ЯҢАЛЫКЛАР
Бүген Альберт Кәримов Cotton Way компаниясе (Мәскәү шәһәре) вәкилләре белән очрашты. Эшлекле очрашуда сүз компаниянең республика территориясендә урнашу планнары турында барды. Cotton Way компаниясе - аренда һәм текстиль эшләнмәләрне профессиональ эшкәртү буенча Россия базары лидеры.
9 һәм 10 ноябрьдә Татарстан Республикасында Красноярск крае губернаторы Александр Усс җитәкечлегендәге делегациянең эш сәфәре уза. ТР Сәнәгать һәм сәүдә министрлыгы, төбәкара хезмәттәшлек өчен җаваплы ведомство буларак, Крансоярск делегациясен бөтен сәфәре барышында озатып йөри.
Визитның төп максаты - Красноярскида үтәчәк 2019 елгы XXIX Бөтендөнья кышкы универсиада хөрмәтенә Казанда уздырыла торган Универсиада уты эстафетасы чараларында катнашу.
Эш сәфәре программасында Казан мэры белән очрашу планлаштырылган, ә Татарстан Республикасы Инвестиция үсеше агентлыгында Татарстан Республикасының икътисадый потенциалын тәкъдим итү булачак. Җәйге Универсиада мирасыннан файдалану тәҗрибәсе белән танышу өчен, делегация "Казан Арена" футбол стадионында булачак, халыкара класслы башка спорт объектларын һәм җәмәгать киңлекләрен караячак.
Сәфәрнең икенче көненә Татарстан Республикасы Президенты Рөстәм Миңнехановның Красноярск крае губернаторы Александр Усс белән очрашуы, шулай ук эстафетаның йөгереш этабы финишында һәм КФУның төп бинасы каршында Универсиаданың "Ут казанын" яндыру тантанасында бергә катнашу планлаштырылган. Чарада ТР сәнәгать һәм сәүдә министры Альберт Кәримов та катнашачак.
Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясенең Томск өлкәсенә эш сәфәре кысаларында Томск өлкәсе губернаторы Сергей Жвачкин белән очрашу узды. Татарстан Республикасы Хөкүмәт делегациясе эшендә Альберт Кәримов катнашты.
Очрашу барышында түбәндәге ике яклы документлар имзаланды:
- Сәүдә-икътисадый, фәнни-техник һәм социаль-мәдәни хезмәттәшлек турында килешү һәм аны гамәлгә ашыру буенча чаралар планы;
- Татарстан Республикасы Урман хуҗалыгы министрлыгы белән Томск өлкәсе Урман хуҗалыгы департаменты арасында хезмәттәшлек турында килешү;
- "РариТЭК" ҖЧҖ һәм "Томскавтотранс" АҖ арасында хезмәттәшлек турында килешү.
Мәскәүдә Ростех Дәүләт копорациясенең "Техмаш" концернына керүче POZIS ("ПОЗиС" АҖ) компаниясе белән Сәнәгатьне үстерү фонды арасында займ шартнамәсенә кул куелды. Акчалар көнкүреш һәм медицина суыткыч техникасын чыгаруны арттыру өчен предприятие куәтләрен модернизацияләүгә юнәлтеләчәк.
POZIS компаниясенә Сәнәгатьне үстерү фондының 750 млн сумлык заемы "Конверсия" программасы кысаларында гамәлгә ашырылган. Августта Сәнәгатьне үстерү фонды эксперт советы предприятиенең югары класслы энергия нәтиҗәлелеге һәм электрон идарә блогы булган яңа суыткычлар чыгаруны үзләштерүен күздә тоткан проектын хуплады. Аны гамәлгә ашыру нәтиҗәсе 2021 елга елына 600 мең берәмлеккә кадәр техника җитештерүгә чыгу булачак.
Проект рәсми рәвештә 2018 елның сентябрендә тәкъдим ителде. Аны Ростех Дәүләт копорациясе генераль директоры С.В.Чемезов һәм Татарстан Республикасы Президенты Р.Н.Миңнеханов, шулай ук компаниянең Директорлар советы, "Ростех" ДК һәм "Техмаш" ФҖК вәкилләре югары бәяләде. Инвестпроект "Ростех" ДКнең гадәти кораллану, сугыш кирәк-яраклары һәм махсус химия кластерын үстерү, шулай ук 2025 елга кадәр "ПОЗиС" АҖ үсеш стратегиясен гамәлгә ашыру кысаларында гамәлгә ашырыла.
"Сәнәгатьне үстерү фондыннан алынган заем 2021 елга кадәр көнкүреш һәм медицина суыткыч җиһазлары производствосын модернизацияләү буенча гомуми бәясе 2 млрд сум булган тулы масштаблы проектны финанслый башларга мөмкинлек бирә. Әлеге чараларны тормышка ашыру завод үсеше өчен өстәмә импульс бирәчәк, җитештерү күләмнәрен арттырырга мөмкинлек бирәчәк, POZIS продукциясенең экспорт потенциалын арттырачак", - дип билгеләп үтте "Ростех" ДКнең гадәти кораллану, сугыш кирәк-яраклары һәм махсус химия кластеры индустриаль директоры, POZIS Директорлар советы рәисе Сергей Абрамов.
"ПОЗиС" АҖ матбугат хезмәте материаллары буенча
Бүген ТР сәнәгать һәм сәүдә министры Альберт Кәримов Потсдам шәһәрендә (Германия) Россия-Германия чимал конференциясе эшендә катнашты. Моннан алдагы унынчы конференция 2017 елда Санкт-Петербург шәһәрендә узган иде.
11 нче конференция Бранденбург җире Премьер-министры Дитмар Войдке (Dietmar Woidke) патронатлыгында уза һәм энергетика һәм чимал секторларында һәм хезмәттәшлекнең ике яклы проектларына инициатор булу өчен тармак темалары турында фикер алышуның әһәмиятле платформасы булып тора.
Пленар сессияләр эше барышында Россия төбәкләренең, министрлыкларның һәм ведомстволарның җитәкчеләре, ике илнең базар белгечләре һәм экспертлары түбәндәге төп темалар турында сөйләште:
– трансформация барышында чимал төбәкләре – чимал төбәкләренең структур үзгәрү нәтиҗәләре;
– Россия өчен чакырулар – әйләнә-тирә мохитне тотрыклы үстерү һәм саклау – модернизация шартларында яңа партнерлык шанслары;
– чимал сәнәгатен цифрлаштыру;
– традицион энергетика ресурсларыннан югары технологияле файдалану;
– рентабельле булмаган ятмаларны үстерү өлкәсендәге технологияләр;
– университетлар һәм фәнни-тикшеренү учрежденияләре арасында Россия-Германия хезмәттәшлегенең перспективалары.
Россиянең дә, Германиянең дә фәнни-тикшеренү учреждениеләре һәм предприятиеләре арасында хезмәттәшлек итү буенча күп еллык, традицияләргә бай эш тәҗрибәсе бар. Татарстан Республикасында алман капиталы катнашында 90 якын компания теркәлгән. Чимал сәнәгате бүген Россия-Германия хезмәттәшлегендәге төп юнәлешләрнең берсе булып тора.
Бүген Татарстан Республикасы Министрлар Кабинетында ТР сәнәгать һәм сәүдә министры урынбасары Алмаз Хөсәенов катнашында брифинг узды. Брифингның төп темасы – эшли торган яшьләрнең "Наше время – Безнең заман" VI иҗат фестиваленең зональ сайлап алу турларын төгәлләү.
Журналистларның сорауларына шулай ук ТР яшьләр эшләре министры Дамир Фәттахов, ТР Президенты каршындагы Мәдәният үсешенә ярдәм фондының башкарма директоры Нурия Хашимова һәм "Наше время-Безнең заман" республика фестиваленең башкарма директоры Наталья Смирнова җавап бирде.
Ел саен уздырыла торган эшли торган яшьләрнең "Наше время – Безнең заман" VI ачык иҗат фестивале ярышларында 800дән артык кеше катнашты, алар Татарстан Республикасының төрле районнарындагы 170тән артык оешма һәм предприятиедә эшли. Фестивальдә аерым башкаручылар да, иҗат коллективлары да, шулай ук оешмаларның командалары да катнаша алды. Конкурсантлар исәбенә 18-35 яшендәге предприятие хезмәткәрләре сайлап алынды, алар өчен музыка, бию белән шөгыльләнү һөнәри эшчәнлек булып тормый.
Сайлап алу турларында катнашучыларның барысы өчен дә эстрада сәнгате, заманча хореография, режиссура һәм пластика буенча мастер-класслар; түгәрәк өстәлләр уздырылды, аларда жюри әгъзалары үзләренең кисәтүләрен һәм теләкләрен җиткерде.
"Наше время-Безнең заман" конкурсы – ул сәнгать үзешчәнлеген карау гына түгел, әлеге чара әһәмиятле социаль функцияне үти – кешелек капиталын үстерү мөмкинлеген бирә, яшьләргә өстәмә мотивация биреп, республика предприятиеләренә җәлеп итәргә булыша. Ләкин, әлеге музыкаль хәрәкәткә әле барлык предприятиеләр дә кушылмаган, шуңа күрә эшлисе эшләр бар әле", – дип җавап бирде журналистларның сорауларына Алмаз Хөсәенов.
Чаллы сайлап алу зонасында гомумкоманда зачетында түбәндәгеләр җиңүче булды:
"Аммоний" АҖ, Менделеевск ш. (I урын), "КАМАЗ" ГАҖ пресслау-рам заводы (II урын), "Челтәр компаниясе" ААҖ - Алабуга электр челтәрләре (III урын), "Л.Я.Карпов исемендәге химия заводы" АҖ, Менделеевск ш. (III урын).
Зәйдә гомумкоманда зачетында иң яхшылары дип түбәндәгеләр танылды:
ТР Әлмәт муниципаль районының Мәгариф идарәсе (I урын), "ТР Зәй муниципаль районының Мәгариф идарәсе" МКУ (I урын), "Әлмәт труба заводы" АҖ (II урын), "А.Н.Туполев исемендәге Казан милли тикшеренү техник университеты - КАИ" Әлмәт филиалы (III урын).
Казанның сайлап алу этабында түбәндәге командалар аерылып чыкты:
"Юл хәрәкәте куркынычсызлыгы" ДБУ (I урын); "Татэнерго" АҖ (II урын), "Казан вертолет заводы" ГАҖ (II урын), С.П.Горбунов исемендәге Казан авиация заводы – "Туполев" ГАҖ филиалы (II урын); "Челтәр компаниясе" ААҖ (III урын).
Түбән Кама сайлап алу этабында гомумкоманда зачетында түбәндәге җиңүчеләр билгеләнде: "Татнефть-Нефтехим" ИК" ҖЧҖ (I урын), "ТР Мамадыш муниципаль районы Башкарма комитеты Мәгариф бүлеге" МКУ (II урын), "Нижнекамскнефтехим" ГАҖ (II урын), "Чистай үзәк район хастаханәсе" ДАССУ (III урын).
Моннан тыш, һәр сайлап алу зонасында конкурс номинацияләре буенча иң яхшы ялгыз башкаручылар һәм коллективлар билгеләнде. Аларның барысы да дипломнар, истәлекле бүләкләр һәм суперфиналга юллама алды, анысы 2018 елның 13-14 ноябрь көннәрендә Казанда булачак (гала-концерт – 2018 елның 16 ноябрендә "Пирамида" күңел ачу үзәгендә).
Республиканың эшләүче яшьләр өчен "Наше время – Безнең заман" телевизион иҗат фестивале Татарстан Республикасы Президенты ярдәме белән 2013 елда булдырылды. Гамәлгә куючылары – ТР Сәнәгать һәм сәүдә министрлыгы, ТР яшьләр эшләре министрлыгы, ТР Мәдәният министрлыгы, ТР Мәгариф һәм фән министрлыгы, "Татмедиа" республика матбугат һәм массакүләм коммуникацияләр агентлыгы, "Татарстан Республикасы Муниципаль берәмлекләр советы" ассоциациясе, "ТР Предприятиеләр һәм оешмалар яшьләре берлеге" РИО, ТР Предприятиеләр һәм эшкуарлар ассоциациясе, ТР Профессорлар федерациясе. Проектның идея авторы һәм оештыручысы – Татарстан Республикасы "Созвездие-Йолдызлык" төбәк яшьләр иҗтимагый оешмасы.
Проект кадрларның яңа буынын формалаштыру һәм эшче һөнәрләрне популярлаштыру, республика предприятиеләрендә һәм оешмаларында эшләүче яшь кешеләрнең иҗади потенциалын ачу буенча әһәмиятле функцияне үти. Фестиваль социаль-әһәмиятле дәүләт проекты булып тора һәм коммерция максатларын күздә тотмый. Фестивальдә катнашу – бушлай, катнашучылардан оештыру кертеме алынмый.
Фестиваль телевизион булып тора: барлык гала-концертлар яздырыла һәм "ТНВ" телеканалы аша трансляцияләнә. Фестивальдә җиңүчеләр һәм лауреатлар дипломнар, истәлекле бүләкләр, акчалата премияләр белән бүләкләнә; Гран-при – Татарстан Республикасы Президентының күчмә кубогын һәм 250 000 сум күләмендә акчалата премия ала.
"Татнефть" хезмәткәрләре "Һөнәре буенча иң яхшысы" россиякүләм конкурсында катнаша, әлеге чара 1 ноябрьдән 3 сенә кадәр Ноябрьск шәһәрендә (Ямал-Ненец автоном округында) уза.
Һөнәри осталык буенча республика конкурсында җиңү яулаган "Елховнефть" НГДИ нефть табу операторлары Алексей Купцов һәм Илнур Сәлимов илнең иң яхшы хезмәткәрләре исәбендә республика данын яклау дәрәҗәсенә иреште.
Конкурс биремнәре ике өлештән тора: теория һәм тәҗрибә. Соңгысы "Газпромнефть-Ноябрьскнефтегаз" компаниясенең Спорыш ятмасының куст мәйданчыкларында оештырыла. Егетләргә нефть табу скважинасында вентильне алмаштырырга һәм аның тәүлеклек җитештерүчәнлеген үлчәргә туры киләчәк. Биремнәр махсус павильонда да, ачык һавада да үтәләчәк.
Экспертлар комиссиясе составына РФ Хезмәт министрлыгы, автономияле округ хөкүмәте вәкилләре, галимнәр, шулай ук предприятиеләрнең җитәкчеләре кергән. Конкурс призерлары акчалата премия, ә җиңүчеләр, илнең иң яхшы эшче һөнәр вәкилләре белән бергә, РФ Хөкүмәте Йортында бүләкләүгә чакыру алачак.
"Һөнәре буенча иң яхшысы" россиякүләм конкурсы "Нефть һәм газ табу буенча иң яхшы оператор" номинациясе буенча Ямал-Ненец автономияле округының Ноябрьск шәһәрендә "Газпромнефть-ННГ" АҖ базасында уза.
В.Д.Шашин исемендәге ГАҖ командасына уңышлар һәм җиңүләр телибез!
2018 елгы сыйфат өлкәсендә РФ Хөкүмәте Премиясе дипломантлары билгеле булды. Сыйфат өлкәсендә Россия Федерациясе Хөкүмәте премияләрен бирү советы конкурс дипломантларын раслады, алар исәбенә Россиянең 12 төбәгеннән оешмалар кергән. Дипломантлар исәбе буенча быел Татарстан Республикасы лидер булган.
Республиканың дүрт предприятиесе дипломант исеменә лаек: "Татнефть-АЗС Центр" ҖЧҖ, "Кадрлар әзерләү үзәге – Татнефть" ӨҺББ ХМУ, "Казан компрессорлы машина төзү заводы" ААҖ һәм "Шифалы су - Ижминводы" шифаханәсе.
Сыйфат өлкәсендә РФ Хөкүмәте премияләре ел саен оешмаларга конкурс нигезендә продукция һәм хезмәт сыйфаты өлкәсендәге шактый күрсәткечләргә ирешкән өчен, шулай ук югары нәтиҗәле сыйфат менеджменты методларын керткән өчен бирелә.
Дөньяви тәҗрибә нигезендә сыйфат өлкәсендәге премия акчалата бирелми. Конкурс лауреатлары РФ Хөкүмәте призларын һәм дипломнарын ала, шулай ук премия символикасын үзләренең реклама материалларында куллану хокукына ия була.
Тулырак: https://roskachestvo.gov.ru/award/
Бүген Министрл "Арамикор" һәм "Синома" кытай компанияләре топ-менеджерлары һәм Россиянең партнеры – "Тулпар ИГ" компаниясе вәкилләре белән очрашу уздырды. Компаниянең беренче затларын һәм аларның хезмәттәшләрен сәламләп, Альберт Кәримов Татарстан-Кытай хезмәттәшлегенең хәзерге вакытта әһәмиятлеләрнең берсе булуын билгеләде.
Очрашу барышында "Арамикор" һәм "Синома" компанияләре җитәкчеләре республика территориясендә үзләренең җитештерү куәтләрен торгызу ниятләре турында белдерде. Якын киләчәктә инвесторлар, киләсе ике елда кәрәзле тутырма җитештерү күләмен 3 мең кубометрга кадәр җиткерүгә ирешү өчен, кирәкле мәйданны сайларга һәм җитештерү эшен башлап җибәрергә планлаштыра.
Бүген SEMITEC Corporation компаниясе президенты Ишидзук әфәнде Татарстан Республикасына беренче визитын ясады. Очрашуны Герман Лернер уздырды. Моннан тыш, очрашуда Татарстан Республикасының Япониядә билгеләнгән Вәкиле Тамерлан Абдикеев катнашты. Япон компаниясе вәкилләренә төбәкнең инвестицияле мөмкинлекләре һәм республиканың сәнәгый потенциалы күрсәтелде, шулай ук яклар татарстан-япон хезмәттәшлеген үстерү буенча үзара мәнфәгатьләр белән дә уртаклашты.