ЯҢАЛЫКЛАР

Бүген Казан шәһәрендә “Казан ярминкәсе” күргәзмәләр үзәге территориясендә 19 нчы халыкара “Энергетика. Ресурс саклау” махсуслаштырылган күргәзмәсе белән 18 нче халыкара “Энергия-ресурс нәтиҗәлелеге һәм энергияне сак куллану” симпозиумын ачу тантанасы булды.

Тантаналы ачылыш чарасында Татарстан Республикасы Президенты Рөстәм Миңнеханов, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Премьер-министры Алексей Песошин, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов катнашты.

Быел күргәзмә эшендә Россия Федерациясенең 18 төбәгеннән, шул исәптән Мәскәү өлкәсеннән, Санкт-Петербургтан һәм Кырым Республикасыннан вәкилләр катнашты. Россиядән, Беларуссиядән, Казахстаннан, АКШтан, Германиядән, Венгриядән, Израильдән һәм Словениядән 130дан артык компания күргәзмә экспозицияләрен тәкъдим итте. Симпозиум һәм Күргәзмә эше киң күләмле эш программасы белән үрелеп барачак.

Чараны ачып, Татарстан Республикасы Президенты Рөстәм Миңнеханов ассызыклаганча, күргәзмә үзен энергия ресурсларын сакчыл куллану мәсьәләләре хакында предметлы сөйләшү һәм тармактагы иң заманча технологияләр белән танышу өчен нәтиҗәле мәйданчык булып күрсәтте. Ул күргәзмәдә катнашучыларның барысына да рәхмәт белдерде һәм аның алга таба энергияне сакчыл куллану өлкәсен үстерүгә хезмәт итәчәгенә ышаныч белдерде.

Чараларның беренче көннәрендә Татарстан Республикасы Хөкүмәтенең Татарстан Республикасы Президенты Р.Н. Миңнеханов катнашында “2014-2020 елларга Татарстан Республикасында энергияне сакчыл куллану һәм энергетика нәтиҗәлелеген арттыру” дәүләт программасын тормышка ашыру турында утырышы әһәмиятле вакыйга булды. Утырышта энергияне сакчыл куллану буенча республика программасын тормышка ашыру йомгаклары турында сүз барды, шулай ук әлеге өлкәдә киләсе елларга бурычлар билгеләнде. Моннан тыш, ТКХ өлкәсендә энергия нәтиҗәлелеген арттыру мәсьәләләре, бюджет өлкәсендә энергия-сервис контрактлары төзүгә кагылышлы мәсьәләләр каралды һәм республиканың электр челтәрләре комплексында “Челтәр компаниясе” ААҖ тарафыннан тормышка ашырыла торган санлаштыру проекты күрсәтелде.

Утырышта Россия Федерациясе Дәүләт Думасы һәм Федерация Җыены, Татарстан Республикасы Дәүләт Советы һәм Хөкүмәте, шулай ук башкарма хакимият һәм җирле үзидарә органнары, Татарстан Республикасының алдынгы сәнәгать предприятиеләре, оешмалар һәм мәгариф учреждениеләре вәкилләре катнашты.

Үзенең докладында Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов билгеләп узганча, энергетика комплексы буенча тулаем алганда, модернизацияләү һәм яңа куәтләрне гамәлгә кертү 2017 ел йомгаклары буенча электр энергиясе эшләп чыгаруга ягулыкның чагыштырма сарыф күләмен 11,3%ка киметү мөмкинлеген биргән. Моннан тыш, Альберт Кәримов сүзләренә караганда, башкарылган эш аркасында, челтәрләрдә электр энергиясен югалтулар өлеше узган ел белән чагыштырганда 4,4%ка кимегән һәм 6,8% тәшкил иткән.

2017 ел йомгаклары буенча сәнәгатьтә энергиясыешлык индикаторы 2016 елга карата 9,8%ка киметелгән. Сәнәгатьнең төп тармаклары кисемендә барлык тармакларда да продукциянең энергиясыешлык индикаторы кимү күзәтелә.

Сәнәгать өлкәсендә санлаштыру технологияләрен үстерүгә килгәндә, Альберт Кәримов билгеләгәнчә, Татарстанда, асылда энергетика комплексында, шулай ук зур эш алып барыла. “Әйтик, мисал өчен, республиканың “Челтәр компаниясе” тарафыннан SmartGrid “акыллы челтәр” технологияләрен кертү проекты тормышка ашырыла”, – дип тә өстәде Альберт Кәримов.

Рөстәм Миңнеханов ассызыклап узганча, энергияне сакчыл куллану мәсьәләләре бүген аеруча зур игътибар таләп итә. Ул Россиядә алга киткән илләр белән чагыштырганда энергия куллану дәрәҗәсенең 2-3 мәртәбә күбрәк булуын билгеләде. Татарстанга килгәндә исә, узган ел йомгакларына караганда тулай төбәк продуктының бәяләрдә чагыштыргандагы энергиясыешлыгы нибары 0,5%ка гына кимегән.

Татарстан Республикасы Президенты билгеләгәнчә, республикада җылылыкны һәм электр энергиясен катнаш эшләп чыгаруны оештыру буенча мисаллар бар. Әйтик, быел Алабугада электр куәте 20 МВт һәм җылылык куәте 28 Гкал/сәг тәшкил иткән яңа җылылык-электр станциясе сафка бастырылачак. Әлеге ҖЭС төп өстенлеге – җылылык энергиясе җитештерүнең үзкыйммәтен киметү мөмкинлеге. Шул рәвешле, җылылыкка булган тариф үсешен тоткарлау, шулай ук Алабугада электр белән тәэмин итүдә нәтиҗәлелек һәм ышанычлылык дәрәҗәсен арттыру күздә тотыла.

Татарстан Республикасы Президенты бүгенге көндә Зәй ГРЭСын модернизацияләүнең әһәмиятле проект булуын билгеләде. “Без әлеге ГРЭСны модернизацияләү эшенә керешергә тиеш. Нигездә, республика, кирәгеннән артык энергетика куәтләренә ия була торып, бүген үзенең конкурентлы булмавы аркасында электр энергиясен читтән сатып ала.  Биредә карар кабул итәргә кирәк”, – дип белдерде Рөстәм Миңнеханов.

Исегезгә төшерик, 14 март көнне, эш программасы кысаларында, альтернатив энергетиканы, газ-мотор ягулыгы базарын үстерү мәсьәләләре буенча түгәрәк өстәлләр узачак һәм энергетика нәтиҗәлелегенең санлаштыру технологияләре буенча эксперт секциясе, шулай ук “Татэнерго” АҖ һәм “Челтәр компаниясе” ААҖ кебек алдынгы энергетика предприятиеләре белән конференцияләр оештырылачак.

15 март көнне Казан дәүләт энергетика университеты территориясендә Яшьләр көне узачак, ул күләмле эш программасы белән үрелеп барачак. Көн тәртибендә интеллектуаль викторина уздырылачак. Беренче мәртәбә энергетика тармагындагы яшьләр советы утырышы булачак, анда энергетика бергәлегенең актив вәкилләре катнашачак. Шулай ук студентлар “галстуксыз очрашу” барышында хакимиятнең энергетика мәсьләләләрен күзәтеп торучы органнары җитәкчеләре, шулай ук алдынгы энергетика компанияләре вәкилләре белән аралаша алачак.

Теләге булган һәркемне Күргәзмәне карарга һәм Симпозиумның эш программасында катнашырга чакырабыз.

2018 елның 13 мартыннан 15 мартына кадәр Казан шәһәрендә “Казан ярминкәсе” күргәзмәләр үзәге территориясендә “Энергетика. Ресурс саклау” XIX Халыкара махсуслаштырылган күргәзмәсе һәм “Энергия-ресурс нәтиҗәлелеге һәм энергияне сак куллану” XVIII Халыкара симпозиумы булачак.

Күргәзмәне оештыручылар булып түбәндәгеләр катнаша: Татарстан Республикасы Президенты һәм Хөкүмәте ярдәмендә Татарстан Республикасы Сәнәгать һәм сәүдә министрлыгы, Татарстан Республикасы Министрлар Кабинеты каршындагы Татарстан Республикасы Энергия саклау технологияләре үзәге, Казан ш. мэриясе, “Казан ярминкәсе” ААҖ.

Күргәзмә эше энергетика ягыннан нәтиҗәле һәм ресурсларны сакчыл куллану технологияләрен күрсәтүгә; төбәкара һәм халыкара хезмәттәшлекне үстерүгә; алга таба энергетика нәтиҗәлелеге стратегиясе турыдан-туры аларның инициативаларына һәм карарларына бәйле булган бизнес-бергәлек, галимнәр һәм федераль һәм региональ хакимият органнары вәкилләренең эксперт фикерләре белән алмашуга юнәлдерелгән.

Күргәзмә эшендә Россиядән һәм Белоруссиядән, Казахстаннан, АКШтан, Германиядән, Венгриядән, Израильдән һәм Словениядән 100дән артык алдынгы компания вәкилләре катнашачак. Симпозиумның һәм күргәзмәнең эш программасының көн тәртибендә – энергетика нәтиҗәлелеген арттыруга һәм энергияне сакчыл куллану өлкәсендәге инновацияле чишелешләргә бәйле булган иң актуаль темаларга фәнни-техник конференцияләр, түгәрәк өстәлләр, эксперт секцияләре һәм семинарлар.

2017 ел йомгаклары буенча Татарстан Республикасы Хөкүмәтенең “2014-2020 елларга Татарстан Республикасында энергияне сакчыл куллану һәм энергетика нәтиҗәлелеген арттыру” дәүләт программасын тормышка ашыру һәм 2018 елга бурычлар турында” утырышы эш программасының әһәмиятле чарасына әвереләчәк.

Күргәзмә узган көннәрдә “Энергия-нәтиҗәле җиһазланыш һәм технологияләр” конкурсында җиңүчеләрне бүләкләячәкләр, шулай ук энергияне сакчыл куллану һәм энергетика нәтиҗәлелеген арттыру темаларын яктырту һәм пропагандалау буенча ММЧ һәм предприятиеләрнең матбугат хезмәтләре республика конкурсында җиңүчеләр аталачак.

15 март көнне, яшьләр көне кысаларында, республика яшьләренең V “Без энергетика нәтиҗәлелеген сайлыйбыз – 2018” яшь инициативалар конкурсында җиңүчеләрне бүләкләү булачак.

“Энергетика. Ресурс саклау” 19 нчы халыкара махсуслаштырылган күргәзмәне рәсми рәвештә ачу тантанасы 2018 елның 13 мартында 08.30 сәгатьтә, “Казан ярминкәсе” күргәзмәләр үзәгенең 3 нче павильонында булачак.

Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов гүзәл затларны Халыкара хатын-кызлар көне белән тәбрик итә:

“Татарстан Республикасы Сәнәгать һәм сәүдә министрлыгы исеменнән һәм шәхсән үземнән 8 март – Халыкара хатын-кызлар көне белән тәбрик итәм!

Ныклы сәламәтлек, иминлек, шәп кәеф, күңелнең иң түрендәге теләкләрнең тормышка ашуын телим!

Туган һәр яңа көн туганнарыгызның һәм якын кешеләрегезнең игътибары, җыл карашы һәм кайгыртуы белән сөендереп торсын, ә бәхет, мәхәббәт һәм уңыш алыштыргысыз юлдашларыгыз булсын!”

“ТАНЕКО” нефть эшкәртү комплексында изомеризат – бензиннарның яхшыртылган экологик үзенчәлекләргә ия булган югары октанлы компонентын җитештерү эше үзләштерелде.

“ТАНЕКО” Ростехнадзорның Идел буе идарәсеннән җиңел нафтаны изомеризацияләү һәм нафта сплиттеры бүлемтекләренең катнаш җайланмасына карата техник регламентларның һәм проект документларының таләпләренә җавап бирүе турында бәяләмә алды.

Исегезгә төшерик, 25 гыйнвар көнне Россия Федерациясе Президенты Владимир Путин Татарстан Республикасы Президенты Рөстәм Миңнеханов катнашында видеоэлемтә форматында “ТАНЕКО”да нефтьне тирәнтен эшкәртү буенча яңа эш тармагына – нафтаны гидрочистарту һәм изомеризация җайланмалары эшенә старт бирде. “Татнефть” компаниясе генераль директоры Наил Мәганов җайланмаларны тантаналы рәвештә эшләтеп җибәрү чарасында проектның Россиядәге проектчылар һәм машина төзүчеләр белән берлектә тормышка ашырылуы турында билгеләде, сафка бастырыла торган җайланмаларда илдәге нефть эшкәртү тармагы өчен яңа технологияләр кулланылган, алар арасында җайланманы әзер технологик зур блоклар белән тәэмин итү дә бар.

Җиңел нафта изомеризациясе җайланмасы елына 420 мең тонна пентан-гексан фракциясе эшкәртүгә юнәлдерелгән. Эш тармагы экология һәм сәнәгый куркынычсызлык буенча барлык заманча таләпләргә җавап бирә. Товарлык бензинның югары октанлы компоненты илнең “НПП Нефтехим” ГАҖ (Краснодар) тарафыннан эшләнгән “Изомалк-2” технологиясе буенча җитештерелә. Түбән температуралы нәтиҗәле платинкатнашмалы катализатор куллану югары октан санына ия булган изомеризат алу мөмкинлеген бирә.

Изомеризация процессы югары октанлы, яхшыртылган экологик үзенчәлекләргә ия булган бензиннар өчен компонент алуның иң табышлы ысулларының берсе булып тора. Продукт үзендә бензолның, ароматик углеводородларның һәм күкерт кушылмаларының булмавы белән сыйфатлана.

“Татнефть” ГАҖ матбугат хезмәте материаллары нигезендә

“Татнефть” компаниясе “Татнефть” ГАҖ грантларын алырга теләүчеләргә III конкурс уздырылуы турында игълан итә.

Конкурсның максаты төбәкләрне социаль, мәдәни яисә экологик үстерүгә кагылышлы актуаль мәсьәләләрне хәл итү буенча иң яхшы креатив идеяләрне, кызыклы тәкъдимнәрне сайлап алудан гыйбарәт.

Заявкалар түбәндәге номинацияләр буенча кабул ителә:

- мәгариф һәм фән (фәнне үстерү өчен гамәли кыйммәткә һәм социаль әһәмияткә ия булган проектлар);

- социаль өлкә (шәһәрләрне һәм торак пунктларын төзекләндерү; архитектура-тарихи мирас ядкәрләрен реставрацияләү һәм торгызу, яңа ядкәрләр булдыру; социаль объектларны капиталь ремонтлау һәм тәэмин итү, парклар, яшел зоналар булдыру, юллар ремонтлау);

- экология (иминлекле әйләнә-тирәлекне саклау һәм тәэмин итү, чишмәләрне, су объектларын төзекләндерү, мәктәпкәчә яшьтәге балаларны һәм укучыларны экологик мәгърифәтләү);

- мәдәният һәм сәнгать (яңа мәдәни-агарту проектларын тормышка ашыру, мәдәният һәм сәнгать өлкәсендә сәләтле кешеләргә һәм иҗат коллективларына булышлык күрсәтү, әдәбият үсешенә ярдәм күрсәтү);

- гражданлык һәм патриотлык (эзләнү эшчәнлеге, музейларның белем-тәрбия бирү проектлары, тәрбияви программалар).

Заявкалар 2018 елның 31 мартына кадәр кабул ителә.

Номинацияләр буенча элемтә телефоннары: “Социаль өлкә” - 307494; “Фән һәм мәгариф” - 307228; “Гражданлык һәм патриотлык” - 307228; “Мәдәният һәм сәнгать” - 373828; “Экология” - 307315. Әлмәт шәһәре коды – 8553.

Конкурс турында тулырак мәгълүмат www.tatneft.ru сайтында, “Социаль сәясәт” бүлегендә.

“Казаньоргсинтез” ГАҖ заводында полимер продукция төрү өчен җиңсәле өч катлы  FFS-пленка җитештерелә башлады. Яңа эш тармагына Татарстан Республикасы Президенты Рөстәм Миңнеханов старт бирде. Тантаналы чарада шулай ук Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов катнашты.

Өч катлы җиңсәле пленка “Казаньоргсинтез”дан төяп озатыла торган полимер продукцияне төреп җибәрү өчен югары җитештерүчәнлекле төргәкләү машиналарына капчыклар әзерләү өчен билгеләнгән.

Әлеге линия “Казаньоргсинтез” структурасына керә торган түбән басымлы полиэтилен җитештерү һәм эшкәртү заводы территориясендә ачылды. Яңа линия өчен заводтагы цехларның берсе урнашкан иске бина тулысынча үзгәртеп корылган. Яңа эш тармагы өчен “ReifenhauserBlownFilm” (Германия) өч катлы экструзион җайланмасы, шулай ук төргәкне маркалау өчен “Windmoller&Holsher” (Германия) флексографи машинасы махсус әзерләнгән.

Өч катлы FFS-пленкасын җитештерә башлау импорт төргәкләреннән һәм чит илдән сатып алына торган чималдан ясалучы төргәкләрдән баш тарту, шулай ук җитештерелә торган төрле маркалы полиэтиленны, пленканы үзебездә эшкәртү күләмен арттыру һәм продукциянең үзбәясен киметү мөмкинлеген бирәчәк. Янга калдырудан алынган файда елына 51 млн сумнан артып китәчәк.

Исегезгә төшерик, РФ Президенты Владимир Путин импорталмаш кысаларында сәнәгать үсешен стратегик бурычларның берсе буларак билгеләгән иде. “Үзебезнең ил сәнәгатендә эшлекле активлыкны үстерүгә ярдәм итү, яңа, уңышлы эш тармаклары булдыруга стимуллаштыру мөһим һәм, әлбәттә инде, тармакның нәтиҗәле үсешен тоткарлый торган системалы мәсьәләләрне хәл итәргә кирәк”, – дип билгеләде ул.

Илдә сәнәгать үсеше дәүләт башлыгының 2012 елдагы май указларының берсенә (“Дәүләтнең дәвамлы икътисади сәясәте турында” 596 номерлы) нигезләнеп алып барыла.

2018 елның 13 мартыннан 15 мартына кадәр Казан шәһәрендә “Казан ярминкәсе” күргәзмәләр үзәге территориясендә “Энергетика. Ресурс саклау” XIX Халыкара махсуслаштырылган күргәзмәсе (алга таба – Күргәзмә) һәм “Энергия-ресурс нәтиҗәлелеге һәм энергияне сак куллану” XVIII Халыкара симпозиумы (алга таба – Симпозиум) булачак.

Ел саен Күргәзмә зур, урта һәм кече бизнес вәкилләрен, дәүләт структураларындагы һәм фәнни даирәләрдәге вәкилләрне энергетика тармагына кагылышлы актуаль мәсьәләләр хакында сөйләшү, энергияне сак куллану һәм энергия ресурсларыннан нәтиҗәле файдалану өлкәсендә иң яхшы эшләнмәләрне күрсәтү өчен үзәк мәйданга җыя. Быел Россиядән, Беларуссиядән, Казахстаннан һәм АКШтан 100дән артык әйдәп баручы компания үзләренең иң яхшы казанышлары белән уртаклашачак.

Күргәзмә эше киң күләмле эш программасы белән үрелеп барачак, Татарстан Республикасы Хөкүмәтенең “2014-2020 елларга Татарстан Республикасында энергияне саклау һәм энергетика нәтиҗәлелеген арттыру” дәүләт программасын тормышка ашыру турында утырышы һәм Симпозиум әһәмиятле вакыйгага әвереләчәк.

Эш программасы кысаларында альтернатив энергетиканы үстерү, газ-мотор ягулыгы базары, экология һәм энергетика нәтиҗәлелеге мәсьәләләре буенча түгәрәк өстәлләр булачак, энергосервис контрактларын тормышка ашыру өчен бюджетныкы булмаган акчаларны җәлеп итү тәҗрибәсе турында киңәшмә узачак, шулай ук “Татэнерго” АҖ һәм “Челтәр компаниясе” ААҖ кебек әйдәп баручы энергетика предприятиеләре тарафыннан конференцияләр оештырылачак.

Ел саен, шушындый чаралар аркасында, республикадагы 90 артык предприятиегә, кече һәм урта бизнес белгечләренә эшлекле сөйләшүләрне нәтиҗәле уздырыру, яңа бизнес-партнерлар табу, шулай ук файдалы контрактлар төзү мөмкинлеге ачыла.

Һәркемне Күргәзмә эшендә катнашырга һәм Симпозиумның эш программасы чаралары белән танышырга чакырабыз.

Татарстан Республикасы Сәнәгать һәм сәүдә министрлыгы хәбәр итә: 2018 елның 23 февраленнән 23 мартына кадәр Татарстан Республикасындагы балалар өчен иң беренче “Кызыклы фән һәм техника йорты” интерактив фән үзәгендә (алга таба – ИФҮ) “Киләчәккә чакыру” дигән социаль экспериминет узачак. Балалар һәм аларның ата-аналары өчен экспозиция түләүсез булачак.

ИФҮ ул:

 - уникаль интерактив экспонатлар экспозициясе, аларга кул белән тияргә мөмкин;

- шәхси экспериментлар белән фәнни-танып белә торган  шоу;

- яңалыкка омтылучылар өчен үсеш ала торган мастер-класслар;

- фәнни-техник робот техникасы, лего-конструкцияләү лабораториясе;

-космонавтлар әзерләү буенча яшүсмерләр үзәге һәм төрле проектлар һәм идеяләр өчен ачык мәйданчык.

ИФҮ экспозициясе 50дән артык интерактив экспонатны исәпли, аларның һәркайсы – экспериментлар уздыру өчен әзер стенд.

Балаларның төп максатчан аудиториясе – 5-12 яшьлекләр.

Фәнни-техник интерактив экспозицияне түбәндәге адрес буенча карарга була: Татарстан Республикасы, Казан ш., Г.Тукай ур., 91.

Кунакларның барысы да үзләренең хис-кичерешләре, ИФҮ киләчәге турында идеяләре, аны яңа экспонатлар, фәнни программалар һәм балалар һәм ата-аналар белән эшләүдә гадәти булмаган эш юнәлешләре белән тулыландыру турындагы фикерләре белән уртаклаша алачак.

Тулырак мәгълүматларны (843)250-00-30, 250-00-36 телефоннары буенча алырга мөмкин. Рәсми сайт: www.science-house.ru.

2018 елда авыл хуҗалыгы, юл-төзелеш һәм коммуналь техника, шулай ук азык-төлек һәм эшкәртү сәнәгате өчен җайланмалар сатып алучылар кредит буенча ташламалы шартлардар файдалана алачак.

Авыл хуҗалыгы, юл-төзелеш һәм коммуналь техника, шулай ук азык-төлек һәм эшкәртү сәнәгате өчен җайланмалар сатып алу өчен бирелгән кредитлар буенча төшеп калучы керемнәрне каплау өчен Россия кредит оешмаларына субсидияләр бирүнең тиешле кагыйдәләре (Россия Федерациясе Хөкүмәтенең 2018 елның 17 февралендәге 163 номерлы карары) 2018 елның 2 мартында законлы көченә керә.

Программа шартлары буенча ахыргы кулланучыга авыл хуҗалыгы, төзелеш-юл һәм коммуналь техника, шулай ук азык-төлек һәм эшкәртү сәнәгате өчен җайланма сатып алуга елына 5% процентлы кредит ставкасын күздә тоткан ташламалы шартларда кредитлар бирелергә мөмкин.

2018 елга әлеге дәүләт ярдәме механизмын тормышка ашыру өчен федераль бюджетта 2 млрд сум күләмендә акча каралган.

Ташламалы кредит бирү программасы 2018 елның 1 гыйнварыннан 1 декабренә кадәр 5 елдан артык булмаган чорга сумнарда бирелгән кредитларга кагыла.

Дәүләт ярдәме предприятиеләрдәге җитештерү куәтләрен өстәмә эшкә җигәргә, эш урыннарын сакларга ярдәм итәчәк, шул исәптән катнаш тармакларда да. Шулай ук дәүләт ярдәменең әлеге механизмын тормышка ашыру аркасында барлык дәрәҗә бюджетларга өстәмә акча килү дә тәэмин ителәчәк.

“ТАНЕКО” АҖ “Россиядә табигать саклау эшчәнлегендә лидер 2017” XIII россиякүләм конкурсында “Экологик җаваплы булган өчен” номинациясендә җиңүче булды.

Әлеге абруйлы конкурс ел саен “Россиянең халыкара тәҗрибәсе һәм икътисады”, “Кеше сәламәтлеге һәм экология” халыкара форумнары инициативалары белән уздырыла. Конкурсның эксперт комиссиясенә федераль министрлыклардан, РФ Федерациясе Советы һәм Дәүләт Думасы профильле комитетларыннан вәкилләр, иҗтимагый оешмаларның җитәкчеләре, галимнәр һәм Россиядәге иң зур вузларның ректорлары керә. Конкурс әйләнә-тирә мохитне саклау өлкәсендә актив эшләгән өчен предприятиеләрне иҗтимагый бүләкләү максатларында уздырыла.

Өстәп әйтик, бүген “ТАНЕКО” АҖ икътисад күрсәткечләре буенча да, җитештерүнең экологияле булуы күзлегеннән караганда да, Россиядәге иң заманча предприятиеләрнең берсе булып тора. Моны “ТАНЕКО” АҖ белгечләре уздыра торган даими экологик мониторинг мәгълүматлары да раслый. НП һәм НХЗ комплексындагы лабораторияне югары технологияле заманча җиһазлар белән тәэмин итү Россия һәм халыкара законнарда каралган кирәкле тикшерүләрнең барча спектрын колачларга мөмкинлек бирә.