ЯҢАЛЫКЛАР

Санкт-Петербургта Халыкара икътисадый форум үз эшен башлап җибәрде, «Экспофорум» конгресс-күргәзмә үзәгендә 2 июньнән 5 июньгә кадәр эшлекле даирә вәкилләре төп икътисадый мәсьәләләр буенча фикер алышуга җыелачак.

Форум, коронавирус инфекциясе таралуны кисәтү буенча барлык куркынычсызлык чараларын үтәп, эшлекле, мәдәни һәм спорт программаларын да кертеп, компанияләр, илләр һәм төбәкләр экспозицияләрен үз эченә алган көндезге форматта уза.

Быелгы Форумның темасы: «Янә бергә. Яңа чынбарлык икътисады». 2021 елгы Форум программасы дүрт өлештән тора: «Үсеш өчен көчләрне берләштереп», «Илкүләм үсеш максатлары: бурычлардан нәтиҗәләргә», «Горизонтларны киңәйтә торган технологияләр», «Яңа чынбарлык кешесе. Глобаль чакыруларга җавап биреп».

Бүген, 3 июньдә Форумның тантаналы ачылышы булачак. Бу көнне панель сессияләр һәм дискуссияләр барышында чикләнмәгән ресурслар икътисады, система барлыкка китерүче тармакларның инвестиция җәлеп итүчәнлеге, кече бизнесның роле турында фикер алышу планлаштырыла.

4 июньдә Россия Федерациясе Президенты Владимир Путин катнашында пленар утырыш узачак. Дәүләт башлыгының чыгышы илнең социаль-икътисадый үсешенә һәм инвестицияләр җәлеп итүчәнлегенә багышланачак. Пленар утырышта чыгыш ясаганнан соң дәүләт башлыгы модераторацияләнә торган дискуссиядә катнашачак. Чара кырларында Путин шулай ук дөньяның мәгълүмат агентлыклары журналистлары, бизнесменнар һәм инвесторлар белән сөйләшәчәк.

2021 елгы Форумның эш программасы 5 июньдә Халыкара яшьләр икътисадый форумы чаралары белән ябылачак.

Бүген Татарстан Республикасы сәнәгать һәм сәүдә министры урынбасары Герман Лернер рәислегендә сәүдә предприятиеләре җитәкчеләре белән коронавирус инфекциясеннән (COVID-19) хезмәткәрләрне вакцинацияләү буенча киңәшмә узды. 

Киңәшмә барышында министр урынбасары Герман Лернер, халыкны кирәкле азык-төлек белән тәэмин итеп, көн саен күп кеше белән бәйләнешкә керә торган сәүдә предприятиеләре персоналын куркыныч инфекциядән саклауның мөһим булуы турында билгеләп үтте. Вакцинацияләүнең мөһимлеге турында доклад белән Роспотребнадзорның Татарстан Республикасы идарәсе җитәкчесе урынбасары Любовь Авдонина чыгыш ясады.

Прививка ясатудан инде инфекция кичергән кешеләргә дә баш тартырга кирәкми. Чирдән соң иммунитет какшап кала һәм вакыт узу белән COVID каршы тәнчекләр саны кими һәм кабат зарарлану куркынычы барлыкка килә.

Әмма бер генә прививка да авырудан 100% гарантия бирми. Вакцина аның авыр торышыннан, катлаулану һәм үлем очракларыннан саклый. Авыру килеп чыкса да, ул я билгеләрсез генә яки җиңел формада булачак. Шуңа күрә, күмәк иммунитет дәрәҗәсен 60%ка җиткергәнчегә кадәр кирәк урында битлек кияргә туры киләчәк.

Исегезгә төшерик, хәзерге вакытта коронавируска каршы биә ысул белән прививкага язылырга мөмкин:

- РФ Дәүләт хезмәтләре күрсәтүнең бердәм порталы (ЕПГУ);

- Татарстан Республикасы Дәүләт һәм муниципаль хезмәтләр күрсәтү порталы;

- бердәм 122 номеры;

- күпфункцияле үзәккә мөрәҗәгать иткәндә;

- элемтәгә керү телефоннары аша поликлиникага мөрәҗәгать иткәндә.

Россия Сәнәгать һәм сәүдә министрлыгы, кластер сәясәте өлкәсендәге законнарга үзгәрешләр кертү, шулай ук төрле төбәк предприятиеләре арасында сәнәгать кооперациясен үстерү тәҗрибәсе белән уртаклашу өчен, икенче гамәли сессия оештыра. Чара 24-25 июньдә Саранскта (Мордовия Республикасы) узачак. Гамәлдәге һәм төзелә торган сәнәгать кластерлары, кластерлы үсеш үзәкләре составында махсуслаштырылган оешмалар һәм предприятиеләр җитәкчеләрен гамәли сессиядә катнашырга чакырабыз.

Чарада катнашу өчен 2021 елның 18 июненә кадәр түбәндәге сылтама буенча теркәлү формасын тутырырга кирәк: https://forms.gle/E5qkQvzUGzqySz3v5.

Шулай ук 2021 елның 11 июненә кадәр Мордовия Республикасында узачак чарада кластер проектларын тәкъдир итәргә планлаштыручы сәнәгать кластерларында катнашучыларга проект буенча документацияне (исемлек астарак бирелгән) әзерләргә һәм әлеге электрон почта адресылары җибәрергә кирәк булачак:

danilovlv@minprom.gov.ru -  Данилов Леонид Валентинович, Россия Сәнәгать һәм сәүдә министрлыгының Төбәк сәнәгать сәясәте һәм проект идарәсе департаментының территориаль үсеш проектлары бүлеге җитәкчесе, телефон: +7 926-238-61-48.

ekashinova@akitrf.ru - Кашинова Елена Андреевна, Россия Кластерлар, технопарклар һәм махсус икътисад зоналары ассоциациясенең кластер сәясәтен гамәлгә ашыру юнәлеше җитәкчесе, телефон: +7 915-163-84-39.

Үзегезгә алу өчен документларның формалары түбәндәге сылтамалар буенча урнаштырылган:

- гамәли сессияне үткәрү программасы;

- уртак кластер проектларын тәкъдир итү өчен кирәкле документлар исемлеге;

- смета, план-график һәм күрсәткечләр формалары;

- уртак проектны тәкъдир итү үрнәге.

Гамәли сессиядә катнашуның оештыру мәсьәләләре буенча элемтә өчен җаваплы зат: «Технопарк-Мордовия» АУ кластерларны формалаштыру бүлеге җитәкчесе Солонина Марина Геннадьевна, телефон: +7 (903) 325-00-68, m.solonina@tpm13.ru

Татарстан Республикасында беренче тапкыр «АГРОВОЛГА» агросәнәгать күргәзмәсе кысаларында «Трактор-шоу» төбәк ярышлары узачак, анда механизаторлар иң яхшы тракторчы исемен яуларга  тырышачаклар.

1 июльдән 3 июльгә кадәр Татарстанда Татарстан Республикасы Авыл хуҗалыгы һәм азык-төлек министрлыгы тарафыннан кыр форматында оештырылган иң зур «АГРОВОЛГА-2021» күргәзмәсе узачак.

31 майдан 4 июньгә кадәр Мәскәүдә Россия Федерациясе Сәнәгать һәм сәүдә министрлыгы һәм Ритейл Базары Экспертларының Россия Ассоциациясе тарафыннан оештырылган «Ритейл атнасы» VII Халыкара бизнес һәм хакимият форумы уза.

«Ритейл атнасы» – мөһим тармак чарасы булып тора, анда ваклап сату сәүдәсен үстерү трендлары, заманча ритейл базарын формалаштыруга дәүләт алымнары билгеләнә, тармак проблемалары күтәрелә.

Ел саен форум эшендә Татарстан Республикасы Сәнәгать һәм сәүдә министрлыгы, Татарстан Республикасы Президенты каршындагы Эшкуарлар хокукларын яклау буенча вәкаләтле вәкил аппараты һәм Татарстан Алкоголь Ассоциациясе вәкилләре составындагы Татарстан Республикасы делегациясе катнаша.

Оештыручылар 5 көнлек эш программасын планлаштырган, аңа пленар утырышлар, эксперт сессияләре, эшлекле конференцияләр, презентацияләр һәм түгәрәк өстәлләр керәчәк.

Форум кысаларында шулай ук ел саен уздырыла торган Retail Week Awards премиясен тапшыру тантанасы булачак, анда Россиядә ваклап сату өчен 25 артык номинациядә алдынгы чишелешләрне тәкъдим иткән иң нәтиҗәле компанияләрне билгеләп үтәчәкләр.

«Казанский ДСК» ҖЧҖ – Татарстан Республикасында күпкатлы эре панельле йортлар төзү өчен әзер йортлар җитештерүче иң эре предприятиеләрнең берсе, ул 2019 елның июнендә «Хезмәт җитештерүчәнлеге» илкүләм проекты программасына кергән.

Шулай итеп, Федераль компетенцияләр үзәге катнашында, сынау проекты буларак, «Sommer циркуляция линиясендә тимер-бетон плитәләр җитештергәндә хезмәт җитештерүчәнлеген арттыру» программасы гамәлгә ашырылган.

Программаны гамәлгә ашыруда беренче адым – комбинатта проектның эшче төркемен формалаштыру, ул Федераль компетенцияләр үзәге белгечләренең сизгер күзәтчелегендә сынау агымындагы процессларны оптимальләштергән.

Предприятие җитәкчеләре өчен оптимальләштерү процесслары белән бер үк вакытта максатларны композицияләү инструментларына укулар да уздырылган: барлык предприятиенең эшен конкрет өлешләргә таратканнар һәм һәр максатны аерым караганнар.

Хезмәт җитештерүчәнлеген арттыру процессына күчүне эшчәнлекнең сынау участогында агымдагы торыш карталарын эшләүдән башлаганнар: проблемаларны ачыклап, аларны билгеләгәннәр. Аннан соң аларны бетерү планы расланган һәм максатчан карталар төзелгән.

Ачыкланган төп проблемалар арасында, мәсәлән: җитештерү төеннәре арасында артык ераклык булуы, һәм нәтиҗә буларак, материалларның күчерелүенә бик күп вакыт китүе. Урыннарны үзгәртеп кору һәм цехларда радикаль үзгәртү нәтиҗәсендә, транспортлау юлы 237 метрга кыскартылган.

Тимер-бетон эшләнмә каркасларын эретеп ябыштыру участогында «генераль җыештыру» үткәрелгән: запас урнаштырылган 300 квадрат метрга якын урында, нәрсәнең кайда торырга тиешлеген билгеләп, тәртип урнаштырылган. Шулай итеп, производстводагы үзгәртеп корулар исәбенә логистика яхшырган һәм җитештерү күләме, участокка карап, 2-2,5 тапкырга арткан.

Тулаем алганда, предприятиедә кран һәм төягеч көткәндә эшсез утыру вакытын бетерүгә ирешкәннәр, нәтиҗәдә бер эш сменасында гына да 2 сәгатьтән артык вакыт бушаган. Заклад детальләрен яңадан җитештерү һәм ярымфабрикатларны кирәгеннән артык эшкәртү (моның өчен бер сменага 4 сәгать китә торган булган) бетерелгән.

Эшнең әлеге участогында кирәгеннән артык хәрәкәт ясамас өчен, әзер продукцияне бер урыннан икенче урынга күчерү эше оптимальләштерелгән.

Шулай ук предприятиедә участок эшчеләре хезмәтенә түләү системасын да яңадан караганнар, эшче персоналга физик йөкләнешне киметкәннәр (хәзер авыр материалларны берничә дистә метрга күчереп ташырга туры килмәячәк). Эш урыннарында тәртип урнаштырылган, шуның аркасында эретеп ябыштыручыларның эш урыннары эргономикасын яхшыртып кына калмыйча, хезмәт шартларын да күбрәк иминиләштерүгә ирешкәннәр.

Башкарылган барлык эшләр детальләр әзерләү вакытын киметкән, тимер-бетон плитәләрне өч тапкырга тизрәк эшли башлаганнар (9 көн түгел, 3 көн эчендә), тимер-бетон эшләнмәләр җитештерү агымында төгәлләнмәгән эш күләме 10 тапкырга (543 данәдән 52 кадәр) кимегән. Бер кеше тәүлегенә 131 түгел, ә 183 деталь эшләп чыгара башлаган. Нәтиҗәдә, комбинатта тәүлегенә 65 урынына 107 тимер-бетон плитә җитештерелә башлаган.

«Караван» балалар киностудиясе һәм Казан органик синтез заводы «Балалар заводны төшерә» уртак белем бирү проектына йомгак ясаган. Проект кысаларында тәрбияләнүчеләр өчен студиядә видеороликлар ясау буенча мастер-класслар сериясе уздырылган. Соңыннан балалар Казан органик синтез заводы мәйданчыгында үз сценариесе буенча социаль фильм төшерә алган.

«Караван» балалар киностудиясенә Казанда 7 ел элек «Дуслык» девиант тәртипле балалар һәм яшүсмерләр өчен социаль-тернәкләндерү үзәгенең ике тәрбиячесе шушы приютта тәрбияләнүчеләр өчен түгәрәк буларак нигез салган булган. Акрынлап анда 4 яшьтән алып 18 яшькә кадәрге башка балалар да йөри башлаган.

«Караван»га нигез салучы Лилия Гыйбадуллина һәм Людмила Садилованың һөнәри белеме юк һәм әлегә кадәр студияне җәмәгать башлангычларында гына үстерәләр. Шуңа да карамастан, «Караван»да тәрбияләнүче балаларның бүләкләр җыентыгында – 9 гран-при һәм төрле халыкара һәм Бөтенроссия кинофестивальләрендә һәм конкурсларында яуланган 60тан артык җиңү. Балаларның хезмәтләре Франция, Латвия һәм Беларусиядә җиңү яулаган.

«Балалар заводны төшерә» белем бирү проекты 2021 елның мартында «Караван» киностудиясендә тәрбияләнүчеләрне Казан органик синтез заводы белән таныштырудан башланган. Казанның яшь режиссерларына пиролиз мичләрен һәм этилен заводының оператор цехын, продукцияне фасовкалау цехын, шулай ук өч кат җиңсәле FFS-пленкасын җитештерүне күрсәткәннәр. Балалар Казан органик синтез заводы тарихын һәм химия эшчәнлеге үзенчәлекләрен өйрәнгән, сәнәгатьнең социаль аспектларына һәм аңа бәйле экологик проблемаларга төшенгәннәр.

Эш башлаучы кино һәм видеорежиссерларның икенче этабында проектның партнеры – Kingof Media видеопродакшен студиясе сценарий эше, продюссерлык, режиссура, камера һәм ут белән эшләү, монтаж буенча мастер-класслар сериясен уздырган.

Өченче этапта Химиклар көненә Казан органик синтез заводыннан сценарийлар конкурсы уздырылган. Гомумән алганда, балалар 9 конкурс эше тәкъдим иткән. Игезәк кызлар Алисә һәм Луиза Зәбироваларның «Яблони» сценариесе җиңүче дип танылган.

Казан органик синтез заводы «Игелекле эшләр көне» фондының «Һөнәр белән танышу» проектына теләктәшлек күрсәткән. Ел саен Казан органик синтез заводы «Мәктәпкә җыенырга ярдәм ит» акциясендә катнаша. Шулай ук предприятие Киров һәм Мәскәү районнары мәктәпләренә, «Заречье» өстәмә белем бирү үзәгенә, «Факел» яшүсмерләр клубына, «Апрель» балаларны тернәкләндерү үзәгенә, ТРның Анжела Вавилова исемендәге Лейкемия белән авыручы балаларга ярдәм итү төбәк иҗтимагый фондына һәм башка иҗтимагый оешмаларга шефлык ярдәме күрсәтә.

2021 елның 31 маенда Ташкентта Мирзо Улугбек исемендәге Үзбәкстан милли университеты (НУУз) җитәкчелеге Казан (Идел буе) федераль университеты делегациясе белән сөйләшүләр уздырды.

Татарстан делегациясеннән Үзбәкстан Республикасында Татарстан Республикасы вәкиле А.А.Әхтәриев, Казан (Идел буе) федераль университетының Идарә, икътисад һәм финанс институты директоры Н.Г. Баһаветдинова, директор урынбасары О.В.Полякова катнашты. Үзбәкстан ягыннан сөйләшүләрдә М.Улугбек исемендәге НУУз ректоры И.У.Маджидов, халыкара элемтәләр буенча проректор Р.Х.Ширинова, география һәм табигый ресурслар факультеты деканы Ш.М.Шәрипов катнашты.

Яклар әйдәп баручы ике югары уку йортының, бигрәк тә ике диплом программасы буенча НУУзның бакалаврлар әзерләү өлкәсендә хезмәттәшлек итүенең югары дәрәҗәдә булуын канәгатьләнлек хисе белән билгеләп үттеләр. Татарстан ягы бакалаврлар өчен ике диплом программасын картография һәм психология белгечлекләре буенча гына түгел, финанс һәм икътисад белгечлекләре буенча да киңәйтергә тәкъдим итте.

Казан (Идел буе) федераль университеты PhD магистрларын, аспирантларын һәм докторларын әзерләүдә ярдәм итәргә әзер. Үзбәкстан ягы финанс аналитикасы, бизнес-информатика, киберкуркынычсызлык һәм гамәли математика магистрантлары әзерләүдә кызыксынуын белдерде. Әйдәп баручы кафедралар арасында турыдан-туры элемтәләр урнаштыру, академик мобильлекне үстерү, студентлар һәм яшьләр программалары өлкәсендә паритет шартларда хезмәттәшлекне җайга салу, төрле фестивальләр һәм спорт ярышлары уздыру буенча тәкъдимнәр дә яңгырады.

Бүген Россия Федерациясе Сәнәгать һәм сәүдә министры Денис Мантуров һәм Татарстан Республикасы Президенты Рөстәм Миңнеханов «Алабуга Политех» мәгариф үзәгендә булдылар.