ЯҢАЛЫКЛАР

Казан федераль университеты яңа белем бирү моделен формалаштыру кысаларында Татарстан Республикасы сәнәгать секторы предприятиеләре һәм оешмаларының югары квалификацияле кадрларга булган ихтыяҗларын канәгатьләндерергә омтыла.

Республика сәнәгать һәм сәүдә тармакларында төп эш бирүчеләрнең К(И)ФУ тәмамлаган белгечләрнең алган белем сыйфаты белән канәгать калуы турында объектив мәгълүмат алу, шулай ук белем бирү процессын оештыруда яңа алымнар табу өчен югары уку йортын тәмамлаучылар арасында сораштыру үткәрелә. Әлеге сылтама буенча сораштыруда катнашырга чакырабыз.

Татарстан Республикасы Сәнәгать һәм сәүдә министрлыгында Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов видеоконференцэлемтә режимында Россия Федерациясенең Германия Федератив Республикасындагы сәүдә вәкиле Андрей Соболев белән эшлекле очрашу үткәрде. Очрашу кысаларында Татарстан Республикасы һәм Германия партнерларының Germantech платформасыннан файдаланып, калдыклар белән эш итү өлкәсендәге кооперация мөмкинлекләре тикшерелде.

Әлеге очрашуда шулай ук Татарстанның экология һәм табигать ресурслары министры Александр Шадриков, Россия-Германия тышкы сәүдә палатасы вәкилләре Андрей Сизых, Татьяна Мацидовски һәм Юлия Грищенкова катнашты

Белешмә өчен: Germantech – Германия Федератив Республикасының (BMU) Әйләнә-тирә мохитне саклау, табигатьне саклау һәм атом-төш куркынычсызлыгы федераль министрлыгы ярдәмендә оештырылган электрон мәгълүмати-технологик платформа. Бу инициатива экологик машина төзелеше һәм инжиниринг өлкәсендә эшләүче алдынгы алман фирмаларын Россиядә җитештерү һәм технологияләр трансферы процессларына җәлеп итү инструменты буларак карала, алман һәм Россия компанияләре арасында калдыклар белән эш итү өлкәсендә элемтәләр урнаштыруга хезмәт итә.

Республиканың эре федераль һәм төбәк челтәрләрендәге бәяләрне мониторинглау нәтиҗәләре буенча 2020 елның 12-18 нче май көннәрендә кайбер социаль әһәмиятле азык-төлек товарларына бәяләр артуы ачыкланды:

- ак кәбестә – 2,7%;

- бәрәңге – 2,4%;

- алма – 2,1%;

- карабодай ярмасы – 1,5%;

- дөге – 1,5%.

Җиләк-җимеш продукциясенә бәяләр артуның төп сәбәбе – сезонлы күрсәткеч, ул республикада ел саен күзәтелә.

Бүгенге көндә Татарстан Республикасы Сәнәгать һәм сәүдә министрлыгы тарафыннан, Монополиягә каршы федераль хезмәтнең Татарстан Республикасы буенча идарәсе, Татарстан Республикасы Авыл хуҗалыгы һәм азык-төлек министрлыгы һәм Татарстан Республикасы Прокуратурасы белән берлектә, бәяләр арту сәбәпләрен ачыклау өчен уртак эш дәвам итә.

Шулай ук 2020 елның 21 нче маена республиканың ваклап сату һәм даруханә челтәрләрендә 700 меңнән артык антисептик, бер миллион пар перчатка һәм 2,5 млн. битлек исәпләнә. Шәхси саклану чараларын «Бәхетле», «Эдельвейс», «Августина», «Агат», «Магнит», «Пятерочка», «Лента», «Метро», «Верный», «Ашан», «Перекресток», «Зельгросс», «FAITRO», «Челны Хлеб», «Дуслык», «Гурман-продукт», «Светофор» челтәрләрендә һәм «Таттехмедфарм», «Планета здоровья», «Ривьера», «Саулык», «Сакура», «Фармленд», «Ева плюс», «Магнат», «Универсал» һәм «Алоэ-Фарм» даруханә челтәрләрендә сатып алырга мөмкин.

Быел үзенең 5 еллыгын билгеләп үтә торган укучыларның Россиякүләм #ВместеЯрче иҗади, проект һәм тикшеренү эшләре конкурсының төбәк этабына гаризалар кабул ителә башлаган.

Бу юлы конкурс илебезнең миллионлаган кешеләрнең тормышын яхшы якка үзгәрткән ГОЭЛРО планының 100 еллык юбилеена багышлана.

Гаризаны мәктәпкәчә, гомуми, өстәмә һәм урта һөнәри белем бирү оешмаларында укучы 6-18 яшьлек балалар һәм яшьләр бирә ала.

Җиңүчеләрне кыйммәтле бүләкләр көтә, ә өлкән сыйныф укучылары шулай ук чараны оештыручылардан һәм партнерлардан: «МЭИ» илкүләм тикшеренү университеты һәм Россиянең әйдәп баручы энергетика компанияләреннән Мәскәүгә чакыру алачак. Конкурс нәтиҗәләре Энергетиклар көне – 2020 елның 22 нче декабрендә ясалачак.

Конкурс номинацияләре яшь категорияләрен исәпкә алып формалаштырылган:

✔ «Заманча энергетика һәм энергиянең яңа төрләре кеше тормышын ничек үзгәртте?» (мәктәпкәчә белем бирү учреждениеләре, 1-4 сыйныф укучылары өчен);

✔ ГОЭЛРО планын кабул итүгә 100 ел тулуга багышланган иншалар конкурсы,  «Кеше, җәмгыять һәм яңа энергия төрләрен үзләштерү» россиякүләм иншалар конкурсы номинациясе (5-11 сыйныф укучылары өчен);

✔ «Мәктәп укучылары өчен белем бирү интерактив эшләнмәсе» темасы буенча иҗади һәм тикшеренү проектлары конкурсы (10-11 сыйныфлар һәм 1-2 курс укучылары өчен).

Заманча чынбарлык һәм үз-үзеңне изоляцияләү шартлары беркемгә дә комачауламаячак: эшне #ВместеЯрче фестивале сайтында укучылар конкурсына багышланган бүлеккә урнаштырырга мөмкин: https://вместеярче.рф/polozhenie-o-konkurse.

Конкурс Яшьләр эшләре буенча федераль агентлык, РФ Энергетика министрлыгы һәм Мәгариф министрлыгы ярдәме белән үткәрелә.

Шәхси эшкуар «Анастасов Георгий Николаевич» предприятиесе бер тапкыр кулланыла торган саклагыч битлекләр җитештерә башлаган. Җиһаз проекты үзләрендә әзерләнгән һәм Татарстан Республикасында җитештерелгән. Предприятиенең максималь җитештерү куәте аена бер миллионнан артык әйбер тәшкил итә. Битлекләр җитештерү өчен «Полиматиз» АҖ, «Эластик заводы» ҖЧҖ республика предприятиеләре тулысынча чимал белән тәэмин итә. Битлекләр халыкка Татарстан Республикасының сәүдә-ваклап сату челтәрләре аша сатылачак.
Хәзерге вакытта фиксаторлы бер тапкыр кулланыла торган яңа битлекләр җитештерү буенча икенче линия монтажлана. Шулай ук предприятие теркәү таныклыгын да алырга планлаштыра, ул аларга республиканың дәвалау-профилактика учреждениеләрен һәм даруханә челтәрләрен бер тапкыр кулланыла торган битлекләр белән тәэмин итәргә мөмкинлек бирәчәк.

Начар эпидемиологик хәл чорында шәхси саклану чараларына ихтыяҗны канәгатьләндерү өчен һәм Татарстан Республикасы Министрлар Кабинетының 2020 елның 20 мартындагы 620-р номерлы боерыгы белән расланган Яңа коронавирус йогышы таралуга, нефтькә һәм доллар курсына бәяләр волатильлегенә бәйле рәвештә начарланган вәзгыятьтә Татарстан Республикасы икътисадын тотрыклы үстерүне тәэмин итү чаралары планының 1.16 пунктын үтәү йөзеннән, Татарстан Республикасы Сәнәгать һәм сәүдә министрлыгы тарафыннан Татарстан Республикасында медицина битлекләре җитештерү куәтләрен киңәйтү эше алып барыла. Альтернатив вариант сыйфатында марлядан (ТУ 21.20.24-001-00302178-2020 буенча) һәм юу, пар ярдәмендә үтүкләү нәтиҗәсендә күп тапкыр файдаланып була торган тукымалардан (агартылган бәз, мадаполам, мамык һ.б.) маскалар җитештерү карала.

Республика территориясендә урнашкан җиңел сәнәгать предприятиеләре белән әлеге мәсьәләне карау нәтиҗәләре буенча җитештерүнең мөмкин булган егәрлекләре, дизайн, чимал төре, эшләнмәләр күләме билгеләнде.

Химик Куркиннар династиясенә Любовь Николаевна нигез сала. Гаиләнең гомуми хезмәт стажы – 52 ел. Любовь Николаевна 1960 елның 24 нче мартында Бондюга поселогында (хәзерге Менделеевск шәһәре) нәселле химиклар гаиләсендә туа. Аның әти-әнисе Л.Я.Карпов исемендәге химия заводында хезмәт куя. 1986 елда КХТИ (технологик бүлек) тәмамлый. 1992 елда предприятиегә инженер-микробиолог булып эшкә урнаша. «Аммоний» АҖдә хезмәтне саклау, азык-төлек контроле һәм сәнәгать куркынычсызлыгы буенча әйдәп баручы белгеч булып эшли. Хәзерге вакытта – лаеклы ялда. Эштән буш вакытында сөекле хатын, кайгыртучан әни һәм әби булып кала.

Ире, Сергей Петрович, 1960 елның 1 нче гыйнварында Свердловск өлкәсенең Новолялинск районындагы Лобва поселогында туа. КХТИ (механик бүлек) тәмамлаган. Предприятиедә 1999 елдан бирле аммиак селитрасы җитештерү цехында смена башлыгы булып эшли. «Татарстан Республикасының Атказанган химигы» дигән мактаулы исемгә ия.

Сергей Петрович белән Любовь Николаевна институтның 2 нче курсында таныша, бер тулай торакта яшиләр. Беренче очрашудан соң ук бер-берсенә тиң яр булуларын аңлап алалар, менә инде 34 елдан артык алар бергә гомер кичерә. Ике бала: ул һәм кыз тәрбияләп үстергәннәр.

Бүгенге көндә Куркиннар гаиләсе династиясен уллары Артем дәвам иттерә, ул «Аммоний» АҖнең концентрацияләнгән азот кислотасы җитештерү цехының контроль-үлчәү приборлары һәм автоматикасы буенча слесарь булып эшли. Белеме: Түбән Кама химия-технология институтын технологик процессларны һәм производстволарны автоматлаштыру инженеры белгечлеге буенча тәмамлаган. Өйләнгән, ике бала тәрбияли.

Кызлары Полина, мәктәпне тәмамлаганнан соң, РФ Үзәк банкының Омск банк мәктәбен тәмамлый. Омск шәһәрендә эшли. Хәзерге вакытта ире һәм кызы белән газиз шәһәренә әйләнеп кайткан.

Кондратьевлар династиясенең «КЗСК» предприятиесендәге хезмәт стажы – 650 ел. Хезмәт династиясе 1932 елда СК-4 заводы төзелешенә ташчы булып урнашкан ике бертуган Иван белән Петрдан башланып китә, 1940 елда заводка Иванның хатыны да килә. Җиде елдан соң Иванның улы Сергей токарь булып  билгеләнә. Сергейның улы – Кондратьев Николай Сергеевич 1975 елдан бирле слесарь-ремонтчы булып эшли. Хатыны – Кондратьева Татьяна Геннадьевна – химик. Аның сеңлесе Гордеева Валентина Сергеевна – баш бухгалтер урынбасары, заводта 1995 елдан бирле эшли.

«КЗСК минем өчен – газиз предприятие. Анда эшләгәндә төрле чорларны кичердем, катлаулысы да булгалады. Заводка – гомер, ә миңа заводта династиянең бу матур традициясен өзмәскә мөмкинлек биргән Татарстан Республикасы Сәнәгать һәм сәүдә министрлыгы һәм «Синтез» АҖ исеменнән котлау алуы бик күңелле», – ди Валентина Сергеевна.

«Сколково» фонды дистанцион сервисларны, сәламәтлек торышын диагностикалау һәм мониторинглау системаларын үстерү юнәлешләре буенча «үтәли» цифрлы технологияләр кертүгә бәйле сынау проектларын сайлап алу буенча конкурс игълан итә. Конкурсның төп максаты – коронавирус инфекциясе таралуга каршы көрәштә әһәмиятле өлеш кертә алырлык проектларга ярдәм күрсәтүне тизләтү. Проектлар COVID-19 пандемиясе нәтиҗәләрен бетерүгә һәм, шул исәптән, түбәндәгеләргә ярдәм итәргә тиеш:

- социаль дистанция шартларында эшчәнлекне тәэмин итү;

- читтән торып эшләү һәм уку нәтиҗәлелеген арттыру;

-  онлайн-мәшгульлек мөмкинлеген арттыру;

- тәкъдим итү һәм коммуникация сервисларын үстерү;

- онлайн хезмәтләр күрсәтү өчен сервислар һәм платформаларны үстерү;

- сәламәтлек торышын диагностикалау, мониторинглау һәм вакцинацияләү системаларын үстерү;

- телемедицинаны үстерү юлы белән медицина ярдәменнән файдалану мөмкинлеген арттыру.

Проектларны гамәлгә ашыру өчен грантлар заказчылар сыйфатында үз эшчәнлекләрендә цифрлы чишелешләр кертергә ниятләгән индустриаль компанияләргә һәм башка оешмаларга бирелергә мөмкин.

Түбәндәге шартларга туры килә торган проектлар карау өчен кабул ителә:

- проект сынау рәвешендә гамәлгә кертү характерына ия;

- продуктның технологик әзерлек дәрәҗәсе 5 башлап 8 кадәр (TRL яки ГОСТ);

- продукт үзебездә ясалган;

- бюджеттан тыш финанслау күләме кимендә 20%;

- продукт тиражлауның расланган потенциалына ия.

Башлангыч конкурста җиңүчеләр төп конкурс сайлап алуында катнашу мөмкинлеген алачак, нәтиҗәдә иң яхшы проектларга грантлар биреләчәк.

Гаризалар кабул итү 2020 елның 15 маеннан башлана. Гаризаларны карау һәм җиңүчеләрне билгеләү турында карарлар кабул итү гаризалар керүгә карап гамәлгә ашырылачак.

 Проектның максималь күләме: 300 млн. сум.

Өстәмә финанслау: кимендә 20%

 Тулырак мәгълүматны әлеге сылтама буенча белергә, шулай ук гариза тапшырырга мөмкин.

Бөек Җиңүнең 75 еллыгын бәйрәм итү уңаеннан Татарстан Республикасы Сәнәгать һәм сәүдә министрлыгы, өйләренә азык-төлек җыелмалары китереп, ветераннарны бәйрәм белән котлады, шулай итеп Министрлыкның 91 ветераны шундый җыелма алды.

«Татарстан Республикасы Сәнәгать һәм сәүдә министрлыгы һәм шәхсән үз исемемнән Сезне Яз һәм Хезмәт бәйрәме һәм Бөек Җиңү көне белән котлыйм! Сезгә һәм якыннарыгызга чын күңелдән игелек, иминлек, бетмәс-төкәнмәс энергия, нык сәламәтлек һәм тыныч күк йөзе телим!» – диелә Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримовның котлау открыткасында.