ЯҢАЛЫКЛАР
#ЩедрыйВторник — ул Халыкара хәйриячелек көне, Россиядә 2018 елның 27 ноябрендә уза. Хәрәкәт дөньяның 100 артык илендә таралыш тапты. Әлеге бөтендөнья хәйриячелек көне Россиядә беренче мәртәбә 2016 елда узды. Инициативаның төп максаты хәйриячелек культурасын үстерүдән, ихтыярилыкка ярдәм күрсәтүдән гыйбарәт.
#ЩедрыйВторник чарасына теләсә нинди хәйри активлыгы белән теләктәшлек күрсәтергә була: волонтерлык яки фандрайзинг акциясе, концерт, лекция, хәер яки социаль челтәрләрдә хәйриячелек темасына пост белән. Хәйриячелек көне Президент Грантлары Фонды, "Все вместе" хәйриячелек җыены, Фандрайзерлар ассоциациясе, Донорлар форумы, "Благосфера" АКО, Социаль мәгълүмат агентлыгы һәм Бөтендөнья кыргый табигать фонды ярдәмендә уздырыла. Быел #ЩедрыйВторник инициативасы кысаларындагы чаралар 2018 елның 4 декабренә кадәрге чорда уза.
Ничек итеп #ЩедрыйВторник чарасының партнеры булу мөмкинлеге турында әлеге сылтама аша белергә мөмкин.
"Җан өчен мәрхәмәтлелек ул тән өчен сәламәтлек кебек: ул аңа ия булганда күренми һәм теләсә кайсы эштә уңыш китерә", - Лев Толстой.
Предприятиеләрнең вәкилләрен "Лукойл" ГАҖ тэминатчысы көнендә катнашырга чакырабыз, ул "Машина төзелеше. Металл эшкәртү. Казан" халыкара махсуслаштырылган күргәзмәсе һәм "TeсhnoСварка" махсуслаштырылган күргәзмәсе кысаларында узачак. Чара 2018 елның 6 декабрендә 13.00 сәгатьтә Казан шәһәрендә "Казан ярминкәсе" ААҖнең 1 нче павильонында, конференцияләр залында узачак.
Чараның максаты - компаниядә кулланыла торган материалларны һәм технологияләрне сатып алу, импорт белән алмаштыру өлкәсендә корпоратив сәясәтне күрсәтү, шулай ук республика предприятиеләре белән үзара хезмәттәшлек өчен элемтәләр урнаштыру.
Кызыксыну булган очракта, планлаштырылган катнашучылар исемлеген, аларның элемтә белешмәләрен күрсәтеп, I.Haffazov@tatar.ru электрон адресы буенча җибәрүне сорыйбыз.
Бүген ТР Сәнәгать һәм сәүдә министрлыгында республикада газ-мотор ягулыгы базарын үстерү һәм автотранспорт чараларын, авыл хуҗалыгы техникасын сыегайтылган газга күчерү буенча эшләрне оештыру һәм координацияләү буенча эш төркеме утырышы узды. Сөйләшүләр өстәле артында газ-мотор ягулыгы базарын үстерү процессының барлык яклары: техника җитештерүчеләр - "КАМАЗ" ГАҖ һәм "РариТЭК" АҖ вәкилләре, АЗС челтәре компанияләре вәкилләре, Теләче районында сыегайтылган табигый газ заводы төзелеше өчен җаваплы "Топгаз" компаниясенең топ-менеджерлары; Татарстанның Авыл хуҗалыгы һәм азык-төлек, Транспорт һәм юл хуҗалыгы, Сәнәгать һәм сәүдә министрлыклары вәкилләре җыелды. Утырышны Альберт Кәримов үткәрде.
"Программа гамәлгә ашырыла башлаганнан алып (2013 елдан) Татарстан Республикасында кысылган табигый газга күчерелгән һәм газ-мотор ягулыгы кулланучы 4400 транспорт чарасы исәпләнә. Кысылган табигый газдан тыш, сыегайтылган табигый газ (СТГ) белән кызыксынуның үсеш преспективаларын күрәбез. Әмма хәзерге вакытта СТГ базары үсешен тыеп торган факторлар бар: Россиядә тиешле автомобиль техникасын җитештерүнең чикләнгән күләме, җитештерү һәм заправка инфраструктурасының булмавы. ТР Президенты Рөстәм Миңнеханов күрсәтмәсе нигезендә, Татарстан Республикасында газ-мотор ягулыгы базарын үстерү һәм автотранспорт чараларын, авыл хуҗалыгы техникасын сыегайтылган табигый газга күчерү буенча эшләрне оештыру һәм координацияләү буенча эш төркеме оештырылды һәм расланды. Әлеге эш төркеме Татарстан Республикасында СТГ базарын үстерү буенча нәтиҗәле корал булыр дип ышанам", - дип ассызыклады министр.
Эш төркеме катнашучылары 2019-2025 елларда СТГда эшләүче техниканы эшкәртү һәм җитештерү буенча планнар хакында фикер алышты.
Фикер алышулар тәмамланганда эш төркеме газ-мотор ягулыгы базарын үстерү процессының барлык өлешләренең икътисадый рискларын аңлау, системаның инвесторлар өчен нәтиҗәле һәм Татарстан кулланучылары өчен файдалана алырлык булып төзелүе мөһим, дигән уртак фикергә килде.
Казанда киләсе елның язында 2019 елның 19-21 март көннәрендә "Энергия ресурслары нәтиҗәлелеге һәм энергияне сак тоту" XIX Халыкара симпозиумын һәм "Энергетика. Ресурсларны сак тоту-2019" XX Халыкара махсуслаштырылган күргәзмәсен үз эченә алган энергия ресурслары нәтиҗәлелеге буенча Татарстан халыкара форумы (алга таба - ТЭФ-2019) уздырыла.
ТЭФ-2019 үткәрү кысаларында "Без энергия нәтиҗәлелеген сайлыйбыз" дип аталган яшьләр инициативалары VI республика конкурсы (алга таба - Яшьләр конкурсы) һәм массакүләм мәгълүмат чаралары һәм предприятиеләрнең матбугат хезмәтләре арасында энергияне сак тоту һәм энергия нәтиҗәлелеген арттыруны яктырту һәм пропагандалау буенча Республика конкурсы (алга таба - ММЧ конкурсы) оештырыла.
Конкурслар энергия ресурслары нәтиҗәлелеген һәм энергияне сак тотуны популярлаштыру максатларында үткәрелә һәм 2018 елның 26 ноябрендә старт ала.
Конкурсларның нәтиҗәләрен чыгару һәм җиңүчеләрне бүләкләү тантаналары,
2019 елның 19 мартында ММЧ конкурсы буенча -"2018 ел нәтиҗәләре буенча Татарстан Республикасы Хөкүмәтенең "Татарстан Республикасында энергияне сак тоту һәм энергетика нәтиҗәлелеген арттыру" дәүләт программасын гамәлгә ашыру барышы һәм 2019 елга бурычлар турында" утырышы кысаларында;
2019 елның 21 мартында Яшьләр конкурсы буенча ТЭФ-2019ның
Яшьләр көнен үткәрү кысаларында узачак.
Заявкаларны һәм кушымта итеп бирелгән конкурс документларын конкурс комиссиясе электрон рәвештә түбәндәге электрон почтага кабул итә: cetrt@mail.ru
Яшьләр конкурсы буенча 2019 елның 15 февраленә кадәр һәм ММЧ конкурсы буенча 2019 елның 30 гыйнварына кадәр, тел./факс(843)272-99-43, 272-19-21, (843)272-99-69, "Татарстан Республикасы Министрлар Кабинеты каршындагы Татарстан Республикасы энергияне сак тоту технологияләре үзәге" ДАУ мәгълүмат-нәшрият һәм белем бирү эшчәнлеге бүлеге.
Тулырак мәгълүмат: cet.tatarstan.ru
Яшьләр конкурсы: http://mpt.tatarstan.ru/rus/2018-2019-gg-3142577.htm
ММЧ конкурсы: http://mpt.tatarstan.ru/rus/2018-2019-gg.htm
Бүген Казанда "Яшь Профессионаллар" WorldSkills Russia Татарстан Республикасы Төбәк чемпионаты 2018/2019нең икенче этабын ябу тантанасы узды. Татарстан Республикасы Сәнәгать һәм сәүдә министрлыгына беркетелгән 5 компетенция буенча (2 зурлар һәм 3 юниорлар) җиңүчеләрне бүләкләү тантанасы "Төбәкара компетенцияләр үзәге - Казан мәгълүмат технологияләре һәм элемтә техникумы" Дәүләт автоном һөнәри белем бирү учреждениесе мәйданчыгында үтте.
Тантанада Татарстан Республикасы сәнәгать һәм сәүдә министры урынбасары Алмаз Хөсәенов катнашты. Сәламләү сүзендә министр урынбасары җиңүчеләрне финалга чыгулары белән котлады һәм предприятие-партнерларга әлеге халыкара хәрәкәткә булышлыклары, шулай ук компетенцияләр экспертларына уңышлы хезмәттәшлек һәм Татарстан Республикасында WorldSkills конкурс хәрәкәте үсешенә бәяләп бетергесез өлешләре өчен тирән рәхмәтен белдерде.
Моннан тыш, ул каршыбызда абициоз бурыч - Казан шәһәрендә 2019 елда WorldSkills стандартлары буенча һөнәри осталык буенча 45нче Дөнья чемпионатын һәм Илкүләм чемпионатны үткәрү бурычы тора, дип билгеләп үтте. 2019 елда Дөнья чемпионатын үткәрү республиканың уртак җиңүләренә үз өлешен кертергә һәм дөнья дәрәҗәсендәге югары квалификацияле белгечләрне әзерләргә мөмкинлек бирәчәк.
Чемпионат циклының агымдагы этабында 5-7 декабрьдә "Казан ярминкәсе" күргәзмәләр үзәге территориясендә узачак "Машина төзү. Металл эшкәртү. Казан 2018" еллык халыкара күргәзмәсен үткәрү кысаларында 5 йомгаклау компетенциясе тәкъдим ителәчәк.
"Вверх!" яшь лидерларның республика конкурсын уздыру кысаларында ТР Сәнәгать һәм сәүдә министрлыгында тармак кейсларын хәл итү һәм шәхси әңгәмә узу кебек сынауларны үз эченә алган катнашучыларны сайлап алу процедуралары уздырылды. Республика министрлыклары һәм ведомстволары вәкилләреннән торучы конкурс комиссиясе нәтиҗәдә стажерларны сайлаячак һәм финалистларны билгеләячәк. Стажировкалар узу нәтиҗәсендә Татарстан Республикасы Яшьләр хөкүмәтенең яңа составы формалашачак.
Бүген Россиянең унберенче вертолет фррумын уздыру кысаларында "Вертолет индустриясе икътисады: кушыла торган уңышлар" пленар утырышы булды. Министр Альберт Кәримов сессия эшендә катнашты. Катнашучылар алдында Татарстан Республикасы Президенты исеменнән сәламләү сүзләре белән Татарстан Республикасы Президенты Ярдәмчесе Равил Зарипов чыгыш ясады: "Казан Россиянең мөһим авиация үзәге булып тора: биредә яңа, дөньяда аналоглары булмаган авиация техникасы һәм аның хәрби, граждани билгеләнештәге компонентлары әзерләнә. Татарстан Республикасында җитештерелә торган Ми-8/17 сериясендәге вертолетлар дөньяның 100дән артык илендә оча. Киләчәктә аларга иң яңа Ми-38 һәм Ансатлар да кушылачак..."
Вертолет форумы тармакта катнашучылар өчен дә, карарлар кабул итүче затлар өчен дә дискуссияләр мәйданчыгы ролен үти. Тарихта беренче тапкыр форум башкала чикләреннән чыгарылды. Диалог барышында сессиядә катнашучылар тармактагы мәсьәләләр һәм проблемалар турында сөйләште, вертолет индустриясен тотрыклы икътисадый үстерү, бәя билгеләүнең үтәкүренмәлелек дәрәҗәсен арттыру критерияләрен билгеләде.
Асылда, Россия вертолет индустриясенең ярдәм чаралары турында Равил Хәкимов - Россия Федерациясе Сәнәгать һәм сәүдә министрлыгының Авиация сәнәгате департаменты директоры; вертолет техникасы һәм аның компонентлары сертификациясе мәсьәләләре буенча - Һава транспорты федераль агентлыгы җитәкчесе Александр Нерадько; Россия вертолет төзелешен үстерү турында "Вертолеты России" холдингы генераль директоры Андрей Богинский сөйләде.
Сессиягә "А.Ромашин ис. технология" Обнинск фәнни-җитештерү предприятиесе генераль директоры Андрей Силкин модераторлык итте, ул ассызыклаганча, Россия ул - вертолет индустриясе, аның географик киңлекләрен исәпкә алып, дөньяда иң үсеш алган ил булырга тиеш.
Бүген ТР Сәнәгать һәм сәүдә министрлыгында Хэнань провинциясенең Халык хакимиятенең икътисад һәм технологияләр бүлеге директоры урынбасары У Юнхун ханым җитәкчелегендәге кытай делегациясе белән очрашу булды. Очрашуны министр урынбасары Герман Лернер уздырды.
Яклар Татарстан Республикасы белән Хэнань провинциясе предприятиеләре арасында хезмәттәшлек итү өчен партнерлык мөнәсәбәтләрен тудыру мөмкинлеге турында, шулай ук Россия-Кытай сәүдә һәм фән-техник хезмәттәшлек мәсьәләләре турында фикер алышты. Шунысын билгеләп үтәргә кирәк, Хэнань провинциясе машина төзелеше һәм авыл-хуҗалыгы өлкәсендә Кытайның лидер төбәге булып тора.
"Казаньоргсинтез" ГАҖ бүген нигез салыну көненнән башлап 60 ел тулуны һәм беренче продукция чыгара башлаган көннән башлап 55 еллыкны билгеләп уза. Шуның хөрмәтенә предприятие этилен заводында, Э-200 комплексында яңа дүрт пиролиз мичен күрсәтте.
Комплекслы кулланып карау кысаларында мичләрне Татарстан Республикасы Премьер-министры Алексей Песошин, Казан мэры Илсур Метшин, "ТАИФ" АҖ генераль директоры Альберт Шиһабетдинов, "Казаньоргсинтез" ГАҖ Директорлар советы рәисе Руслан Шиһабетдинов, "Казаньоргсинтез" ГАҖ генераль директоры Фәрид Миңнеголов эшләтеп җибәрде. ТР Сәнәгать һәм сәүдә министрлыгыннан министр урынбасары Алексей Савельчев катнашты.
- Бүген без "Оргсинтез" төзелә башлаган көннән башлап 60 ел узуны һәм яңа продукция чыгарыла башлаган көннән башлап 55 еллыкны билгеләп үтәбез, бу әһәмиятле көндә без модернизация программасында каралган төп объектларның берсен эксплуатациягә кертәбез. Быел "Оргсинтез"да өч елга исәпләнгән модернизациянең яңа этабы башланды. Модернизацияләү программасы кысаларында яңа объектлар төзелешенә һәм җиһазлар сатып алуга 10 миллирд сумнан артык акча инвестицияләү планлаштырыла, - дип билгеләде Алексей Песошин.
Дүрт яңа пиролиз миче эксплуатациягә кертелгәч 40 ел диярлек хезмәт иткән иске ун мичне алмаштырырга тиеш. Мич блогын модернизацияләү гамәлдәге производстволарның нәтиҗәлелеген арттырырга булышачак: этилен алу җайланмаларының җитештерүчәнлеген арттыру, технологик процесста иминлекне көчәйтү, продукция җитештерүгә чыгымнарны киметү мөмкинлеген бирәчәк.
Яңа мич блогында технологик процесс тулысынча автоматлаштырылган. Биредә дистанцион контроль һәм пиролиз мичләре белән эшләгәндә оператор бүлмәсеннән идарә итү җайга салынган. Объектта сәнәгый иминлекне тәэмин итү буенча башка чаралар да күрелгән: чимал бирүче һәм ягулык газы трубаүткәргечләре тиз тәэсир итүче бүлекчә каналлары, басымны, температураны һәм сарыфны үлчәү датчиклары, чимал бирү басымындагы чик билгеләрнең сигнализаторлары белән җиһазланган.
Яңа мичләрне төзү 2017 елның маеннан башлап 2018 елның ноябренә кадәр гамәлгә ашырылды. База проектын эшләүче - Technip Benelux B.V. (Нидерланд), җиһаз белән тәэмин итүче - Technip Benelux B.V. (Нидерланд).
Ун иске мичнең сигезе эксплуатациядән чыгарылачак һәм сүтеләчәк. Ике мич эшләвен дәвам итәчәк.
Юбилей уңаеннан булган тантаналар кичен "Пирамида" күңел ачу комплексында булды, биредә дәүләт бүләкләре тапшырылды.
"Казаньоргсинтез" ГАҖ матбугат хезмәте
Бүген Татарстан Республикасы Президенты Аппаратында дәүләт хакимияте башкарма органнарының Татарстан Республикасының "Халык контроле" дәүләт мәгълүмат системасында "Коррупциягә каршы көрәш" категориясе буенча заявкаларны кабул итү кагыйдәләрен камилләштерү мәсьәләләре буенча киңәшмә узды. ТР Сәнәгать министрлыгыннан киңәшмәдә кулланучылар базарын үстерү бүлеге башлыгы Резедә Миңнеханова катнашты. Киңәшмәдә әлеге категория заявкаларын авторлаштырмыйча Бердәм идентификация һәм аутентификация (ЕСИА) системасы аша тапшыру мөмкинлеге каралды. Статистика буенча, 2012-2018 еллар чорында гражданнардан сәнәгать һәм сәүдә өлкәсендә коррупциягә кагылышлы берән-сәрән генә очраклар теркәлгән.