ЯҢАЛЫКЛАР

2019 елның 22 мартында Санкт-Петербургта Россиякүләм газ-мотор форумы булды һәм ул Илкүләм газ-мотор ассоциациясенең (НГА) 20 еллык юбилеена багышланган иде. Чарага "РариТЭК" компанияләре төркеменең генераль директоры Рафаэль Батыршин килде.

Форумны ачканда Ассоциацияләр Советы Рәисе Валерий Голубев ассызыклап узганча, илдәге газ-мотор ягулыгы тармагын үстерү әһәмиятле һәм әлеге юнәлештә дәүләт һәм хосусый компанияләр өчен шактый перспективалар бар. Элегрәк, 2018 елның апрелендә, РФ Президенты РФ Хөкүмәте әгъзалары белән киңәшмәдә билгеләгәнчә, газ-мотор ягулыгыннан файдалану мәсьәләсе ил өчен өстенлекле булып тора.

Форум кысаларында Россия Федерациясе территориясендә газ белән тәэмин итү инфраструктурасын үстерү, шул исәптән Россиянең өстенлекле 17 төбәгендә газ-мотор ягулыгы белән тәэмин итү челтәрләрен киңәйтү стратегиясе күрсәтелде.

"НИИ Газэкономика" ҖЧҖ исәпләмәләренә караганда, "Газ-мотор ягулыгы базарын үстерү" федераль ярдәмче программасы кысаларында, ул быелдан башлап транспортны үзгәртеп кору чыгымнарын субсидияләүне һәм газ-мотор челтәрен үстерүгә инвестицияләр бирүне үз эченә ала – Россиядә газ-мотор ягулыгын куллануны киңәйтүдән алынган файда елына 312 млрд сумга кадәр җитәргә мөмкин һәм экологик файдасы да аз булмаячак.

"Газпром газ-мотор ягулыгы" компаниясе планнарында программаны тормышка ашыруның нәтиҗәсе мотор ягулыгы сыйфатында кулланыла торган 4 млрд куб метр табигый газ, 1500 АГНКС һәм 2024 елга кадәр 400 мең берәмлектән артык газ-мотор транспорты белән бәяләнә.

Форумның махсус тантанасында "РариТЭК" компанияләре төркеменә Россиядә газ-мотор ягулыгына керткән махсус өлеше өчен бүләк бирелде.

Әгәр "РариТЭК" компаниясенең газ-мотор техникасын җитештерүче һәм газ-мотор базары структурасына шактый өлеш кертүче компания буларак эшчәнлек нәтиҗәләре турында сөйләгәндә, 2018 ел компаниянең берничә яңа проекты өчен нигез һәм төп старт алу ноктасына әверелде, дип әйтергә мөмкин, шул исәптән сыегайтылган табигый газ куллана башлау өлешендә дә.

"МТЗ Татарстан" белән берлектә сыегайтылган табигый газда эшләүче беренче "МТЗ 1221.2" тракторының прототибы җыелган һәм тест узган.

2019 ел башында "РариТЭК" компаниясе "Минск мотор заводы" белән берлектә 100% дәрәҗәсендә газ циклы белән эшләүче 4 һәм 6 цилиндрлы "ММЗ" двигательләренең газ версияләрен оештыру проектын башлап җибәргән.

"РариТЭК" компаниясе үзенең Lotos автобуслары бренды белән урта класска караган 100 газ автобусын чыгарган, Lotos 206 автобуслары Казан, Надым, Көньяк Сахалинск, Чабаксар һәм Ростов-на-Дону шәһәрләренә җиткерелгән.

Газ-мотор двигательләре белән зур класслы Lotos 105 автобусларының беренче үрнәкләре җыелган.

2018 елда "РариТЭК", "Hyundai Truck and Bus Rus" һәм "Эллада Интретрейд" ҖЧҖ арасында хезмәттәшлек башланып киткән, кысылган һәм сыегайтылган табигый газда эшләүче двигатель белән Hyundai 78 коммерция автомобиленең беренче прототибы җыелган.

"РариТЭК" компаниясе өчен 2018 елда халыкара хезмәттәшлек юнәлеше дә зур әһәмияткә ия була, берничә мөһим килешү төзелә, Үзбәкстан Республикасында газ-мотор техникасын җитештерү мәйданчыгы оештырыла. 

Казакъстан-Татарстан бизнес-форумы кысаларында "РариТЭК ремонт-механика заводы" ҖЧҖ һәм "Семипалата автоҗыю заводы" ҖЧШ арасында "СемАЗ" җаваплылыгы чикләнгән ширкәт мәйданчыкларында Lotos сәүдә маркасы белән пассажирлар өчен автотехника җыюны оештыруга бәйле хезмәттәшлек турында меморандум имзалана.

 "UzAuto Trailer" ҖЧҖ белән берлектә Үзбәкстан территориясендә КАМАЗ газ-мотор техникасын җитештерү буенча "RARITEK GAS ENGINEERING" уртак предприятиесе оештырылган.

 "РариТЭК Холдинг" АҖ материаллары буенча

Ел саен, Бөтендөнья кыргый табигать фонды (WWF) инициативасы белән, республика территориясендә "Җир сәгате" дигән халыкара акция уза, ул төрле дәүләтләрдә яшәүчеләрнең ресурсларны саклау проблемаларын хәл итүдә үзара теләктәшлектә булуын символлаштыра. 

Чарада катнашу өчен республикадагы мәнфәгатьле барлык юридик һәм физик затлар чакырыла.

Акцияне уздыру өчен 2019 елның 30 мартында, шимбә көнне, 1 сәгатькә (20.30-21.30) административ биналарның архитектура-декторатив утларын һәм кизү яктырткычларны, шулай ук башка объектларның, гражданнарның иминлеген тәэмин итүгә бәйле булмаган яктылык чыганакларын һәм электр җиһазларын сүндереп торырга тәкъдим ителә.           

Казан дәүләт энергетика университетында 25 марттан 28енә кадәр сәнәгать предприятиеләрендә эшләүчеләр арасында "Электромонтаж" компетенциясе буенча беренче мәртәбә  IV Тармак чемпионаты (рәсми WorldSkills Hi-Tech чарасы) узды. Чемпионатны оештыручы булып Россиядә IEK GROUP яктылык-техник һәм электротехник җайланмасы белән тәэмин итү һәм җитештерү буенча әйдәп баручы компания тора.

Ярышларда Россиянең иң эре сәнәгать предприятиеләре ("Росатом" дәүләт корпорациясе, "ЕВРАЗ", "СИБУР", "Норильск никеле" компанияләре, Чиләбе труба прокаты заводы (ЧТПЗ), Африкантов ис. машина төзелеше ОКБ), Швейцария, Бөекбритания, Бразилия һәм Казакъстан җыелма командалары, БГӘ һәм Иран халыкара экспертлары катнашты. Чемпионат көннәрендә анда катнашучылар двигательгә идарә итү, яктыртуга идарә итү схемаларын җыйдылар, программалаштыру өлкәсендә үз күнекмәләрен күрсәттеләр.

Чемпионат "Электромонтаж" компетенциясе буенча WorldSkills илкүләм җыелмасын гамәли әзерләү мәйданчыклары исемлегенә кертелде. Бер мәйданчыкта яшь эшчеләр белән берлектә WORLDSKILLS KAZAN 2019 дөнья чемпионатында чыгыш ясау өчен әзерләнүче WorldSkills Russia Илкүләм җыелма командасының киңәйтелгән состав әгъзалары да көч сынашты.

"Skill Camp" категориясе буенча "Электромонтаж" компетенциясендә IV ачык IEK GROUP тармак чемпионатында Бразилиядән Карлос Аугусто Леотте Брайс җиңү яулады (тренеры: Сидней Россо Серафим), ә "Эшчеләр" категориясендә – Сидней Россо Серафим, "Евраз" АҖ, Новокузнецк ш. (тренеры: Тютюник Евгений Сергеевич).

Чемпионат кысаларында яңа WorldSkills Russia  – "Интернет-маркетинг" компетенциясе буенча ярышлар узды. 1 нче урынны КДЭУ студенткасы Кривоногова Анастасия Евгеньевна яулады.

Чемпионат узган вакыт дәвамында "Электромонтаж" компетенциясе буенча профессиональ пробалар һәм мастер-класслар узды, алар КДЭУ һәм Казан энергетика көллияте катнашында оештырылган иде.

Чемпионат мәйданчыгында беренче тапкыр инде "Электр җиһазларын ремонтлау һәм аларга хезмәт күрсәтү буенча электромонтер" һөнәрен алган һәм һөнәре буенча 3 нче разрядка ия булган профессиональ (техник) волонтер-студентлар эшләде.

 КДЭУ матбугат хезмәте материаллары буенча

Бүген "Ростех" корпорациясе башкарма директоры Сергей Абрамов катнашында "НПК "ТЕХМАШ" АҖ предприятиеләре белән киңәшмә булды.

Сәламләү сүзләрендә Альберт Кәримов ТР ОСК предприятиеләре өчен төп бурычлар турында сөйләде. Асылда, граждани һәм икеләтелгән билгеләнештәге продукцияне чыгару буенча яңа инвестиция проектларын эшләү һәм сату турында. Хәзерге вакытта федераль һәм төбәк дәрәҗәләрендә инвестиция проектларын, шул исәптән ОСК предприятиеләре өчен дә, тормышка ашыруга булыша торган механизмнар уйлап табыла. Мисал өчен, Сәнәгатьне үстерү фондының "Конверсия" программасы. Узган ел "ПОЗиС" АҖ энергонәтиҗәлелеге буенча югары класслы һәм электрон идарә блоклы яңа суыткыч җиһазларын чыгаруны үзләштерү проектын тормышка ашыруга 750 млн сум күләмендә заем алган. Чыгышы барышында министр билгеләп узганча, хезмәт җитештерүчәнлеген тотрыклы үстерү өчен предприятиеләрне цифрлаштыруга юнәлеш алу зарур. Моннан тыш, киңәшмәдә сәнәгый һәм экологик куркынычсызлык һәм предприятиеләрдә хезмәтне саклау турындагы мәсьәләләр дә каралды.

2019 елның 10 апреленнән 12 апреленә кадәрге чорда "Казан Экспо" ХКҮ мәйданчыгында Татарстанның ТЭФ-2019 энергия-ресурс нәтиҗәлелеге буенча халыкара форумы узачак, әлеге чара "Энергетика. Ресурсларны саклау" 20 нче халыкара махсус күргәзмәсен һәм "Энергия-ресурс нәтиҗәлелеге һәм энергияне саклау" 19 нчы халыкара симпозиумын үз эченә ала. Ел саен уздырыла торган әлеге традицион тармак чаралары быел форумның бердәм форматында узачак һәм Идел буе федераль округында үзләрен энергетика тематикасына бәйле чараларның иң әйдәп баручыларының берсе буларак таныттылар. Форумның эш программасы кысаларында 20 дискуссия мәйданчыгы планлаштырыла.

Әйтик, 11 апрельдә, форумның эш программасы кысаларында Татарстан Республикасының энергетика тармагы предприятиеләрендәге төп белгечләрнең бизнес-очрашулары булачак, алар Matchmaking принцибы буенча оештырылачак.  Әлеге чараның төп максаты – Татарстан Республикасы энергетика тармагындагы әйдәп баручы предприятиеләрнең вәкилләре белән башка төбәкләрдән һәм илләрдән килгән күргәзмәдә катнашучылар белән сөйләшүләр уздыру, перспективалы партнерлык мөнәсәбәтләрен җайлау, бизнес-контрактлар төзү.

Очрашулар "Казан-Экспо" ХКҮ 2 нче павильонында, махсус оештырылган "бизнес-очрашулар" зонасында узачак, түбәндәге график буенча:

• 14.00 сәгатьтән 15.00 сәгатькә кадәр – генерацияләү компанияләре өчен, модераторлар: ҖЭҮ, ГЭС, ҖЧ вәкилләре;
• 15.00 сәгатьтән 16.00 сәгатькә кадәр – челтәр компаниясе сәгате, модераторлар: "Челтәр компаниясе" ААҖ вәкилләре;
• 16.00 сәгатьтән 17.00 сәгатькә кадәр – предприятиеләрнең баш энергетиклары сәгате.

Ел саен, шушындый очрашулар нәтиҗәсендә, республикадагы 90 артык предприятиегә, кече һәм урта бизнес белгечләренә эшлекле сөйләшүләрне нәтиҗәле уздыру, яңа бизнес-партнерлар табу, шулай ук файдалы контрактлар төзү мөмкинлеге ачыла.

Бизнес-очрашуга www.bizexpotime.ru сайтында язылырга мөмкин.

Күргәзмәне карау – бушлай. Теләге булганнарга Җиңү Проспекты м.станциясеннән "Казан Экспо" ХКҮ кадәр түләүсез шаттллар оештырылачак.

Тулырак мәгълүматлар: www.bizexpotime.ru

2019 елның 27 мартында ТР Сәнәгать һәм сәүдә министрлыгында министр урынбасары Алмаз Хөсәенов җитәкчелегендә Дәүләт граждан хезмәткәрләренең хезмәт тәртибенә карата таләпләр үтәлеше һәм мәнфәгатьләр каршылыгын җайга салу буенча комиссия утырышы булды.

Утырышта түбәндәге мәсьәләләр каралды:

- дәүләт граждан хезмәткәрләре вазыйфа биләгәндә үзләренең керемнәре, чыгымнары, мөлкәте һәм мөлкәти холыклы йөкләмәләре турында белешмәләр тапшырырга тиешле булган, коррупция куркынычларына бәйле вазыйфалар исемлегенә карала торган вазыйфаларга беркетелгән функционалга бәйле рәвештә өстәмәләр кертү турында;

- дәүләт граждан хезмәтеннән куылганнан соң коммерциячел һәм башка төр оешмаларда тиешле вазыйфаларны биләүгә ризалык алу максатында, элегрәк ТР Сәнәгать һәм сәүдә министрлыгында Татарстан Республикасы дәүләт граждан хезмәтенең төрле вазыйфаларын биләгән гражданнар белән хезмәт шартнамәләрен төзү турында югарыда аталган оешмалардан хәбәрләр җиткерү турында;

- балигълык яшенә җитмәгән балага керемнәр, чыгымнар, мөлкәт һәм мөлкәти холыклы йөкләмәләр турында белешмәләр тапшыру мөмкинлегенең булмавы турында гариза һәм башка мәсьәләләр.

Ford Sollers реструктуризация турында игълан итә: компания җиңел автомобильләр базарыннан китә һәм җиңел коммерция транспорты сегментында бизнес алып баруга көч куячак.            

• Ford Motor Company һәм "СОЛЛЕРС" ГАҖ уртак предприятиесе акционерлары Ford Sollers уртак предприятиесен реструктуризацияләү турында игълан итә. "СОЛЛЕРС" ГАҖ Ford Sollers УП контрольдә тотучы акционерына әйләнәчәк.

• Компания җиңел коммерция транспорты базарында Ford Transit  позицияләрен алга таба ныгытырга тырышачак, анда әлеге модель чит ил брендлары арасындагы сегмент лидеры булып тора.

• Ford Sollers җиңел автомобильләр базарыннан китә, бу хәл тагын да көндәшлерәк һәм табышлырак бизнес-модель формалаштыру мөмкинлеген бирәчәк.

• Ford җиңел автомобильләрен җитештерү 2019 елның июнендә тулысынча төгәлләнәчәк, алга таба Яр Чаллыда һәм Всеволожскта ике Ford автомобильләре заводы, шулай ук "Алабуга" МИЗ (Алабуга шәһәре) двигательләр заводы ябылачак.
• Җиңел автомобильләргә гарантия ремонтын ясау һәм сервис хезмәтләрен күрсәтү тулы күләмендә башкарылачак.

 Ford Motor Company һәм "СОЛЛЕРС" ГАҖ уртак Ford Sollers компаниясе акционерлары килешүгә ирешкәннәр һәм уртак предприятиене реструктуризацияләү турында ниятләр хакында беркетмә имзалаганнар, киләчәктә аның эшчәнлеге җиңел коммерция транспорты сегментында алып барылачак. Бизнесның яңа структурасы компаниягә позицияләрне ныгытырга һәм Ford Transit сатуны арттырырга булышачак, аны җитештерү "Алабуга" МИЗ (Татарстан, Алабуга ш.) заводында дәвам итәчәк. Соңгы өч ел эчендә Ford Transit сату 200% артып киткән, ул модельгә чит ил брендлары арасында сегмент лидерларына чыгу мөмкинлеген биргән.

Ниятләр турында беркетмә Ford Motor Company һәм "СОЛЛЕРС" ГАҖ уртак предприятиесе акционерларының стратегияне яңадан карау йомгаклары буенча имзаланган. Үзгәрешләрнең максаты булып кыска срокларда компаниянең табыш алу дәрәҗәсен кире кайтару зарурлыгы һәм базардагы катлаулы вәзгыять шартларында инвестицияләрнең нәтиҗәлелеген арттыру тора. Акционерлар арасындагы сөйләшүләр дәвам итә һәм якын айларда ахыргы килешенүләргә ирешеләчәк.

"Әлеге карар – безнең барлык партнерларыбыз мәнфәгатендә Ford бизнесының нәтиҗәлелеген һәм көндәшлеккә сәләтле булу дәрәҗәсен арттыру юлында әһәмиятле адым, – диде Ford Motor Company башкарма вице-президенты һәм Евроа, Якын Көнчыгыш һәм Африка төбәкләре буенча президенты Стивен Армстронг. – Ford Sollers яңа структурасы Европаның барлык базарларында коммерция транспорты сегментында Ford брендының лидер дәрәҗәсен ныгыту буенча безнең стратегиягә җавап бирә, шулай ук катлаулы карар кабул итү һәм Россиядәге җиңел автомобиль базары кебек югалтулы сегментларны ташлап китү ниятебезне чагылдыра".

Ford Sollers яңа структурасында Ford Motor Company һәм "СОЛЛЕРС" ГАҖ акционерлары партнерлар булып кала, шул ук вакытта "СОЛЛЕРС" ГАҖ уртак предприятиенең устав капиталында 51% өлешкә идарә итәчәк.

Бизнесны реструктуризацияләү җиңел автомобильләр җитештерүне 2019 елның июнендә тулысынча төгәлләүне күздә тота, нәтиҗәдә Яр Чаллыда һәм Всеволожскта ике Ford автомобильләре заводы, шулай ук "Алабуга" МИЗ (Алабуга шәһәре) двигательләр заводы ябылачак. Әлеге чаралар хезмәткәрләр штатын шактый кыскартуга китерәчәк, бу эш иң беренче чиратта өстәмә компенсация түләп, эштән ирекле китү программасы буенча уздырылачак.

Ford Sollers партнерлар белән берлектә алга таба башкарылачак, бизнесны реструктуризацияләү өчен кирәкле эшләр буенча сөйләшүләр алып бара.

Ford Sollers җиңел автомобильләрнең гарантия ремонты һәм сервисы буенча барлык йөкләмәләрнең дә тулы күләмендә үтәләчәге турында раслый.

Форд Соллерс матбугат хезмәте материаллары буенча

Бүген ТР Сәнәгать һәм сәүдә министрлыгында Стамбулның Электроника, электр техникасы, җайланмалар һәм мәгълүмат технологияләре экспортерлары ассоциациясе (ТЕТ) вәкилләре белән очрашу булды. Очрашуны министр урынбасары Алмаз Хөсәенов уздырды. Ул республиканың сәнәгый потенциалы турында сөйләде. Ассоция вәкилләре киңәйтелгән составта Татарстанда беренче мәртәбә, шуңа күрә алар энергетика вәкилләре белән b2b очрашуларга махсус игътибар бирде.

Бүген Татарстан Республикасы сәнәгать һәм сәүдә министры урынбасары Алмаз Хөсәенов рәислегендә Сәнәгать продукциясенең законсыз әйләнешенә каршы тору комиссиясенең чираттагы утырышы булды. Утырышта җиңел сәнәгать продукциясенең һәм балалар өчен товарларның законсыз әйләнешенә каршы көрәшү мәсьәләләре, шулай ук табигый мехтан ясалган эшләнмәләрне контроль (тәңгәлләштерүче) тамгалар белән зарури маркалау турындагы таләпләрнең үтәлешенә кагылышлы мәсьәләләр каралды.

Ропотребнадзорның Татарстан Республикасы буенча идарәсе җитәкчесе урынбасары Марина Трофимова җиңел сәнәгать продукциясен һәм балалар товарларын тикшерүдә тоту буенча уздырыла торган чаралар турында һәм контроль (тәңгәлләштерүче) тамгалар белән зарури маркалау өлешендә мех эшләнмәләре әйләнешенә уздырыла торган контрольлек эше турында сөйләде.

2018 елда Идарәгә кулланучылардан җиңел сәнәгать продукциясенең начар сыйфатына кагылышлы 76 язма мөрәҗәгать килгән. Хокук бозучылар арасында "Смешные цены" һәм "Планета одежды и обуви" кибетләре челтәре лидерлар булып тора. Техник регламентларның таләпләре бозылудан тыш, Идарә белгечләре тарафыннан түбән бәяле категориягә караучы мондый кибетләрдә еш кына ят товар тамгасын законсыз кулланган контрафакт продукциясе дә ачыклана. Мисал өчен, сатуда "Adidas", "NIKE", "ReeboK", "PUMA" брендлары белән спорт киемнәре, аяк киеме, шапкалар, футболкалар тәкъдим ителгән, ә товар тамгасыннан файдалану хокукына лицензия шартнамәсе булмаган.  Уздырылган күзәтчелек чаралары нәтиҗәсендә, тулаем алганда, 104 хокук бозу очрагы ачыкланган, административ хокук бозулар турында 22 беркетмә төзелгән. Җиңел сәнәгать продукциясенең 449 партиясенә арест салынган.

Болар белән берлектә, Идарә контроль (тәңгәлләштерүче) тамгалар белән зарури маркалау өлешендә мех эшләнмәләре әйләнешен тикшерүдә тотуны дәвам итә. 2018 елда 67 контрольлек чарасы уздырылган. Тикшерелгән мех продукциясенең 2000 берәмлеге арасыннан "Җиңел сәнәгать продукциясенең куркынычсызлыгы турында" Таможня берлеге Техник регламенты таләпләренә 217 берәмлек мех эшләнмәсе җавап бирмәгән, 123 мех эшләнмәсе буенча мех эшләнмәләрен контроль (тәңгәлләштерүче) тамгалар белән маркалау тәртибе бозылган, 26 млн сумлык эшләнмәгә арест салынган һәм алар сатудан алынган.

Республика комиссиясе утырышы нәтиҗәсендә Сәнәгать продукциясенең законсыз әйләнешенә каршы тору буенча дәүләт комиссиясе адресына табигый мехтан ясалган эшләнмәләрне контроль (тәңгәлләштерүче) тамгалар белән маркалау системасын камилләштерү буенча уртак тәкъдимнәр әзерләү турында карарлар кабул ителде.

2019 елның 26 мартында Яр Чаллыда металлны EPS-чистарту буенча югары технологияле җайланма кулланылган BRANDSTEEL (EPS – Eco Pickled Surface, өслекне экологик эшкәртү) – Сервислы металл эшкәртү үзәге ачылды. Әлеге үзәк Яр Чаллы шәһәренең "Кама-Трейд Татарстан" ҖЧҖ алгарышлы социаль-икътисадый үсеш территориясе резиденты булып тора. Металлпрокат белән төп тәэминатчы булып "Магнитогорск металлургия комбинаты" ГАҖ тора.

EPS-чистарту линиясе җыйнак, тавышсыз, экологияле һәм автомат идарә ителә торган җайланмалардан гыйбарәт. Гамәлгә кертелгән технологик линиянең Россиядә дә, Европа илләрендә дә аналоглары юк. Әлеге линияләр АКШ, Мексика, Корея, Кытай кебек илләрдә генә эшли.

"Металл эшкәртү үзәге хезмәтләреннән файдалануда, иң беренче чиратта, Россиянең, Белоруссиянең "Группа ГАЗ" ИК" ҖЧҖ, "МАЗ" ААҖ, "КАМАЗ" ГАҖ һ.б. кебек автомобиль төзү предприятиеләре мәнфәгатьле", – дип белдерде "Аккурайд Уилз Руссиа" ҖЧҖ генераль директоры Илья Давыдов.