ЯҢАЛЫКЛАР
Татарстан Республикасы Сәнәгать һәм сәүдә министрлыгы тарафыннан "Казан дәүләт энергетика университеты" ЮББ ФДБМУ территориясендә Татарстан Республикасы бюджет өлкәсе оешмалары белән энергияне сакчыл куллану һәм энергетика нәтиҗәлелеген арттыру программаларын эшләү буенча семинар-киңәшмә оештырылды. Киңәшмәдә Татарстан Республикасы башкарма хакимият органнары һәм җирле үзидарә органнары катнашты.
Үзенең чыгышында ТР Сәнәгать министрлыгының энергияне саклау һәм энергетика нәтиҗәлелеге бүлеге башлыгы Евгения Каткова болай дип ассызыклады: "Муниципаль берәмлектә, дәүләт хакимияте органында, дәүләт учреждениесендә яки муниципаль учреждениедә энергияне сакчыл куллану буенча расланган программаның булмавы гамәлдәге законнарның бозылуына һәм тиешле административ штрафлар салынуга китерә. Энергия саклау программасы булу-булмавын энергия саклау өлкәсендә законнар үтәлешен тикшерүдә тотучы тиешле күзәтчелек органнары гамәлгә ашыра, шулай ук Татарстан Республикасы Сәнәгать һәм сәүдә министрлыгы программаларның актуальлеге буенча мониторинг алып бара. Моннан тыш, энергия саклау программалары буенча белешмәләр "Энергиянәтиҗәлелек" дәүләт мәгълүмат системасына кертелергә тиеш, биредә махсус бүлектә энергия декларацияләрен тутырырга кирәк, шулай ук әлеге белешмәләр муниципаль берәмлекләрнең, дәүләт хакимияте органнарының һәм бюджет учреждениеләренең рәсми сайтларында бастырылырга тиеш".
"Татарстан Республикасы Министрлар Кабинеты каршындагы Татарстан Республикасы Энергияне сак куллану технологияләре үзәге" ДАУ энергетика нәтиҗәлелеген анализлау һәм фаразлау бүлеге башлыгы Вкатерина Бородай дәүләт (муниципаль) учреждениеләрнең энергияне саклау һәм энергетика нәтиҗәлелеген арттыру программаларын эшләү һәм актуальләштерү турында җентекләп сөйләде.
Бүген ТР Сәнәгать министрлыгында Альберт Кәримов Япониянең Россиядәге Вәкаләтле илчесе Тоёхиса Кодзуки белән эшлекле очрашуы булды. Япония илчесенең Казанга булган визиты Казан Кремлендә "Иксез-чиксез мәдәният" күргәзмәсен ачуга багышланган, әлеге чара япон мәдәнияте һәм Россия-Япония елларын уздыру кысаларында уза. Билгеле булганча, 2018 елда Россиядә – Япония, ә Япониядә Россия елы билгеләп үтелә.
Очрашу барышында Кодзуки әфәнде илләрнең япон-россия гуманитр алмаш өлкәсендә генә түгел, ә нефть һәм газ эшкәртү, авыл хуҗалыгы һәм фән өлкәсендә дә үзара мәнфәгатьле булуын билгеләде.
Болар белән беррәттән, яклар ике илнең товар әйләнешен арттыру мөмкинлеге, төбәкара хезмәттәшлек һәм икътисад өлкәсендәге хезмәттәшлек перспективалары турында сөйләште.
Альберт Кәримов генераль директор Владимир Никитин җитәкчелегендә "Крылов дәүләт фән үзәге" ФДУП (Санкт-Петербург ш.) белән эшлекле очрашу уздырды. Очрашу киңәйтелгән составта "Ак Барс" суднолар төзү корпорациясе" АҖ предприятиесе җитәкчесе Ренат Мистахов, "Яшел Үзән ПКБ" АҖ җитәкчесе Евгений Жирков, башка предприятиеләрнең һәм ТР Сәнәгать министрлыгы вәкилләре катнашында узды.
ТР Сәнәгать министрлыгы башлыгы сәламләү сүзләрендә билгеләгәнчә, хәзерге җитештерү предприятиесе үзенең эшендә тармакка кагылышлы фәнни белемнәрдән файдаланырга, техник трендларга һәм инновацияләргә юнәлеш алырга, әлеге белемнәрне исәпкә алып, һөнәри кадрлар составы әзерләргә тиеш. Шуңа күрә "Крылов дәүләт фән үзәге" ФДУП белән "Ак Барс" суднолар төзү корпорациясе” АҖ арасында партнерлык һәм партнерлык мөнәсәбәтләрен үстерү өчен уртак нәрсәләр бик күп дип саныйм.
"Крылов дәүләт фән үзәге" ФДУП генераль директоры Владимир Никитин үз чиратында болай дип белдерде: "Безнең үзәк кораблар, суднолар, хәрби һәм граждани билгеләнештәге диңгез техникасы төзү, судно-машина төзелеше һәм приборлар төзелеше өчен эшләнмәләр җитештерү, коеп эшләү производствосының заманча технологияләрен оештыру һәм конструкция материаллары җитештерү өлкәсендә фәнни һәм гамәли белемнәргә ия. "Крылов дәүләт фән үзәге" ФДУП суднолар төзү һәм, тармакның фәнни базасыннан файдаланып, профессиональ судно төзүчеләрне әзерләү өлкәсендәге уртак проектларны тормышка ашыру өчен Татарстан Республикасында (Яшел Үзән ш.) вәкиллек ачарга әзер.
Очрашу азагында "Крылов дәүләт фән үзәге" ФДУП белән "Ак Барс" суднолар төзү корпорациясе АҖ арасында Хезмәттәшлек турында килешү имзаланды.
Татарстан Республикасы төзелеш объектларында кабель продукциясе сыйфатына кереш контролен оештыру буенча пилот проектын гамәлгә ашыручы төбәкләр исәбенә керәчәк. ТР Сәнәгать һәм сәүдә министрлыгы тиешле хатны РФ сәнәгать һәм сәүдә министры урынбасары Виктор Евтухов исеменә юллады.
"Пилот проектын гамәлгә ашыру максатларында, Татарстан Республикасы Төзелеш, архитектура һәм торак-коммуналь хуҗалык министрлыгы "Татарстан Республикасы Баш инвестицион төзелеш идарәсе" ДКУга һәм социаль объектларны төзүче подряд оешмаларына көч һәм контроль кабельләре конструктив зурлыклары һәм үткәргеч чыбыкларның электрик каршылыгының өстәмә документар тикшерүен, киңәйтелгән тикшерүен, шулай ук сатып алына торган кабель продукциясенең тирәнтен лаборатор контролен үткәрергә киңәш итте", - диелә хатта.
Россия төбәкләрендә капиталь төзелеш объектларында кабель продукциясе сыйфатына кереш контролен кертү карары 2017 елның декабрендә РФ Сәнәгать һәм сәүдә министрлыгы каршында сәнәгать продукциясенең законсыз әйләнешенә каршы көрәш буенча дәүләт комиссиясендә кабул ителде. Пилот территорияләр исемлегенә Мордовия, Чуашстан, Владимир, Мәскәү, Самара, Свердловск өлкәләре керде, соңрак Томск өлкәсе кушылды.
Төзелеш мәйданчыкларында кабель эшләнмәләренә кереш контроль берничә этапта үткәрелер дип ниятләнә. Тауар китерүчеләрне конкурс нигезендә сайлап алу этабында ук документар тикшерү өчен методик киңәшләр эшләнгән: Юридик затларның бердәм дәүләт реестрында мәгълүматлар эзләүдән алып, продукциянең ярашлылык сертификатлары, эксплуатация буенча инструкцияләр һәм техник шартлары анализына кадәр.
Бүген Альберт Кәримов Mahindra компаниясе делегациясе белән эшлекле очрашу үткәрде. Делегациягә Mahindra & MahindraLtd генераль директор - халыкара операцияләр бүлеге башлыгы Бисвас Сураб, Россиядә һәм БДБ илләрендә концерн вәкиле Кавалджит С. Маккар, компаниянең башка вәкилләре һәм ТР Сәнәгать һәм сәүдә министрлыгы хезмәткәрләре керде.
Очрашуда яклар Mahindra машина төзү компаниясенең җитештерү куәтләрен локальләштерү мөмкинлекләре, продукцияне үз һәм партнерлык дилер челтәрләре аша сату һәм республика территориясендә сервис хезмәте күрсәтү мәсьәләләре турында фикер алышты.
Министр очрашуда ике яклы Татарстан-Һиндстан мөнәсәбәтләрен үстерү кысаларында хезмәттәшлек белән кызыксыну һәм аңа әзерлекне белдерде: "Сезнең визит Һиндстан белән Татарстан арасында инде булган уңышлы элемтәләрне үстерү потенциалын күрсәтә. Һиндстан Татарстан Республикасының мөһим стратегик партнеры булып тора. 2017 ел нәтиҗәләре буенча Һиндстан Республикасы белән Татарстан арасында тышкы сәүдә әйләнеше 2,2 млн долларга якын тәшкил итте. Хезмәттәшлек белән кызыксынуны игътибарга алып, әлеге проектны уңышлы гамәлгә ашыруга ышаныч белдерәм".
26 октябрьдә Казан илкүләм тикшеренү-технологик университетында (КИТТУ) Кытайның Norinco төньяк сәнәгать компаниясенең "Пиротехника" программасы буенча укуларын тәмамлаган егерме дүрт белгеченә квалификация күтәрү турында документлар тапшыру тантанасы узды. Анда ТР сәнәгать һәм сәүдә министры урынбасары Алмаз Хөсәенов һәм Казанда КХР генераль консулы урынбасары Чэн Вэй әфәнде катнашты.
Чара барышында яңгыраган барлык чыгышларда Россия-Кытай хезмәттәшлегенең үсә барган актуальлеге, аерым алганда - инженер-технологик өлкәдә дә, мәгариф һәм фән өлкәсендә дә КХРның югары технологияле предприятиеләре белән ныклы багланышлар булдыру темасы кызыл җеп булып узды.
Җыелганнарны сәламләп, Алмаз Хөсәенов безнең республиканың кытай ягы белән элемтәләрен ныгыту эшендә Казандагы КХР генераль консуллыгы эшенең әһәмиятен ассызыклады. "Республика җитәкчелеге Кытайга визитларда актив катнаша, кытай коллегалары - КХРның төрле провинцияләре вәкилләре белән очраша, Татарстан территориясендә хәзер үк берничә компания үз производстволарын урнаштырды, - дип билгеләп үтте ул. - Без гуманитар, мәгариф багланышлары ныгуга шат".
Кытай белән Россия арасында партнерлык стратегик характерда һәм даими ныгый, дип белдерде үз чыгышында генконсул урынбасары Чэн Вэй. "Кытай Россиянең иң эре сәүдә партнеры булып кала, безнең илләрнең нефть-газ ресурслары, атом энергетикасы, авиакосмик тармак һәм трансчик инфраструктурасы өлкәсендә уртак стратегик проектлары бар", - дип сөйләде дипломат. 2018-2019 еллар Кытай һәм Россия төбәкләренең хезмәттәшлек еллары, дип игълан ителде, һәм Norinco белән КИТТУның мәгариф проектлары үсеп килүче ике яклы хезмәттәшлекнең бер юнәлеше.
Бу - Norinco белгечләренең КИТТУда квалификация узган икенче төркеме. Кытай инженерларының беренче төркеме сентябрьдә "Энергия белән туендырылган материаллар" программасы буенча укуын тәмамлады.
КИТТУ (КХТИ) медиакоммуникацияләр идарәсе
Татарстан Республикасы Сәнәгать һәм сәүдә министрлыгы шуны хәбәр итә: Россия Сәнәгать һәм сәүдә министрлыгы Россия оешмаларына комплекслы инвестицион проектларны гамәлгә ашыру кысаларында гражданлык сәнәгатенең өстенлекле юнәлешләре буенча фәнни-тикшеренү һәм тәҗрибә конструкторлык эшләрен үткәрүгә чыгымнарның бер өлешен компенсацияләүгә федераль бюджеттан субсидияләр алу хокукына конкурс сайлап алуы уздыруы турында (2013 елның 30 декабрендәге 1312 санлы РФ Хөкүмәте карары белән расланган кагыйдәләр нигезендә) игълан итә.
Шуңа игътибар итәбез, конкурста катнашу өчен заявкалар бирү, расланган Регламент нигезендә, Сәнәгатьнең дәүләт мәгълүмати системасында (ГИСП) гамәлгә ашырыла. Заявкалар тапшыру буенча инструкция ГИСП белемнәр базасында түбәндәге сылтама буенча урнаштырылган: https://gisp.gov.ru/documents/9184111/
Заявкалар 2018 елның 20 ноябренә кадәр кабул ителә.
Элемтә өчен мәгълүмат:
Ксенофонтов Олег Викторович, тел. +7 (495) 632-88-05, E-mail: ksenofontov@minprom.gov.ru
Соболевский Павел Сергеевич, тел. +7 (495) 632-84-69, E-mail: sobolevskiy@minprom.gov.ru
25 октябрьдә ТР сәнәгать һәм сәүдә министры урынбасары Илдар Миңгалиев Беларусь Илчелеге бүлеге җитәкчесе Олег Исаев белән очрашты. Очрашуда шулай ук «БСВТ-новые технологии» (БСВТ-НТ) ҖЧҖ директоры урынбасары Эдуард Швалюк катнашты. Әңгәмә барышында Белоруссия БСВТ-НТ компаниясенең Россия оборона-сәнәгать комплексы (ОПК) предприятиеләре белән икеләтә билгеләнештәге продукция җитештерү буенча кооперацион хезмәттәшлеге мәсьәләләре каралды. Яклар, Эдуард Швалюк белән Татарстан ОПК вәкилләренең Илчелек бүлеге һәм ТР Сәнәгать һәм сәүдә министрлыгы теләктәшлегендә узган сөйләшүләре барышында ирешелгән килешүләрне исәпкә алып, хәрби-техник өлкәдә үзара файдалы ике яклы хезмәттәшлекне үстерү белән кызыксынуларын белдерде.
Республикада җитештерелә торган газ-мотор техникасының сыйфаты төп мәсьәләләрнең берсе булып тора. Чаллыда КАМАЗ ясаган техника һәм НЕФАЗ автобуслары сыйфатын арттыру мәсьәләләре буенча техник совет утырышы узды. Киңәшмәдә ТР Сәнәгать һәм сәүдә министрлыгы, ТР Транспорт һәм юл хуҗалыгы министрлыгы һәм ТР Авыл хуҗалыгы һәм азык-төлек министрлыгы, шулай ук республиканың эре шәһәрләре һәм районнарының автотранспорт предприятиеләре, агросәнәгать комплексы һәм җитештерүче компания вәкилләре катнашты.
Киңәшмәдә катнашучылар газ-мотор йөк һәм автобус техникасын кулланган вакытта ачыкланган проблемалар гына түгел, сервисның оперативлыгын арттыру һәм аның сыйфатын яхшырту чаралары турында да фикер алышты.
"Киңәшмәнең мондый форматын нәтиҗәле дип саныйм, чөнки кулланучылар газ-балонлы автотехниканың сыйфаты һәм аны файдалану мәсьәләләре буенча җитештерүчегә турыдан-туры мөрәҗәгать итә ала, бу нәтиҗәдә җитештерелә торган техниканың сыйфатын арттыруга китерергә тиеш", - дип белдерде министр урынбасары Илдар Миңгалиев.
2018 елның 25 октябрендә ТР Сәнәгать һәм сәүдә министрлыгы дәүләт хезмәткәрләренең хезмәт урынындагы тәртибенә карата таләпләрне үтәү һәм мәнфәгатьләр каршылыгын җайга салу комиссиясе утырышы узды.
Утырышта ТР Сәнәгать һәм сәүдә министрлыгында элек төрле дәүләт гражданлык хезмәте вазыйфаларын биләгән гражданнар белән тиешле вазыйфаларны биләүгә һәм аталган оешмаларда, дәүләт гражданлык хезмәтеннән эштән киткәннән соң, эшләр башкаруга килешү алу максатыннан хезмәт шартнамәләре төзү турында коммерцияле һәм башка оешмалардан килгән язма хәбәрләр, эшкә алучы вәкиленнән бүтән акча түләнә торган эш башкару турында хәбәрләр каралды.
Моннан тыш, комиссия Татарстан Республикасы дәүләт хакимияте органнары һәм җирле үзидарә органнарының 2018 елның беренче яртысында коррупциягә каршы көрәш чараларын гамәлгә ашыру турында мәгълүматлар анализы нәтиҗәләренә күзәтүне һәм "Хакимият, Җәмгыять, Бизнес: коррупциягә каршы көрәш өлкәсендә хезмәттәшлекнең уңай тәҗрибәсе" Бөтенроссия конференциясе резолюциясен тикшерде.