ЯҢАЛЫКЛАР

Бүген ТР Сәнәгать һәм сәүдә министрлыгының конференцияләр залында "галстуксыз" форматында мактаулы кунаклар – Сәнәгать һәм сәүдә министрлыгы ветераннары белән традицион очрашу булды. Октябрьнең беренче атналарында Халыкара өлкәннәр көнен уздыру кысаларында, гадәткә кергәнчә, хәзерге пенсионерлар, министрлык ветераннары адресына рәхмәт сүзләрен җиткерү өчен, шундый очрашулар уздырыла.

Чара ТР сәнәгать һәм сәүдә министры урынбасары Алексей Савельчев, "Пятерочка" Идел буе дивизион федераль сәүдә челтәре директоры урынбасары Тимур Баймуллин катнашында узды. Һәркемгә сәүдә челтәренә бүләкләү сертификатлары, ә юбилярларга чәчәк бәйләмнәре бирелде һәм котлау сүзләре җиткерелде.

Рәсми өлеше тәмамлангач, фуршет белән концерт программасы булды.

Җомга көнне Россиянең йөк транспорты башкаласы булган Яр Чаллы каласында һөнәри бәйрәм – Машина төзүче көненә багышланган тантаналы чара булды.

Концертлар залы каршысындагы мәйданчыкта Казан-Яр Чаллы авточабышында республиканың машина төзү тармагы флагманнары булып саналучы биш шәһәре аша узып, финишка чыгучы техника күрсәтелгән иде. Тантана Орган залында узды, биредә Рөстәм Миңнеханов World Skills чемпионатының һәр яшь призерының кулын кысты, алда торган эшче белгечлекләр чемпионатларында зур уңышлар теләде. Алга таба Президент республиканың машина төзү комплексындагы казанышларга багышланган күргәзмә белән танышты.

Тантаналы залда республиканың машина төзү тармагындагы иң яхшы хезмәткәрләр, предприятиеләрнең, министрлыкларның һәм ведомстволарның җитәкчеләре җыелды.

Машина төзүчеләрне һөнәри бәйрәмнәре белән котлап, Президент ветераннарның тармак үсешенә керткән өлешен рәхмәт сүзләре белән билгеләп узды. "Безнең өлкән буыннар нигез салган гореф-гадәтләрне сакларга кирәк. Бу безнең республиканың, илнең казанышы".

Чара дәвамында концерт номерлары арасында ТР сәнәгать һәм сәүдә министры һәм мактаулы кунаклар республикадагы иң яхшы машина төзүчеләрне, тармактагы эшче династия вәкилләрен, талантлы яшь инженер-конструкторларны һәм инженерлык лицейларында белем алучыларны бүләкләде.

Билгеләп узарга кирәк, залның бизәлеше җыю цехы стилендә футуризм һәм технологик дизайн элементлары белән башкарылган иде һәм һөнәри бәйрәмгә чын-чынлап ямь өстәде.

12 октябрь көнне "КАМАЗ" ГАҖ мәйданчыгында ТР сәнәгать һәм сәүдә министры Альберт Кәримов, "Хезмәт җитештерүчәнлеге өлкәсендә компетенцияләрнең федераль үзәге" АКО генераль директоры Николай Соломон һәм "КАМАЗ" ГАҖ генераль директоры Сергей Когогин катнашында "Хезмәт җитештерүчәнлеге һәм мәшгульлеккә ярдәм итү" илкүләм проектын тормышка ашыру буенча Татарстан предприятиеләре җитәкчеләренең семинары булды.

Чараны Альберт Кәримов ачып җибәрде, хәзерге вакытта икътисадның чималга бәйле булмаган тармакларына караган зур һәм урта предприятиеләрдә хезмәт җитештерүчәнлегенең ел саен биш процентка артуының төп юнәлеш булуы турында билгеләп узды. Татарстанда бүген 19 предприятие өстенлекле региональ программа исемлегенә керә. Хезмәт җитештерүчәнлеген арттыру һәм сыйфатлы күрсәткечләргә ирешү буенча илкүләм проект кысаларында чараларны гамәлгә ашыру өчен предприятиеләрне проектка актив кертү һәм кирәкле сыйфат үзгәрешләренең өстенлекле булуын аңлау зарур.

"Хезмәт җитештерүчәнлеге һәм мәшгульлеккә ярдәм итү" илкүләм проектында программаның төп өстенлекләре турында тулырак итеп Николай Соломон сөйләде. Компетенцияләрнең Федераль Үзәгенең бурычы – федераль һәм төбәк дәрәҗәләрендә бердәм методикалар һәм алымнар формалаштыру, белемнәр тарату, укыту һәм профильле компетенцияләр булдыру, типик чишелешләр эшләү һәм кертү, иң яхшы халыкара тәҗрибәләрне кертү юлы белән хезмәт җитештерүчәнлеген арттыруга булышачак ресурс булдыру.

Николай Соломон ассызыклаганча: "Предприятиеләрдә программаны уңышлы тормышка ашыру өчен үзгәрергә, амбициоз максатлар куярга һәм аларга ирешергә әзер булган генераль директорлар йөзендә мәнфәгатьле заказчылар булдыру әһәмиятле. Алар арасында иң төп нәрсә – ул хезмәт җитештерүчәнлеген арттыру".

Алга таба чарада "КАМАЗ" ГАҖ цифрлы үзгәртеп кору тәҗрибәсе, "Горький исемендәге Яшел Үзән заводы" АҖдә һәм "Ак Барс Металл" ҖЧҖдә эшләрне тормышка ашыру тәҗрибәсе турында әйтелде, аларның һәркайсыннан директор үз чыгышында предприятиеләрдә идарәи, оештыру һәм технологик процессларны оптимальләштерүдә, шулай ук эшчәнлекнең икътисадый күрсәткечләрендә уңай үзгәрешләр булуы турында билгеләп узды.

Бүген министр "Русгидро" ГАҖ вәкилләре катнашында гидроэнергетиканы үстерү буенча эш төркеме киңәшмәсен уздырды. Катнашучылар районнар территориясендә кече һәм урта зурлыктагы елгаларның гидроэнергетик потенциалын бәяләү белән танышты, шулай ук республиканың кече гидроэлектростанцияләрен төзү мәсьәләләре буенча вариантлар каралды һәм тәкъдимнәр кертелде.

Бүген ТР Сәүдә һәм сәнәгать министрлыгында "РЕНОВА" компанияләр төркеме (КТ) вәкилләре белән эшлекле очрашу узды. Компанияне "РЕНОВА" компанияләр төркеменең стратегик планлаштыру һәм үстерү директоры Олег Фомичев, "Группа Т-1" АҖ генераль директоры Александр Куканов, "Цифра" ҖЧҖ  генераль директоры Игорь Богачев тәкъдим итте.

Фикер алышу барышында Альберт Кәримов билгеләп үткәнчә, республикада санлы технологияләрне үстерү һәм аларны җитештерүгә кертүгә зур игътибар бирелә, шуңа күрә хәзер әйдәп баручы санлы карарлар эшләүчеләр белән хезмәттәшлекне үстерү буенча актив эш алып барыла.

Очрашуда сүз сәнәгатьне санлы трансформацияләүнең комплекслы проектлары кысаларында - технологик процесслар белән идарә итүдән алып сәнәгать аналитикасына кадәр - санлы икътисад турында барды.

Бүген Израильгә РФ Хөкүмәт делегациясе визиты кысаларында сәүдә-икътисадый хезмәттәшлек буенча катнаш Россия-Израиль комиссиясенең Пленар утырышы узды. Комиссиянең Россия өлеше рәисе - Россия Федерациясе Хөкүмәте рәисе урынбасары Максим Акимов, комиссиянең Израиль өлеше рәисе - Израиль дәүләтенең әйләнә-тирә мохитне саклау, Иерусалим эшләре һәм яһүд мирасы министры Зеэв Элькин.

Альберт Кәримов Россия-Израиль комиссиясе утырышында чыгыш ясады, Татарстанның икътисадый һәм инвестиция потенциалын тәкъдим итте, дәүләт программалары һәм проектларын гамәлгә ашыру турында сөйләде. Министр ассызыклаганча, Татарстан Израиль белән сәнәгать, югары технологияләр, энергетика, авыл хуҗалыгы һәм инвестицияләр мәсьәләләрендә уртак хезмәттәшлек белән кызыксына.

Очрашу ахырында комиссиянең Израиль өлеше рәисе Зеэв Элькин Израиль делегациясенең Татарстан Республикасына сәфәр белән кызыксынуын белдерде.

Быел "Россия энергетика атналыгы" (РЭА) Халыкара форумының (2018 елның 3-6 октябре) төп темасы "Үзгәрүчән дөнья өчен тотрыклы энергетика"булды. Пленар сессияне Россия Федерациясе Президенты Владимир Путин ачты.

"Бу юлы Россия энергетика атналыгына белгечләр һәм энергетика белән кызыксынучы барлык кешеләрнең рекордлы саны - тугыз мең ярымга якын кеше килде. Алар ачык, ышанычлы шартларда глобаль энергетика көн тәртибе темалары турында фикер алышырга җыелды. Билгеле булганча, Россия - дөнья энергетика базарының иң эре уенчыларының берсе. Без нефть һәм газ чыгару буенча алдынгы позицияләрне билибез, электр энергиясе җитештерү һәм күмер табу күләмнәре буенча лидерлар сафына керәбез. Көндәшлекле өстенлегебезне нәтиҗәле гамәлгә ашыру һәм башка илләр белән берлектә уртак энергетика киңлеген һәм уртак энергетика киләчәген булдыру өчен, безгә глобаль энергетика тенденцияләрен тою гаять мөһим", - дип билгеләп үтте Владимир Путин.

Форум Россия Федерациясе Энергетика министрлыгы, Мәскәү Хөкүмәте һәм Росконгресс фонды теләктәшлегендә узды.

"ТЭК дөнья лидерларының берсе буларак, Россия глобаль энергетика көн тәртибен формалаштыруга җитди өлеш кертә. Мин энергетика ведомстволары һәм компанияләре җитәкчеләренең, шулай ук төрле илләрдән килгән экспертларның энергетика үсеше мәсьәләләрен карау өчен Мәскәү һәм РЭАны  сайлавына бик шат”, - дип белдерде Александр Новак.

РЭА-2018 эш программасы

Форумның эш программасы нигезендә төп ике блок булды:

Беренчесе - "Глобаль энергетиканың көн тәртибе" - үзгәрүчән дөньяда энергетика үсеше аспектларына кагылды - АТР илләрендә һәм Африкада ягулыкның экологик чиста төрләреннән файдалану мөмкинлеге проблемаларыннан алып Арктикада энергетиканы үстерү һәм яңа технологияләрне куллануга кадәр. Катнашучылар глобаль энергетика базары, дөнья электр энергетикасы каршында торган таләпләр, энергия нәтиҗәлелеге һәм энергияне сак тоту өлкәсендә яңа эшкәртмәләр, энергиянең яңартыла торган чыганаклары һәм атом энергетикасы перспективалары хакында фикер алышты. РЭА кысаларында ОПЕКның яңа хисабы тәкъдим ителде - World Oil Outlook (WOO) 2018. Хисап 2040 елга кадәр озак вакытлы перспективада дөнья нефть базарына йогынты ясаучы төрле факторларның җентекле анализыннан гыйбарәт.

Икенче блок - "Россия ТЭК үсеше планнары". Трекның көн тәртибе, аерым алганда, тармак сессияләре чараларында, илнең бүгенге ягулык-энергетика комплексының күмер, нефть, газ, нефть химиясе, электр энергетикасы тармакларындагы казанышларны һәм проблемаларны киң яктыртты.

Моннан тыш, Форумның эш программасы кысаларында Россия Федерациясе төбәкләренең җылылык белән тәэмин итү системалары нәтиҗәлелеге рейтингын тәкъдим итү, "Энергияне сак тоту потенциалын гамәлгә ашыру - "Торак һәм шәһәр мохите" илкүләм проектының уңыш шарты" Бөтенроссия киңәшмәсе, "Транспортта альтернатив энергия: бүгенгесе һәм киләчәге" түгәрәк өстәле, "Россиядә яңартыла торган энергетика - агымдагы торышы һәм перспективалары" лекциясе узды. "Россия энергетика атналыгында куелган мәсьәләләрнең тематикасы Россия төбәкләре өчен генә түгел, чит дәүләтләр өчен дә актуаль, Форумга килгән күп санлы делегацияләр - моның дәлиле. Энергия - ул тормыш нигезе, социаль тотрыклылык һәм кешеләр иминлеге чыганагы. Нәкъ менә шуның өчен Форум үзенә күрә уникаль санала, чөнки анда тормышыбызның икътисадый, экологик, мәгариф һәм фәнни аспектларына, шул исәптән аның энергетик иминлегенә тигез дәрәҗәдә игътибар бирелә", - дип билгеләп үтте Россия Федерациясе Президенты киңәшчесе, Оештыру комитеты рәисе урынбасары - җаваплы сәркатиб Антон Кобяков.

Форумның төп программасы төрле форматтагы 67 чарадан гыйбарәт иде, әйтик, пленар утырыш, панельле сессияләр, түгәрәк өстәлләр, лекцияләр, тармак белгечләренең очрашулары һ.б.лар. Форумның эш программасында 471 спикер катнашты.

"Россия энергетика атналыгы Россиянең энергетика тармагы белгечләренә актуаль мәсьәләләр буенча үз карашларын белдерергә, тармак үсеше турында бәхәсләрдә катнашырга, шулай ук әйдәп баручы дөнья экспертларының фикерен ишетергә уникаль мөмкинлек бирде", - дип хәбәр итте Форум эше барышында Россия Федерациясе энергетика министры урынбасары, Оештыру комитеты рәисе урынбасары Антон Инюцын. Форумда 20 чит ил министры, шул исәптән, Әзербайҗан Республикасы энергетика министры Парвиз Шахбазов, Алжир Республикасы сәнәгать һәм тау казылмаларын чыгару министры Юсеф Юсфи, Бангладеш Республикасы фән һәм технологияләр министры Осман Ясеф, Венгрия Республикасы тышкы эшләр һәм сәүдә министры Петер Сийярто, Катар дәүләте энергетика һәм сәнәгать министры Мөхәммәд Салех Әл-Садә, Согуд Гарәбстаны Корольлеге энергетика, сәнәгать һәм минераль ресурслар министры Халид Әл Фалих, Сербия Республикасы тау казылмаларын чыгару сәнәгате һәм энергетика министры Александра Антич, Сьерра-Леоне Республикасы энергетика министры Альхаджи Канжа Сисей, Экваториаль Гвинея Республикасы тау-руда сәнәгате һәм углеводородлар министры Габриэль Нгуема Лима, Көньяк Судан Республикасы нефть сәнәгате министры Иезекииль Лол Гаткуот һәм башкалар чыгыш ясады.

РЭА кысаларында газ экспортлаучы илләр Форумының күчмә панель сессиясе узды, массакүләм мәгълүмат чаралары, ТЭК компанияләре һәм төбәк хакимиятләренең матбугат хезмәтләре арасында "МедиаТЭК" дүртенче Бөтенроссия конкурсы нәтиҗәләре чыгарылды һәм җиңүчеләре бүләкләнде, энергия нәтиҗәлелеге һәм шәһәрләрнең тотрыклы үсеше буенча Халыкара мэрлар саммиты, "Глобаль энергия" премиясен тапшыру тантанасы үтте. РЭА-2018 Яшьләр көнендә "Энергопрорыв" интеллектуаль энергетика өлкәсендә алгарышлы проектлар конкурсында җиңүчеләрне бүләкләү, CASE-IN Халыкара инженерлар чемпионаты, "Яшьләр инициативалары энергиясе" бәйгесендә җиңүчеләрне рәсми бүләкләү һәм иң яхшы флешмобка #ВместеЯрче конкурсы финалы булды.

Тармак күргәзмәсенең 12 экспоненты үз стендларында ТЭК өлкәсендәге алдынгы эшкәртмәләрне һәм казанышларны тәкъдим итте. Алар арасында - «Газпром», «Россети», «Новатэк», «Росатом», «Фортум», «РусГидро», «Транснефть», «СИБУР», «Роснефть» компанияләре, шулай ук Мәскәү Хөкүмәте, Татарстан Республикасы һәм «Глобаль энергия» премиясе.

РЭАның йомгаклау көнендә, 6 октябрьдә, #ВместеЯрче Яшьләр көне үтте, анда тармакның яшь белгечләре, студентлар һәм мәктәп укучылары катнашты. Яшьләр көненең төп вакыйгасы Россия Федерациясе энергетика министры Александр Новак һәм  Россия Федерациясе фән һәм югары белем министры Михаил Котюков белән галстуксыз очрашу булды.

Килешүләр

Форум вакытында 10 килешү имзаланды, шул исәптән  Россия Федерациясе Хөкүмәте һәм Казахстан Республикасы Хөкүмәте арасында  Казахстан Республикасына нефть һәм нефть продуктларын җибәрү өлкәсендә сәүдә-икътисадый хезмәттәшлек турында килешүнең Хөкүмәтара беркетмәсенә кул куелды.

Имзаланган документлардан аеруча әһәмиятлеләре:

• "Түбән Кама Нефтехим" ГАҖ белән Deutsche Bank AG арасында  «Ойлер Гермес» (Euler Hermes) иминият полисы яклавында 2033 ел ахырына кадәр вакытка 240 млн евро күләмендә суммага яңа электр станциясе төзү турында озак вакытлы кредит килешүе;
• Тамбов өлкәсе хакимияте һәм "СФЕРРУМ" ҖЧҖ арасында урам яктыртуны модернизацияләү буенча хезмәттәшлек турында килешү. Инвестицияләрнең күләме 50 миллион сумга якын тәшкил итәчәк.
• «НОВАТЭК» ГАҖ һәм «Сименс АГ» арасында стратегик партнерлык һәм хезмәттәшлек турында килешү;
• Себер Төбәкара бүлүче челтәр компаниясе, "Хевел" ҖЧҖ һәм  SAFT арасында Алтай Республикасында кояш электр станцияләрендә энергия саклау системаларын урнаштыру буенча пилот проектын гамәлгә ашыру турында килешү;
• «ТАИФ» ААҖ һәм  «Сименс» ҖЧҖ арасында хезмәттәшлекне киңәйтү турында килешү,
• Росконгресс Фонды һәм KAZENERGY Казахстан нефть-газ һәм энергетика комплексы оешмалары ассоциациясе арасында хезмәттәшлек турында килешү;
• Чукотка автономияле округы хөкүмәте белән "РАСУ" АҖ арасында хезмәттәшлек турында килешү;
•  «СПбМТСБ» АҖ һәм S&P Global Platts арасында үзара аңлашу турында меморандум;
• «Россети» ГАҖ белән «Сбербанк» ГАҖ арасында стратегик хезмәттәшлек турында килешү;

"Россия энергетика атналыгы-2018" Форумы мәгълүмат үзәге

Узган атнада Санкт-Петербургта VIII Халыкара газ форумы булып узды. Татарстан Республикасыннан ТР Министрлар Кабинеты, ТР Сәнәгать һәм сәүдә министрлыгы, ТР Авыл хуҗалыгы һәм азык-төлек министрлыгы хезмәткәрләре, "КАМАЗ" ГАҖ һәм "РариТЭК Холдинг" АҖ хезмәткәрләре катнашты.

Гадәткә әйләнгәнчә, газ форумында җитештерүчеләр газ комплексы өчен яңа техника, продукция һәм җиһаз күрсәтергә тырыша. Әйтик, "РариТЭК" сыеклатылган табигый газда эшли торган беренче экологияле һәм экономияле Lotos-105 автобусын күрсәтте – 10,5 метр озынлыгында зур класслы тәбәнәк идәнле газ автобуслары линейкасында беренче модель. Форум кысаларында Lotos-105 автобуслары белән тәэмин итү турында Казакъстаннан партнерлар белән "РариТЭК" ДК арасында дилер килешүләре имзаланды. 2019 елда беренче 150 машинаны китертү планлаштырыла.

Форумның эш программасы эчтәлекле иде. Форум кысаларында "Газ-мотор ягулыгы. ТЧ куркынычсыз эксплуатацияләү" халыкара техник семинары кебек чаралар узды. "Газ-мотор ягулыгы" Россия-Корея техник семинары булды, биредә лидер компанияләрнең вәкилләре тәҗрибә уртаклашты һәм газ ягулыгы һәм сыеклатылган газ өлкәсендә соңгы эшләнешләрен күрсәтте. "Газ-мотор ягулыгы базарына теләктәшлек чаралары" газ-мотор ассоциацияләренең халыкара конференциясе булды, аны "Газпром" ГАҖ директорлар советы рәисе, Газ илләре-эскпертлары форумы белән хезмәттәшлек итү буенча РФ Президентының махсус вәкиле Виктор Зубков ачып җибәрде, "Татарстан Республикасы транспорт чараларын газ-мотор ягулыгына күчерү буенча чаралар комплексы" темасына доклад белән "Татарстан Республикасы Министрлар Кабинеты каршындагы Татарстан Республикасы энергия саклау технологияләре үзәге" ДАУ директоры Евгений Мартынов чыгыш ясады. Шулай ук "Социаль әһәмиятле кулланучылар категорияләрен газ белән тәэмин итүнең актуаль мәсьәләләре" темасына да семинар-киңәшмә узды, анда "Газпром межрегионгаз" АҖ җитәкчелеге, шулай ук газ сату буенча кулланучыларның социаль категорияләре белән эшләү өчен җаваплы региональ җитәкчеләр катнашты.

4 октябрьдә Санкт-Петербургта VIII Халыкара газ форумы кысаларында "Газны моторларга - 2018" табигый газ техникасының халыкара авточабышына финиш ясалды. 2018 елда авточабыш дөньяда иң озыны булды һәм Гиннесның рекордлар китабына керү өчен дәгъва белдерә.

Машина төзүче көне уңаеннан бүген Казаннан Татарстанда җитештерелә һәм җыела торган техника буенча авточабыш старт алды. Сәламләү сүзе белән ТР сәнәгать министры урынбасары Алексей Савельчев чыгыш ясады. Автоколонна составында "КАМАЗ" ГАҖ, "Форд Соллерс" УП, "РариТЭК" ҖЧҖ, "ТПК МТЗ-Татарстан" ҖЧҖ һәм "Ремдизель" АҖ җитештерелә торган техника күрсәтелде. Экспозициягә шәһәр мәктәпләреннән, техникумнардан һәм югары уку йортларыннан үзенең һөнәри киләчәген машина төзү тармагына бәйләргә планлаштырган өлкән сыйныфларда укучылар чакырылган.

Авточабыш маршруты махсус рәвештә биш шәһәрне – республиканың иң зур предприятиеләре эшли торган, Татарстанның машина төзү флагманнарын карарлык итеп төзелгән. Старт Казанда бирелде, алга таба Яшел Үзән юлы буйлап, 10 октябрь – Әлмәт, 11 октябрь – Түбән Кама һәм авточабыш 12 октябрьдә Россиянең йөк транспорты башкаласы – Яр Чаллыда узачак. Билгеләп узарга кирәк, автоколонналар килгән көнне югарыда саналган шәһәрләрнең һәрберсендә авточабышта катнашучы техника теләге булганнарга күрсәтү өчен чыгарып куелачак. Шул рәвешле республикада яшәүчеләр машина төзү предприятиесендәге продукция белән якыннанрак таныша алачак.

5 һәм 6 октябрьләрдә Яр Чаллы шәһәренең "КАМАЗ" мәдәният сараенда Эшләүче яшьләрнең республика буенча ел саен уздырыла торган "Наше время – Безнең заман" ачык телевизион иҗат фестиваленең беренче сайлап алу туры булды. Зоналар буйлап көрәштә Татарстан Республикасының 10 муниципаль районыннан – Актаныштан, Әгерҗедән, Минзәләдән, Мөслимнән, Тукайдан, Алабугадан, Менделеевскидан, Мамадыштан, Кукмарадан һәм Яр Чаллы шәһәреннән 40 оешма һәм предприятие катнашты. Конкурсантлар "Музыкаль юнәлеш", "Бию юнәлеше", "Шөһрәт минуты" номинацияләрендә үзләренең иҗади сәләтләрен күрсәтте. Исегезгә төшерик, командалар составына предприятиеләрдән 18дән 35 яшькәчә булган, конкурс программасы төрләрендәге шөгыльләр аларның һөнәри эшчәнлеге булып тормаган хезмәткәрләр сайлап алына. Нигезләмәгә кертелгән яңалыклар нигезендә, әлеге сезоннан башлап фестивальдә аерым башкаручылар, аерым иҗат коллективлары, шулай ук бары тик бер генә оешманы белдерүче командалар катнаша ала. Ләкин, шәһәрләрнең һәм районнарның җыелма командалары, мәдәният тармагы хезмәткәрле фестивальдә катнашуга кертелми. Сайлап алу турында катнашучылар өчен Яр Чаллыда эстарада вокалы, заманча хореография, театр кую буенча әйдәп баручы белгечләрдән түләүсез мастер-класслар уздырылды.

Гомумкоманда зачетында түбәндәге предприятиеләрнең иҗат коллективлары билгеләп үтелде:

"Дебют өчен" махсус приз – "РТЮ" ААҖ Әгерҗе тимер юл станциясе;

конкурста 3 нче урын – "Л.Я.Карпов ис. химия заводы" АҖ, Менделеевск ш. һәм фестивальнең суперфиналына жюридан махсус чакыру;

конкурста 3 нче урын – "Челтәр компаниясе" ААҖ Алабуга электр челтәрләре һәм фестивальнең суперфиналына жюридан махсус чакыру;

конкурста 2 нче урын – "КАМАЗ" ГАҖ (Пресслау-рам заводы" һәм фестивальнең суперфиналына жюридан махсус чакыру;

конкурста 1 нче урын – "Аммоний" АҖ, Менделеевск ш. һәм фестивальнең суперфиналына жюридан махсус чакыру.

VI фестивальнең киләсе зона этаплары 2018 елның 19 октябреннән 3 ноябренә кадәр түбәндәге шәһәрләрдә узачак: 1. Зәй: 19-20.10.2018, "Энергетик" МЙ; 2. Казан: 26-27.10.2018, Идел буе физик культура, спорт һәм туризм дәүләт академиясенең (Универсиада авылы) концертлар залы; 3. Түбән Кама: 2-3.11.2018, "Мәдәни инициативалар үзәге" МАУ.  Финал 2018 елның 13-14 ноябрендә Казанда булачак. Гала-концерт 2018 елның 16 ноябрендә "Пирамида" күңел ачу комплексында узачак. Фестиваль турында тулырак:http://bzzm.ru/