ЯҢАЛЫКЛАР

25 майда «Казан милли тикшеренү технология университеты» федераль дәүләт бюджет югары белем бирү мәгариф учреждениесенең сәләтле балаларга химик тирәнтен белем бирү лицей-интернатын тәмамлаучылар өчен «соңгы» кыңгырау яңгырады. Тантананың сәбәпчеләрен сыйныф җитәкчеләре белән бергә мактаулы кунаклар, ата-аналар, педагоглар, тәрбиячеләр һәм лицей укучылары, узган елда тәмамлаучылар каршы алды.

Әлеге дулкынландыргыч һәм бәйрәм көнендә чыгарылыш сыйныфларын  лицей директоры Лилия Ибрашева, Казан милли тикшеренү технология университетының даими белем бирү буенча проректоры, профессор Любовь  Овсиенко, Татарстан Республикасы Яшел Үзән муниципаль районы Башкарма комитеты җитәкчесе урынбасары – Мәгариф идарәсе башлыгы Раиса Афанасьева, «Йокогава Электрик СНГ» чикләнгән җаваплылыктагы җәмгыять филиалы директоры Алексей Анохин, Татарстан Республикасы Сәнәгать һәм сәүдә министрлыгының корпоратив идарә бүлеше башлыгы Андрей Фёдоров котладылар.

Бу көнне лицейда уку елын бишле билгеләренә генә тәмамлаучы 9 һәм 11 сыйныфтагы 13 укучыга алтын медальләр тапшырылды. Җиденче сыйныф укучылары лицейны тәмамлаучыларга көлкеле һәм шаярулы котлаулар әйттеләр. Лицейны тәмамлаучылар укытучыларга, тәрбиячеләргә карата үзләренең рәхмәт сүзләре белән чыгыш ясадылар. Аларның һәрберсе исеменә оригиналь җыр башкардылар һәм махсус дипломнар бүләк иттеләр, шулай ук «Ботаниклар» дип аталган заманча бию күрсәттеләр һәм искиткеч вальс биеделәр. 9 сыйныф укучылары шигырьләр сөйләделәр һәм гитара белән дулкынландыргыч җыр башкардылар. Укуны тәмамлаучылар сыйныф җитәкчеләренең барсына да төсле комнан бәхет бөтиләре ясаганнар. Салават күперенең җиде төсе мәктәп тормышы турында иң яхшы истәлекләр калдырачак. Ата-аналар лицейның педагоглар коллективына тирән рәхмәтләрен белдерделәр һәм укучыларга җылы теләкләр теләделәр. Соңгы кыңгырау мәктәп тормышының йомгаклау аккорды булып яңгырады. Аны чыңлату хокукына җиденче сыйныф укучысы Азалия Сафия ия булды. Ахырда укуны тәмамлаучылар үзләренең күңелләре түрендәге теләкләрен теләп һавага күгәрченнәр һәм шарлар җибәрделәр. Әлеге шарлар төрле төстәге нокталар булып югарыга омтылдылар һәм тормышның тагын бер сызыгы артта калды.

2017 елның 10 июненнән 10 сентябренә кадәр Астана шәһәрендә (Казахстан Җөмһүрияте)  «Киләчәк энергиясе» темасына Халыкара ЭКСПО-2017 махсуслаштырылган күргәзмәсе узачак.

Россиянең ЭКСПО-2017дә катнашу кысаларында энергетика өлкәсендәге иң әһәмиятле юнәлешләргә багышланган халыкара эш программасы оештырылачак. Гаять зур энергетик тигезлекне эзләү төп тема булып торачак. Программа шартлы рәвештә тематик бүлекчәләрдән тора. Әлеге бүлекчәләрнең дәвамлылыгы 1 атна дәвам итәчәк.

Россия тәкъдим итәчәк күргәзмә ЭКСПО-2017дә иң зурларның берсе булып тора һәм 1000 кв.метр мәйданны тәшкил итә. Күргәзмә зонасы дөньядагы бердәнбер Рус Арктикасы табигать регионы үрнәгендә илебездәге энергетик потенциалның темасын ача.

Күргәзмәгә килүче керү белән «Энергия порталына» (ENERGY PORTAL) эләгә. Төп экспозиция белән танышу «Арктика энергиясе» дип аталган кереш инсталляциядән башлана. Ялтырап торучы Арктика бозларыннан, төнъяк балкышы һәм башка тамаша төрләреннән торган күпкырлы декорация Арктика регионының мохитын тудырачак.

Илебездә атом өлкәсен үстерү һәм аның казанышлары «Поляр ярым сфера» дип аталган мультимедиалы күргәзмәдә яктыртылачак. Күргәзмәгә килүчеләр монда Җирнең арктик ноктасындагы мохитка эләгәчәкләр һәм теләге булган һәр кеше тәэсирле Арктикага кагыла алачак.

«Киләчәк энергиясе» илебезнең энергетикасы өлкәсендәге казанышларга һәм гидроэнергетикадагы, күмер-водород өлкәсендәге, альтернатив һәм яңаручы энергетикадагы эшләнмәләргә багышланган тематик бүлекчәләрдә чагылачак.

«Россиядә экология елы»на ярдәм итү кысаларында күргәзмәдә шулай ук яшәп китүче экология тәртипләрен, үсемлекләр һәм хайваннар дөньясын саклап калу темасы да тәкъдим ителәчәк. Күргәзмәгә килүчеләр «Арктиканың табигате», «Арктиканың су асты дөньясы. Шельф», «Арктиканың үсемлекләр һәм хайваннар дөньясы. Бозлар» дип аталган хәрәкәтчән видео-инсталляцияләрне күрәчәк. Аеруча игътибар сирәк очрый торган хайваннарны саклау һәм аларны арттыру турындагы проектларга юнәлтеләчәк.

Күргәзмә ахырында кунаклар ЭКСПО-2017нең өч ай буе эшләү дәверендә халыкара күпкырлы күргәзмә темасы буенча Россия ширкәтләре һәм регионнары тарафыннан оештырылган алдынгы технологияләрне һәм икътисади көч-куәтне күрсәтүче, алмаштырыла торган экспозицияләр зонасына эләгәчәкләр.

 Россиянең ЭКСПОдагы мәдәни программасы проектның төп чараларына өстәмә булачак. ЭКСПО кысаларында Россия регионнарының фестивале узачак. Әлеге фестивальдә Россиянең төрле почмакларыннан килгән артистлар һәм иҗади коллективлар катнашачак.

Тәфсилле программа белән Россия павильоны сайтында таныша аласыз (http://www.russiaexpo2017.ru/partners-and-participants/preliminary-program/).

2017 елның 25 маенда Татарстан Республикасы Премьер-министры урынбасары – Татарстан Республикасының Сәнәгать һәм сәүдә министры Альберт Кәримов Татарстан Республикасы Президенты Рөстәм Миңнехановның Беларусь Республикасы Премьер-министры Андрей Кобяков белән очрашу чарасында катнашты.

Кунакларны каршы алганда Рөстәм Миңнеханов: «Белоруссия делегациясенең республикага килүе Россия Федерациясе белән Беларусь Республикасы арасындагы дусларча мөнәсәбәтләрне ныгытуга юнәлдерелгән татарстан-беларуссия хезмәттәшлеген үстерүнең хәзерге халәте һәм алдагы киләчәге турында фикер алышу өчен бик яхшы мөмкинлек», - дип билгеләп узды. «Татарстанга бу килүегез үзара файдалы элемтәләрне киңәйтүгә яңа этәргеч бирер дип, ышанабыз» - дип ассызыклады Татарстан Республикасы Президенты.

Рөстәм Миңнеханов, 2016 ел нәтиҗәләре буенча Татарстан һәм Беларусь арасындагы товар әйләнешенең гомуми күләме $700 млн. тәшкил итүе турында хәбәр итте. Шул ук вакытта, ул булган мөмкинлекләр тулы күләмдә кулланылмый, сәүдә-икътисади һәм инвестиция хезмәттәшлеген киңәйтү буенча күп көч куярга кирәк дип саный.

Андрей Кобяков үз чиратында Белорусьтан килгән кунакларны эчтәлекле кабул итүләре өчен республика җитәкчелегенә рәхмәт белдерде. «Казанда шундый эре халыкара чара узу сәбәпле, вакытыгыз тыгыз булуга карамастан, очрашуга вакыт табуыгыз өчен Сезне тирән ихтирам итәбез», - дип  Рөстәм Миңнехановка мөрәҗәгать итте ул.

Андрей Кобяков сүзләре буенча, россия регионнары арасында Татарстан Белорусьның иң мөһим сәүдә партнерларының берсе булып тора. «Бүгенге көндә без үзара товар әйләнеше күләмен үстерү юлына чыктык. Киләкчәктә машина төзү өлкәсендә җитештерү кооперациясен үстерү юнәлешендә, фәнни-техник хезмәттәшлек һәм мәдәни элемтәләр өлкәсендә дә эшләргә өметләр бар», дип өстәде Беларусь Республикасы Премьер-министры.

Исегезгә төшерәбез, Андрей Кобяков Казанга БДБ хөкүмәтләре башлыклары советы һәм Евразия хөкүмәтара советы утырышы кысаларында узучы чараларда катнашу өчен килде.

Мәкалә Татарстан Республикасы Президентының матбугат хезмәте материаллары нигезендә язылды.

Мәскәүнең "Крокус Экспо" күргәзмә комплексында 25-27 майда  узачак HeliRussia-2017 вертолет индустриясенең 10-нчы Халыкара күргәзмәсендә "Россия Вертолетлары" холдингы гражданлык һәм хәрби вертолетларының киң спектрын тәкъдим итәчәк.

HeliRussia экспозициясендә күпмаксатлы урта Ми-38 вертолеты һәм төрлечә җиһазландырылган өч Ансат вертолеты күрсәтеләчәк. "Россия Вертолетлары" стендында күргәзмәдә катнашучылар һәм кунаклар холдинг тарафыннан җитештерелә торган вертолетларның барлык линейкасы белән таныша алачаклар.

HeliRussia-2017 аерым пункты пилотыз очу аппаратлары тематикасына биреләчәк. «ВР-Технологии» конструкторлык бюросы күргәзмәдә заманчалаштырылган пилотсыз – конвертопланның эксперименталь үрнәген тәкъдим итәчәк,  хәзерге вакытта пилотсыз үрнәк очу сынаулары уза.

Моннан тыш, холдинг белгечләре чараның эшлекле программасында актив катнашырга ниятли вә Россия һәм чит ил партнерлары белән берничә очрашу уздыруны планлаштыра.

"Гадәттәгечә, без HeliRussia-2017 вертолет индустриясенең Халыкара күргәзмәсендә актив катнашабыз һәм бу ел гына әлбәтә искәрмә булмаячак. 10-нчы юбилей күргәзмәсе кысаларында холдинг катнашында берничә истәлекле вакыйга узачак, аерым басым санитария авиациясенә ясалачак. HeliRussia без заказ бирүчегә тантаналы медицина ягыннан җиһазландырылган Ансат вертолетын тапшырырга ниятлибез", - дип белдерде "Россия Вертолетлары" Холдингы генераль директоры Андрей Богинский.

Бүген Иннополиста “Сәнәгый Россиянең Цифрлы индустриясе-2017” конференциясе эшен башлады (ЦИПР). Шунысын билгеләп үтәргә кирәк, әлеге тармакта бу елның төп вакыйгасы.

Дисскусияләр кысаларында ясалган нәтиҗәләр ил җитәкчелеге тарафыннан кабул ителәчәк карарлар нигезенә ятачак, -дип билгеләде оештыручылар. Экспертлар сыйфатында конференциядә Россия Президены киңәшчеләре, министрлар, регион башлыклары, Россия һәм чит илнең эре компанияләре вәкилләре чыгыш ясаячаклар.

Өстәп шунысын әйтик, эшлекле программа кысаларында Россия IT-базары лидерлары арасында дистәләгән килешү имзаланачак, Россиядә цифрлы икътисад темасына багышланган 20 дән артык түгәрәк өстәл узачак.

ЦИПР кысаларында Иннополиста тагын бер конференция – «Россия Интернет Форумы – 2017» узачак.

24 майда «КНИТУ» югары уку йортының химияне тирәнтен өйрәнү сәләтле балалар лицей-интернатында иң максатчан һәм талантлы укучыларны бүләкләделәр.

Лицейның  актлар залында традициягә кергән бәйрәм – «Менделеевск өмете  – 2017» узды.  Тантаналы чарада админисрация һәм мәртәбәле кунаклар уку алдынгыларын, олимпиада һәм төрле конкурсларда җиңүчеләрне, призерларны котладылар, дипломнар һәм бүләкләп тапшырдылар.

Бәйрәмдә укучылар үзләрен иҗади яктан да күрсәттеләр. Баянда Наргиз Шерова, саксофонда Дмитрий Полушин матур итеп уйнадылар.

2017 елның 23 маенда Түбән Камада Химиклар көнен билгеләү тантанасы узды.

Бәйрәмнең шәрәфле кунаклары ТР Премьер-министры Алексей Песошин, ТР Премьер-министры урынбасары – ТР сәнәгать һәм сәүдә министры Альберт Кәримов, РФ сәнәгать һәм сәүдә министрлыгының химия-технология һәм урман сәнәгате комплексы Департаменты директоры урынбасары Александр Орлов, ТР профсоюзлар Федерациясе рәисе Татьяна Водопьянова, Түбән Кама муниципаль районы Башлыгы Айдар Метшин булдылар. Чарада шулай ук, министрлык һәм ведомство вәкилләре дә катнаштылар.

“Нефтехимик” Боз сараенда билгеләп үтелгән Химиклар көнен бәйрәм итүдә 4 меңнән артык кеше – химия тармагы предприятиеләре җитәкчеләре һәм хезмәткәрләре, югары уку йортлары укытучылары һәм студентлары, мәктәп укучылары катнашты.

Чараны ТР сәнәгать һәм сәүдә министрлыгы, Түбән Кама мэриясе, “Түбән Кама нефтехим”, “ТАИФ” оешмалары, «Татнефть» компаниясе и Казан Милли –Тикшеренү Техник университеты оештырдылар.

Бәйрәм тантанасы алдыннан катнашучылар республиканың нефтехимия кластеры предприятиеләренең продукцияләре күргәзмәсен карадылар. Үзләренең экспозицияләрен «Түбән Кама нефтехим», «Татнефть» компаниясе төркеме, «ТАИФ», «Казаноргсинтез», «ТАСМА» һәм башкалар күргәзмәдә җәелдерделәр.

Зур сәхнәдә Татарстан химия предприятиеләренең хезмәт династиясе вәкилләрен, химия фәне үсешенә зур өлеш керткән галимнәрне, галим-җитештерүчеләрне, рационализаторларны тәбрикләделәр.

Бәйрәмнең рәсми өлешен ТР Премьер–министры Алексей Песошин тәмамлады. Ул Татарстан Президенты исеменнән  республика нефть химиячеләрен һөнәри бәйрәмнәре белән котлады. Премьер-министр ассызыклап үткәнчә, нәкъ менә нефть химиясе тармагы республика икътисады үсешенең локомативы булып тора. Алга таба Татарстанның нефть химиясе предприятиеләре алдынгыларына дәүләт бүләкләрен тапшыру тантанасы булды.

Бәйрәм Россия йолдызлары "Иванушки International" төркеме чыгышы белән тәмамланды.

«1С:Ел проекты» халыкара конкурсы нәтиҗәләре нигезендә «Татнефть» ширкәтенең ике проекты «1С:Предприятие 8» платформасында корпоратив автоматлаштыру буенча җиңүгә иреште.

Конкурс «1С:Предприятие 8» системасы чишелешләрен гамәлгә кертү проектларын автоматлаштыруда һәм алга таба куллануда зур уңышларга ирешкән кулланучыларны һәм партнерларны табу максатыннан оештырыла. Барлыгы 100 гариза кабул ителде, шулар арасындагы 79 проектка конкурста катнашуга рөхсәт бирелде.

Проектлар һөнәри жюри тарафыннан бәяләнде. Жюри составына эре предприятиеләрнең җитәкчеләре, профильле киңәшчеләр, журналистлар, «1С» фирмасы белгечләре керде.

«КАМАЗ» гавәми акционерлык җәмгыяте үстерү бүлегенең миллион сумлык икътисади нәтиҗәгә ия булган проектын эшләгән инженер-конструкторларына эшләрен дәвам итүне йөкләделәр.

«КАМАЗ» гавәми акционерлык җәмгыятенең үстерү буенча директоры Ирек Гомәров уздырган инвестиция комитеты утырышында төркемнең эш нәтиҗәләре тәкъдим ителде. Шулай итеп, «Евро-4» экостандарт автомбильләре өчен алты сервис китабы эчтәлегенең бер китапка берләшүе нәтиҗәсендә типографиядә бастыру өчен кирәк булачак миллион сум акча сакланып калды. Нәтиҗәдә, Ирек Гомәров төркемгә гамәлдәге проектның дәвамы булачак яңа проект эшли башларга йөкләмә бирде.

Проект барышында кәгазьдәге документлардан баш тартып тулысынча электрон сервислы китапларга күчү планлаштырыла. Бу фикерне «КАМАЗ»ның финанс директоры Андрей Максимов хуплады. Мондый форматтагы сервислы китапны чыгара башлаган очракта бастыру өчен киткән чыгымнар турында онытырга мөмкин. Проектны «Евро-5» һәм аннан да югары экокласслы йөрткече булган автомобильләрдә тормышка ашыру планлаштырыла. Проектны гамәлгә кертү өчен команда төзелде, аңа яңа белгечләр дә керде.

Казан вертолет заводында металлны кисеп эшкәртүче мөһәндис-технологлар (инженер-технологлар) арасындагы тармакара һөнәри осталык конкурсы тәмамланды. Ярышларда катнашу өчен ике төркемдә Россиянең иң яхшы авиация оешмалары җыелды: 30 яшькә кадәр һәм 30 яшьтән соң.

30 яшькә кадәр булган төркемдә «Казан вертолет заводы» гавәми акционерлык җәмгыятенең мөһәндис-технологы Шипигин Сергей Вячесловович җиңүче дип билгеләнде. Икенче урынны «КумАПП» акционерлык җәмгыяте вәкиле Семавина Мария Николаевна яулады. Шулай ук, «Концерн радиоэлектронные технологии» (КРЭТ) акционерлык җәмгыяте, «Технодинамика» акционерлык җәмгыяте һәм «Концерн ВКО «Алмаз – Антей» акционерлык җәмгыяте вәкилләре бүләкле урыннарга лаек булдылар.

Конкурс Россиянең 17 регионындагы авиатөзелеш комплексының иң эре предприятиеләреннән 42 катнашучыны җыйды. Эшче һәм мөһәндис һөнәрләренең дәрәҗәсен арттыру, киләчәктәге мәсьәләләргә туры килүче персоналның эшкә яраклылыгын үстерүгә һәм даими үсешенә ярдәм итү ярышның максаты булып тора. Конкурс мөһәндис-технологларның гамәли һәм теория белемнәрен бәяләргә мөмкинлек бирә.

Оештыручылар фикеренчә, мондый конкурсларда катнашу яшьләргә сайланган һөнәрнең әһәмиятлелеген аңларга ярдәм итә һәм аларның осталыкларын арттыра.