ЯҢАЛЫКЛАР

Татарстан Республикасына "Газпром" ГАҖ идарәсе рәисе урынбасары Виталий Маркелов килде.

Эш сәфәре Иннополис Университетына визит белән башланды, анда Татарстан предприятиеләре күргәзмәсе оештырылган иде. Күргәзмәдә "Газпром" ГАҖ ихтыяҗлары өчен Татарстан предприятиеләре тарафыннан җитештерелә торган инновацияле һәм импортны алмаштыручы продукция экспозициясе күрсәтелде. Виталий Маркеловны ТР Президенты Рөстәм Миңнеханов озата йөрде.

Кунаклар газ моторлы техника үрнәкләре – җиңел автомобильләр һәм газдагы авыл хуҗалыгы машиналары, шул исәптән "МТЗ" тракторлары белән танышты.

Иннополис Университетының ясалма интеллект лабораториясе күргәзмәдә берничә проект тәкъдим итте.

Күргәзмәдә үз эшләнмәләрен "Электроприбор", "Тасма", "КМПО", "Казанкомпрессормаш", "РариТЭК" һәм Татарстан Республикасының һәм Россия төбәкләренең башка компанияләре тәкъдим итте.

Горький исемендәге Яшел Үзән судно төзү заводы стендын карау барышында Рөстәм Миңнеханов һәм Виталий Маркелов республиканың туристлык маршрутларында сыекландырылган табигый газда эшләүче елга судноларын куллану буенча сынау проектын гамәлгә ашыру буенча чаралар планын имзалады. Мондый судноны төзү белән бүген Яшел Үзән заводы шөгыльләнә.

Күргәзмәне караганнан соң, "Газпром" ГАҖнең республиканың сәнәгать комплексы белән үзара хезмәттәшлеге буенча Юл картасын гамәлгә ашыруның барышы турында киңәшмә узды.

Киңәшмәдә хезмәттәшлекнең перспектив юнәлешләре билгеләнде: газ белән тәэмин итү инфраструктурасын үстерү, магистраль газүткәргечләр төзү һәм газ ятмаларын комплекслы геомеханик модельләштерүнең мәгълүмат платформасын эшләү буенча Иннополис университеты проекты.

ТР Президенты матбугат хезмәте һәм "Татар-информ" МА материаллары буенча

2019 елның 14 октябреннән "Работа в России" киң масштаблы һөнәри юнәлеш бирүче проект кысаларында республикада "Турникетларсыз атна" Бөтенроссия акциясе старт алды.

Акция Россиянең алдынгы предприятиеләре эшчәнлеге турында һөнәри юнәлеш бирүче мәгълүмат җиткерүгә, сәнәгый җитештерүдә ихтыяҗ булган һөнәрләрне һәм белгечлекләрне популярлаштыруга юнәлдерелгән чаралар комплексыннан гыйбарәт.

Проектның төп идеясе – мәктәп укучыларын һәм студентларны төбәктә урнашкан предприятиеләр эше белән интерактив таныштыру.

"Турникетларсыз атна" ел саен апрель һәм октябрь айларында үткәрелә. 2019 елның язында әлеге акцияне Татарстан Республикасының 40тан артык сәнәгать һәм сәүдә предприятиесе хуплады: "Нижнекамскнефтехим" ГАҖ, "Татнефть – прескомпозит" ҖЧҖ, С.П.Горбунов исемендәге КАЗ – "Туполев" ГАҖ филиалы, "А.М.Горький исемендәге Яшел Үзән заводы" АҖ һәм башкалар.

14 октябрь көнне "Бөгелмә электр насослары заводы" ААҖдә Бөгелмә шәһәренең "14 нче татар гимназиясе"нең 9 нчы сыйныф укучылары өчен экскурсия үткәрелде. Кунакларга предприятие турында сөйләделәр һәм күрсәттеләр, завод цехлары буйлап экскурсия үткәрделәр.

"КВЗ" ГАҖ 54 нче урта мәктәпнең 9 нчы сыйныф укучылары өчен үз ишекләрен ачты. Балалар завод музеенда булды һәм производство белән танышты.

"Казан вертолет заводы" ГАҖ матбугат хезмәте материаллары буенча

"Татнефть" компаниясе "Фән һәм инновацияләр" халыкара форумы кысаларында "Студент күзлегеннән бизнес" хакатонын оештыра.

Форумда катнашу өчен техник вузларның 3-4 курс студентлары һәм магистрлары чакырыла.

Хакатон 2019 елның 18 октябрендә компаниянең Әлмәттәге "Юность" җәйге савыктыру лагере базасында узачак. Анда катнашучыларга өч юнәлеш буенча – "Разведка һәм чыгару", "Нефть-газ эшкәртү", "Шиннар комплексы" технологик чакырулар нигезендә җитештерү кейслары тәкъдим ителәчәк.

Хакатон нәтиҗәләре буенча иң яхшы 7 студент "Татнефть" компаниясенең технологик үсеш үзәгендә түләүле стажировка узу мөмкинлеген алачак.

Хакатонда катнашу өчен гаризаны әлеге электрон почта аша бирергә мөмкин: BakeevRN@tatneft.ru.

Өстәмә

*Хакатон (ингл. hackathon, hackер (к.хакер) һәм marathon — марафон) — эшләүчеләр форумы, анда вакытта программа белән тәэмин итү буенча төрле өлкә белгечләре (программистлар, дизайнерлар, менеджерлар) нинди дә булса проблеманы билгеле бер вакыт эчендә бергәләп хәл итә. Гадәттә, хакатоннар бер көннән бер атнага кадәр сузыла.

"Татнефть" ГАҖ матбугат хезмәте материаллары буенча

Зәйдә "Наше время – Безнең заман" VII эшче яшьләр иҗатының ачык республика телевизион фестиваленең сайлап алу зонасы этабы онытылмаслык гала-концерт һәм иң яхшы башкаручыларны бүләкләү чарасы белән тәмамланды.

Узган ял көннәрендә жюри әгъзалары Зәйнең "Энергетик" мәдәният йорты сәхнәсендә фестивальдә катнашучыларның 50дән артык иҗат номерларын карады.

Гомумкоманда зачетында мактаулы беренче урынны берьюлы өч команда яулады: "Татэнерго" АҖ филиалы – Зәй ГРЭСы, "Нижнекамскнефтехим" ГАҖ һәм ТР Зәй муниципаль районы Башкарма комитетының мәгариф идарәсе.

Икенче урынны ТР Чистай муниципаль районы Башкарма комитетының мәгариф идарәсе һәм "Чистай РҮХ" ДАССОның иҗат коллективларына бирделәр.

Гадәттәгечә, барлык җиңүчеләргә һәм лауреатларга дипломнар һәм бүләкләр тапшырылды. Беренче, икенче, өченче урыннарга ия булучыларга фестивальнең суперфиналына махсус чакыру тапшырылган.

Бу елның мөһим үзенчәлеге шунда: конкурсантларның күбесе тамашачыларга татар һәм рус телләрендә генә түгел, мари, чуаш һәм башкорт халыкларының көнкүрешенә һәм мәдәниятенә багышланган җырлар һәм хореографик композицияләр дә тәкъдим итте.

Киләсе зона сайлап алу туры конкурсантларны 19-20 нче октябрьдә Яр Чаллы шәһәрендә көтә.

"Наше время-Безнең заман" фестиваленең оештыру комитеты материаллары буенча

Казан Оргсинтезы яңа янгын техникасы сатып алган: ул Татарстанда иң биек ВИТАНД АПК-72 дигән янгын сүндерү телескопик күтәргече һәм яңа автоцистерна.

Машиналар Татарстан Республикасы буенча федераль янгынга каршы хезмәтнең 5 нче янгын сүндерү отряды паркын тулыландырачак. Техника Казанның Оргсинтез предприятиесе объектларында сәнәгать иминлеген тәэмин итү өчен дә, янгыннарда һәм гадәттән тыш хәл очрагында да кулланылачак.

ВИТАНД АПК-72 хәзерге вакытта Казанда һәм Татарстанда иң биеге булып санала. Ул кешеләрне коткарырга һәм 72 метрга кадәр яки торак йортның 22 катына кадәр биеклектә янгынны сүндерергә мөмкинлек бирә.

Автокүтәрткеч индивидуаль проект буенча "Казаньоргсинтез" ГАҖ өчен махсус эшләнгән. Күтәргечнең авырлыгы 40 тоннадан артык. Угы максималь биеклеккә минут ярым эчендә күтәрелә. Люлькасының йөк күтәрүчәнлеге – 500 кг. Люльканың үзәк өлешендә дистанцион идарә ителә торган лафет көпшәсе беркетелгән, ул минутына 3800 литрга кадәр су сиптерә ала. Суны да, күбекләрне дә сиптерү мөмкинлеге каралган.

Бу көнне ГТХМ тапшырылган икенче машина – КАМАЗ базасында "СТ-Авто" янгын техникасы җитештерүче Алтай автоцистернасы. Ул 7 мең литрдан да ким булмаган күләмдә су сыйдыра ала. Цистерна шулай ук күбек ясау өчен 420 литр күбек хасил итә торган эретмә сыйдырышлы бак белән җиһазландырылган. Янгын чыганагына су цистернадан да, ачык сулыктан да яки суүткәргеч челтәреннән дә бирелергә мөмкин. Әлеге автоцистернаның мөһим өстенлеге булып ике баскычлы насос тора, анда су бирү басымын үзгәртергә мөмкин.

"Казаньоргсинтез" ГАҖ материаллары буенча

Кичә, 10 нчы октябрьдә, ТР Сәнәгать һәм сәүдә министрлыгында энергия эшкәртү һәм җил үлчәү буенча хисаплар тәкъдим ителде. Казан дәүләт энергетика университеты вәкилләре республиканың Спас, Кама Тамагы һәм Балык Бистәсе районнары территориясендә башкарылган эшләр буенча презентация үткәрде. Энергетика университеты белгечләре ел дәвамында өч мәйданчыкта эшләгән: "Измери", "Саескан тавы" һәм "Красновидово". Тикшеренүләр түбәндәге параметрлар буенча үткәрелгән: җилнең юнәлеше һәм тизлеге, турбулент ешлыгы һәм җилнең бүленеше. Бу мәгълүматларны исәпкә алып, киләчәктә җил паркларын төзү планлаштырыла. Эш нәтиҗәләре буенча белгечләр ун елга электр энергиясе эшләп чыгару параметрларын билгеләде.

7-11 октябрьдә Мәскәүдә "Агропродмаш-2019" күргәзмәсе узды. "Интеграл+" ФҖП (Казан, Татарстан) компаниясе төргәкләү җиһазларының иң популяр модельләрен һәм 2019 елгы төп яңалыкларны – пакет-пирамидкага чәй төрә торган, Татарстанда җитештерелгән "Инпак-Тетра" төргәкләү машинасын, шулай ук бездә ясалган яңа югары җитештерүчәнлекле "Инпак-Ультра" автоматын тәкъдим итте.

Предприятие стендын Россия сәнәгать һәм сәүдә министры Денис Мантуров карады, ул компаниянең НИОКР федераль программасын тормышка ашырудагы уңышларына бәя бирде, аның нигезендә предприятие биотаркала торган элпәгә тартмалар төяү өчен уникаль машиналар эшләү буенча конверт методы белән эш алып бара.

"Интеграл+" ФҖП ЯАҖ маркетинг бүлеге материаллары буенча

Агач эшкәртү тармагында дөньяның әйдәп баручы җитештерүчесе – Төркиянең Kastamonu компаниясе Россиядә биш еллык юбилеен билгеләп үтә. Татарстанда урнашкан предприятие әлеге елларда башкарылган эш нәтиҗәсендә төбәккә АКШ доллары белән 771,8 млн. инвестиция керткән.

2014 елда Алабугада МДФ, ХДФ плитәләре һәм ламинирланган идән түшәмәләре чыгару буенча Kastamonu заводы ачылды. Биш ел эчендә предприятиенең җитештерү куәте елына 1,05 млн. м3 МДФ плитәсе һәм 35 млн. м2 ламинат тәшкил иткән. Компания ламинат сегментында идән түшәмәсе буенча Россия базарының лидеры булып тора, аның 20% өлешен били. Завод ачылу нәтиҗәсендә турыдан-туры производствода 930 эш урыны, шулай ук чиктәш – урман әзерләү, транспорт, мебель өлкәләрендә 2 500 эш урыны булдырылган.

Соңгы биш елда компания җитештерелә торган продукциянең ассортиментын шактый киңәйткән. Мәсәлән, 2014 елда ламинирланган идән япмалары декорлары саны 45 булса, 2019 елда 200гә җиткән, ә 2015 елда чыгарыла башлаган Evogloss МДФ-панельләренең декорлары саны 34тән 73кә кадәр арткан. Моннан тыш, яңа МДФ-Acrylic панельләре коллекциясе барлыкка килгән, хәзерге вакытта ул 14 төрле декор тәшкил итә.

Kastamonu матбугат хезмәте (АГТ коммуникация агентлыгы материаллары буенча)

9 нчы октябрьдә "Казан ярминкәсе" мәйданчыгында "Сәламәтлек индустриясе. Казан" дигән 24 нче халыкара махсус күргәзмә һәм "Эстетик медицина һәм косметология. Казан" дигән 1 нче махсус күргәзмә ачылды.

Шул ук көнне "Татарстан" конференцияләр залында ТР Сәнәгать һәм сәүдә министрлыгы тарафыннан оештырылган "Татарстан Республикасы медицина сәнәгате үсешенең актуаль проблемалары" темасына түгәрәк өстәл узды. Анда ТР Сәламәтлек саклау министрлыгы, ТР буенча Росздравнадзор территориаль органы, медицина җиһазлары җитештерүче предприятиеләр, шулай ук профильле фәнни-белем бирү оешмалары вәкилләре катнашты.

Министр урынбасары Алексей Савельчев рәислегендәге түгәрәк өстәлдә катнашучылар тармакның иң мөһим мәсьәләләре, аерым алганда, медицина эшләнмәләрен БДАМС системасының яңа кагыйдәләре буенча яңадан теркәлү һәм дәүләт сатып алуларында катнашуга, шул исәптән товарлар, эшләр һәм хезмәт күрсәтүләр каталогына, бәйле булган мәсьәләләр буенча фикер алыштылар.

Түгәрәк өстәл барышында "ФармМедПолис РТ" вәкиле "Татарстан Республикасында медицина сәнәгать паркы" проектын тәкъдир итте, ә Татарстан Республикасы Сәнәгать һәм сәүдә министрлыгы белгече катнашучыларга "Халыкара кооперация һәм экспорт" илкүләм проекты турында сөйләде.

Күргәзмә Татарстан Республикасы Сәламәтлек саклау һәм косметология белгечләре, шулай ук медицина сәнәгате вәкилләре өчен әһәмиятле вакыйга булып тора. Медицинаның төрле юнәлешләрендәге яңалыкларны медицина җиһазлары һәм медицина приборлары җитештерүчеләр һәм тәэмин итүчеләр тәкъдим итә. Тармак белгечләре өчен бай эш программасы оештырылган иде: фәнни-гамәли конференцияләр, түгәрәк өстәлләр, тематик фестивальләр һәм семинарлар.

Күргәзмә эше 11 нче октябрьгә кадәр дәвам итәчәк, чара ТР Сәламәтлек саклау министрлыгы ярдәмендә оештырылган.

Бүген Татарстан Республикасы сәнәгать һәм сәүдә министры урынбасары Алексей Савельчев һәм Россия Сәнәгать һәм сәүдә министрлыгының Химия-технология комплексы һәм биоинженерлык технологияләре департаменты директоры урынбасары Денис Латфуллин "КЗСК" ААҖдә булды.

Министрлык вәкилләре производство эшен торгызу, ә атап әйткәндә җиһазларны агымдагы ремонтлау эшләре алып барыла торган цехларда булды. Ремонт эшләренең барышы турында "Синтез" АҖ генераль директоры Денис Чернышев "КЗСК" ААҖ башкарма директоры Алексей Контуров белән бергә җиткерде.

Энергия белән тәэмин итүче оешмалар вәкилләре белән очрашу узды. Очрашу барышында, тиешле шартнамәләргә кул куйганнан соң, киләсе атна башында предприятиегә энергия ресурсларын бирүне яңартырга әзер булуы расланды.

Бүгенге көндә, шулай ук, чимал сатып алу буенча да чаралар үткәрелә. Беренче партия киләсе атна башында килер дип планлаштырыла.