ЯҢАЛЫКЛАР
Фестиваль Татарстанда агымдагы елның 1 мартыннан 16 ноябренә кадәр узды. Заявка кампаниясе 1 октябрьдә тәмамланды. Зона буенча сайлап алу турлары Әлмәт, Зәй, Яр Чаллы һәм Казанда зур уңыш белән узды.
Фестиваль эшче һәм инженер һөнәрләрен популярлаштыруга, эшче яшьләрнең иҗади потенциалын ачуга юнәлдерелгән. Проект республика предприятиеләрендә һәм оешмаларында эшләүче 18 яшьтән 35 яшькә кадәрге яшьләргә иҗади яктан үзләрен күрсәтергә тәкъдим итә.
Быел "Наше время - Безнең заман" фестивалендә катнашу өчен республиканың төрле милек формасындагы 174 предприятиесе, оешма һәм учреждениесе вәкилләре заявка биргән.
Быел фестивальдә катнашучылар арасында "Аммоний", "Нижнекамскнефтехим", "Әлмәт торба заводы", С.П.Горбунов исемендәге "Казан авиация заводы" – "Туполев" ГАҖ филиалы, "Татэнерго", "Татнефть-Нефтехим" ИК, "Казан дәүләт казна дары заводы", "Юл хәрәкәте иминлеге" ДБУ һ.б. кебек республиканың танылган предприятиеләре һәм оешмалары бар.
Фестивальдә катнашучылар "Музыкаль юнәлеш", "Бию юнәлеше", "Дан минуты", "Предприятиенең визит карточкасы" номинацияләрендә үз номерларын тәкъдим итте. Гала-концерт Татарстан Республикасы Президенты Рөстәм Миңнеханов катнашында узды.
Фестивальне оештыручылар – Татарстан Республикасы Сәнәгать һәм сәүдә министрлыгы, Татарстан Республикасы Яшьләр эшләре министрлыгы, Татарстан Республикасы Мәдәният министрлыгы, Татарстан Республикасы Мәгариф һәм фән министрлыгы, "Татмедиа" АҖ, Татарстан Республикасы Муниципаль берәмлекләр советы, "Татарстан Республикасы предприятиеләре һәм оешмалары яшьләре берлеге" ТИО, Татарстан Республикасы предприятиеләре һәм эшкуарлары ассоциациясе һәм Татарстан Республикасы Һөнәр берлекләре федерациясе.
Проектның идея авторы һәм оештыручысы – Татарстан Республикасының "Созвездие-Йолдызлык" төбәк яшьләр иҗтимагый оешмасы.
Фестивальдә җиңүчеләр һәм лауреатлар дипломнар, истәлекле бүләкләр, акчалата премияләр белән бүләкләнде.
Гран-при иясе – С.П.Горбунов исемендәге Казан авиация заводы – "Туполев" ГАҖ филиалы командасы Татарстан Республикасы Президентының Күчмә кубогы һәм 500 мең сум күләмендә акчалата премия алды.
Җиңүчеләрне котлыйбыз!
ТР Президенты матбугат хезмәте һәм Руслан Шиһабетдинов материаллары файдаланылды
Альберт Кәримов Кытай Халык Республикасына булган эш сәфәре кысаларында "China Hi-Tech Fair" (CHTF) күргәзмәсендә булды. 2019 елның 17 ноябренә кадәр Кытайда югары технологияләр өлкәсендә "China Hi-Tech Fair" (CHTF) 21 нче халыкара күргәзмә эше дәвам итәчәк.
Күргәзмә кысаларында эшлекле очрашулар узды, аерым алганда, министр күргәзмәне оештыручы компаниянең топ-менеджеры белән очрашты.
CHTF ел саен үткәрелә һәм 1999 елдан бирле гамәлдә. Агымдагы күргәзмәдә якынча 500 мең кеше булган, ә 3 меңгә якын компания үз продукциясен, шул исәптән Россиядән дә, тәкъдим иткән.
Быел күргәзмә кысаларында ясалма интеллект, "акыллы" җитештерү, энергия саклаучы һәм "яшел" технологияләр, IT, 5G-технологияләр, биология һ.б. өлкәләрдә яңа технологияләр күрсәтелә.
Күргәзмәнең эш программасы профильле семинарлар, сәнәгать конференцияләре, инвесторлар һәм җитештерүчеләр өчен презентацияләр белән үрелеп бара.
"Хезмәт җитештерүчәнлеге һәм эш белән тәэмин итүгә ярдәм итү" илкүләм проектын гамәлгә ашыру кысаларында "#ЛидерыПРО – эффектив җитештерү 2.0" федераль хакатоны үткәрелә. Икътисадның чимал булмаган секторындагы Татарстан предприятиеләрен хакатонның төбәк этабында актив катнашырга чакырабыз.
Оештыручылар чарада катнашучылар арасыннан Россия Федерациясе Икътисадый үсеш министрлыгының Экспертлар советы тарафыннан эшләнгән җитештерү һәм корпоратив кейсларны көн дәвамында хәл итәчәк командаларны формалаштырачак. 2020 елда иң яхшы карарларны тәкъдим иткән командалар Мәскәүгә гомумроссия хакатоны финалына юл тотачак, анда башка төбәкләрдән халыкара стажировкага бару хокукы өчен җиңүчеләр белән көч сынашачак.
"#ЛидерыПРО – нәтиҗәле җитештерү 2.0" хакатонында катнашу түбәндәге мөмкинлекләрне бирәчәк:
- бөтен команда өчен халыкара стажировканы оту;
- халыкара икътисад мәйданчыкларында үз проектыңны тәкъдим итү;
- "Инновация лидерлары" берләшмәсе әгъзасы булу;
- үз тәкъдимнәрең һәм ноу-хау өчен экспертлардан бәя алу;
- танышлар, компетенцияләр даирәсен киңәйтү, һөнәри күнекмәләрне яхшырту;
- үз предприятиесендә генә түгел, ә илдә дә хезмәт җитештерүчәнлеген арттыручылар командасына керү.
Хакатонны уздыру вакыты һәм урыны – 2019 елның 20 ноябре, 9:00 сәгатьтә, "Торатау" конгресс-холлы, Уфа шәһәре, Зак Вәлиди урамы, 2.
Катнашу өчен www.reglider.ru сайтында гариза калдырырга кирәк.
Катнашу мәсьәләләре буенча +7 (925) 722-26-47 телефоны аша мөрәҗәгать итәргә була.
Форд Соллерс Алабуга предприятиесе Ozonның эре интернет-кибетен Ford Transit автомобильләре белән тәэмин иткән. Агымдагы елның ноябрь ахырына кадәр компаниягә барлыгы 743 брендлы автомобиль кайтачак.
Ford Transit автомобильләрен сатып алу, ил төбәкләрендә машина бирү пунктларын арттыру максатыннан, интернет-кибет автопаркын киңәйтү кысаларында башкарылган.
Ford Transit файдасына сайлау әлеге автомобильләрнең югары ышанычлылыгы, сервисның түбән бәясе, үсеш алган дилерлар челтәре булу, сатканда автомобильләрне шактый югары бәядән җибәрә алу мөмкинлеге белән эшләнгән. Автомобильләр партиясенең күпчелек өлеше Мәскәүдә калачак, ә калганнары Россиянең эре шәһәрләрендәге пунктларга бүлеп биреләчәк: Санкт-Петербург, Екатеринбург, Казан, Краснодар, Самара, Ростов-на-Дону һәм башкалар.
Клиентларга заказны җиткерү өчен Ozon компаниясе тарафыннан 3100 кг металл Ford Transit фургоннары һәм уртача түбәле 3500 кг металл фургоннар, алгы һәм тулы приводлы модификацияләрдә сайлап алынган.
Автомобильләр 2,2 литрлы (125 ат көче) Duratorq TDCi двигателе һәм 6 баскычлы МКПП, кондиционер, дистанцион идарә пульты булган программалы алдан җылыта торган җайланма, кертеп ясалган Bluetooth магнитола белән тәэмин ителгән, бу исә йөртүчегә кесә телефонына игътибар итмәскә һәм хәрәкәтнең иминлек дәрәҗәсен арттырырга мөмкинлек бирә.
Автомобильгә шулай ук арткы паркрониклар да урнаштырылган, алар машина йөртүчене артка хәрәкәт иткәндә булган тоткарлыклар турында кисәтә. Автомобильләр фирма төсенә – ачык зәңгәргә буялган һәм компаниянең логотиплары белән брендланган.
Ford Sollers матбугат хезмәте материаллары буенча
Татарстан Республикасы делегациясенең Кытай Халык Республикасына булган визитының икенче көнендә Haier корпорациясенең цифрлы җитештерү эшчәнлеге һәм технологияләре белән танышу узды.
Альберт Кәримов корпорациянең индустриаль паркында булды һәм кондиционерлар җитештерү буенча "акыллы" завод, шулай ук кер юу машиналары җитештерү заводы белән танышты.
Haier "акыллы" заводлары автоматлаштырылган цифрлы модульләр комплексы булып тора, ул персоналга турыдан-туры ахыргы кулланучы белән элемтәгә керергә һәм продукция җитештергәндә аның барлык теләкләрен һәм ихтыяҗларын исәпкә алырга мөмкинлек бирә.
Бүген татарстанлылар Haier COSMOPlat яңа платформасы белән танышты. Нәкъ менә әлеге модель продукцияне кулланучы һәм ахырдан алучы белән турыдан-туры хезмәттәшлек итәргә мөмкинлек бирә.
Заводлар белән танышканнан соң министр чит ил юнәлеше буенча Haier корпорациясе вице-президенты Ли Пан әфәнде белән очрашты. Очрашуда Татарстан Республикасы һәм Haier арасындагы хезмәттәшлек мәсьәләләренә аерым игътибар бирелде.
Мәсәлән, министр 2016 елда Яр Чаллыда суыткычлар җитештерү буенча Россиядә беренче заводны эшләтеп җибәрүне һәм агымдагы елда кер юу машиналары җитештерү буенча беренче завод белән "Хайер Рус" индустриаль паркын ачуны билгеләп үтте.
Татарстан ягыннан "Хайер Рус" индустриаль паркын төзү проектына гамәлгә ашыруның барлык стадияләрендә төрле яклап ярдәм күрсәтеләчәген ассызыклады.
RenDanHeYi бизнес алып бару моделен корпорациягә кертү турында Ли Панның сөйләве зур кызыксыну уятты. Модель хезмәткәрләрнең киң автономлыгын, бюрократик чыгымнарны киметүне, шулай ук һәр хезмәткәр табышының эш сыйфатыннан бәйле булуын күздә тота.
Шуны да билгеләп үтәргә кирәк, Татарстан-Кытай хезмәттәшлегенә инде ун елдан артык. 2018 елда Татарстан Республикасы һәм Шаньдун провинциясе арасында хезмәттәшлекне үзара стимуллаштыру буенча чаралар планы имзаланды.
Көн азагында Татарстан делегациясе Haier HQ музеенда булды.
Халыкара сыйфат көнен сыйфат мәсьәләләре өстенлекле булган күп кенә илләрдә билгеләп үтәләр. Дөнья җәмәгатьчелеге беренче тапкыр бу көнне 1989 елда билгеләп үткән, ә алты елдан соң (1995) Европа сыйфат оешмасы бу атнаны ноябрьнең икенче пәнҗешәмбесенә, Европа сыйфат атналыгы дип игълан итә.
Дөньяның күп кенә илләрендә икътисадта иң беренче проблемаларның берсе – сыйфат. Ул һәр предприятие үсешендә уңыш ачкычы булып тора. Бу төшенчә әйләнә-тирә мохитне, кешенең физик һәм эмоциональ хәлен үз эченә ала торган тормыш сыйфаты белән бәйле. Әлеге проблемага игътибар җәлеп итү максатыннан Халыкара бәйрәм оештырылган да инде.
Бөтендөнья сыйфат көненең төп бурычы – дөнья базарында тәкъдим ителгән югары сыйфатлы хезмәтләрнең һәм җитештерелә торган продуктларның әһәмиятен арттыру. Товарлар җавап бирергә тиешле беренче критерий – кешеләр һәм әйләнә-тирә мохит өчен куркынычсызлык, икенчесе – алар кулланучыларның күрсәтелгән нормаларына, ихтыяҗларына һәм өметләренә туры килергә тиеш.
Азык-төлек, товарлар, белем бирү, хезмәт күрсәтү сыйфаты – болар барысы да тормыш сыйфаты, кешенең психологик уңайлылыгы.
Бүген "Мода һәм Стиль. Казан – Көз" җиңел һәм текстиль сәнәгате товарларының махсус күргәзмәсенең эш программасы кысаларында "Җиңел сәнәгать товарларын зарури маркировкалау. Проблемалар. Чишелеш юллары" дигән темага түгәрәк өстәл узды.
Татарстан Республикасы Сәнәгать һәм сәүдә министрлыгы вәкилләре катнашында узган чарада аяк киемнәре һәм җиңел сәнәгать предприятиеләре җитештерүчеләре катнашты. Очрашуның модераторы – "Честный знак" илкүләм товарларны маркировкалау системасы вәкиле Виталий Лосюгин.
Хәзерге вакытта Россия Федерациясе территориясендә аяк киемен зарури цифрлы маркировкалау гамәлгә кертелде, ул аяк киемнәре базарында эшләүчеләрне теркәүне күздә тота һәм 2020 елның 1 мартыннан башлап маркировкаланмаган аяк киеме сатуны тыя. Шул ук вакытта, зарури маркировкалау үзебезнекеләргә дә, чит ил продукциясенә дә кагыла. Зарури маркировка 2019 елның 1 декабрендә башлана, ә 2019 елның 27 июнендә җиңел сәнәгать товарларын маркировкалау буенча эксперимент старт алган иде.
Товарларны маркировкалау системасы контрафакт продукциягә каршы көрәшүгә һәм түбән сыйфатлы продукция таралуын чикләүгә юнәлдерелгән. Экспериментта хәзер дару чаралары, аяк киеме һәм тәмәке маркировкалана. 2020 елга кадәр Хөкүмәт 12 атама буенча зарури маркировканы гамәлгә кертүгә, ә 2024 елга кадәр гаммави ихтыяҗ булган барлык товарларны колачлау планга кертелгән.
Фото "Казан ярминкәсе" КҮ тарафыннан бирелде
Татарстан Республикасы сәнәгать һәм сәүдә министры эшлекле визит белән Кытай Халык Республикасына, Циндао шәһәренә (Шаньдун провинциясе) килде.
Визит барышында Циндао шәһәренең Чит ил эшләре канцеляриясе башлыгы Моу Цзюньдян әфәнде белән очрашу узды. Очрашуда министрны Татарстан Республикасының КХРдагы сәүдә-икътисад вәкиле Евгений Горшков озатып йөрде.
Аерым алганда, фикер алышу өчен Татарстан белән Шаньдун провинциясенең авыл хуҗалыгы, судно һәм вертолет төзелеше, нефть чыгару һәм нефть эшкәртү, электр энергетикасы, инвестицияләр һәм медицина өлкәләрендә хезмәттәшлек перспективалары беренче мәсьәлә булды.
Шулай ук 2018 елның сентябрендә "КАМАЗ" һәм Кытайның Weichai Power компаниясе – Weichai Power Co.Ltd. белән уртак проектларны гамәлгә ашыру мәсьәләсе дә каралды. Россия территориясендә 17 литрдан артык, 520дән 2000 кВт кадәр егәрлекле индустриаль дизель һәм газ двигательләре җитештерү буенча предприятие төзү турындагы килешүгә кул куелды. Бүгенге көндә проект эшләнелеш стадиясендә тора.
2019 елның 13 ноябрендә "Казан Экспо" халыкара күргәзмәләр үзәгендә профильле министрлыклар һәм ведомстволар вәкилләре катнашында "Яшь профессионаллар" WorldSkills стандартлары буенча 2019/2020 еллар төбәк һөнәри осталык чемпионатын ачу тантанасы узды.
Быел Татарстанда төбәк чемпионаты 13 ноябрьдән 7 декабрьгә кадәр 16 яшьтән алып 22 яшькәчә булганнар арасында 96 компетенция буенча, шулай ук 16 яшькә кадәрге конкурсантлар өчен 66 компетенция буенча үткәрелә. Компетенцияләрдә барлыгы 2300 артык конкурсант һәм эксперт катнашачак.
Чемпионат республиканың 11 шәһәрендә һәм авылларда – Бөгелмә, Буа, Алабуга, Яшел Үзән, Казан, Лениногорск, Яр Чаллы, Түбән Кама, Сарман, Тәтеш, Иннополиста 43 мәйданчыкта узачак. Ярышларны үткәрүнең төп мәйданчыклары – "Казан Экспо" халыкара күргәзмәләр үзәге, Казан мәгълүмат технологияләре һәм элемтә техникумы, Казан төзелеш көллияте һәм Халыкара сервис көллияте.
ТР Сәнәгать һәм сәүдә министрлыгы хезмәткәрләре республика мәйданчыкларында, шул исәптән Казанда да, WorldSkills стандартлары буенча беркетелгән компетенцияләр буенча 2019/2020 еллар һөнәри осталык буенча төбәк чемпионатын ачу тантанасында катнашты.
Төбәк чемпионаты нәтиҗәләре буенча иң яхшы конкурсантлардан "Ворлдскиллс" стандартларына бәйле һөнәри осталык буенча Татарстан җыелма командасы тупланачак, алар алга таба Новокузнецк шәһәрендә узачак "Яшь профессионаллар" (WorldSkills Russia 2020) VIII Илкүләм чемпионатының ярымфиналында һәм финалында республика данын яклаячак.
Түбән Камада "Нижнекамскнефтехим"ның беренче генераль директоры, Социалистик Хезмәт Герое, СССР нефть эшкәртү һәм нефть химиясе сәнәгате министры Николай Васильевич Лемаевның 90 еллыгына багышланган тантаналы чаралар башланды.
Иртән бөек химик бюстына чәчәкләр салу тантанасы булды, шуннан соң Школьный бульвар урамындагы 8 нче адресы буенча мемориаль такта ачылды.
Бәйрәм чаралары Түбән Каманың Халык иҗаты йортында дәвам итте. Кунаклар өчен "Нижнекамскнефтехим"ның беренче генераль директоры тормышына багышланган фотокүргәзмә һәм истәлекле программа оештырылган иде.
Чарада катнашучыларга рәсми чыгышлар белән республиканың беренче затлары мөрәҗәгать итте. Лемаевның көрәштәшләре һәм гаилә әгъзалары кунакларга Николай Васильевич белән бәйле хатирәләре турында сөйләде.
Николай Лемаев хөрмәтенә оештырылган чаралар 14 ноябрьдә традицион җиңел атлетика ярышы һәм музыкаль концерт белән дәвам итәчәк.
"Нижнекамскнефтехим" ГАҖ матбугат хезмәте материаллары буенча, ТР Президенты матбугат хезмәте фотографияләре файдаланылды