ЯҢАЛЫКЛАР

Бүген Сәнәгать һәм сәүдә министрлыгында сәүдә-икътисадый хезмәттәшлек буенча Казакъстан-Татарстан эш төркеменең киңәйтелгән составтагы утырышы узды. Утырышта Татарстан Республикасы министрлыклары һәм ведомстволары, машина төзелеше буенча зур предприятиеләрнең вәкилләре катнашты. Очрашуны министр урынбасары Герман Лернер алып барды. Сәламләү сүзләрендә ул болай дип билгеләде: "Татарстан Казакъстандагы партнерлар белән икътисадый һәм инвестицион багланышларны киңәйтүдә мәнфәгатьле. Автомобиль төзелеше, суднолар төзелеше, вертолет төзелеше, нефть-газ химиясе, югары технологияләр, авыл хуҗалыгы, сәламәтлек саклау өлкәсендәге кооперация зур кызыксыну тудыра".

Казакъстан ягыннан делегацияне Казакъстан Республикасы Милли икътисад министрлыгының халыкара хезмәттәшлек департаментны директоры Кайрат Торебаев җитәкләде, шулай ук министрлыклар, ведомстволар, акимат һәм бизнес вәкилләре катнашты. Утырыш барышында яклар инвестицион хезмәттәшлек мөмкинлекләре, табигый газдан мотор ягулыгы сыйфатында файдалануны киңәйтү планнары турында, оборона сәнәгате һәм башка мәсьәләләр хакында сөйләште.

Моннан тыш, бүген Казанда Россия Федерациясендә "KazakhExport" экспорт иминият компаниясе" АҖ беренче чит ил вәкиллеген ачу тантанасы булды. Әлеге компания Казакъстаннан килгән товарлар экспортына ярдәм итү белән шөгыльләнә. KazakhExport Берн союзының Прага клубы һәм Aman Union кебек дөньяның иң зур экспорт-кредит агентлыкларына керә торган халыкара ассоциацияләрнең тулы хокуклы әгъзасына әверелде.

Әлеге ике яклы чаралар Россия Федерациясе һәм Казакъстан Республикасы арасында хезмәттәшлек буенча хөкүмәтара комиссия утырышы уңаеннан уза, ул Казанда 26 октябрьдә булачак.

Бүген Россиянең йөк транспорты башкаласы булган Яр Чаллы шәһәрендә, гадәткә кергәнчә,  VI "Сыйфат - заманча автосәнәгатьнең конкурентлылыкка сәләтле булу нигезе" халыкара конференциясен ачу тантанасы булды.

Конференция республиканың "Сыйфат көннәре" кысаларында уздырыла торган әһәмиятле чараларның берсе булып тора.

Ике көн дәвамында түбәндәге мәсьәләләр фикер алышуга чыгарылачак:

Россиядә автомобиль кластерын үстерүнең актуаль мәсьәләләре;

сыйфат менеджменты системасында куркынычларга идарә итү механизмын үстерүнең перпективалы юнәлешләре;

Россия автосәнәгатен дөньякүләм автосәнәгатькә интеграцияләү;

квалификацияләрнең илкүләм системасын үстерү;

автоҗыю предприятиеләренә һәм автокомпонентлар белән тәэмин итүчеләргә карата халыкара таләпләр;

автосәнәгатьтә тәэминатчыларны үстерү системасы;

мәгълүмат куркынычсызлыгы;

менеджмент системасының иң яхшы тәҗрибәләре.

Билгеләп узарга кирәк, белдерелгән тематика үз бизнесын уңышлы үстерү өчен автосәнәгатьтә сыйфатның ролен аңлап эш итә торган даирә вәкилләрен җыйды - болар әйдәп баручы автоҗыю предприятиеләре, консалтинг компанияләре җитәкчеләре һәм белгечләре, финанс һәм инвестиция оешмалары, фәнни-тикшеренү институтлары вәкилләре, Россиядән һәм чит илләрдән профильле союзларның һәм ассоциацияләрнең җитәкчеләре. Россия Федерациясенең 17 субъектыннан барлыгы 250дән артык белгеч, шулай ук Беларусьтан, Сербиядән, Италиядән, Кытай Халык Республикасыннан чит ил партнерлары.

Конференция кысаларында хәзерге автосәнәгатьне үстерүнең актуаль мәсьәләләре буенча тематик "түгәрәк өстәлләр" уздырылачак һәм җитештерү мәйданнарын, шул исәптән "КАМАЗ" ГАҖ автомобиль заводын карау планлаштырыла.

Автомобиль тармагындагы хәзерге икътисадый вәзгыять автомобильләргә тотрыклы булмаган сорау, конкуренциянең, шул исәптән чит ил җитештерүчеләре ягыннан, көчәюе белән сыйфатлана. Әлеге шартларда Россия җитештерүчеләре үзләрендәге идарә системаларының нәтиҗәлелеген арттырырга мәҗбүр, шул исәптән сыйфат менеджментын эшләү, кертү һәм даими камилләштерү юлы белән дә. Соңгы ике елда әлеге өлкәдә шактый үзгәрешләр булды. Асылда,  "Сыйфат менеджменты системалары. Автомобиль сәнәгате оешмаларына карата таләпләр" (ГОСТ Р 58139-2018) дигән яңа дәүләт стандарты бастырып чыгарылды. Шунысын билгеләү әһәмиятле, ГОСТ Р 58139-2018 тулысынча Россия эшләп чыгарган стандарт, ә андагы таләпләр халыкара идарә стандартларына каршы килми.

Конференциядә катнашучыларга сәламләү сүзләре белән ТР сәнәгать һәм сәүдә министры урынбасары Илдар Мингалиев мөрәҗәгать итте: "Татарстан Республикасының дәүләт сәясәтендәге стратегик линия товар җитештерүчеләрнең һәм тулаем алганда республикадагы сәнәгатьнең көндәшлеккә сәләтле булу дәрәҗәсен арттырудан гыйбарәт. Алдынгы фәнни казанышларны производствога җәлеп итү, идарә итүнең яңа, дәүләт, фән һәм бизнес хезмәттәшлегенә нигезләнгән методларын кертү әлеге эшнең әһәмиятле өлешләре булып тора. Мәсьәләнең бәясе - глобальләшү, хезмәт һәм капитал базарын дөньякүләм бүлү шартларында позицияләребезне ныгыту".

"Алабуга бөкеләү һәм пластмасса эшләнмәләре предприятиесе" ҖЧҖ - ул Идел буенда күрү сәләте буенча инвалидлар өчен зур тернәкләндерү үзәге. Предприятиенең миссиясе начар күрүчеләрне һәм сукыр кешеләрне иҗтимагый файдалы хезмәткә җәлеп итүдән һәм аларны социаль яраклаштырудан гыйбарәт. Предприятие сәламәтлеге буенча мөмкинлеге чикләнгән кешеләргә эш урыннары булдыра һәм лаеклы хезмәт хакы белән тәэмин итә. Бүгенге көндә предприятиедә күрү сәләте буенча 252 инвалид эшли. "Алабуга УкупрПласт" ҖЧҖ бөкеләү эшләнмәләрен җитештерү буенча әйдәп баручы предприятие булып тора, җитештерелә торган продукция исемлегендә 50дән артык атама бар.

Быел "Алабуга УкупрПласт" ҖЧҖ предприятиесе "Күрү сәләте буенча инвалидлар өчен эш урыннары булдыру" социаль-юнәлешле проекты белән җиңүче булды һәм "Безнең киләчәк" региональ һәм социаль программалар фондыннан финанс ярдәмен алды. Проект кысаларында бөкеләү продукциясенең яңа төрен җитештерү өчен җиһаз сатып алу планлаштырыла, ул сәламәтлеге буенча мөмкинлекләре чикләнгән кешеләр өчен эш урыннарын саклау мөмкинлеген бирәчәк.

Тантаналы чарада үзенең сәламләү чыгышында ТР сәнәгать һәм сәүдә министры урынбасары Алексей Савельчев предприятие ветераннарын, хезмәткәрләрне һәм җитәкчелекне "Алабуга УкупрПласт" ҖЧҖ барлыкка килүгә 75 ел тулу белән котлады, предприятиенең уңышларын билгеләп узды, шулай ук предприятие коллективына Татарстан Республикасы Сәнәгать һәм сәүдә министрлыгы Рәхмәт хатын тапшырды.

2018 елның 18-19 октябрендә Зәй шәһәренең "Энергетик" мәдәният сараенда ел саен уза торган Эшләүче яшьләрнең VI "Наше время – Безнең заман" республика телевизион иҗат фестиваленең икенче зоналап сайлап алу туры булды. Зәйдәге сайлау этабында Зәй, Әлмәт, Нурлат, Лениногорск, Яңа Чишмә, Бөгелмә, Азнакай, Ютазы, Спас һәм Чирмешән районнарыннан 52 оешма, учреждение һәм предприятиедән барлыгы 224 эшләүче яшь кеше катнашты.

 Ел саен уза торган Эшләүче яшьләрнең VI "Наше время – Безнең заман" республика телевизион иҗат фестиваленең сайлап алу турында Татарстан Республикасы Зәй муниципаль районы Башкарма комитетының Мәгариф идарәсе җиңүче булды. Икенче һәм өченче урыннарны Әлмәт труба заводында һәм  А.Н.Туполев ис. Казан милли тикшеренү техник университеты - КАИ Әлмәт филиалында эшләүче яшьләр алды. "Иң көчлеләр өчлеге" командалары фестивальнең 13-14 ноябрьдә Казанда узачак суперфиналына жюридан махсус чакыру алды.

Киләсе сайлап алу туры инде бу атнада Казанда – 26-27 октябрь көннәрендә Универсиада авылының концертлар залында булачак.

Исегезгә төшерик, фестивальдә аерым башкаручылар, иҗат коллективлары, шулай ук бер оешманы танытучы командалар катнаша (шәһәрләрнең һәм районнарның җыелма командалары, шулай ук мәдәният тармагы хезмәткәрләре фестивальдә катнашуга кертелми). Конкурсантлар исәбенә 18-35 яшендәге предприятие хезмәткәрләре сайлап алына, алар өчен музыка, бию белән шөгыльләнү һөнәри эшчәнлек булып тормый. Катнашучылар "Музыка юнәлеше", "Бию юнәлеше", "Шөһрәт минуты" номинацияләрендә иҗади сәләтләрен күрсәтә.

Фестиваль Татарстан Республикасы Президенты Рөстәм Миңнеханов ярдәмендә уза.

Проектның төп гамәлгә куючылары – ТР Сәнәгать һәм сәүдә министрлыгы, ТР Яшьләр эшләре министрлыгы, ТР Мәдәният министрлыгы, ТР Мәгариф һәм фән министрлыгы, республиканың матбугат һәм массакүләм коммуникацияләр буенча "Татмедиа" агентлыгы һ.б.

Проектның идея авторы һәм оештыручысы – Татарстан Республикасы "Созвездие-Йолдызлык" төбәк яшьләр иҗтимагый оешмасы.

Фестивальнең рәсми сайты:  http://bzzm.ru/

Альберт Кәримов ТР Хөкүмәте делегациясе составында Үзбәкстан Республикасына ике көнлек визит ясады. Татарстан Республикасы Президенты Рөстәм Миңнеханов Ташкент өлкәсенең Хәкиме Галимҗан Ибраһимов белән эшлекле очрашу уздырды.

18 октябрьдә Үзбәкстан башкаласы Ташкентка килеп, Министр татар диаспорасы вәкилләре белән очрашуда катнашты. Үзбәкстанда чит илләрдәге татар диаспораларының иң зурларыннан берсе яши һәм аларның гомуми күләме 200 мең кешедән артык, бу исә ил халкының нибары 1%ын гына тәшкил итә. Үзбәкстандагы татарларның яртысына якын өлеше Ташкент шәһәрендә һәм Ташкент өлкәсендә яши.

Шулай ук 18 октябрьдә әһәмиятле ике яклы документлар имзаланды, шул исәптән:

- ТР Хөкүмәте һәм Ташкент өлкәсе Хакимияте арасында сәүдә-икътисад, фән-техника, социаль һәм мәдәният өлкәләрендә тышкы икътисадый багланышларны гамәлгә ашыруга багышланган килешү;

- Ташкент өлкәсе Хакимияте белән "МСК ГРУПП" ҖЧҖ арасында сәүдә-логистика мөнәсәбәтләрен ике яклы үстерүгә юнәлдерелгән хезмәттәшлек турында меморандум.

19 октябрьдә министр Россия һәм Үзбәкстан арасында Беренче төбәкара хезмәттәшлек форумының ике дәүләт башлыгы катнашында "Россия-Үзбәкстан мөнәсәбәтләрен үстерүнең өстенлекле юнәлеше буларак авыл хуҗалыгы" темасына Пленар утырышында катнашты. Форум ике дәүләт башлыклары Владимир Путин һәм Шәүкәт Мирзиеев рәислегендә узды.

Россиядә сигезенче мәртәбә оештырыла торган Finnish Business Фин-Россия бизнесының ел саен узучы эш чарасы бүген беренче мәртәбә Казанда булды. Чараны оештыручылар булып ТР Хөкүмәте ярдәмендә Team Finland белән берлектә Фин-Россиянең сәүдә палатасы катнаша. Бизнес-форумны ТР Президенты Рөстәм Миңнеханов ачып җибәрде, министр Альберт Кәримов хөкүмәт делегациясе составында иде.

Сәламләү сүзләрендә Финляндиянең РФдәге вәкиле Микко Хаутала болай дип билгеләде: "Фин бизнесы биредә үсеш өчен зур потенциал күрә, чөнки рейтинглар буенча Татарстан Россиядә алдынгы урыннарны алып тора, ә Финляндия яшәешнең сыйфат күрсәткечләре буенча Европадагы алдынгы илләрнең берсе. Димәк, без бер-беребез өчен яралган һәм алга таба үзебезнең эшлекле мөнәсәбәтләрне үстерергә тәкъдим итәбез".

Фин-Россия бизнес-форумына сәнәгатьтә, төзелештә, экологиядә, консалтингта, сәламәтлек саклауда, мәгарифтә махсуслашучы 50 фин компаниясеннән җитәкчеләр килде.

Фин компанияләре вәкилләре Казанга республика предприятиеләре белән яңа партнерлык элемтәләрен урнаштыру, потенциаль заказчыларга үз технологияләрен, җиһазларын, материалларын һәм хезмәтләрен тәкъдим итү максатында килде. Кагыйдә буларак, сөйләшүләр барышында Финляндиядән Россия төбәкләренә товарларны һәм хезмәтләрне эскпортлау мәсьәләсе генә түгел, ә мөмкин булган инвестиция хезмәттәшлеге, шул исәптән җитештерү куәтләрен локальләштерү һәм яңа җитештерү предприятиеләрен булдыру турында да фикер алышына.

Хәзерге вакытта Россиядә 600 артык фин компаниясе эшли, аларда 50000 артык кеше хезмәт куя. Халыкка яки эчке тулай продуктка исәпләгәндә Финляндия Россиягә башка теләсә нинди ил белән чагыштырганда күбрәк инвестиция кертте. Фин компанияләренең Россия бизнесына керткән җыелма инвестицияләре, экспертлар бәяләвенчә, 12 млрд еврога җиткән. Әлеге сумманың дүрттән бер өлеше диярлек производстволар булдыруга юнәлдерелгән. 2017 елда фин предприятиеләренең Россия базарына булган мәнфәгате арткан, әлеге тенденция 2018 елда да көтелә.

Бүген ТР Сәнәгать һәм сәүдә министрлыгында министр урынбасары Алмаз Хөсәенов җитәкчелегендә быелның 8 аенда предприятиеләрнең эш йомгаклары буенча баланс комиссиясе утырышы булды. Комиссия составына Татарстан Республикасының Сәнәгать һәм сәүдә министрлыгы, Икътисад министрлыгы һәм Финанс министрлыгы белгечләре керде.

Утырыш барышында предприятиеләрнең җитештерү-хуҗалык эшчәнлеге, зыянга эшләү күрсәткечләре белән предприятиеләрнең финанс торышы һәм үсеш перспективалары буенча хисаплары тыңланды.  Предприятиеләрнең тискәре финанс күрсәткечләренә китергән төп сәбәпләрнең берсе чит ил валютасында алынган займнарның булуы һәм алар буенча хезмәт күрсәтүләр тора.

Октябрь ае башында Нидерландның Маастрихт шәһәрендә 34 нче Халыкара мода конференциясе IAF булды, ул Голландиянең Modint тармак ассоциациясе белән берлектә оештырылган иде. Конференциягә бөтен дөньядан лидерлар һәм индустрия вәкилләре чакырылган иде.

Татарстаннан ТР сәнәгать һәм сәүдә министры урынбасары Илдар Мингалиев, "Казан милли тикшеренү технология университеты" югары белем бирүче федераль дәүләт бюджет учреждениесе ректоры Сергей Юшко, Җиңел сәнәгать технологияләре, мода һәм дизайн институты директоры Людмила Әбүталипова катнашты.

Визит барышында Татарстан делегациясе 34 нче IAF конференциясе эшендә катнашты һәм Ахен техник университетында булды. Нәтиҗәдә "КНИТУ" ЮББ ФДБМУ белән Ахенның Рейн-Вестфаль техник университеты арасында фән һәм мәгариф өлкәләрендә үзара хезмәттәшлек турында килешү имзаланды. 

Эш программасы кысаларында Татарстан вәкилләре IAF президенты Хан Бекке белән очрашты, нәтиҗәдә Казан шәһәрен Халыкара форумны һәм Халыкара кием-салым федерациясе әгъзаларының чираттагы утырышын уздыру мәйданчыгы буларак карау турында килешенгәнлеккә ирешелде.  

ТР Сәнәгать министрлыгында алманнарның LEMKEN GmbH Co & KG компаниясе делегациясе белән очрашу булды - ул профессиональ үсемлекчелек өчен махсус техника җитештерә. Делегация составына компаниянең генераль директоры Энтони Ван дер Лей һәм җитештерү директоры Рудольф Ферфурст керде. Очрашуны министр урынбасары Алмаз Хөсәенов уздырды.

Очрашу барышында яклар инвестиция проектының икътисадый һәм логистик өлешләре, производствоны урнаштыру өчен оптималь мәйданчыклар сайлау механизмы, Россия Федерациясендә халыкара класслы Lemken агросәнәгать техникасын җитештерү буенча предприятие ачу өчен техник регламентлар һәм кадрлар ресурслары турында фикер алышты. 

Россиядә белем бирү йортларында "Мехатроника" белгечлеге буенча дуаль мәгариф системасын кертү проектының икенче этабы старт ала. Проект Ford Fund хәйрия фонды ярдәмендә Ford Sollers компаниясе тарафыннан тормышка ашырыла.

Проектның беренче этабы 2017 елның декабрендә уңышлы гына тормышка ашырылды. Россиянең 9 әйдәп баручы һөнәри белем бирү оешмасыннан 22 укытучы соралган белгечлек үрнәгендә дуаль мәгариф системасы принциплары белән таныштыра торган өч көнлек тренингларны узды. Моннан тыш, укытучылар тарафыннан "Мехатроника" белгечлеге буенча модульләр һәм укыту планы эшләнде.

Мәгариф проектының икенче стадиясе укытучыларны яңа сорала торган "Мехатроника" белгечлеге буенча һөнәри үзгәртеп әзерләүгә багышланган һәм берничә этапта тормышка ашырылачак.

Әйтик, Татарстан Республикасындагы 6 белем бирү оешмасыннан (Алабуга КФУ институты, Л.Б. Васильев исемендәге Дәүләт автомеханика техникумы, Алабуга политехникf көллияте, Түбән Кама агросәнәгать көллияте, Казан федераль университеты каршындагы инженер-икътисадый көллият, П.В.Дементьев исемендәге Казан авиация-техника көллияте, Яшел Үзән механика көллияте) 10 укытучы Алабугадагы Ford Sollers машина төзү заводы мисалында эшкә җигелгән белгечләргә карата хәзерге таләпләрнең үзенчәлекләре белән танышачак. Соңыннан алар югары технологияле Festo белем бирү үзәгендә тренинглар узачак, әлеге уку йорты хәзерге сәнәгый җиһаз җитештерүчеләр арасында әйдәп баручыларның берсе булып тора.

Укулар барышында курста катнашучылар хәзерге сәнәгый җиһазларны проектлау, монтажлау, көйләү һәм тәэмин итү өлкәсендә кирәкле белемнәр һәм гамәли күнекмәләр алачак. 5 көнлек тренинглар һәм гамәли дәресләр нәтиҗәсендә укытучылар үзләренең уку йортларында укыту планының вариатив өлешенә кертү өчен "Мехатроника" белгечлеге буенча программа эшләячәк. Эшләнгән программаларны яклау чарасы быелның ноябрендә Казан ш. WorldSkills Russia төбәк чемпионатының эш программасы кысаларында булачак.

Проектның икенче этабы тәмамлангач анда катнашучыларга квалификация күтәрү турында сертификатлар тапшырылачак.

Ford Sollers Татарстандагы матбугат хезмәте мәгълүматлары нигезендә