ЯҢАЛЫКЛАР
2019 елның 11 ноябрендә "Казан икмәк заводы" АҖендә "Чәк-чәк" җитештерүне оптимальләштерү" пилот проектын гамәлгә ашыруга йомгак ясалды.
Проектны гамәлгә ашыру кысаларында Татарстан Республикасы Сәнәгать һәм сәүдә министрлыгы экспертлары җитәкчелегендә предприятиенең 20 хезмәткәре сакчыл җитештерү инструментларына өйрәтү узды.
Җитештерү агымында проект командасы тарафыннан сакчыл җитештерү инструментлары кертелгән һәм үрнәк участоклар булдырылган.
Проектны тормышка ашыру нәтиҗәсендә эш вакыты 2 тапкырдан күбрәк кыскартылган, цехта әзер продукция запаслары 1,5 тапкырга киметелгән, ә эшләп чыгару күләме 12%ка арткан. Оптимальләштерелгән җитештерү агымы бөтен предприятие өчен үрнәк булган.
Предприятиедә шулай ук "Казан икмәк заводы" эшче төркеме көче белән тормышка ашырылачак өстәмә проектлар да бар.
ppt.tatarstan.ru сайтындагы мәгълүматлар буенча
POZIS (Ростех дәүләт корпорациясенең "Техмаш" концернына керә) "Хезмәт җитештерүчәнлеге һәм эш белән тәэмин итүгә ярдәм күрсәтү" илкүләм проекты кысаларында 3,3 млн сум субсидия алган.
Завод Яшел Үзәннең халыкны эш белән тәэмин итү үзәге белән персоналны бюджет акчалары хисабыннан укытуга субсидия бирү турында килешү төзегән.
Мондый мөмкинлекне предприятие "Хезмәт җитештерүчәнлеге һәм эш белән тәэмин итүгә ярдәм күрсәтү" илкүләм проектында катнашу нәтиҗәсендә алган.
"ПОЗиС" АҖ – үзенең укыту үзәге булган Россиядәге аз санлы предприятиеләрнең берсе, аның ресурсларын әлеге проектны гамәлгә ашыру өчен кулланырга мөмкин. Мәсәлән, уку-укыту программаларын шәхси производствога яраклаштырырга.
Программа нигезендә, әгәр бу хәл хезмәткәрләрне эш белән тәэмин итүгә һәм хезмәт җитештерүчәнлеген арттыруга ярдәм итә икән, предприятиенең һәр хезмәткәре белем үзләштерү мөмкинлегенә ия.
Моннан тыш, проект шартлары буенча катнашучы предприятие өчен дәүләт ярдәме чаралары да каралган: "Хезмәт җитештерүчәнлеге өлкәсендәге компетенцияләрнең федераль үзәге"нең алдынгы экспертларын түләүсез нигездә җәлеп итү мөмкинлеге бар.
Бүгенге көндә Татарстанда әлеге проект кысаларында 2 меңнән артык кеше яңадан белем алуга керешкән, меңгә якын белгеч укуларын тәмамлаган инде.
"ПОЗиС" АҖ матбугат хезмәте материаллары буенча
Татарстан Республикасы Сәнәгать һәм сәүдә министрлыгында төбәкләрдән килгән коллегалар белән очрашу узды: чарада Новосибирск өлкәсенең сәнәгать, сәүдә һәм эшкуарлыкны үстерү министры урынбасары Максим Останин һәм Киров өлкәсе сәнәгать сәясәте министры урынбасары вазыйфаларын башкаручы Екатерина Королева катнашты.
Бу атнада Максим Останин Татарстан Республикасына ваклап сату өлкәсендә тәҗрибә уртаклашу өчен килде, аерым алганда, аны республикада автолавкалар эшчәнлеге мәсьәләләре кызыксындыра иде.
Автолавкалар стационар азык-төлек кибетләре булмаган ерак һәм аз халык яши торган пунктларда стационар булмаган сәүдә нокталарыннан гыйбарәт. Татарстан Республикасында алар 2014 елдан бирле эшли.
Автолавкалар мондый торак пунктларда яшәүчеләргә билгеләнгән исемлек нигезендә беренче кирәкле товарларны һәм башка продуктларны сатып алу мөмкинлеген бирә.
Бүгенге көндә Татарстанда 185 автолавка эшли, алар 895 якын ерак һәм аз халыклы торак пунктларга хезмәт күрсәтә.
Фикер алышу өчен икенче мәсьәлә төнге вакытта алкогольле продукция белән сәүдә итү үзенчәлекләре булды. Татарстан Республикасында сату махсус таләпләр нигезендә җәмәгатьне тукландыру йортларында – барлар, кафе, рестораннар буенча гамәлгә ашырыла.
Бүген министр урынбасары Алмаз Хөсәенов Екатерина Королева белән очрашты. Киров өлкәсе Сәнәгать сәясәте министрлыгы вәкилен Татарстанда "Хезмәт җитештерүчәнлеге һәм эш белән тәэмин итүгә ярдәм итү" һәм "Халыкара кооперация һәм экспорт" илкүләм проектларын тормышка ашыру тәҗрибәсе кызыксындыра иде.
Кунак сорауларына җавап биреп, Татарстан Республикасы Сәнәгать һәм сәүдә министрлыгы белгечләре республикада сәнәгать предприятиеләре белән аларны җәлеп итү һәм илкүләм проектларда катнашу буенча үзара хезмәттәшлекнең ничек җайга салынуы турында сөйләделәр.
Бүгенге көндә "Хезмәт җитештерүчәнлеге һәм эш белән тәэмин итүгә ярдәм итү" илкүләм проектында 62 республика предприятиесе катнаша. Министрлыктан һәм "Татарстан Республикасы Министрлар Кабинеты каршындагы Энергияне сак тоту технологияләре үзәге"ннән илкүләм проектларның кураторлары предприятие җитәкчеләре белән шәхси эш алып бара, аларга илкүләм проектта катнашуның уңай нәтиҗәсе турында сөйлиләр.
Яклар шулай ук республикадагы сәнәгать предприятиеләренең эре дәүләт корпорацияләре белән кооперация өлкәсендәге тәҗрибәсе турында да фикер алышты.
tps.tatarstan.ru сайтыннан алынган фотолар кулланылды
1 нче октябрьдә Татарстан Республикасы Сәнәгать һәм сәүдә министрлыгында "Хезмәт җитештерүчәнлеге һәм халыкны эш белән тәэмин итүгә ярдәм итү" ("Хезмәт җитештерүчәнлеге һәм эш белән тәэмин итүгә ярдәм итү" илкүләм проекты составына керә) төбәк проектын гамәлгә ашыру мәсьәләләренә багышланган киңәшмә узды.
Министр урынбасары Алмаз Хөсәенов рәислегендә узган киңәшмәдә "Татарстан Республикасы Министрлар Кабинеты каршындагы Икътисадый һәм социаль тикшеренүләр үзәге" дәүләт автоном учреждениесенең компетенцияләр үзәге, Татарстан Республикасы Хезмәт, халыкны эш белән тәэмин итү һәм социаль яклау министрлыгы, шулай ук хезмәт җитештерүчәнлеген арттыру чараларын гамәлгә ашыруда катнашучы республика предприятиеләре вәкилләре катнашты.
Моннан тыш, киңәшмә эшендә илкүләм проектны потенциаль башкаручы оешмалар да катнашты. Мондый "консультантларның" төп функциясе – предприятиеләр белән берлектә алга таба бөтен производствога тиражлау өчен үрнәк агым булдыру.
Предприятие өчен консультантларның эше бушлай. Түләү федераль бюджет акчалары хисабына башкарылачак.
Киңәшмә предприятиеләр тарафыннан зур кызыксыну уятты, аларның вәкилләре үзләрен кызыксындырган сорауларны бирә алды. Мәсәлән, "Экспортны үстерү акселераторы" һәм "Җитештерүчәнлек лидерлары" белем бирү программаларында катнашу, хезмәткәрләрне яңадан укыту һәм квалификацияләрен күтәрү өчен субсидияләр алу һәм башкалар турында.
Алмаз Хөсәенов ассызыклаганча, илкүләм проектта катнашу ирекле һәм оештыру ягыннан гади булып тора:
"Предприятие компетенцияләрнең федераль үзәге сайтына кереп, төймәгә басып, илкүләм проектта катнашуга языла, ягъни барысы да бик гади", – дип аңлатты ул.
Татарстан предприятиеләрендә Россия икътисады үсешенең локомотивы булу өчен бөтен мөмкинлекләр дә бар. Хезмәт җитештерүчәнлеге өлкәсендә Федераль компетенцияләр үзәге генераль директоры Николай Соломон әнә шулай дип белдерде.
"Безнең республикада 2011 елдан бирле хезмәт җитештерүчәнлеген арттыру программасы гамәлгә ашырылып килде, – дип искәртте ТР сәнәгать һәм сәүдә министры Альберт Кәримов республикада илкүләм проектны гамәлгә ашыруга багышланган семинарда. – Бу юнәлеш "Стратегия 2030"да билгеләнгән максатка ирешүнең төп резервы булып тора. Татарстан глобаль конкурентлыкка сәләтле төбәк булырга тиеш. Нәкъ менә югары хезмәт җитештерүчәнлеге безнең икътисадның конкуренциягә сәләтлелегенең төп күрсәткече булып тора. Ә бүген бу бурыч Россия Президенты Указы белән дәүләтнең өстенлекле дәрәҗәсенә чыгарылды".
Исегезгә төшерәбез, республика илкүләм проектка 2017 елда кушылды. Якындагы биш елда 351 компания сакчыл җитештерү инструментларын үзләштерер дип планлаштырыла.
Производительность.рф сайтына 70 гариза кергән инде. Проектта чимал булмаган 5 тармактан оешмалар катнаша ала: эшкәртү сәнәгате, авыл хуҗалыгы, төзелеш, транспортлау һәм саклау, шулай ук ТКХ. Дәүләт ярдәменең төрле чаралары аларга сыйфатлы яңа дәрәҗәгә чыгарга ярдәм итәчәк. Ә хезмәт җитештерүчәнлеген арттыру Татарстан халкының тормыш дәрәҗәсен күтәрәчәк.
Тэглар: нацпроект производительность труда поддержка занятости
Бүген Яшел Үзәндә "Хезмәт җитештерүчәнлеге һәм халыкны эш белән тәэмин итүгә ярдәм итү" илкүләм проектының Россия Президенты Владимир Путин тарафыннан билгеләнгән бурычларын тормышка ашыру мәсьәләләренә багышланган семинар узды. Чара Горький исемендәге Мәдәният үзәгендә узды. Чараны оештыручылар – Татарстан Республикасы Сәнәгать һәм сәүдә министрлыгы, Татарстан Республикасы предприятиеләре һәм сәнәгатьчеләре ассоциациясе, шулай ук Төбәк компетенцияләр үзәге.
Чарада икътисадның чимал булмаган тармаклары – эшкәртүче производство, төзелеш, авыл хуҗалыгы, транспорт һәм башка 90 артык предприятие вәкилләре катнашты.
Чарада Татарстан Республикасы Премьер-министры урынбасары –Татарстан Республикасы сәнәгать һәм сәүдә министры Альберт Кәримов та катнашты: «Татарстан Республикасы Хөкүмәте һәм Президенты ягыннан производствода хезмәт җитештерүчәнлеген арттыру темасына аерым игътибар бирелә. Хезмәт җитештерүчәнлеге икътисад үсеше һәм аның конкуренциягә сәләтен арттыру резервларының берсе булып тора. Татарстан глобаль конкуренциягә сәләтле төбәк булырга тиеш – нәкъ менә шундый бурычлар куелган безнең алда".
Очрашуның модераторы ТР ПСА Президенты Александр Лаврентьев булды, ул билгеләп узганча: "Предприятиеләрнең җитештерүчәнлеген арттыру буенча илкүләм проектта катнашуы аларга иң прогрессив һәм нәтиҗәле дөньякүләм методикаларны гамәлгә кертергә, шулай ук үсеш өчен Сәнәгатьне үстерү фондыннан финанслауда катнаша алу мөмкинлеген бирәчәк".
Катнашучылар алдында шулай ук "Татарстан Республикасы Министрлар Кабинеты каршындагы Энергияне сак тоту технологияләре үзәге" ДАУ, Татарстан Республикасы Хезмәт, халыкны эш белән тәэмин итү һәм социаль яклау министрлыгы, шулай ук республиканың сәнәгать предприятиеләре – "А.М.Горький исемендәге Яшел Үзән заводы" АҖ, "КВАРТ" АҖ, "КМПО" АҖ һәм "Казан электроприбор заводы" ААҖ җитәкчелеге чыгыш ясады.
Аларның докладларының төп темалары әлеге илкүләм проектта катнашучы предприятиеләр өчен каралган дәүләт ярдәме мөмкинлекләре һәм чаралары, шулай ук хезмәт җитештерүчәнлеген арттыру буенча эшләрне гамәлгә ашыру буенча үз предприятиеләре тәҗрибәсе булды.
"Горький исемендәге Яшел Үзән заводы" АҖ генераль директоры Александр Карпов үз чыгышында болай диде: "Кешеләр җәлеп ителә һәм инициативалы була башлады, заводта рационализаторлык буенча эш алып барыла, ә методикаларны куллануның икътисадый нәтиҗәсе мине чын-чынлап гаҗәпләндерде".
"КВАРТ" АҖ баш инженеры Рәшидә Хөсәенова: "Без Сакчыл җитештерү инструментларын кертү тәҗрибәсен тиражларга планлаштырабыз, чөнки икътисадый нәтиҗәне тойдык һәм хезмәт җитештерүчәнлеген арттыру буенча методикаларны гамәлгә кертүне предприятиенең барлык участокларында да, хәтта административ участокларында да файдалы дип саныйбыз".
"Бүген семинарда предприятиеләрдә хезмәт җитештерүчәнлеген арттыру буенча тупланган тәҗрибә һәм компетенцияләр тәкъдим ителде. Асылда, предприятиедә проект эшчәнлеген дөрес оештыру төп фактор булып тора, шул ук вакытта уңыш предприятие җитәкчесе ихтыярына һәм әлеге проектка хезмәткәрләрнең җәлеп ителүенә бәйле", – дип ассызыклады очрашу ахырында министр.
Өстәмә:
"Хезмәт җитештерүчәнлеге һәм эш белән тәэмин итүгә ярдәм итү" илкүләм проекты кысаларында түбәндәге ярдәм чаралары каралган:
федераль һәм төбәк компетенцияләр үзәкләре экспертларын түләүсез җәлеп итү, яңадан укыту һәм хезмәткәрләрнең квалификациясен күтәрү өчен субсидияләр бирү,
хезмәткәрләрне хезмәт җитештерүчәнлеген арттыру инструментларына өйрәтү,
предприятиеләрнең экспорт потенциалын үстерүгә ярдәм итү программасына керү,
идарәче кадрларны укыту программасын узу мөмкинлеге,
"Хезмәт җитештерүчәнлеге" программасы буенча проектларны гамәлгә ашыру өчен Сәнәгатьне үстерү фондыннан еллык 1% ташламалы кредит бирү.
Тулырак мәгълүматны төбәк компетенцияләр үзәгендә алырга мөмкин, тел.: (843) 272-19-41, 272-19-21, элемтә өчен: Шамил Бәйрәмов – директор урынбасары – РКҮ җитәкчесе ( Казан ш.).
Илкүләм проектта катнашу өчен гаризаны ppt.tatarstan.ru яки производительность.рф сайтына бирергә була.
СЕМИНАР МАТЕРИАЛЛАРЫ:
РКҮ, Әхмәров М.Р. (презентация)
Бүген Альберт Кәримов В.А.Белугин исемендәге "Цифрлы икътисад" үзәге вәкилләре белән киңәшмә үткәрде, үзәк белгечләре Татарстан предприятиеләрендә хезмәт җитештерүчәнлеген арттыру буенча үз проектларын тәкъдир итте.
"Җитештерү процессларын планлаштыру һәм мониторинглау программа-аппарат комплексы" дигән шартлы исем астындагы проектлар республиканың сәнәгать предприятиеләрендә 2017 елдан башлап гамәлгә ашырыла.
Мондый комплекс предприятиеләрдә цифрлы икътисад элементларын кертү хисабына хезмәт җитештерүчәнлеген 20-40% арттырырга ярдәм итә. Ә атап әйткәндә,
- "санлы эш үзәкләре" кысаларында җитештерү персоналының һәм җитештерү җиһазларының үзара хезмәттәшлеген оештыруда
- җитештерү планын формалаштыру өчен цифрлы мониторингның математик методларын һәм инструментларын куллануда
- бер цех кысаларында җитештерүне планлаштыру, исәпкә алу һәм мониторинглауда
- реаль вакыт режимында җиһазлар мониторингында, ул исә эшсез тору сәбәпләрен вакытында ачыклау һәм бетерү мөмкинлеген бирә.
Очрашуда әлеге программа эше турында республиканың башка министрлыклары һәм ведомстволары вәкилләреннән уңай фикерләр әйтелде. Алга таба комплексны республика мәнфәгатьләрендә куллану буенча тәкъдимнәр формалаштыру планлаштырыла.
Бүген Партия Генераль советы Президиумының илкүләм проектларны тормышка ашыру буенча контрольлек төркеме эш визиты белән "Вакууммаш" АҖ килде.
Төркем әгъзалары арасында – РФ Дәүләт Думасы депутатлары Светлана Бессараб һәм Дмитрий Скриванов, шулай ук РФ Федерация Советы әгъзасы Юрий Федоров.
Визит кысаларында контрольлек төркеме "Вакууммаш" АҖ вәкилләре белән "Хезмәт җитештерүчәнлеген арттыру һәм халыкны эш белән тәэмин итүгә ярдәм итү" илкүләм проектын гамәлгә ашыру нәтиҗәләре турында фикер алышты.
Фикер алышуда Татарстан Республикасы сәнәгать һәм сәүдә министры урынбасары Алмаз Хөсәенов, Татарстан Республикасы Министрлар Кабинеты каршындагы Татарстан Республикасы ЭСТҮ ДАУ компетенцияләре төбәк үзәге вәкилләре һәм завод хезмәткәрләре катнашты.
Предприятиенең баш инженеры Сергей Голоднов презентация үткәрде, анда илкүләм проектны производствога кертү нәтиҗәләре, аны гамәлгә ашыруның икътисадый нәтиҗәләре, шулай ук предприятиенең киләчәккә булган планнары турында сөйләде.
Презентациядән соң чарада катнашучылар "Вакууммаш" АҖ эш цехларында булды, анда алар илкүләм проектны гамәлгә кертү нәтиҗәләрен турыдан-туры күрде һәм завод хезмәткәрләренә үзләрен кызыксындырган сорауларны бирде.
"Вакууммаш" АҖ илкүләм проектта 2018 елдан башлап катнаша, аның кысаларында заводта "2НВР-60Д һәм 2НВР-90Д насосларын ясау агымында хезмәт җитештерүчәнлеген арттыру" пилот проекты эшли башлаган. Хәзерге вакытта заводта процесс вакытын киметү, тәмамланмаган җитештерүне киметү һәм хезмәт җитештерүчәнлеген арттыру күрсәткечләренә ирешү буенча бурычлар уңышлы хәл ителә.