ЯҢАЛЫКЛАР

"Вертолеты России" холдингының Казан вертолет заводы (Ростех дәүләт корпорациясенә керә) 2019 елның 4 сентябрендә 79 еллыгын билгеләп үтә.

Бәйрәм уңаеннан 90 артык завод хезмәткәре Россия Сәнәгать һәм сәүдә министрлыгы, Татарстан Республикасы Министрлар Кабинеты, Татарстан Республикасы Сәнәгать һәм сәүдә министрлыгы, Ростех дәүләт корпорациясе, "Вертолеты России" холдингы һәм хәрби-техник хезмәттәшлек буенча федераль хезмәтнең Мактау грамоталары һәм Рәхмәт хатлары белән бүләкләнгән. Завод хезмәткәрләренә шулай ук Казан Мэриясе, шәһәр Башкарма комитеты һәм Авиатөзелеш һәм Яңа Савин районнары администрациясе бүләкләре дә тапшырылачак.

Предприятиенең туган көне дип 1940 елның 4 сентябрендә, Ленинградның 387 нче авиация заводы төзелгән көн кабул ителә. Бөек Ватан сугышы башлану белән аны Казанга эвакуацияләгәннәр һәм 169-нчы номерлы күзәтү детальләре җирле заводы белән берләштергәннәр. Бөек Ватан сугышы вакытында предприятие фронт өчен якынча 11 мең төнге бомбардировщик әзерләгән.

Завод тарихында борынгы этап булып 1951 елда илдәге беренче Ми-1 серияле вертолетын чыгара башлау тора, ә 1953 елдан беренче Ми-4 вертолеты җитештерелә башлый, ул экспортка да җибәрелә. Легендар Ми-8/17 – дөнья авиациясе тарихында иң массакүләм вертолетларның берсе, ул бүген дә чыгарыла һәм дөньяның 92 илендә эксплуатацияләнә.

1997 елдан башлап Казан вертолет заводының вертолет техникасын эшләп чыгаручы сертификаты бар: серияле производствода Ансат җиңел ике хәрәкәтле вертолеты бар – 2019 елның 17 августында әлеге машинаның беренче мәртәбә очыш ясавына 20 ел тулды.

"Вертолеты России" холдингы матбугат хезмәте материаллары буенча

Бүген Татарстан Республикасы сәнәгать һәм сәүдә министры Альберт Кәримов X5 Retail Group ("Х5") компаниясе вәкилләре белән очрашты.

X5 Retail Group компаниясенең дәүләт органнары белән хезмәттәшлек итү буенча директоры Александр Ильин республика территориясендә предприятиенең эшчәнлеге турында сөйләде.

X5 Retail Group – Россиянең алдынгы мультиформатлы азык-төлек ваклап сату компанияләренең берсе. Берничә сәүдә челтәренә: "Пятерочка" бренды белән "У дома" кибетләренә, "Перекресток" супермаркетларына, "Карусель" гипермаркетларына һәм "Перекрёсток Экспресс" дигән бренд белән якында урнашкан кибетләргә идарә итә.

Бүгенге көндә Татарстан Республикасында 661 "Пятерочка" кибете, 15 "Перекресток" кибете һәм 5 "Карусель" кибете эшли.

Александр Ильин шулай ук хәзерге вакытта X5 Retail Group – Яңа Турада (Татарстан Республикасының Яшел Үзән районы) һәм Алабугада (элеккеге Алабуга аэропорты территориясе) ике бүлү үзәген төзү буенча проектлар гамәлгә ашырылуын билгеләп үтте. Яңа Турада бүлү үзәген ачу агымдагы елның ноябрендә планлаштырыла.

Татарстан Республикасында компаниянең эше турында "X5 Retail Group" компаниясенең региональ хакимият органнары белән үзара хезмәттәшлек департаменты директоры Алексей Иванов сөйләде.

Аның сүзләренә караганда, компаниядә җирле җитештерүчеләр белән эшләүгә зур игътибар бирелә:

“Без төбәк товар җитештерүчеләре белән актив хезмәттәшлек итәбез. Безнең киштәләрдә икмәк һәм кондитер әйберләре, сөт продуктлары, соуслар һәм башкалар күп".

Компания шулай ук "Татарстанда җитештерелгән" программасында катнаша, анда җирле җитештерүчеләрнең товарлары киштәләрдә бирелә, ә кибетләрдәге күрсәткечләр татар телендәге текст белән үрелеп бара. Моннан тыш, кайбер җирле продуктлар республикадан читкә чыгарыла.

X5 Retail Group вәкилләре илнең башка төбәкләрендә эшләү тәҗрибәсе белән уртаклашты. Аерым алганда, Мәскәүдә интернет-сәүдә, кассирсыз сату һәм фабрика-кухня (әзер ризыклар җитештерү) рәвешендәге проект актив үсеш ала.

"Без үз ягыбыздан республикада яңа сәүдә формалары өчен һәрвакыт ачык", - дип билгеләп үтте очрашу ахырында Альберт Кәримов.

3 сентябрьдә "ТАНЕКО" комплексы базасында "Химия һәм нефть химиясе комплекслары объектларын төзегәндә федераль күзәтчелекне гамәлгә ашыру үзенчәлекләре" дигән күчмә семинар-киңәшмә узды.

Киңәшмә эшендә Экологик, технологик һәм атом күзәтчелеге буенча федераль хезмәт җитәкчесе урынбасары Александр Трембицкий, Татарстан Республикасы сәнәгать һәм сәүдә министры Альберт Кәримов, Ростехнадзорның Идел буе идарәсе җитәкчесе Борис Петров, "Татнефть" ГАҖ генераль директорының капиталь төзелеш буенча урынбасары Николай Глазков, Россиянең кайбер төбәкләреннән Ростехнадзор җитәкчеләре һәм белгечләре һәм башкалар катнашты.

Семинар Ростехнадзорның Идел буе идарәсенең 65 еллыгына һәм Россиядә тау һәм сәнәгать күзәтчелегенең 300 еллыгына багышланган юбилей чаралары циклы кысаларында оештырылды. 

Комплексның сәнәгать мәйданчыгында киңәшмәдә катнашучыларга "ТАНЕКО" АҖ авария-коткару формированиеләренең күрсәтмә күнегүләре күрсәтелде. Укыту-күнекмә бирү полигонында нефть эшкәртү һәм нефть химиясе производстволары өчен иң типик булган авария хәлләре модельләштерелде.

Кунаклар өчен "ТАНЕКО"ның гамәлдәге һәм төзелеш стадиясендә булган төп объектлары буенча күзәтчелек ведомствосы вәкилләре нефть эшкәртү чылбырын тәкъдим итә алсын өчен экскурсия оештырылды, "ТАНЕКО" комплексында эшли торган сәнәгый, янгын һәм экологик куркынычсызлык системасы белән таныша алсын өчен эшләнде. 

Киңәшмәдә катнашучылар куркыныч объектларны төзегәндә һәм эксплуатацияләгәндә барлыкка килә торган проблемалар турында фикер алышты, шулай ук эш тәҗрибәсе белән дә уртаклашты. Аерым алганда, "Татнефть" ГАҖ РПС идарәсе башлыгы Альберт Нурмиев проект порталын – мәгълүмат ресурсын булдыру турында мәгълүмат бирде, анда бүген барлык проект һәм эш документлары, шулай ук подрядчы төзелеш оешмаларына эш досьесы туплана. 

"ТАНЕКО" АҖ генераль директоры вазыйфаларын башкаручы Айдар Хисмәтуллин төзелеп беткән объектларны файдалануга кабул итү тәҗрибәсе белән уртаклашты. Ул билгеләп үткәнчә, "Татнефть" ГАҖ РПС идарәсеннән яңа төзелгән "ТАНЕКО" АҖ объектларын тиз һәм сыйфатлы итеп тапшыруны тәэмин итү өчен уртак эш төзелеш чорында ук башлана.

"Татнефть" ГАҖ матбугат хезмәте материаллары буенча

Татарстан Республикасында роботлар ярдәмендә җылылык челтәрләрен диагностикалау буенча сынау проекты гамәлгә ашырылачак. Бу хакта Татарстанның нефть, газ, химия форумында билгеле булды, анда сәнәгый куркынычсызлык һәм предприятиеләрне эксплуатацияләүнең ышанычлылыгы төп темаларның берсе булды.

"Бүгенге көндә бездә куркыныч җитештерү объектларында һәм электр энергиясе һәм алардан куллану өлкәсендә 2 млн. артык генерация объектларында, күзәтчелек хезмәтләре гамәлгә керә торган 120 меңнән артык кече һәм урта бизнес предприятиесе эшли. Бу форум кебек чаралар – нәкъ менә предприятиеләрдә гамәлгә кертелергә мөмкин булган яңа технологияләр, инновацияләр турында фикер алыша торган мәйданчык. Төп бурыч үзгәрешсез кала – производствода куркынычсызлыкны тәэмин итү, аварияләрне һәм бәхетсезлек очракларын киметү", – дип билгеләп үтте Экологик, технологик һәм атом күзәтчелеге буенча федераль хезмәт җитәкчесе урынбасары Александр Трембицкий.

Энергетика тармагында аварияләр килеп чыгу куркынычын киметүгә Татарстан Республикасы Президенты Рөстәм Миңнеханов катнашында "Татэнерго" АҖ һәм "Энергобезопасность фәнни-тикшеренү үзәге" ФБУ арасында имзаланган килешү, шулай ук "Энергопрогресс" инженер үзәге, "Энергопрогресс" ФБУ, "НТЦ Энергобезопасность" ФБУ (Мәскәү ш.),  Санкт-Петербург дәүләт университеты һәм "Дивайс Инжиниринг" ҖЧҖ арасында дүрт яклы килешү юлланды. Документ нигезендә, компанияләр, роботлаштырылган комплекс кулланып, "Татэнерго" карамагындагы җылылык челтәрләрен диагностикалау белән шөгыльләнәчәк.

Мондый технология нефтьчеләр арасында уңышлы кулланылса да, җылылык белән тәэмин итү тармагында беренче тапкыр файдаланылачак. Илебездәге эшләнмә дефектлы участокларны ачыкларга мөмкинлек бирә, шул рәвешле ремонт эшләрен вакытында планлаштырып кына калмыйча, аларга чыгымнарны сизелерлек киметергә дә мөмкинлек бирә. Челтәрләрнең тузу дәрәҗәсе югары булган шартларда әлеге технологияне куллану аеруча актуаль, дип билгеләп үтә тармак экспертлары. Әлеге чишелеш нигезендәге сынау проектын киләчәктә Россия Федерациясенең башка төбәкләрендә тәҗрибә туплап, Татарстанда гамәлгә ашыру планлаштырыла.

Бүген Татарстан Республикасы Сәнәгать һәм сәүдә министрлыгында Дәүләт граждан хезмәткәрләренең хезмәт тәртибенә карата таләпләр үтәлеше һәм мәнфәгатьләр каршылыгын җайга салу буенча комиссия утырышы узды.

Көн тәртибендә берничә сорау каралды. Аерым алганда, Министрлыкның дәүләт хезмәткәрләре тарафыннан 2018 ел өчен керемнәре, чыгымнары, мөлкәте һәм мөлкәти характердагы йөкләмәләре турында тапшырылган белешмәләргә анализ нәтиҗәләре, шулай ук коррупциягә каршы сәясәт мәсьәләләре буенча Татарстан Республикасы Президенты Идарәсе тарафыннан 2018 ел өчен тапшырылган коррупциягә каршы көрәш чараларын гамәлгә ашыру турында белешмәләргә анализ нәтиҗәләре буенча әзерләнгән күзәтү материаллары каралды.

Бүген Татарстан Республикасы Сәнәгать һәм сәүдә министрлыгында Татарстан Хөкүмәте делегациясенең Беларуська визиты алдыннан ике яклы хезмәттәшлек буенча эшче төркем утырышы узды.

Очрашуда ике төбәкнең нефть химиясе комплексының эре предприятиеләре вәкилләре катнашты, очрашуны министр урынбасары Илдар Мингалиев үткәрде.

Яклар продукция белән тәэмин итү күләме һәм "Татнефть" белән "Беларусьнефть", "Нижнекамскнефтехим" һәм "Белшина", "Кварт" ГАҖ һәм "Могилевхимволокно" һ.б. компанияләр арасында үзара файдалы хезмәттәшлек буенча "сәгать чагыштырды".

Эшче төркем утырышы Татарстанның нефть, газ, химия форумы – 2019 уздыру кысаларында узды, анда Беларусьтан 30 кешелек составта сәнәгый делегация килде.

Өстәмә:

Татарстан һәм Беларусь хезмәттәшлегенең төп тармаклары – машина төзелеше, нефть химиясе продукциясе һәм дару чаралары. 2019 елның 1 яртыеллыгында Татарстан белән Беларусьның тышкы сәүдә әйләнеше АКШ доллары белән 260 млн. артып киткән.

Бүген Татарстанның нефть, газ, химия форумы кысаларында "Энергетика һәм сәнәгать өчен энергоэффектив, инновацион чишелешләр һәм технологияләр" темасына семинар узды. Чараны "Татарстан Республикасы Министрлар Кабинеты каршындагы Энергияне сак тоту технологияләре үзәге" ДАУ белән берлектә Татарстан Республикасы сәнәгать һәм сәүдә министрлыгы оештырды.

Сәламләү сүзе белән министр урынбасары Алмаз Хөсәенов чыгыш ясады. Ул билгеләп үткәнчә, Татарстан Республикасында ягулык-энергетика ресурсларын төп кулланучылар – энергетика һәм сәнәгать предприятиеләре.

"Шуңа күрә бүген икътисадның реаль секторында, барыннан да элек, эшкәртү тармакларында һәм энергетикада җитештерү куәтләрен модернизацияләүгә юнәлдерелгән инвестицион проектларны гамәлгә ашыру мөһим", – дип ассызыклады Алмаз Хөсәенов.

Семинар кысаларында "РусЭнергоПроект", "Шнейдер Электрик", "Эртей Петрошем Рус", "Керхер", "ГидроМетСнаб", шулай ук Санкт-Петербургтан "Новые решения" кебек Мәскәү компанияләре вәкилләре доклад белән чыгыш ясады.

Докладчылар сәнәгать җитештерүләре һәм энергетика өчен кулланыла торган энергоэффектив, инновацион чишелеш һәм технологияләрнең төрле проектларын тәкъдим итте.

Аерым алганда, "Гидромснаб" генераль директоры Евгений Чихирев, РайнПроф (RainProf) күп компонентлы диэлектрик составлары ярдәмендә сүтмичә 1000В кадәр көчәнеш астында электр җиһазының теләсә нинди төрен элемтәсез чистарту технологиясен гамәлгә кертү проекты турында сөйләде.

Әлеге технологиягә республиканың күп кенә предприятиеләрендә ихтыяҗ зур, шул ук вакытта предприятиеләр аны мөстәкыйль рәвештә (үз составында тиешле профильле хезмәткә ия булган очракта), шулай ук сервис компанияләре хезмәтләре аша да куллана алалар.

Семинар диалог форматында узды, анда Татарстан Республикасы предприятиеләре һәм энергокомпанияләре вәкилләре актив катнашты: "Казаноргсинтез", "Нижнекамсктехуглерод", "УК "КЭР-Холдинг", "Татэнерго", "ТГК-16" һәм башкалар.

Казанга, Татарстанның нефть, газ, химия форумы кысаларында, Төрекмәнстанның дәүләт министры – "Туркменгаз" дәүләт концерны рәисе Мурад Арчаев  килде.

2 нче сентябрьдә – форум ачылган көнне – Мурад Арчаев ТНФ-2019 тантаналы ачылышында, шулай ук "Нефть-газ химиясен нәтиҗәле үстерүнең инновацион чишелешләре" халыкара фәнни-гамәли конференциясенең пленар утырышында катнашты.

Бүген Төрекмәнстанның дәүләт министры "Татнефть" ГАҖ җитәкчелеге белән эшлекле очрашуда катнашу өчен Татарстан Республикасы Сәнәгать һәм сәүдә министрлыгына килде.

Очрашу кысаларында "Татнефть" ГАҖ генераль директоры урынбасары – баш геолог Рәис Хисамов "Татнефть" компанияләр төркеме эшчәнлегенең төп юнәлешләрен тәкъдир итте, шуннан соң яклар үзара файдалы хезмәттәшлек мөмкинлеге турында фикер алышты.

Бүген Татарстанның нефть, газ, химия форумы кысаларында "Углеводородлы һәм минерал чимал потенциалы" халыкара фәнни-гамәли конференциясенең пленар утырышы булып узды.

Конференциядә сәламләү сүзе белән Татарстан Республикасы Президенты Рөстәм Миңнеханов чыгыш ясады:

"Чимал базасын үстерү мәсьәләләре хәзерге вакытта Россия нефть-газ сәнәгате өчен актуаль, алай гына да түгел. Бу тема бөтен дөньяда нефть-газ сәнәгате өчен фәнни тикшеренүләрнең өстенлекле юнәлешләренең берсе булып тора".

ТР сәнәгать һәм сәүдә министры Альберт Кәримов конференциянең рәисе буларак катнашты. "Форум югары дәрәҗәдәге профессионаллар, абруйлы экспертлар һәм төбәк хакимият органнары вәкилләренең конструктив диалогының төп урынына әйләнәчәк, катлаулы тармак мәсьәләләре буенча төрле яклап фикер алышу һәм файдалы тәкъдимнәр исемлеген формалаштыру өчен уникаль мөмкинлек бирәчәк", – дип ассызыклады министр.

Конференциядә катнашучыларга һәм кунакларга сәламләү сүзе белән Әзербайҗанның энергетика министры урынбасары Гульмамед Җавадов та мөрәҗәгать итте:

"Татарстан белән Әзербайҗан үз структурасы буенча охшаш, димәк, нефть-газ сәнәгате өлкәсендә һәм башка өлкәләрдә хезмәттәшлекне киңәйтү мөмкинлеге бар. Хәзерге вакытта без нефть химиясе сәнәгатен үстерәбез, чималны мөстәкыйль эшкәртүгә караганда отышлырак икәнен аңлыйбыз. Шуның белән бергә, альтернатив энергетика өлкәсендәге эшләнмәләргә игътибар белән карыйбыз, ягъни, аларның экологик яктан чиста булуын һәм табигатькә йогынтысын исәпкә алып, Әзербайҗанда энергия саклау һәм энергоэффектив технологияләрне үстерү белән шөгыльләнәбез".

Бүген конференциядә углеводород чималы ресурсларын тулыландыру резервларын эзләү белән бәйле мәсьәләләр буенча 100дән артык доклад тәкъдим ителде. Докладларны чит илләр (Үзбәкстан Республикасы, Канада һ.б.), шулай ук Россия субъектлары (Мәскәү, Санкт-Петербург һ.б.) вәкилләре яңгыратты.

Алда форумда катнашучыларны һәм кунакларны зур эш программасы көтә: нефть-газ химиясе тармагының актуаль мәсьәләләре буенча фәнни-гамәли конференцияләр, түгәрәк өстәлләр һәм семинарлар.

ТР Президенты матбугат хезмәте материаллары файдаланылды

Чирек гасырдан артык Казан ел саен нефть-газ тармагының иң эре халыкара чараларның берсе уздырылган башкалага әверелә. Бүген чираттагы тапкыр "Казан ярминкәсе" күргәзмә үзәгендә ТНФ - 2019 Татарстан нефть, газ, химия форумы ачылды. Быел бу чара Россия тау һәм сәнәгать күзәтчелегенең 300 еллыгына багышланган.

"Хезмәт тарихы илнең сәнәгый үсеше һәм аның чимал һәм энергетика потенциалын ныгыту белән өзлексез бәйләнгән. Хезмәт коллективы техноген аварияләрне булдырмау, гражданнарыбызның гомерен һәм сәламәтлеген саклау буенча уңышлы эш башкара", – дип билгеләп үтте сәламләү сүзендә Татарстан Республикасы Президенты Рөстәм Миңнеханов.

Татарстан нефть, газ, химия форумы төбәк һәм халыкара дәрәҗәләрдә предприятиеләр арасында эшлекле хезмәттәшлек өчен тармак мәйданчыгы булып тора. Быел форум эшендә Россиянең 31 төбәгеннән һәм 23 ерак һәм якын чит илдән 180 тармак компаниясе катнаша.

Татарстанның нефть, газ, химия форумы гадәттәгечә өч мөһим тармак күргәзмәсен берләштерә, алар арасында:

• "Нефть, газ. Нефть химиясе" дигән 26 нчы халыкара махсуслашкан күргәзмәсе;

• "GEO-КАЗАН: Геологоразведка. Геодезия. Картография" дигән 9 нчы махсуслашкан күргәзмә;

• "Интерпластика Казан 2019" 5нче халыкара пластмасса һәм каучук күргәзмәсе – "Мессе Дюссельдорф Москва" ҖЧҖ белән берлектә оештырылучы бердәнбер төбәк тармак проекты, K-Globalgate пластмасса һәм каучук эшкәртү буенча халыкара күргәзмәләре буенча дөньякүләм челтәренең бер өлеше.

Күргәзмәләр экспозициясе өч павильонда һәм гомуми мәйданы 10 000 кв. метрдан артык булган күргәзмә үзәгенең ачык мәйданчыгында урнашкан.

Форум 2019 елның 2 сентябреннән 4 сентябренә кадәр дәвам итәчәк һәм аның аерылгысыз өлеше бай эш программасы булачак.

Бүген форум кысаларында СИБУР һәм "Татнефть" Тольяттида нефть химиясе производстволарына карата ниятләр турында килешү төзеде. Документ нигезендә, яклар СИБУР ягыннан сату һәм, димәк, "Татнефть" ягыннан Тольяттида җитештерү һәм башка активларны сатып алу буенча килешү төзергә планлаштыра.

Бу активлар Россиянең һәм дөньяның алдынгы җитештерүчеләре тарафыннан югары сыйфатлы шиннар чыгару өчен кулланыла торган төрле синтетик каучукны җитештерүне үз эченә ала. "Татнефть"нең активлар сатып алуы KAMA TYRES шин бизнесының вертикаль интеграциясен тәэмин итәчәк һәм аның бәясен арттырачак. Компания "Татнефть"нең нефть, газ, химия стратегиясен гамәлгә ашыру кысаларында алар үсешен дәвам итәргә ниятли.

Яклар килешү бәясе конфиденциаль булачак дип килеште. Компанияләр төркеме җитәкчелеге фикеренчә, килешү төзү "Татнефть"нең финанс хәленә сизелерлек йогынты ясамаячак.