ЯҢАЛЫКЛАР
12 июльдә 21631 "Ставрополь" проекты буенча (эшләп чыгаручысы – "Яшел Үзән проект-конструкторлык бюросы" АҖ) кече ракета корабы сериясеннән уникенче корпуска нигез салу тантанасы булды. Чара Россия Федерациясе оборона министры Алексей Криворучко, Татарстан Республикасы сәнәгать һәм сәүдә министры Альберт Кәримов, "Ак Барс" холдинг һәм суднолар төзү корпорациясе вәкилләре һәм башка рәсми затлар катнашында узды.
2010 елдан бирле Россиянең Хәрби-Диңгез Флоты өчен төзелә башлаган 21631 проекты буенча кече ракета кораблары "елга-диңгез" классына караган күп максатлы, коралландыруның иң заманча үрнәкләре белән тәэмин ителгән кораблар булып тора. Әлеге проект корабларының билгеләнеше – дәүләтнең икътисад зонасын саклау һәм яклау.
Шунысын билгеләп үтү әһәмиятле, бүгенге көндә "А.М.Горький исемендәге Яшел Үзән заводы" АҖ стапельләрендә 21631 проекты буенча тагын биш берәмлек төзелеше алып барыла.
Бүген, 12 июльдә, Татарстан Республикасы Бөгелмә районының Карабаш ш.т.п. ел саен уза торган нефть саммиты булды. Татарстан Республикасы Президенты һәм республикадагы нефть тармагы вәкилләре катнашында гадәткә әйләнгән очрашуның төп темасы: "Кеше капиталы – ТР нефть комплексының технологик алга китү базисы" иде.
Рөстәм Миңнеханов билгеләгәнчә, хәзерге нефтькә югары бәяләр булган шартларда табышның үзкыйммәте компаниянең уңышын билгеләүче фактор булып тора. Шуңа күрә бары тик инновацияләрне актив кертү нәтиҗәсендә генә эшләп чыгаруның соңгы стадиясе, чимал базасының структурасы сыйфат ягыннан начарлану шартларында республика нефтьчеләренә нәтиҗәле нефть табарга һәм запасларны киң дәрәҗәдә торгызырга ярдәм итәчәк.
Шунысын билгеләү әһәмиятле, быелның 1 яртыеллыгы буенча Татарстанның нефть эшкәртү сәнәгатенең үсеш тизлеге 2017 елның 1 яртыеллыгына карата 113% тәшкил итә.
Бүген иң зур "ТАНЕКО" нефть эшкәртү заводында керосинны һәм дизель ягулыгын гидрочистарту буенча җайланмаларны эшләтеп җибәрү тантанасы булды. Әлеге чарада РФ энергетика министры урынбасары Павел Сорокин, Татарстан Республикасы Президенты Рөстәм Миңнеханов, Татарстан Республикасы сәнәгать һәм сәүдә министры урынбасары Алексей Савельчев, ягулык-энергетика комплексы предприятиеләре җитәкчеләре катнашты.
Сәламләү чыгышында Рөстәм Миңнеханов билгеләп узганча, "ТАНЕКО" проекты Россиянең нефть эшкәртү тармагындагы иң зурысы булып тора. "Безнең яңа Россиядә ул иң заманча завод, ул үсеш алсын һәм беренче номерлы булсын", – дип ассызыклады ул.
Яңа җайланмалар югары өстәлгән бәяле продуктлар чыгаруны арттыру мөмкинлеген бирә. Керосинны һәм дизель ягулыгын гидрочистарту җайланмаларының куәте чимал буенча елына тиешенчә 500 мең тонна һәм 1.6 млн тонна тәшкил итә. Әлеге эш куәтләре ягулыкның хәзерге экологик һәм эксплуатация таләпләрен канәгатьләндерә торган оптималь сыйфат дәрәҗәсенә ирешү мөмкинлеген бирә.
Белешмә өчен:
"ТАНЕКО" АҖ – "Татнефть" компаниясенең бизнесның дәвамлы тотрыклы үсеш алуын тәэмин итү максатында нефть эшкәртү сегментын үстерүгә юнәлдерелгән югары технологияле проекты. "Татнефть" ГАҖ проектын тормышка ашыру өчен барлыгы 307 млрд сум акча юнәлдергән.
"ТАНЕКО" "Татнефть" өчен генә әһәмиятле проект булып калмыйча, аны гамәлгә ашыру нәтиҗәсендә халык хуҗалыгының күп кенә тармаклары – машина төзелеше, төзелеш индустриясе, металлургия, проект фәне өчен дә синергетик нәтиҗә тәэмин итү мөмкин булды.
10 июльдә Екатеринбургта "ИННОПРОМ-2018" IX Халыкара сәнәгать күргәзмәсе кысаларында Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов "КUКА" компаниясенең генераль директоры Стефан Лампа белән очрашты.
Очрашу барышында Татарстан Республикасында технологияләр трансферы буенча алга таба хезмәттәшлек итү перспективалары турында сүз барды.
Очрашу йомгаклары буенча яклар үзара визитлар һәм юл картасын формалаштыру турында килешенде.
Белешмә өчен:
KUKA AG 3 млрд евро тирәсе әйләнеше булган халыкара компаниясе булып тора. Көн саен KUKAның 13 200 якын хезмәткәре Аугсбургтагы баш офиста һәм барча дөньяда робот техникасы һәм автоматлаштыру технологияләре өлкәсендә интеллектуаль чишелешләр белән тәэмин итүчеләр арасында компаниянең әйдәп баручыларның берсе буларак статусын саклау өстендә эшли. KUKA бер кулдан киң спектрлы продуктлар: аерым компонентлардан башлап автоматлаштырылган сәнәгый чишелешләр тәкъдим итә.
10 июльдә Екатеринбургта "ИННОПРОМ-2018" IX Халыкара сәнәгать күргәзмәсе кысаларында "Росатом" дәүләт корпорациясе һәм Татарстан Республикасы арасында хезмәттәшлекне үстерү буенча юл картасы имзаланды.
Имзалау буенча тантаналы чара Татарстан Республикасы стендында узды. Генераль директорның беренче урынбасары – "Росатом" дәүләт корпорациясенең Үсеш һәм халыкара бизнес блогы директоры Кирилл Комаров һәм Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов документка үзләренең имзаларын куйды.
Имзаланган юл картасы "Росатом" дәүләт корпорациясе мәнфәгатьләрендә Татарстан Республикасы предприятиеләренең, шул исәптән импорт белән алмаштырыла торган, югары технологияле продукциясеннән файдалануны җәелдерү буенча тәкъдимнәр формалаштыруны һәм карауны күздә тота. Карау йомгаклары буенча республика предприятиеләре продукциясен Җайланмаларның һәм материалларның бердәм тармак номенклатура каталогына кертү, шулай ук 2018 ел азагына кадәр күчмә проект сессиясен уздыру планлаштырыла, соңгысында хезмәттәшлекнең перспективалы югәлешләре һәм вариантлары каралачак.
"Иннопром" күргәзмәсен карау барышында Россия Федерациясе сәнәгать һәм сәүдә министры Денис Мантуров Татарстанның Ford Sollers җитештерүендә кулланыла торган өстәмә чынбарлыклы 3D-күзлекләреннән файдалану барышы белән танышты.
Ford Sollers "Иннопром" халыкара сәнәгать күргәзмәсендә беренче мәртәбә катнаша, биредә үзенең шәхси сан технологияләрен күрсәтә.
Татарстан Республикасы стендында эшләп чыгару процессында булган җитештерү барышларын санлаштырылган нигездә модельләштерү системасы; складта эшләүчеләрнең хезмәтен җиңеләйтә торган өстәмә чынбарлыклы 3D-күзлек; шулай ук яңа хезмәткәрләрне өйрәтү өчен кулланыла торган виртуаль чынбарлыклы 3D-күзлек күрсәтелгән.
Санлы җитештерүнең тәкъдим ителгән технологияләре Россиядәге Ford Sollers заводлары өчен компаниянең шәхси IТ-департаменты тарафыннан эшләнгән. Аларны проектлаганда инженерлар хезмәт нәтиҗәлелеген һәм җитештерүдәге куркынычсызлыкны арттыру өчен хезмәткәрләр һәм белгечләр белән тыгыз элемтәдә торган.
Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясе "ИННОПРОМ" халыкара сәнәгать күргәзмәсе эшендә катнаша, чара Екатеринбург шәһәрендә 2018 елның 9-12 июль көннәрендә уза.
Делегация составына республика министрлыклары, ведомстволары һәм предприятиеләре җитәкчеләре керде. Күргәзмәдә Татарстан Республикасының бердәй экспозициясе тәкъдим ителә.
Күргәзмә чаралары барышында очрашулар һәм берничә документка кул куюлар планлаштырыла.
Бүген Губернатор вазыйфаларын вакытлыча башкаручы – Нижегородск өлкәсе Хөкүмәте Рәисе Глеб Никитин, Чиләбе өлкәсе Губернаторы Борис Дубровский, Свердлау өлкәсе Губернаторы Евгений Куйвашев белән очрашулар булып узды. Түбәндәгеләр имзаланды: 2018-2020 елларга Нижегородск өлкәсе белән Килешүне тормышка ашыру буенча чаралар планы; 2018-2020 елларга Чиләбе өлкәсе белән Килешүне тормышка ашыру буенча чаралар планы; 2018-2020 елларга Свердлау өлкәсе белән Килешүне тормышка ашыру буенча беркетмә.
Бүген ТР вице-премьеры – ТР сәүдә һәм сәнәгать министры Альберт Кәримов Уралның гражданнар авиациясе заводында булды.
Исегезгә төшерик, ИННОПРОМ күргәзмәсе ел саен 2010 елдан башлап уздырыла. Ул Россия һәм чит ил җитештерүчеләре өчен нәтиҗәле сәүдә мәйданчыгы булып тора. ИННОПРОМдагы экспонентларның өчтән ике өлеше – халыкара компанияләр. Быел ИННОПРОМга дөньяның 95 иленнән һәм Россиянең 59 төбәгеннән 50 меңнән артык кеше киләчәк. Күргәзмәне оештыручылар – Россия Сәнәгать һәм сәүдә министрлыгы һәм Свердлау өлкәсе Хөкүмәте.
ИННОПРОМ-2018 темасы – Санлы җитештерү. Корея Республикасы юктан гына Партнер-илгә әйләнмәгән, ул – дөньядагы сәнәгый революция лидерларының берсе. Көньяк Корея альтернатив энергетика технологияләрен актив кертә, автомобиль төзелешендә, судно төзүдә, көнкүреш өчен электр приборларын һәм телекоммуникация җайланмаларын җитештерүдә, сәнәгый роботларны кертүдә әйдәп баручы урыннарда тора: биредә 10 мең хезмәткәргә 630 артык сәнәгать роботы туры килә.
Бүген Казанда Сәүдә, икътисадый һәм техник хезмәттәшлек буенча Әмирлек-Россия хөкүмәтара комиссиясенең 8 нче утырышы булып узды. Утырышны Россия Федерациясе сәнәгать һәм сәүдә министры Денис Валентинович Мантуров һәм Берләшкән Гарәп Әмирлекләренең тышкы эшләр министры, Сәүдә, икътисадый һәм техник хезмәттәшлек буенча Россия-Әмирлекләр хөкүмәтара комиссиясе рәистәше Шәйх Абдалла бән Зәйед Әл Нәхәйян уздырды. Утырыш эшендә Татарстан Республикасы Президенты Рөстәм Нургали улы Миңнеханов катнашты.
Утырыш барышында берничә документ имзаланды, шул исәптән Россия Федерациясе Хөкүмәте белән Берләшкән Гарәп Әмирлекләре Хөкүмәте арасында Россия Федерациясе һәм Берләшкән Гарәп Әмирлекләре гражданнары өчен үзара виза таләпләрен гамәлдән чыгару турында Килешүгә кул куелды.
Узган елда безнең илдән БГӘ булган тур агымының 50%ка артуы билгеләнде. "Виза режимын алу белән капма-каршы турагым артуына өметләнәбез", – дип билгеләде Денис Мантуров.
Исегезгә төшерик, 2017 елның 1 февралендә БГӘ Россия халкына 30 көндезге виза бирү тәртибен гадиләштерде. Һәм хәзерге вакытта РФдә яшәүчеләр Әмирлеккә чыгу визасын чиктә бушлай ала.
Билгеле булганча, Россия Федерациясе территориясендә, шул исәптән Татарстан Республикасында да, электр энергиясенең альтернатив чыганакларын гамәлгә кертү буенча актив эш алып барыла.
Татарстан Республикасы Министрлар Кабинеты йөкләмәсен (2018 елның 13 мартындагы утырышның № 1-ПК беркетмәсенең 7 пункты) республикада яңартыла торган энергия чыганакларын үстерүгә кагылышлы өлешендә үтәү кысаларында Татарстан Республикасында кече гидроэлектростанцияләр төзү мәсьәләсе буенча эш төркеме төзелде.
Эш төркеме составына Татарстан Республикасы Сәнәгать һәм сәүдә министрлыгы, Татарстан Республикасы Экология һәм табигый ресурслар министрлыгы, "Татарстан Республикасы Министрлар Кабинеты каршындагы Татарстан Республикасы Энергия саклау технологияләре үзәге" ДАУ, "Татарстан Республикасы Гидрометеорология һәм әйләнә-тирә мохитне мониторинглау идарәсе" ФДБУ, республиканың энергетика компанияләре вәкилләре, шулай ук "РусГидро" ГАҖ вәкиле керде.
Бүген министрлыкта ТР Премьер-министры урынбасары – Татарстан Республикасы сәнәгать һәм сәүдә министры – эш төркеменең җитәкчесе А.А. Кәримов җитәкчелегендә эш төркеменең беренче утырышы уздырылды, аның барышында Татарстан Республикасында кече гидроэнергетиканы үстерү перспективалары турында сөйләштеләр.
Астанада Казакъстан Премьер-министрының беренче урынбасары Аскар Мамин һәм Татарстан Республикасы Президенты Рөстәм Миңнеханов җитәкчелегендә Казакъстан-Татарстан бизнес-форумы узды.
– Без автомобиль төзелеше, суднолар төзелеше, вертолетлар төзү, нефть-газ химиясе өлкәсендә, югары технологияләр һәм башка тармакларда Казакъстандагы партнерлар белән икътисадый һәм инвестицион элемтәләрне җәелдерүдә мәнфәгатьле. Казакъстанда безнең "Татнефть", "КАМАЗ", "КВЗ" кебек күп кенә әйдәп баручы компанияләребез эшли. "Алабуга" МИЗда Казакъстанның аккумуляторлы батарейкалар җитештерү буенча "Кайнар Технолоджис" компаниясе катнашындагы резидент теркәлде, – дип билгеләде Рөстәм Миңнеханов.
Узган ел нәтиҗәләре буенча Татарстан-Казакъстан товар әйләнеше 40%ка арткан һәм 700 млн АКШ долларыннан артып киткән. Планда – әлеге күрсәткечне 1 млрд долларга җиткерү.
Татарстанның социаль-икътисадый һәм инвестицион потенциалын презентацияләп Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов чыгыш ясады. "Татнефть" ГАҖ, "ТАИФ" ГАҖ, "КАМАЗ" ГАҖ, "Ак Барс" холдинг компаниясе" АҖ, "КВЗ" ГАҖ һ.б. җитәкчеләре дә үз продукциясен күрсәтте.
Ахырдан хезмәттәшлек турында берничә документка кул куелды.