ЯҢАЛЫКЛАР
2018 елның 1-12 октябрь көннәрендә Казанда Казакъстан Республикасы Сәүдә вәкиллеге бүлеге, Казакъстан Республикасы һәм Татарстан Республикасы экспортерлары һәм импортерларына ике яклы ярдәм өчен көчләрне берләштерү максатыннан, "Ачык ишекләр көне" үткәрә.
Чараны үткәрү кысаларында уртак бизнес алып баручы яки планлаштыручы, ягъни Казакъстан Республикасы базарында тауарлар һәм хезмәтләрен тәкъдим итәргә әзер эшкуарлар һәм предприятие җитәкчеләре белән эшлекле очрашулар, консультацияләр һәм сөйләшүләр ниятләнгән.
Түбәндәге телефон яки электрон почта аша алдан язылырга кирәк: +7 (843) 237-76-61 kaztrade.kzn@gmail.com
Казакъстан Республикасының Казан шәһәрендәге Сәүдә вәкиллеге бүлекчәсе адресы: Карл Маркс урамы, 8/13 ( Казан шәһәрендә Казакъстан Республикасының Генераль консуллыгы бинасы).
Пәнҗешәмбе Чаллының Орган залында "КАМАЗ"ның төп һөнәри бәйрәме - Машина төзүчеләр көне уңаеннан тантаналы чара узды.
"Бүген "КАМАЗ" - бөтен дөньяга мәгълүм бренд. "КАМАЗ" БДБ, Көньяк-Көнчыгыш Азия, Якын Көнчыгыш, Африка, Көнчыгыш Ауропа, Латин Америкасының 40тан артык иленә автомобильләрен экспортка җибәрә.
Мин үзләренең тырыш, фидакарь хезмәте белән газиз предприятиеләренә дан китерүче һәм дөнья базарында безнең компанияләрнең абруен күтәрүче барлык завод эшчеләренә, шулай ук хезмәткә намуслы мөнәсәбәт, газиз предприятиеләренә тугрылык һәм сайлаган һөнәрләренә мәхәббәт өлгесе булган ветераннарга рәхмәт әйтәм", - дип билгеләп үтте министр.
Чарада Альберт Кәримов бүләкләү тантанасында катнашты, КАМАЗның атказанган эшчеләренә истәлек дипломнары һәм бүләкләр тапшырды.
Компания эшчеләренә һәм производство ветераннарына котлау сүзләре белән шулай ук "КАМАЗ" ГАҖ генераль директоры Сергей Когогин, компаниянең профсоюз комитеты рәисе Александр Васильев, Чаллы шәһәре муниципаль берәмлеге башлыгы урынбасары Флера Андреева мөрәҗәгать итте.
Чара бәйрәм концерты белән тәмамланды.
2018 елның 25-27 сентябрендә Иркутск өлкәсе икътисади үсеш министры җитәкчелегендә Иркутск өлкәсе делегациясе эш сәфәре белән Татарстан Республикасында булды.
Ике көн дәвамында кунаклар Татарстан Республикасы Инвестиция үсеше агентлыгы, Татарстан Республикасы Икътисад министрлыгы, Мәгълүматлаштыру һәм элемтә министрлыгы җитәкчелеге белән очрашулар уздырды, югары технологияләр өлкәсендәге «IT-парк» технопаркында, "Яр Чаллы" алгарышлы социаль-икътисадый үсеш территориясендә, "Мастер" Кама индустриаль паркында булды. ТР сәнәгать һәм сәүдә министры Альберт Кәримов делегация белән эшлекле төшке аш форматында очрашу үткәрде.
Эш сәфәренең төп максаты Татарстан һәм Иркутск өлкәсе арасында тәҗрибә алмашу һәм сәүдә-икътисадый багланышларны камилләштерү иде.
Бүген Татарстан Республикасы Сәнәгать һәм сәүдә министрлыгында Иҗтимагый советның чираттагы утырышы булды. Иҗтимагый совет составына "Спорткультавтотовары" АҖ генераль директоры Мөнир Гафиятуллин, Татарстан Республикасы Икътисад җәмгыяте вице-президенты Рауза Шаһиева, "В.Г.Тимирясов исемендәге Казан инновация заводы" ЮҺББ ХМУ "Икътисад теориясе" кафедрасы доценты, икътисад фәннәре кандидаты Вячеслав Зубаков, "Идел буе сыйфат үзәге" КП директоры Андрей Яшин, Татарстан Республикасы Сәнәгать һәм сәүдә министрлыгының ветераннар советы рәисе урынбасары Илгиз Хәйруллин, Татарстан Республикасы Икмәк җитештерүчеләр берлегенең идарә рәисе Илдар Никифоров, "Деловая Россия" җәмгыятенең сәнәгать һәм энергетика буенча комитеты рәисе Артем Кузнецов, ТР Сәнәгать һәм сәүдә министрлыгының юридик бүлек башлыгы Лилия Хәбибуллина һәм профильле бүлекләрдән башка хезмәткәрләр керде.
Иҗтимагый советта катнашучылар ике мәсьәлә турында фикер алышты.
Беренчедән, республиканың кулланучылар базарындагы вәзгыять буенча мәгълүмат җиткерелде. 2018 елның 8 аенда ваклап сәүдә итү әйләнеше 92,8% очракта стационар сәүдә челтәрендә (базардан тыш) эшчәнлек башкаручы сәүдә оешмалары һәм шәхси эшкуарлар хисабына формалашкан, ә ваклап сату әйләнешендә базар өлеше 7.2 процент тәшкил иткән. Хәзерге вакытта Татарстан Республикасында ваклап сатучы 17 мең тирәсе предприятие эшли, 30 ваклап сату базары бар. Бер мең халыкка исәпләгәндә сәүдә урыннары белән тәэмин ителеш республика буенча уртача алганда 773 кв.метр тәшкил итә (норматив буенча 603,1 кв.м. булырга тиеш). Ләкин төбәктә барыннан да җитезрәк рәвештә челтәрле сәүдә үсеш ала. 2018 елда республикадагы ваклап сатучы челтәр сәүдәсенең үсеше челтәрле сәүдә итүче зур компанияләрнең инфраструктурасы формалашуының дәвам итүе белән сыйфатлана. Бүгенге көндә республика территориясендә өч халыкара, алты федераль һәм сигез региональ ваклап сатучы челтәр компаниясе эшчәнлек башкара.
Идел буе федераль округы төбәкләре арасында кулланучылар секторында бәя арту буенча 2018 елның августында Татарстан Республикасы 14 урынның 13сендә тора. Нибары Мордовия Республикасында гына бездән дә түбәнрәк бәяләр күзәтелә.
Көн тәртибендәге икенче пунктта Татарстан Республикасы предприятиеләренә дәүләт ярдәме чаралары күрсәтелде.
2014 елның 03 гыйнварындагы РФ Хөкүмәте карарының (РФ Хөкүмәтенең 2018 елның 06 апрелендәге 418 номерлы карары ред.) 2014-2019 елларда алынган кредитлар буенча процентларны түләү буенча чыгымнарны кайтару һәм (яки) гражданлык сәнәгатенең өстенлекле юнәлешләре буенча комплекслы инвестиция проектлары кысаларында 2017-2019 елларда чыгарылган облигацияләр буенча купон керемен түләү өлешендә гамәлдә булу механизмы җентекләп күрсәтелде.
Утырыш нәтиҗәсендә Иҗтимагый совет тарафыннан фикер алышынган мәсьәләләр буенча тәкъдимнәр һәм мөмкин булган өстәмәләр формалаштырылачак.
1-2 октябрьдә Казанда Интернет әйберләре технологияләре буенча Бөтендөнья цифр саммиты (IoT World Summit Russia) булачак, анда Россиядән, АКШтан, Ауропадан һәм Азиядән иң яңа цифрлы технологияләрне гамәлдә куллану өлкәсендә дөнья лидерлары очрашачак һәм IoT һәм IIoT, М2М коммуникацияләр, зур белешмәләр аналитикасы, ясалма интеллект, машина һәм тирәнтен өйрәтү, киберкуркынычсызлык һәм блокчейн өлкәсендәге алдынгы чишелешләр күрсәтеләчәк.
120 артык халыкара эксперт 4.0 индустриясе, цифрлы корпорацияләр, акыллы шәһәр һәм энергетика өчен иң алдынгы технологияләрне кертү тәҗрибәсен күрсәтәчәк. Чарада катнашучылар 125 артык гамәли кейсны караячак һәм IoT технологияләрен куллану нәтиҗәсендә предприятиеләрнең нәтиҗәлелеген арттыруның актуаль мәсьәләләре турында сөйләшәчәк.
Самиттка дөньяның 25 иленнән катнашучылар һәм делегатлар киләчәк. Иң зур халыкара һәм Россия компанияләре самитта катнашачагы турында белдергән инде.
Саммитның аерым бер бүлеге "Индустрия 4.0" багышланачак. Экспертлар җитештерү тармагына цифрлы технологияләрнең ни рәвешле табыш китерә алуы һәм 4.0 проектлары белән ничек эшли башларга кирәклеге турында сөйләячәк. Панель дискуссиядә төп спикерларның берсе Россия Федерациясе Сәнәгать һәм сәүдә министрлыгы каршындагы Сәнәгатьне үстерү фонды директоры Роман Петруца булачак. Ул җитештерү тармакларын цифрлаштыруга фонд тарафыннан күптән түгел эшләтеп җибәрелгән ташламалы кредитлар программасы турында сөйләячәк.
Малайзиянең Petronas баш инженеры Шаруль Рашид Малайзиядә, Сингапурда, Индонезиядә, Таиландта, Вьетнамда, БГӘ, Германиядә, Нидерландта, АКШ һәм Россиядә эшләтеп җибәрелгән, төрле нефть платформаларында алдан хәбәр итү һәм чыбыксыз датчиклар ярдәмендә җитештерүне автоматлаштыру системалары белән эшләү тәҗрибәсе турында уртаклашачак.
Россиядән иң зур компанияләр – Сибур, Гразпронефть, Транснефтьэнерго, КАМАЗ, Северсталь, Роснефть, Вертолеты России, Росатом – җитештерүне цифрлаштыру буенча үзләренең тәҗрибәсе турында сөйләячәк.
Чара турында тулырак итеп түбәндәге сайтта:
Бүген Альберт Кәримов Казан шәһәренең автопассажир предприятиеләренә табигый газда эшләүче автобусларны тапшыру тантанасында катнашты. Чара газ-мотор техникасының "Газны моторларга" - Кытай - Казакъстан - Россия авточабышы кысаларында узды
Татарстан Республикасы Хөкүмәте тарафыннан "2013-2023 елларга Татарстан Республикасында газ-мотор ягулыгы базарын үстерү" дәүләт программасы расланды. Әлеге программа кысаларында республикада транспорт чаралары газ-мотор ягулыгына күчерелә, газ моторында эшли торган техника сатып алына, шулай ук ягулык системасын газ белән эшләрлек итеп үзгәртеп коруга транспорт чаралары милекчеләре тоткан чыгымнарны компенсацияләү механизмы эшләнгән. Программа гамәлдә булган чорда барлыгы 4000 берәмлектән артык техника үзгәртеп корылган һәм сатып алынган.
Шунысын билгеләү әһәмиятле: республикадагы автосәнәгать вәкилләре газ-мотор техникасын эшләп чыгаруга һәм җитештерүгә зур әһәмият бирә. Бүген 15 "НЕФАЗ" автобусы һәм 15 "Lotos" автобусы эксплуатациягә тапшырылды, алар ягулык сыйфатында табигый газ куллана. Казандагы автотранспорт предприятиеләре паркларында барлыгы 104 экологик автобус өстәләчәк. Мотор ягулыгы сыйфатында табигый газ куллану ЯММ чыгымнарны киметергә һәм эксплуатацияләгәндә экологиягә чыккан зарарларны азайтырга булышачак.
"Программаны үти башлаганда Татарстанда 10 газ-метан белән тәэмин итү – автомобильләргә газ тутыру станциясе бар иде. Соңрак 9 яңа станция кертелде. Бу хәл Татарстан Республикасын Россия регионнары арасында газ белән тәэмин итү инфраструктурасы буенча алдынгы позициягә чыгарды (автомобильләргә газ тутыручы 19 станция). Без газ-мотор ягулыгына мәнфәгать артуда перспективалар күрәбез", – дип билгеләде министр.
3-6 октябрь көннәрендә Мәскәүдә узачак "Россия энергетика атналыгы" халыкара форумында катнашучылар сыегайтылган табигый газдан куллануның яңа мөмкинлекләре, шулай ук Азия-Тын Океан регионында (алга таба – АТР) хезмәттәшлек перспективалары һәм аны тотрыклы үстерү турында фикер алышачак.
СТГ базарын формалаштыру, кулланучы илләр белән диалог алып бару нечкәлекләре һәм АТР үстерүнең социаль-икътисадый фаразлары буенча АТРдагы СТГ базарында иң зур уенчылар үзләренең тәкъдимнәрен җиткерәчәк. Чараның модераторы буларак Азия һәм Тын Океан өчен БМОның энергетика, икътисадый һәм социаль комиссиясе директоры Лю Хунпэн чыгыш ясаячак. Спикерлар ролендә Шри-Ланка, Непал, Бангладеш энергетика министрлыкларыннан вәкилләр, шулай ук "НОВАТЭК" ГАҖ, Мәскәүнең "Сколково" идарә мәктәбенең Энергетика үзәгеннән, Татарстан Республикасының Anglo Euro Energy Indonesia, Herbert Smith Freehills LLP компанияләреннән һәм Көньяк Азиянең Региональ хезмәттәшлек ассоциациясеннән вәкилләр белдерелгән.
РФ Энергетика министрлыгы бәяләгәнчә, бүген Азия илләренең үзләрендәге энергия балансында газ өлешен арттыру өчен хосусый СТГ инфраструктурасын формалаштыруга яки күрше илләргә хезмәт күрсәтүге газ хабын булдыруга карата мәнфәгатенең артуы теркәлгән. Уңай динамика актив икътисадый үсешкә, халыкның артуына, энергиядән куллану дәрәҗәсенең артуына, шулай ук АТРда экологик аспектларның әһәмияте артуга бәйле. Бүгенге көндә АТРда яшәүче 2 миллиардтан артык кеше ягулыкның экологик чиста төрләреннән һәм 400 миллионнан артык кеше – электр энергиясеннән файдалана алмый.
Үз чиратында, Россиянең энергетика компанияләре базар чакыруларына гакыллы һәм нәтиҗәле җавап бирү һәм башка катнашучылар белән көндәшлек итү өчен СТГ индустриясен актив үстерә.
Мәскәүнең "Сколково" идарә мәктәбенең Энергетика үзәге директоры Татьяна Митрова ассызыклаганча, Россия газын китертүдә иң өстенлекле юнәлеш – тышкы базарлар. Аның фикеренчә, Россия СТГ экспорт буенча көндәшлеккә сәләтле булу дәрәҗәсен арттыру өчен яңа бизнес-модельләрне эзлекле рәвештә җәелдерергә кирәк. "Россиядәге җитештерүчеләр базарда дәвамлы контрактлардан башлап своплар һәм онлайн-сәүдә итүләргә кадәр - төрле инструментларны берләштерүне күздә тотучы бик куәтле механизм булдыра ала", – дип уйлый ул. "СТГ – ул безнең өчен зур үсеш алырга мөмкин булган уемтык һәм Россия җитештерүчеләре, теоретик яктан караганда, аның өчен мода законнарын чыгаручы була ала. Ләкин моның өчен маркетинг стратегиясен эшләү өлкәсендә дә, СТГ базарына яраклашуда да, шулай ук үзкыйммәтен киметү өлкәсендә дә зур эш башкарырга кирәк", – дип саный Татьяна Митрова.
Россиянең Сәнәгать министрлыгы Россиянең радиоэлектрон сәнәгать предприятиеләре өчен тармак инфраструктурасын, шул исәптән Россия Федерациясе Хөкүмәтенең 2016 елның 17 февралендәге 110 номерлы карары нигезендә радиоэлектроника өлкәсендәге кластерларны булдыруга бәйле проектларны тормышка ашыру максатларына Россия кредит оешмаларыннан алынган кредитлар буенча процентлар түләүдә чыгымнарның бер өлешен компенсацияләү өчен федераль бюджеттан субсидияләр алу хокукына конкурс аша сайлау башлануы турында игълан итә. Заявкалы конвертларны һәм теркәлә торган документларны конкурска 2018 елның 1 октябреннән 4 октябренә кадәр кабул итәчәкләр.
Субсидияләр тармак инфраструктурасын, шул исәптән радиоэлектроника өлкәсендә кластерлар булдыруга бәйле, тормышка ашыру срогы 5 елдан артып китмәгән комплекслы проектларны тормышка ашыру максатларында алынган кредитлар буенча субсидия алу хокукына конкурс нигезендә сайланган радиоэлектроника сәнәгате оешмаларына бирелә, кредитларның суммасы түбәндәгечә булганда:
- "Телекоммуникация җиһазлары җитештерүне үстерү" кече программасы кысаларында – 1,5 млрд сумга кадәр;
- "Санап чыгару техникасы җитештерүне үстерү" кече программасы кысаларында – 2,5 млрд сумга кадәр;
- "Махсус технологик җиһаз җитештерүне үстерү" кече программасы кысаларында – 2 млрд сумга кадәр;
- "Интеллектуаль идарә системалары җитештерүне үстерү" кече программасы кысаларында – 1 млрд сумга кадәр.
Конкурс аша сайлау турында өстәмә мәгълүматларны түбәндәге телефоннар буенча белешергә мөмкин: 8 (495) 647-74-57, 8 (495) 632-85-14 яки түбәндәге электрон почта адреслары аша: balamutovpa@minprom.gov.ru, isaevaa@minprom.gov.ru.
Бүген Татарстан Республикасы территориясе буенча техника йөреше дәвам итә. Табигый газдагы техниканың "Газ в моторы" исемле иң озын автойөреше Татарстан башкаласына торган саен якынлаша.
Йөрештә Россия, Кытай һәм Казакъстаннан ягулык сыйфатында табигый газ (метан) кулланучы 15 йөк, җиңел автомобиль һәм автобус катнаша. Колонна составына Россиядән "ГАЗ" төркеме , "РариТЭК", "КАМАЗ", "УАЗ" һәм "АВТОВАЗ" җитештергән һәм табигый газда эшләүче магистраль сөйрәгеч машиналар, шәһәрара автобуслар, коммерцияле һәм җиңел техника керә.
Әлеге автойөреш мотор ягулыгы сыйфатында табигый газ куллануның экономиялелеген, экологик булуын һәм куркынычсызлыгын раслау, шулай ук газ-мотор техникасы модельләре рәтенең күптөрлелеген, аның югары кулланучы үзлекләрен, сыйфатын һәм ышанычлылыгын күрсәтү максатын куя.
"Газ в моторы" Татарстан этабы 2018 елның 24-27 сентябрендә уза. Гомумән алганда катнашучылар Татарстан буенча 500 чакрым юл үтәчәк. Техника колоннасы Баулы, Бөгелмә, Әлмәт, Алексеевск районнары аша узды инде һәм бүген Казанга килә.
Иртәгә 26 сентябрьдә Казан автотранспорт предприятиеләренә газ-мотор автобусларын тапшыру тантанасы булачак.
Моннан тыш, чәршәмбе 26 сентябрьдә 11.00 сәгатьтә шәһәр халкы һәм Казан кунаклары автойөреш катнашучылары белән аралаша, техниканы өйрәнә, истәлеккә фотога төшә алачак. Чараны үткәрү урыны: "Казан" гаилә үзәге территориясе.
Татарстан Республикасы Сәнәгать һәм сәүдә министрлыгында республика министрлыклары һәм оешмалары вәкилләре катнашында Новосибирск өлкәсе делегациясе белән очрашу узды.
Татарстан Республикасы сәнәгать һәм сәүдә министры урынбасары Герман Лернер Новосибирск өлкәсе делегациясенә республиканың сәнәгый потенциалы турында мәгълүмат тәкъдим итте, шулай ук субъектлар арасында, сәүдә-икътисадый эшчәнлектә генә дә түгел, хезмәттәшлекне үстерү перспективалары барлыгын да билгеләп үтте.
Очрашу барышында Новосибирск өлкәсе компанияләре вәкилләре ТКХ, мәгълүмат технологияләре, сәнәгать җиһазлары өлкәсендә инновацияле эшләнмәләрен тәкъдим итте. Яклар әлеге юнәлешләр буенча хезмәттәшлек мөмкинлекләрен җентекләбрәк тикшерергә килеште.