ЯҢАЛЫКЛАР
2018 елның 29 гыйнварында Татарстан Республикасы Сәнәгать һәм сәүдә министрлыгы “Химград” АҖ белән берлектә традицион аралашу мәйданчыгы форматында полимердан эшләнгән автокомпонентларга багышланган Полимерлар көне үткәрде.
Чарада Россиядә полимердан автокомпонентлар җитештерү мәсьәләләре һәм халыкара хезмәттәшлек перспективалары, полимерларны кабельләр җитештерүдә куллану, җитештерү эшчәнлеге алып барганда чыгымнарны киметү мәсьәләләре һәм дәүләт ярдәме чаралары каралды. Шулай ук Полимерлар көне кысасында автомобильләрнең ягулык бакларын җитештерү өчен полиэтиленны бер урынга туплау буенча эшче төркем утырышы да булды.
Сәламләп, Татарстан Республикасы Премьер-министры урынбасары – сәнәгать һәм сәүдә министры Альберт Кәримов чыгыш ясады. Ул полимер автокомпонентлар җитештерү тармагын үстерүнең мөһимлеген һәм полимерларны җитештерүчеләр һәм эшкәртүчеләр арасындагы кооперация бәйләнешләрен ныгыту ярдәмендә базарны киңәйтү зарурлыгын билгеләп үтте. Министр автомобильләрнең ягулык бакларын җитештерү өчен полиэтиленны бер урынга туплау буенча эшче төркем әгъзаларына башкарган эшләре өчен рәхмәт белдерде. Төп мәсьәләләр буенча фикер алышкандагы актив позициясе өчен – “Форд Соллерс” УПны, чит илдән кертелүче Lupolen 4261AG полиэтиленына охшаш полиэтиленның тәҗрибә партиясен уйлап тапкан һәм бу материалны махсуслаштырылган лабораторияләрдә сынаган “Казан Оргсинтез” ГАҖне аерым билгеләп үтте. Альберт Кәримов полимер автокомпонентларның сәнәгать кластеры булдырылганлыгын, аның якындагы берничә елда анда катнашучыларның тизләтелгән үсешен тәэмин итәсен һәм көндәшлеккә сәләтлелеген арттырасын да ассызыклап әйтте.
Чараның шәрәфле кунагы – JVIS USAның бизнесны алга җибәрү буенча директоры Юджин Прусс Америка компаниясе үсешенең төп юнәлешләре, Татарстандагы компаундлар җитештерүче “ТатхимПласт” ҖЧҖ белән хезмәттәшлек итү тәҗрибәсе һәм илебезнең башка предприятиеләре белән хезмәттәшлек перспективалары турында сөйләде.
Полимерлар көнендә беренче тапкыр “МагнаАвтомотив Рус” АҖнең сатып алулар буенча директоры Андрей Дмитриев катнашты. Ул компаниянең пластик детальләр җитештерү өчен материалларны бер урынга туплау буенча тәҗрибәсе белән уртаклашты һәм бу вакытта компанияләрнең нинди каршылыкларга очравы турында сөйләде. Болар: озакка сузыла торган һәм кыйммәтле омологация процессы, ОЕМ таләпләренең төрлелеге, ягъни автомобиль җитештерүчеләрнең материалга карата бердәм стандарты булмау, тестларны чит илдә уздыру зарурлыгы, материал сыйфатының тотрыксызлыгы һәм зур чыгымнар.
“Химпроминжиниринг” ФҖК” АҖнең Инвестиция проектлары департаменты директоры Михаил Филимонов газ белән эшләүче моторлар сәнәгате өчен югары басымга чыдам 4 нче типтагы гадәттән тыш җиңел савытлар җитештерүне бер урынга туплау проектын тәкъдим итте. Алар автотранспорт, компримацияләнгән табигый газны транспортта ташу һәм саклау өчен тәгаенләнгән. Ул югары басымга чыдам 4 нче типтагы савытларның төп өстенлеген билгеләде: ярыклар барлыкка килми, коррозиягә бирешми, бик чыдам, корыч баллоннар белән чагыштырганда 70 процентка җиңелрәк, хезмәт итү срогы – 20 ел, гидравлик сынауларсыз гына тикшерү мөмкинлеге.
“Уралкабель” АҖ нең җитештерү буенча директор урынбасары Евгений Суходоев автомобиль тимерчыбыклары өчен пластикатлар җитештерүне Россиядә туплау зарурлыгын билгеләп үтте, чөнки хәзерге көндә барлык җитештерүчеләр дә – чит илнекеләр. Ул чираттагы Полимерлар көнен кабель сәнәгатендә компаундлар җитештерүгә бәйле мәсьәләләр буенча фикер алышуга багышлап уздыру теләген җиткерде.
Фикер алышуларда шулай ук “Казан Оргсинтез” ГАҖ, “ТатхимПласт” ҖЧҖ, “Ай-Пласт” ҖЧҖ, “ExotestRus” вәкилләре, автокомпонентлар җитештерүче “Автокомпонент” ИК” АҖ һәм “ЯПП Рус Автомобиль Системалары” ҖЧҖ; “Форд Соллерс” УП, “УАЗ” ҖЧҖ, “ГАЗ” төркеме кебек әйдәп баручы автомобиль җитештерүчеләр, фәнни учреждениеләр вәкилләре дә катнашты.
Чара йомгаклары буенча ягулык салу бакларын җитештерү өчен полиэтиленны бер урынга туплау буенча эшче төркем кысасында хезмәттәшлекне дәвам иттерергә һәм автомобильләрнең пластик детальләрен хромлауны бер урынга туплау мөмкинлеген карарга дигән карар кабул ителде. Шулай ук Татарстан Республикасы Сәнәгать һәм сәүдә министрлыгы автомобиль җитештерүчеләргә полиэтиленның чит илдән кертелүче Lupolen 4261AG полиэтиленына охшаш яңа маркасын гамәлгә кертүдә ярдәм күрсәтү буенча Россия Федерациясе Сәнәгать һәм сәүдә министрлыгы белән эшләүне дә дәвам иттерәчәк.
2018 елның 28 мартыннан 30ына кадәр “Казан ярминкәсе” күргәзмәләр үзәгендә TIAF 2018 supportedbyAutomechanika Автомобиль төзү халыкара форумы була. Ул автомобиль төзү һәм автокомпонентлар сәнәгате өчен күргәзмәне, топ-менеджмент өчен зур эшлекле форумны, автоконцерннарның сатып алулар буенча директорлары белән турыдан-туры очрашуларны, шулай ук Татарстан Республикасының җитештерү мәйданчыкларына баруны берләштерә. Күргәзмәдә Кытайдан 150дән артык китерүче һәм җитештерүче компанияләр катнашачак.
Автомобиль төзү халыкара форумы – чаралар оештыруның немецча сыйфаты югары стандартлары, әйдәп баручы – запас частьлар, автокомпонентлар һәм автосервис өчен җайланмалар җитештерүче халыкара компанияләрнең катнашуы, шулай ук традицион рәвештә Automechanika күргәзмәләре кысасында узучы күп мәгълүматлы белем бирү һәм бизнес-программа ул.
Automechanika (Автомеханика) – запас частьлар, автокомпонентлар һәм автосервис өчен җайланмалар җитештерү өлкәсендә әйдәп баручы халыкара күргәзмәләр бренды, аның чаралары инде 45 елдан артык дөньяның 12 илендә уза һәм автобизнес профессионаллары арасында гаять зур популярлыкка ия. “Automechanika” күргәзмәләре – 13000нән артык экспонентлар һәм ярты миллионнан артык килүче-профессионаллар ул. Automechanika бренды күргәзмәләренең уңышын чаралар оештыруның немецча сыйфаты югары стандартлары, әйдәп баручы – запас частьлар, автокомпонентлар һәм автосервис өчен җайланмалар җитештерүче халыкара компанияләрнең катнашуы, шулай ук традицион рәвештә Automechanika күргәзмәләре кысасында узучы күп мәгълүматлы белем бирү һәм бизнес-программа тәэмин итә.
Күргәзмә турында тәфсиллерәк мәгълүматны http://tiaf-forum.ru сайтыннан, шулай ук +7 (843) 202-29-03, +7 (843) 202-29-92 телефон/факслар аша алырга мөмкин.
25 гыйнвар көнне Россия Федерациясе Президенты Владимир Путин һәм Татарстан Республикасы Президенты Рөстәм Миңнеханов видеоэлемтә форматында “Татнефть”нең Түбән Камадагы “ТАНЕКО” нефть эшкәртү комплексында гидрочистарту һәм изомерация буенча җайланмаларны эксплуатациягә кертү тантанасында катнашты.
“ТАНЕКО” проектын үстерү планы 2023 елга кадәр исәпләнгән. Хәзерге вакытта ике җитештерү – 1,1 миллион тонналык нафтны гидрочистарту һәм 420 мең тонналы изомеризация өлешләрен сафка бастырырга әзерләр. Проект Россиядәге проектчылар һәм машина төзүчеләр белән берлектә эшләнгән, эшкә җигеләчәк җайланмаларда үзебезнең илдә җитештерелгән яңа нефть эшкәртү технологияләре урнаштырылган, алар арасында әзер технологик зур блоклар белән җайланмалар китертү дә бар.
Видеоэлемтә режимында РФ Президенты “ТАНЕКО”ның нефтьне тирәнтен эшкәртү буенча нафтны гидрочистарту һәм изомеризацияләү җайланмаларын эшкә җигү буенча команда бирде.
Владимир Путин “Татнефть” җитәкчелегенә, шулай ук Комплекс төзелешендә катнашкан проектчыларга, төзүчеләргә, инженерларга зур эшләре һәм ирешкән нәтиҗәләре өчен рәхмәтен белдерде, “Татнефть” ГАҖ, “ТАНЕКО” АҖ коллективларын зур хезмәт җиңүләре белән котлады һәм алга таба уңышлар теләде.
“Татнефть” ГАҖ матбугат хезмәте материаллары нигезендә
Россиянең Оборона министрлыгы белән “Туполев” ГАҖ авиация предприятиесе дәүләт контрактына кул куйды, документ нигезендә оборона ихтыяҗлары өчен модернизацияләнгән “Ту-160М” ракетаносецы белән тәэмин итү күздә тотыла.
Имза салу С.П.Горбунов исемендәге Казан авиация заводына сәфәре барышында Россия Президенты Владимир Путин катнашында узды. Документка РФ оборона министры урынбасары Юрий Борисов белән Берләштерелгән авиатөзелеш корпорациясе башлыгы Юрий Слюсарь кул куйды.
“Мондый самолетларның гражданлык версиясе турында да уйларга кирәк. Бездәге кебек, мондый зур территория булганда, ихтыяҗ булыр дип ышанам. Әлбәттә, бу очракта зур эшләр башкарырга туры киләчәк, ләкин ул чын мәгънәсендә төгәлли алырлык эш. Һәркемнең дә теләсә нинди түгел, ә кызыклы һәм кирәкле шөгыле булачак”, – дип билгеләде Владимир Путин.
РФ Президенты сүзләренә караганда, 10 самолетка контрактлар имзаланган, аларның һәркайсысы 15 миллиард сумнан артык бәяләнә.
“Барлыгы 160 млрд сум – 2027 елга кадәр бу заводның тулы куәтенә эшләве”, – дип ассызыклады дәүләт башлыгы.
Ту-160 — күпрежимлы, үзгәрүчән уксыман канатлы иң зур очкыч, дөньяда иң көчле хәрби машиналарның берсе.
25 гыйнвар көнне Россия Президенты Владимир Путин Казанда яңа стратегик Ту-160 ракетаносецын демонстрацияле рәвештә очыру тантанасында катнашты.
2015 елда “БАК” ГАҖ – “С.П.Горбунов ис. Казан авиация заводы” филиалы “Туполев” ГАҖ Стратегик һәм махсус авиация дивизионына керүче Ту-160 очкычын яңадан чыгара башлау турында карар кабул ителде.
Демонстрацияле очыш җир өслегеннән 300 метрлы югарылыкта узды һәм 7 минут тирәсе дәвам итте. Летчиклар төрле-төрле маневрлар ясады, шул рәвешле самолетның ныклы булуын һәм һавада көйләнә алуын тикшереп карау мөмкин булды. Президент үз исеменнән летчикларга рәхмәт белдерергә кушты.
Казан авиация заводында Ту-160 самолетлары җитештерә башлау эше әле 1984 елда ук башланган иде һәм 90 нчы еллар башында туктатылды. 2015 елда РФ Оборона министрлыгы җитәкчелеге стратегик Ту-160М2 очкычларын модификацияләнгән рәвешендә җитештерә башлау турында белдерде.
Очкычларны серияле рәвештә чыгара башлау эше 2023 елга башланып китәргә тиеш. РФ Оборона министрлыгы кимендә шундый 50 ракетаносец сатып алырга планлаштыра. Әлеге очкычны чыгару һәм Очырту-сынау станциясенә тапшыру эше узган елның ноябрендә гамәлгә ашырылды. Инде быелның март аенда самолет РФ Хәрби Көчләренә тапшырылачак.
Россия Федерациясе сәнәгать һәм сәүдә министры Денис Мантуров эш сәфәре кысаларында Казанның Симонов исемендәге сынау-конструкторлык бюросында булды. Аны Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов озата йөрде.
“Симонов исемендәге СКБ” акционерлык җәмгыятенә баштан Спорт авиациясенең сынау-конструкторлык бюросы буларак нигез салына. Ул Михаил Петрович Симонов җитәкчелегендә төзелә, соңыннан ул аның Коры СКБ генераль конструкторы, Су-27 истребительләре семьялыгын булдыручыга әйләнә. 60 нчы еллардан башлап СКБ пилотсыз тематика белән шөгыльләнә. Предприятиедә МиГ-19, МиГ-21, Миг-23, Л-29 очкычлары, Ла-17ММ мишене базасында һава мишеннәре эшләнә.
Предприятиенең үзенең шәхси җитештерү-техник базасы бар, яңа авиация техникасының сынау үрнәкләренә әзерләү, җитештерү һәм сынаулар уздыру буенча операцияләрнең күпчелек циклын гамәлгә ашыру мөмкинлеген бирә.
Визит кысаларында предприятие җитәкчелеге тарафыннан эш нәтиҗәләрен, агымдагы дәүләт контрактлары буенча башкарыла торган эшләрне демонстрацияләп, экскурсия оештырылды. Денис Мантуров электр автоматикасы стедында булды, биредә пилотсыз һава суднолары җайланмаларын төрле миссияләрне үтәгәндә санлы тикшереп карау технологияләре күрсәтелде. Алга таба кунаклар җыю бүлегенә юл алды, биредә техник үрнәкләр белән танышты. РФ сәнәгать һәм сәүдә министры шулай ук токлы җайланмаларның Инжиниринг үзәгендә дә булды. Үзәктә булган вакытта министрга әлеге үзәктә җыела һәм сынала торган поршеньле авиация двигателе һәм аз күләмле газ-турбина двигателе базасында ясалган ток җайланмалары үрнәкләрен күрсәттеләр. Алга таба әлеге ток җайланмалары төрле очкыч аппаратларында кулланылачак.
2018 елның 13 февраленнән 15енә кадәрге чорда Мәскәүдә (Крокус Конгресс Холл) 23 нче “Куркынычсызлык технологиясе” халыкара форумы узачак.
“Куркынычсызлык технологияләре” форумы ел саен һәм Федерация Советының Оборона һәм куркынычсызлык буенча комитеты ярдәмендә уздырыла торган чара.
2015 елда чарада катнашучыларның инициативасы белән Форумның оештыру комитеты аны уздыру форматын киңәйтү һәм модернизацияләү турында карар кабул итте. Куркынычсызлык Ае – форматы һәм географиясе буенча төрле, Россия Федерациясенең илкүләм куркынычсызлыгын тәэмин итүгә кагылышлы иң актуаль мәсьәләләр хакында сөйләшү һәм аларны хәл итү өчен уртак идея белән берләштерелгән чаралар циклы уздыру турында карар кабул ителде. Шул ук вакытта “Куркынычсызлык технологиясе” Куркынычсызлык аеның үзәк вакыйгасына әверелде.
Куркынычсызлык ае 2016 елның һәм 2017 елның февралендә уңышлы узды. Проект кысаларында Россия Федерациясе территориясендә төрле форматлы 500 артык чара уздырылды.
Оештыру комитеты карары нигезендә “Куркынычсызлык ае” проекты ел саен үткәрелә. Шуңа бәйле рәвештә 2018 елның февралендә төбәк һәм муниципаль дәрәҗәләрдә Россия Федерациясенең илкүләм куркынычсызлыгын тәэмин итү буенча чаралар уздыру, әлеге чараларны Куркынычсызлык аеның гомуми махсуслаштырылган календарена кертү һәм барлык мәгълүматларны месяц-безопасности.рф бердәм мәгълүмат платформасында консолидацияләү тәкъдим ителә. Мәгълүмат ягыннан булышлык күрсәтү өчен “Куркынычсызлык технологиясе” халыкара форумы дирекциясе җаваплы. Моннан тыш, “Куркынычсызлык Ае” проектын үстерү һәм үзебезнең илдә куркынычсызлыкны тәэмин итү өлкәсендә югары технологияле чишелешләргә теләктәшлек күрсәтү өчен “Куркынычсызлык технологиясе” форумы мәйданчыгында технологияләрне карау оештырылды.
Элемтә өчен: Кузьмина Екатерина Викторовна (тел. 8 (495) 647-04-42 (өст. 2219) яисә 89670496036; e-mail: kuzmina@groteck.ru).
Куркынычсызлык Аеның рәсми сайты: месяц-безопасности.рф
Россия Федерациясе Президенты, "Яңа проектлары күрсәтү буенча стратегик инициативалар агентлыгы" АКО күзәтүчелек советы рәисе Владимир Путин йөкләмәсен үтәү максатында 2018 елның 13 февраленнән 15енә кадәр ВДНХ мәйданчыгында (Мәскәү, ВДНХ, 75 пав.) Россиякүләм "Остаз" форумы узачак.
Форум остазлык хәрәкәтен үстерү, шулай ук Россия төбәкләрендә тиражлау һәм гамәлгә кертү өчен иң яхшы остазлык тәҗрибәләрен эзләү һәм җыю максатында уздырыла.
Форум кысаларында “Иң яхшы остазлык тәҗрибәләре” конкурсына йомгак ясалачак.
Конкурс 5 номинация буенча уздырылачак: “Җитештерүдә остазлык”, “Бизнеста һәм эшкуарлыкта остазлык”, “Социаль өлкәдә остазлык” һәм “Мәгарифтә һәм түгәрәк хәрәкәтендә остазлык”, “Балалар баларны өйрәтә”.
Форум эшендә Россия Федерациясенең барлык 85 субъектыннан вәкилләр, иң зур дәүләт корпорацияләреннән, федераль һәм төбәк хакимияте органнарыннан һәм бизнес өлкәләреннән вәкилләр, җитештерүдә, мәгарифтә, бизнеста, социаль өлкәдә иң танылган остазлар, профессиональ ассоциацияләрнең остазлык тәҗрибәсенә катнашы булган әгъзалары, проектларның лидерлары һәм профиль университетларның студентлары катнашачак.
Форум һәм Конкурс турында өстәмә мәгълүмат: http://asi.ru/nastavniki/forum/
Гуманитар белемнәрне тарату, җәмгыятьтә югары социаль активлыкны үстерү, Россия дәүләтенең тарихы һәм мәдәнияте белән таныштыру максатларында республика предприятиеләрендә эшләүчеләрне “Россия – минем тарих” региональ мультимедия тарих паркын карарга чакырабыз, биредә борынгы заманнардан башлап хәзергәчә дәүләтнең үсеш дәверләре турында сөйләнә.
Әлеге парк 2015 елның декабрендә Мәскәү шәһәренең Халык хуҗалыгы казанышлары күргәзмәсе территориясендә ачылган парк аналогиясе буенча төзелгән. 2017 елда аналогик тарих парклары Россия Федерациясенең 15 субъектында төзелгән. Проект Россия Федерациясе Президенты Хакимияте, Россия Федерациясе Мәдәният министрлыгы һәм Мәскәү Патриархы ярдәмендә тормышка ашырыла.
Татарстан Республикасында “Россия – минем тарих” тарих паркы 4 хронологик эзлеклелектә урнашкан экспозициядән тора. Алар “Казан ярминкәсе” күргәзмәләр үзәгенең 1 нче һәм 2 нче павильоннарында урнашкан, мәйданнары 5 500 квадрат метрдан артып китә.
1 нче павильонда “Рюриковичлар” экспозициясе һәм “Романовлар” экспозициясе урын алган.
2 нче павильонда “1914-1945: Бөек тетрәнүләрдән Бөек Җиңүгә таба” экспозициясе һәм “1945-2016: Бөек Ватан сугышында Җиңүдән 2016 елга кадәр” экспозициясе урын алган.
Тарих паркының экспозицияләр эшенә кагылышлы сораулар белән түбәндәге телефон аша мөрәҗәгать итәргә була: (843)202-29-25.
Бүген Казан Ратушасында “Россиянең иң яхшы 100 товары” программасының федераль этабында һәм “Татарстан Республикасының иң яхшы товарлары һәм хезмәтләре” конкурсының төбәк этабында 2017 ел буенча җиңүчеләрне бүләкләү тантанасы булды.
Быел конкурсның төбәк этабында 207 предприятиедән 449 товар һәм хезмәт катнашкан. Шуның 110сы – лауреат, 159ы – 1 нче дәрәҗә дипломант һәм 149ы 2 нче дәрәҗә дипломант булган. “Россиянең иң яхшы 100 товары” программасының федераль этабында 176 төрдә продукция һәм хезмәт күрсәтелгән, шуның 59ы лауреат булган.
“Ундүртенче мәртәбә уздырыла торган “Татарстан Республикасының иң яхшы товарлары һәм хезмәтләре” конкурсы елдан-ел республика тормышында әһәмиятен арттыра бара, бу исә аның хәзерге шартларда актуаль булуы турында сөйли. “Россиянең иң яхшы 100 товары” программасы кысаларында конкурс төрле юнәлештәге предприятиеләргә Татарстандагы товарларның һәм хезмәтләрнең сыйфатын арттыруга, аларның Россия Федерациясе территориясендә дә, аннан читтә дә, көндәшлеккә сәләтле булуын арттыруга стимул бирә, иң катгый конкуренция шартларында үз потенциалыңны уңышлы гына тормышка ашырырга ярдәм итә, җитештерүне алга таба камилләштерү һәм модернизацияләүгә, яңа иң алдынгы технологияләрне, инновацияләрне гамәлгә кертүгә этәрә”, – диде үзенең чыгышында Татарстан Республикасы вице-премьеры Рөстәм Нигъмәтуллин.
“Татарстан Республикасының иң яхшы товарлары һәм хезмәтләре” конкурсы үзенең гамәлдә булу чорында җитештерелгән төрле, иң яхшы дип аталу хокукына ия булган товарларга үзебезнең ил базарына юл ачты, дип тә өстәде ул. “Шушы еллар эчендә конкурста 7 мең тирәсе товар һәм хезмәт катнашты. 1400 артык катнашучы Лауреат исемен яулады”, – дип ассызыклады Рөстәм Нигъмәтуллин.
Рөстәм Нигъмәтуллин “Россиянең иң яхшы 100 товары” конкурсы номинацияләрендә җиңүчеләргә бүләкләр тапшырды. “Нижекамскшина” ГАҖ, “Яшел Үзән икмәк комбинаты” АҖ һәм “Мюстелла” ҖЧҖ компанияләре вәкилләре вице-премьер кулыннан дипломнар алды.
Үзенең сәламәләү чыгышында конкурсның оештыру комитеты рәисе, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов “Татарстан Республикасының иң яхшы товарлары һәм хезмәтләре” конкурсында җиңүчеләрне һәм лауреатларны котлады.
“Оешмалар, предприятиеләр, андагы җитәкчеләр һәм хезмәткәрләр көн саен сыйфатны арттыру һәм үз продукцияңне күрсәтүнең ни дәрәҗәдә системалы, тир түгүле хезмәт булуы хакында ишетеп кенә белмиләр. Сүз дә юк, бу эш һәр предприятиенең көндәшлеккә бик озак вакыт дәвамында сәләтле булу дәрәҗәсендә дә чагыла, бу исә, үз чиратында, Татарстан Республикасы икътисадының да озак вакытлы көндәшлеккә әзер һәм тотрыклы булуы турында аңлата”, – дип билгеләде Альберт Кәримов.
Моннан тыш, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов Татарстан Республикасының стандартлаштыру һәм метрология үзәгенә, эксперт комиссияләре җитәкчеләренә, шулай ук массакүләм мәгълүмат чараларына рәхмәт сүзләрен җиткерде. Чыгышын тәмамлап, Альберт Кәримов барысына да сәламәтлек, иминлек, яңа планнарны һәм яңа проектларны тормышка ашыруларын теләде.
Алга таба Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов “ТАИФ-НК” ААҖ, “В.Д.Шашин исемендәге “Татнефть” ГАҖ, “Түбән Кама шин заводы ЦМК” ҖЧҖ, “ТАНЕКО” АҖ, “А.М.Горький исемендәге Яшел Үзән заводы” АҖ, “ПОЗиС” АҖ, “Казан дәүләт казна дары заводы” федераль казна предприятиесе, “Ферекс” СЙ” ҖЧҖ, “Органик синтез” Казан гавами акционерлык җәмгыяте компанияләре вәкилләренә җиңүче дипломнары тапшырды.
Өстәп әйтик, узган елның ноябрендә “Татарстан Республикасының иң яхшы товарлары һәм хезмәтләре” мәгълүмат сайты эшләтеп җибәрелде, биредә республика җитештерүчеләренең иң югары сыйфатлы товарлары турында мәгълүматлар урын алган, www.bestoftatarstan.ru сайтында конкурста җиңүчеләр һәм алар тарафыннан җитештерелә торган продукция турында, конкурс экспертлары һәм илчеләре турында тулырак мәгълүмат алырга, шулай ук катнашу өчен заявка тапшырырга була.
Шунысын билгеләп узарга кирәк, федераль конкурс юнәлешләреннән берсе – импорталмаш системасын үстерүгә ярдәм итү. Сәнәгатькә булышлык күрсәтүнең яңа формаларын гамәлгә кертү зарурлыгы турында узган елның августында профильле киңәшмә барышында РФ Президенты Владимир Путин әйткән иде.
“Импорталмаш программасын вакытында тормышка ашырырга, илнең куркынычсызлыгын һәм бәйсезлеген ныгытырга кирәк. Үзебезнең ил сәнәгатендә эшлекле активлыкның үсешенә булышу, яңа, уңышлы җитештерү өлкәләре барлыкка килүне стимуллаштыру мөһим һәм, әлбәттә инде, тармакның нәтиҗәле үсешен тоткарлый торган системалы мәсьәләләрне хәл итү зарур”, – дип билгеләде ул.