Яр Чаллы дәүләт педагогика университеты делегациясенең Үзбәкстанга визиты
2021 елның 10 июленнән 16 июленә кадәр Яр Чаллы дәүләт университеты (НГПУ) делегациясе Үзбәкстан Республикасына визит ясаган. Ректорат каршындагы киңәшче Л.М.Галиев һәм физик культура һәм спорт факультеты деканы А.М.Әхмәтов составындагы делегация Татарстан Республикасының Үзбәкстандагы вәкиле А.А.Әхтәриев белән бергә Ташкентта Россотрудничество вәкиллегендә очрашу үткәргән. Яр Чаллы дәүләт университетының Россотрудничество программаларында – 2022 елның гыйнвар-март айларында Россия Федерациясе югары уку йортларына керү өчен квота компаниясендә, «Сәламәтлек территориясе», «Мавыктыргыч математика», «Әдәби кичәләр» уртак чараларында катнашуы турында килешенгән. Шулай ук онлайн «Яр Чаллы дәүләт университетында ачык ишекләр көне»н үткәрү турында да килешүгә ирешелгән.
Татарстанның Үзбәкстандагы вәкиллегендә узган очрашуда Үзбәкстан Республикасы Халык мәгарифе министрлыгы һәм Ташкентның Низами исемендәге дәүләт педагогика университеты белән хезмәттәшлек итү, Ташкентта һәм Ташкент өлкәсендә һөнәри ориентация чаралары үткәрү, Яр Чаллы дәүләт университетының Үзбәкстанда Халыкара белем бирү күргәзмәләрендә катнашуы турында фикер алышынган.
Татарстан Республикасы вәкиллеге ярдәмендә РУзда MYFAIR («РУзда белем бирү һәм һөнәр») күргәзмә компаниясе белән сөйләшүләр үткәрелгән. Ирешелгән килешүләр нигезендә компания базасында Ташкент шәһәре абитуриентлары белән әңгәмә үткәрелгән.
Үзбәкстан Республикасының Хорезм өлкәсендә делегация мәктәп директорлары, мәктәпне тәмамлаучылар белән берничә очрашу үткәргән. Шулай ук Хорезм өлкәсенең Татар мәдәни-агарту үзәге рәисе Д.Т.Латыйпова белән дә очрашу узган, ватандашларны Яр Чаллы дәүләт университетында укытуга җәлеп итү турында килешенгән.
Татарстан Республикасы һәм Үзбәкстан Республикасы арасында югары белем бирү өлкәсендә уңышлы һәм үзара файдалы хезмәттәшлек киңәйтелә һәм тирәнәя бара. Яр Чаллы дәүләт университеты делегациясенең Үзбәкстанга булган визиты моңа дәлил булып тора.