ЯҢАЛЫКЛАР
2019 елның 14 маенда ТР Сәнәгать һәм сәүдә министрлыгында министр урынбасары Алмаз Хөсәенов рәислегендә "Ел инженеры" республика конкурсын оештыру комитетының беренче утырышы узды.
Утырышта конкурсны оештыручылар, "Татарстан Республикасы предприятиеләре һәм оешмалары яшьләре берлеге", Татарстан Республикасы предприятиеләре һәм сәнәгатьчеләре ассоциациясе һәм Казанның әйдәп баручы югары уку йортлары вәкилләре катнашты. Катнашучылар бәйгене әзерләү һәм үткәрүгә кагылышлы төп моментлар турында фикер алышты.
"Ел инженеры" массакүләм аңда инженер һәм эшче һөнәрләрне популярлаштыру һәм төбәк икътисадының база тармакларындагы төп предприятиеләрне квалификацияле персонал белән тәэмин итү максатларында үткәрелә.
Конкурсны ике этапта үткәрү планлаштырыла – читтән торып катнашу, анда бирелгән гаризалар сайлап алыначак, һәм ике көнлек күчмә семинар рәвешендә турыдан-туры этап. Конкурста катнашучылар өч категориягә бүленә – студентлар, 35 яшькә кадәрге инженерлар һәм 35 яшьтән өлкәнрәк инженерлар.
Конкурс нәтиҗәләре буенча лауреатларны тантаналы шартларда бүләкләү планлаштырыла.
Татарстан Республикасына Беларусь Республикасы сәнәгать министры Павел Утюпин килде. Әлеге визит кысаларында Павел Утюпин Татарстан Республикасы сәнәгать һәм сәүдә министры урынбасары Герман Лернер белән берлектә "Алабуга автомобиль заводы җитештерү берләшмәсе" АҖ һәм "МТЗ-Татарстан сәүдә-җитештерү компаниясе" ҖЧҖ җитештерү мәйданчыкларында булды.
13-15 майда республика башлыгы Артур Парфенчиков җитәкчелегендә Карелия делегациясенең Татарстан Республикасына визиты уза.
Визит кысаларында берничә чара планлаштырылган: Татарстан Республикасы Президенты Рөстәм Миңнеханов белән очрашу, ТР Сәнәгать һәм сәүдә министрлыгына, ТР Инвестицияле үсеш агентлыгына, югары технологияләр өлкәсендәге "ИТ-парк" технопаркына, "Эйдос-медицина" һәм "Эйдос-робототехника" үзәгенә, "Химград" технополисына, шулай ук 7 нче шәһәр клиник хастаханәсенә һәм Казан (Идел буе) федераль университетына бару.
Делегация әгъзалары өчен авыл хуҗалыгы, сәламәтлек саклау, туризм, төзелеш, эшкуарлык һәм муниципаль хезмәттәшлек юнәлешләре буенча тәҗрибә уртаклашу максатларында аерым программалар әзерләнде.
Татарстан Республикасы Сәнәгать һәм сәүдә министрлыгы Сезне Җиңү көне белән котлый! Бу бөек бәйрәмнең батырлыгы һәм каһарманлыгы беркайчан да онытылмасын иде. Җиңү рухы йөрәкләрне рухландырсын һәм алга — яңа үрләргә, уңышларга һәм казанышларга илтсен. Бөтен дөнья һәрвакыт тыныч яшәсен, сугышлар турында бары тик бу изге бәйрәмне генә искә төшерсен.
"Вертолеты России" холдингының Казан вертолет заводында ("Ростех" дәүләт корпорациясенә керә) 8 май көнне "Ул бөек елларга баш иябез" дигән тантаналы митинг һәм ел саен уздырыла торган "Үлемсез полк" хәрәкәте булды.
Бәйрәмгә Бөек Ватан сугышы ветераннары, тыл хезмәтчәннәре, шулай ук Идел буе балалар йорты балалары һәм Казанның 8 нче гимназиясендә һәм 54 нче мәктәбендә укучылар чакырылган иде.
Тантаналы чарада хәрби-патриотик шигырьләр укылды һәм үзешчән сәнгать коллективлары чыгыш ясады. Тантанада катнашучылар Бөек Ватан Сугышы Геройлары һәм аларның батырлыклары турында хикәяләр тыңлады.
Җиңү көне алдыннан КВЗның ветераннар белән эшләү буенча вәкаләтле вәкилләре аларның өйләренә барды, бүләкләр һәм акчалата бүләкләр тапшырды.
"Вертолеты России" холдингы "Казан вертолет заводы" ГАҖ материаллары буенча
Татарстан Республикасы сәнәгать һәм сәүдә министры урынбасары Герман Лернер Кытай Халык Республикасының Харбин шәһәрендә Татарстан Республикасы алдынгы төркеменең эш сәфәрендә катнашты. Сәфәр 6 майдан 8 майга кадәр дәвам итте һәм Татарстан Президентының 2019 елның 17 июнендә КХР булачак визиты уңаеннан ясалды.
Эш визиты кысаларында ул 15-19 июньдә "Кытай-Россия төбәк хезмәттәшлеге: мөмкинлекләр, потенциал һәм киләчәк" шигаре белән узачак VI Россия-Кытай ЭКСПО-2019 каршындагы Форумны уздыру урыны карап чыгылды.
Делегация шулай ук Харбин шәһәренең татар мәчетендә дә булды. Хәзерге вакытта мәчет ремонт хәлендә, ә аны ачу ТР Президентының июнь аендагы визиты кысаларында планлаштырыла.
Казан (Идел буе) федераль университеты "Корпоратив облигацияләр базарын үстерү" юнәлеше буенча квалификация күтәрү программасын эшләде. Программаның максаты – Татарстанның финанс базарын үстерү.
Әлеге программа кысаларында дәресләр катнашучыларның мондый өлкәләрдә белемнәрен актуализацияләүгә юнәлдереләчәк: облигация кредитлары, корпоратив облигацияләр эмиссиясе процедуралары, облигацияләрне биржадан сатуны оештыру һ.б.
Программа тәмамлангач, катнашучылар тиешле үрнәктәге документлар алачак.
Программада катнашу өчен гаризалар 2019 елның 29 маена кадәр кабул ителә (катнашырга теләүчеләрнең Ф.И.А., вазыйфасы, телефоны).
Гариза бирергә, шулай ук программа турында тулырак мәгълүматны түбәндәгечә алырга мөмкин:
электрон почта буенча: Niyaz.Valiev@tatar.ru
телефон аша: 8 (843) 567-36-28.
2-3 май көннәрендә Татарстанда Бөек Җиңү көненә багышланган "Марш-бросок" туристик-маҗаралы чара узды.
Чара Лаеш районында Мишә елгасында узды, анда эшләүче яшьләр арасыннан 100дән артык һәвәскәр турист җыелган иде.
"Марш-бросок" кысаларында ел саен төрле конкурслар һәм ярышлар уза: туристик-маҗаралы узышлар, иҗади конкурслар, туристик кулинария осталыгы конкурслары, шулай ук һәвәскәр балыкчылык ярышлары, аларга инде өченче ел Яшьләр хөкүмәте белән берлектә ТР Сәнәгать һәм сәүдә министрлыгы җитәкли.
Быел ярышларда 9 предприятие катнашты: "КГКЗ" ФКП, "КМПО" АҖ, "Татэнерго" АҖ, Түбән Кама ГЭС, "Ремдизель" АҖ, "Түбән Кама Нефтехим" ГАҖ, "Татэнерго" АҖ филиалы – Түбән Кама ҖЭҮ, "Бигеш аэропорты" АҖ, Бөгелмә электр челтәрләре – "Челтәр компаниясе " ААҖ филиалы.
Ярышларда җиңүче булып "Бигеш аэропорты" АҖ вәкиле танылды, ул конкурс кураторларыннан диплом һәм бүләкләр алды.
ТР Яшьләр хөкүмәте материаллары буенча
2019 елның 30 апрелендә Татарстан Республикасы Сәнәгать һәм сәүдә министрлыгында "Карпов концерны" ҖЧҖ фәнни-тикшеренү лабораториясен җиһазлау һәм тәҗрибә-сәнәгать җайланмалары булдыруда ярдәм күрсәтү мәсьәләсендә киңәшмә узды. Очрашуны министр урынбасары Алексей Савельчев үткәрде.
Киңәшмәдә "Карпов концерны" ҖЧҖ, Татарстан Республикасы Икътисад министрлыгы, "Идея" технопаркы ЯАҖ, "Татарстан Республикасы Инвестиция-венчур фонды" коммерциясез оешмасы, "Татнефтехиминвест-холдинг" ААҖ, "Казан милли тикшеренү технология университеты" ЮҺБ ФДБМУ вәкилләре катнашты.
Киңәшмә барышында "Карпов концерны" ҖЧҖ вәкилләре тыңланды, алар "Фәнни-гамәлгә кертү үзәге" ҖЧҖ лабораториясенең потенциалы, шулай ук кремнийорганик продуктлар җитештерү технологияләрен эшләү буенча уздырылган тикшеренүләр турында хәбәр итте. "Карпов концерны” ҖЧҖнең гамәлдәге дәүләт программаларында катнашу мөмкинлегенә бәйле мәсьәләләр каралды.
Казан вертолет заводы вәкилләре "Вертолеты России" холдингының ("Ростех" дәүләт корпорациясенә керә) ел саен уздырыла торган IV корпоратив һөнәри осталык чемпионатында җиңү яулады. Ярышлар "Роствертол" заводында узды. Тугыз предприятие эшчеләре һәм инженерлары биш номинациядә көч сынашты. Җиңүчеләр Ростех җыелма командасына сайлап алу чемпионатына китәчәк, ул Россия сәнәгать компанияләренең яшь белгечләре арасында WorldSkills Hi-Tech илкүләм чемпионатында дәүләт корпорациясе исеменнән чыгыш ясаячак.
Апрель ахырында бер атна дәвамында 65 катнашучы биш производство компетенциясендә көч сынашты: "CAD инженерлык графигы", ЧПУлы станокларда токарь эшләре", "ЧПУлы станокларда фрезер эшләре", "Авиация техникасы эшләнмәләрен җитештереп җыю" һәм "Тормыш циклына идарә итү". Аларның эшен холдинг предприятиеләреннән 38 эксперт, шул исәптән КВЗ вәкилләре бәяләде.
"Авиация техникасы эшләнмәләрен җитештереп җыю" компетенциясендә алтын медальне КВЗ җыючысы Рушан Кадыйров яулады. "Тормыш циклына идарә итү" компетенциясендә беренче урынны шулай ук Казан вертолет төзүчеләре командасы алды. КВЗ инженер-программисты Наил Мөхәммәтшин "ЧПУлы станокларда фрезер эшләре" компетенциясендә өченче урын алды.
"Вертолеты России" холдингының ел саен уздырыла торган IV корпоратив һөнәри осталык чемпионатында катнашучыларның барысы да махсус сертификатларга ия булды. Җиңүчеләрне истәлекле дипломнар һәм акчалата бүләкләр белән бүләкләделәр.
Корпоратив чемпионат уздыруның төп максаты – яшьләрнең эшче һәм инженер һөнәрләре белән кызыксынуын арттыру. Иң яхшылары Россия сәнәгать компанияләренең яшь белгечләре арасында һөнәри осталык буенча WorldSkills чемпионатында Ростех корпоратив җыелма командасы составында катнашачак.