әлеге технология, контактлы эретеп ябыштыру белән чагыштырганда, сыйфатлы һәм эстетик тигез җөй белән ябыштыру мөмкинлеген бирәчәк.

Альберт Кәримов Үзбәкстан Республикасында эш визиты белән. Бүген көннең беренче яртысында Министрның Ташкент өлкәсе хакиме Гуломжон Ибраһимов белән эшлекле очрашуы булды. Татарстан делегациясе составына Үзбәкстанда Татарстан Республикасы вәкиле Рамил Шакиров, "Химград" АҖ генераль директоры Айрат Гыйззәтуллин һәм башка рәсми затлар керде.

Сәламәләү сүзләрендә Министр болай диде: "Мин Үзбәкстанга килү мөмкинлеге булуына бик шат һәм кунакчыллык өчен рәхмәт белдерергә телим. Бүген Татарстан-Үзбәкстан хезмәттәшлеге безнең республиканың тышкы икътисадый эшчәнлегендәге өстенлекле юнәлешләрнең берсе булып тора".

Очрашу барышында машина төзелеше, нефть химиясе һәм башка өлкәләрдә ике яклы хезмәттәшлекне җәелдерү мәсьәләләре турында фикер алышынды. Моннан тыш, Үзбәкстанда "Химград" технополисы филиалын ачу турында мәсьәлә дә каралды. Ташкент өлкәсе хакимияте тарафыннан технопарк урнаштыру өчен берничә мәйданчык тәкъдим ителде. Көннең икенче яртысында Министр Пскент районындагы җир кишәрлеген карады. Нәтиҗәдә Татарстан ягыннан әлеге территорияне индустриаль парк урнаштыру максатында файдалану киләчәгенә һәряклы анализ уздыру өчен өстәмә мәгълүмат соратылды.

Хөрмәтле оборона сәнәгате хезмәткәрләре һәм ветераннары!

Сезне профессиональ бәйрәм – Коралчы көне белән тәбрик итәм!

Календарьдагы бу дата – эше оборона сәнәгатенә бәйле кешеләргә зур рәхмәт һәм хөрмәт белдерү көне. Болар конструкторлар, корал җитештерүчеләр, корал традицияләрен тикшерүче галим-тарихчылар. Сезнең аркада, хөрмәтле корал осталары, безнең дәүләт элеккегечә даһи һәм бәйсез булып кала бирә, илнең кораллы көчләре куәте буенча дөньяның барлык илләрендәге армияләрне уздыра торган корал белән тәэмин ителгән, ә Россия халкы үзен якланган итеп хис итә.

Сезнең коллективларга киләсе көнгә ышаныч булуын, булган куәтләрдән нәтиҗәле файдалануны, шулай ук коралларның яңадан-яңа модельләрен җитештерүне арттыруны телим. Боларның барысы да илнең оборона көчен ныгытырга булышачак, предприятиеләребезнең үсешенә, ә димәк, безнең һәркайсыбыз өчен муллык һәм иминлек дәрәҗәсенең үсешенә ярдәм итәчәк.

Мин ышанам, безнең илдәге "оборона" тармакның куәтле интеллектуаль, фәнни-техник потенциалына, менә дигән профессиональ гореф-гадәтләренә һәм элеккеге буыннардан тупланып калган уникаль эш тәҗрибәсенә таянып,  югары интеллектлы кадрларга элеккегечә кытлык кичермәячәк, алга таба уникаль кораллар ясаячак һәм хәрби техника буенча дөнья базарларында үзебезнең ил продукциясенең алдынгы позициясен ныгытачак.

Сезгә һәм Сезнең гаиләләрегезгә уңышлар, бәхет, мәхәббәт һәм тынычлык булсын!

Министр                                                                              Альберт Кәримов

Бүген ТР Сәнәгать һәм сәүдә министрлыгында Кытай компаниясе хезмәткәрләре тарафыннан "Энергия белән туендырылган материаллар" квалификация күтәрү программасының ябылуы уңаеннан дипломнар тапшыру тантанасы булды. Чарада министр урынбасары Алексей Савельчев, "КНИТУ" ЮББ ФДБМУ ректоры Сергей Юшко, Казанда КХР Генконсуллыгының Беренче сәркатибе Ли Фэй һәм башкалар катнашты. Ике атна дәвамында Казанның милли тикшеренү технологик университетында NORINCO корпорациясе (Кытайның төньяк сәнәгый корпорациясе) предприятиеләре белгечләре һәм инженерлары өчен стажировка узды. Стажировка КНИТУ Өстәмә белем бирү институты базасында Инженер химик-технологик институты галимнәре һәм укытучылары тарафыннан уздырылды.

Чарада Ли Фэй әфәнде белгечләргә болай дип мөрәҗәгать итте: "Мин ышанам, сезгә яңа дуслар даирәсен табу мөмкин булгандыр һәм киләчәктә сез үз белемнәрегезне эштә куллана алырсыз һәм тикшеренү эшчәнлегендә яңа үрләр яулый алырсыз дип, ихлас өметләнәм. Кабул итүче якка химия үсешенең чын тарихына кагылу, профессор-укытучылар корпусының профессиональлеген бәяләү һәм Казанның гүзәллеген манзара кылу мөмкинлеге өчен рәхмәт белдерәбез. Бу укыту безнең илләр арасындагы хезмәттәшлекне ныгытуга яңа өлеш булып тора".

Стажировканы дары һәм шартлаучан матдәләр өлкәсендәге барлыгы 14 белгеч узды. Стажировка барышында лекцияләр, түгәрәк өстәлләр һәм иҗат кичәләре уздырылды, "Химград" технополисы һәм "Идея" инновацион технопаркы предприятиеләренә экскурсияләр оештырылды, "Казан дәүләт казна дары заводы" ФКП генераль директоры Александр Лившиц белән очрашу оештырылды. Корпорациянең барлык хезмәткәрләре дә укуны уңышлы узды. Стажировка барышында алга таба хезмәттәшлек итүдә ике яклы мәнфәгать барлыкка килде.

3-6 октябрьдә Мәскәүдә узачак "Россиянең энергетика атналыгы" халыкара форумында 130 бизнесмен үзенең катнашачагын белдергән инде, алар Россиянең 70 һәм 29 чит илдән (Австрия, Әзәрбәйҗан, Белоруссия, Бөекбритания, Венгрия, Алмания, Греция, Мисыр, Индонезия, Иордания, Исландия, Казакъстан, Кытай, Люксембург, Марокко, Молдова, Нигерия, Нидерландлар, БГӘ, Джерси утравы, Панама, Польша, Корея Республикасы, Словения, АКШ, Таҗикстан, Үзбәкстан, Франция, Швейцария) 40 чит ил компаниясеннән, шулай ук Венесуэладан, Шри-Ланкадан, Анголадан, Катарадан һәм Көньяк Суданнан рәсми делегацияләр киләчәк.

 "Боливариан Республикасының нефть сәнәгате халык хакимияте министры Мануэль Киведоның, Шри-Ланка Демократик Социалистик Республикасының Нефть ресурсларын үстерү министры Арджуна Ранатунгиның, Ангола Республикасыннан Энергетика һәм су ресурслары министры Жоао Баптисты Борхесның, Катара энергетика һәм сәнәгать министры Мөхәммәт бин Салих Әл Садәнең, Көньяк Суданның нефть сәнәгате министры Эзекиель Лол Гаткуотның, шулай ук ОПЕК Генераль сәркатибе Мөхәммәт Баркиндоның Форумда катнашуы электр энергетикасы үсешенең киләчәге турындагы дискуссияне яңа дәрәҗәгә чыгару мөмкинлеген бирәчәк. Без нәтиҗәле, бүген дөньяви энергетика каршында торган төп бурычларны хәл итүгә юнәлдерелгән диалог булыр дип өметләнәбез", – дип билгеләде Президент киңәшчесе Антон Кобяков.

Россия һәм чит ил бизнесында мөһим вәкилләр арасында "Россиянең энергетика атналыгы"нда "Газпром нефть" ГАҖ генераль директоры, идарә рәисе Александр Дюков, Атом энергиясе буенча "Росатом" дәүләт корпорациясе генераль директоры Алексей Лихачёв, "Промсвязьбанк" ГАҖ вакытлы хакимияте җитәкчесе Пётр Фрадков, "РОСНАНО" ИК" ҖЧҖ идарә рәисе Анатолий Чубайс, Евразия үсеш банкы идарә рәисе Андрей Бельянинов, "Сименс" ҖЧҖ президенты, генераль директоры Дитрих Мёллер,  ExxonMobil Russia Inc. президенты Гленн Роберт Уоллер һәм башкалар үзләренең катнашачагы турында раслаган.