ЯҢАЛЫКЛАР
2020 елның 17-19 март көннәрендә Казанда энергия һәм ресурслар нәтиҗәлелеге һәм экология буенча Татарстан халыкара форумы-2020 кысаларында Татарстан предприятиеләре матбугат хезмәтләре һәм массакүләм мәгълүмат чаралары арасында энергияне сак тоту һәм энергетика нәтиҗәлелеген арттыру буенча республика конкурсы узачак.
Конкурска 2019 елның 1 февраленнән 31 декабренә кадәр басылып чыккан эшләр кабул ителә.
Республика массакүләм мәгълүмат чаралары һәм республика предприятиеләренең җәмәгатьчелек белән элемтә бүлекләре конкурста катнашу өчен чакырыла.
Җиңүчеләрне бүләкләү 2020 елның 17 мартында Татарстан Республикасы Хөкүмәтенең "2019 ел йомгаклары һәм 2020 елга бурычлар буенча "Татарстан Республикасында энергияне сак тоту һәм энергетика нәтиҗәлелеген арттыру" дәүләт программасын гамәлгә ашыруның барышы турында"гы утырышы кысаларында узачак.
Эшләрне әлеге электрон адреска җибәрергә кирәк: cetrt@mail.ru, җибәрүнең соңгы көне – 2020 елның 5 феврале.
Барлык сораулар буенча конкурсның мәгълүмат хезмәтенә мөрәҗәгать итегез: "Татарстан Республикасы Министрлар Кабинеты каршындагы Татарстан Республикасының Энергияне сак тоту технологияләре үзәге" дәүләт автоном учреждениесенең мәгълүмат-нәшрият һәм мәгариф эшчәнлеге бүлеге, тел/факс: (84-32) 72-99-43, 272-19-21.
Конкурс нигезләмәсе белән сылтама буенча танышырга мөмкин.
"Татар-информ" МА материаллары буенча
Татарстан Республикасы Сәнәгать һәм сәүдә министрлыгы Сезне Яңа ел белән котлый!
Узып баручы ел республика сәнәгате өчен мөһим вакыйгаларга бай булды. Без республиканың барлык предприятиеләренә һөнәри оста, җаваплы булганнары һәм үз эшләренә бирелгәнлеге өчен рәхмәт белдерәбез.
Күңел түрендә иң якты теләкләр кабул булсын һәм иң изге ниятләр тормышка ашсын, гаилә бөтенлеге, муллык һәм бәхет һәрберебезгә юлдаш булсын!
Яңа 2020 нче ел белән!
"Россия вертолетлары" холдингының Казан вертолет заводында (Ростех дәүләт корпорациясенә керә) яшьләр арасында "Һөнәре буенча иң яхшысы" исеменә һөнәри осталык конкурсына йомгак ясалды. 32 хезмәткәр бүләк алды.
КВЗның теләге булган һәр хезмәткәре үз көчен 7 компетенциядә сынап карый алган: "Авиация техникасы эшләнмәләрен җитештерү һәм җыю", "Электромонтаж", "Инженер-технолог", "Хезмәтне саклау", "Очу аппаратлары электр җиһазларын монтажлау", "Төркемле җитештерү" һәм "CAD инженер графикасы".
Экспертлар булып WorldSkills Hi-Tech сәнәгатенең югары технологияле тармакларының үтәли эшче һөнәрләре илкүләм чемпионатында катнашучылар катнашкан. Завод ярышлары өчен конкурс биремнәрен эшләгәндә WorldSkills стандартлары таләпләре исәпкә алынган, КВЗ даими рәвештә конкурсны камилләштерә, аны халыкара нормаларга яраклаштыра.
Конкурс нәтиҗәләре буенча беренче урыннарны Денис Сазыков ("Авиация техникасы эшләнмәләрен җитештерү һәм җыю"), Олег Солдатов ("Электромонтаж"), Руслан Кәримов ("Хезмәтне саклау"), Дарья Осокина ("Очу аппаратлары электр җайланмаларын монтажлау"), Азат Хисмәтуллин ("CAD инженер графикасы") яулаган.
"Төркемле җитештерү" компетенциясендә Илнур Фәхертдинов, Фәнис Гыйльмуллин, Владимир Григорьев һәм Сергей Егоров командасы җиңгән. "Инженер-технолог" компетенциясендә Руслан Гатауллин, Илнур Таналин, Ильяс Тимеров составындагы команда иң яхшысы дип табылган.
КВЗ, гадәттәгечә, кадрлар әзерләү дәрәҗәсен күтәрүгә, эшче һөнәрләрне һәм инженер белгечлекләрен популярлаштыруга юнәлдерелгән күп кенә чараларда катнаша. Завод белгечләре Казанда узган WorldSkills дөнья чемпионатында югары дәрәҗәдә әзерлек күрсәтте: 8 катнашучыдан һәм 1 эксперттан торган команда "Тормыш циклы белән идарә итү" компетенциясендәге ярышларда җиңү яулады.
"Вертолеты России" холдингы матбугат хезмәте материаллары буенча
"Ел җитәкчесе - 2019" республика иҗтимагый конкурсы лауреатларын бүләкләү тантанасы Казанда Татарстан Республикасы Президенты Рөстәм Миңнеханов катнашында узды. Чарада шулай ук министр Алберт Кәримов та катнашты.
Быел конкурс лауреаты исеменә икътисадның төрле тармакларындагы һәм өлкәләрендәге 83 предприятие һәм оешма җитәкчесе дәгъва белдергән.
"Ел җитәкчесе-2019" республика иҗтимагый конкурсы лауреатлары:
"Югары конкуренциягә сәләтлелек өчен" номинациясендә:
Антон Вячеславович Туркин – "ОИЛ" ҖЧҖ генераль директоры, Казан шәһәре;
Рәис Салих улы Хисамов — баш геолог – В.Д.Шашин исемендәге "Татнефть" ГАҖ генераль директоры урынбасары, Әлмәт шәһәре;
Сергей Анатольевич Трифонов – "Тулпар Эйр" авиакомпаниясе" ҖЧҖ генераль директоры, Лаеш муниципаль районы;
"Инвестицион активлык өчен" номинациясендә:
Октем Эджевит — "Джошкуноз Алабуга" ҖЧҖ генераль директоры, Алабуга шәһәре, "Алабуга" МИЗ территориясе;
Фердинанд Нургаян улы Хәйруллин – "Кызыл юл" АХҖК рәисе, Балтач муниципаль районы;
Илдус Зәки улы Исламов – "Татэлектромаш" фәнни-җитештерү берләшмәсе" ААҖ генераль директоры, Яр Чаллы шәһәре;
"Инновацион эшчәнлектәге казанышлар өчен" номинациясендә:
Роза Фатыйх кызы Гатина – "Химия продуктлары дәүләт фәнни-тикшеренү институты" ФКП директоры, Казан шәһәре;
Евгений Рәшит улы Ибраһимов – "В. Б. Шнепп исемендәге НИИтурбокомпрессор", Казан шәһәре;
"Югары социаль җаваплылык өчен" номинациясендә:
Николай Михайлович Николаев – "Лукойл" ГАҖ вице-президенты – "РИТЭК" ҖЧҖ генераль директоры, Самара шәһәре;
Әнвәр Габделмәҗит улы Яруллин – "ТМС групп" ИК ҖЧҖ директоры, Әлмәт шәһәре;
"Кадрлар потенциалын актив үстерү" номинациясендә:
Александр Борисович Лившиц – "Казан дәүләт казна дары заводы" ФКП генераль директоры, Казан шәһәре;
"Кече (урта) бизнес предприятиесе белән уңышлы идарә иткән өчен" номинациясендә:
Равил Фаил улы Идиятулин – "РУ-Инжиниринг" ФҖП ҖЧҖ директоры, Яр Чаллы шәһәре;
Алексей Иванович Леонтьев — "Восток" ҖЧҖ директоры, Кукмара муниципаль районы;
Мөнир Шаһзадә улы Шәяхмәтов "ПЖКХ-17" ИК ҖЧҖ директоры, Түбән Кама шәһәре;
"Предприятиене цифрлы трансформацияләү өчен" номинациясендә:
Зөфәр Фәнил улы Гәрәев – "Ак Барс" Банк ГАҖ идарәсе рәисе, Казан шәһәре;
Екатерина Юрьевна Никонова "ТатПром-Холдинг" ҖЧҖ компанияләр төркеменең коммерция директоры – "Яр Чаллы торба заводы" ҖЧҖ генераль директоры урынбасары, Яр Чаллы шәһәре.
Җиңүчеләрне котлыйбыз!
Роскачество үзебездә чыгарыла торган чемердәп торучы шәрабны тикшергән һәм иң яхшы эчемлекләр исемлеген төзегән. Россиядә җитештерелә торган, чемердәп торган эчемлекләрнең сыйфаты начар, дигән уйдырма расланмаган.
Тикшеренү "Россия шәраб гиды" кысаларында уздырылган, ул Россиянең Сәнәгать һәм Авыл хуҗалыгы министрлыклары белән берлектә Роскачество тарафыннан оештырылган. 2019 елда дегустация нигезендә бәяләү өчен Россия виноградыннан чемердәп торган 129 шәраб үрнәге сатып алынган.
Шулай итеп, Роскачестводан чемердәп торган шәрабләр категориясендә "Россиянең шәраб гиды" исемлегенә эләккән эчемлекләр:
- I урын – Краснодар крае территориясендә үстерелгән, виноградның Пино Нуар дигән сортыннан җитештерелгән "Мысхако" ярымтатлы шәрабе (100 дән 83,7 балл);
- II урын – Шардоне, Рислинг, Совиньон Блан сортлы виноградтан җитештерелгән ак "Дербентской винодельской компания" Россия шәмпан брюты;
- III урын – Ак мускат, Гәрәбә мускат сортлы виноградлардан ясалган, "Золотая балка"дан ярымтатлы, ак Кырым шәрабе.
Артык кыйммәтле булмаган һәм дегустация барышында яхшы бәя алып, рейтингка эләккән эчемлекләр: "Леонсия" шәмпан шәрабе, "Кубань-Вино" ҖЧҖдән ак брют һәм ярымтатлы ак шәраб. Әлеге үрнәкләр бер берәмлек товар өчен 164 сумнан сатып алынган.
Тикшеренүләрнең нәтиҗәләрен һәм нечкәлекләрен Роскачество порталында карагыз.
Роскачество искәрткәнчә, яңа ел табынына чемердәп торган шәраб сайлаган вакытта үзеңә кирәкле шәрабне сайлап алу өчен тышлыкны яхшылап укырга кирәк.
Тышлыкның алгы өлешендә "чемердәп торган шәраб" ("игристое вино") яки "Россия шәмпан шәрабе" дигән сүзләр булмаса, шешәне әйләнедереп, контрэтикеткадагы вак хәрефле текстны укыгыз. Сез алган эчемлек "газландырылган шәраб эчемлеге" булырга мөмкин, андый очракта шешәдәге сыеклыкның иң яхшысы дигәндә яртысы шәрабтан, ә калганы су һәм хушландыргычлардан торачак.
Әгәр "игристое вино" яки "жемчужное вино" сүзләренә "защищенного географического указания (ЗГУ)" яки "защищенного наименования места происхождения (ЗНМП)" дигән сүзләр язылган булса, димәк әлеге шәраб Россия Федерациясе чикләрендә билгеле бер төбәктә виноградтан әзерләнгән дигән сүз.
Якынлашып килүче Яңа ел белән!
"Россия сыйфат системасы" АКО материаллары буенча
ТР сәнәгать һәм сәүдә министры Альберт Кәримов Татарстан Республикасының Россия төбәкләрендәге һәм чит илләрдәге вәкилләре белән йомгаклау видеоконференциясен үткәрде.
Чарада республика министрлыклары һәм ведомстволары, оешмалар, шулай ук ТР Дәүләт Советы вәкилләре катнашты.
Альберт Кәримов узган елгы эш йомгаклары турында сөйләде һәм яңа 2020 елга уртак эшчәнлек өчен төп бурычлар билгеләде.
Татарстан Республикасы Сәнәгать һәм сәүдә министрлыгында бүген "ЭНИКС" АҖ предприятиесе җитештерә торган граждан продукциясе презентацияләнде. Компания табигый һәм техник фәннәр өлкәсендә фәнни тикшеренүләр һәм эшләнмәләр өлкәсендә махсуслаша.
"ЭНИКС" төрле билгеләнештәге пилотсыз авиация комплекслары җитештерә. Эшчәнлекнең төп юнәлеше – пилотсыз очкыч аппаратлар һәм төрле билгеләнештәге һәм катлаулылыктагы мишень комплекслары белән серияле рәвештә тәэмин итү, аларны эшләп чыгару, җитештерү.
Киңәшмәдә тәэсир итүе буенча "Элерон" гаиләлегенә якын һәм уртача радиуслы пилотсыз авиация комплекслары тәкъдим ителде. Алар тәүлек буе һава оптик-электрон разведкасы алып бару өчен билгеләнгән, очыш күрсәткечләрен динамик фаразлау системасына ия, контейнерларны төшереп калдыра ала һ.б.
Автомобиль һәм тимер юл магистральләренең, нефть-газ үткәргечләренең һәм электр тапшыру линияләренең торышын контрольдә тоту, экологик контроль, картографияләү һәм аэрофотога төшерү, балык промыселы разведкалары, элемтә системалары мониторингы һ.б. бик күп функцияләрне башкара ала.
Киңәшмәдә катнашучылар – республиканың тармак министрлыклары һәм ведомстволары вәкилләре "Элерон" гаиләсенең пилотсыз авиация комплексларын куллануга кызыксыну белдерде.
ТР сәнәгать һәм сәүдә министры Альберт Кәримов, мондый хезмәттәшлекнең мөһимлеген билгеләп, болай диде:
"Безнең алда газ белән эшләүче предприятиеләр продукциясен диверсификацияләү буенча Россия Президенты куйган бурыч тора. Граждани продукция чыгару дәрәҗәсе 50%ка кадәр җитәргә тиеш. Шуңа күрә бу эшләнмә һәм тәкъдим карау өчен аеруча актуаль булып тора".
Форд Соллерс һөнәри белем бирү оешмаларында "Мехатроника" белгечлеге буенча дуаль белем бирү системасын гамәлгә кертү проектының өченче этабына йомгак ясаган. Соңгы чаралар кысаларында Казанда Алгарышлы һөнәри әзерлек үзәгендә проектта катнашучыларга квалификация күтәрү турында таныклыклар һәм Зеленодольск механика һәм Казан авиация-техник көллиятләренә "Мехатроника" буенча җиһазлар сатып алуга сертификат тапшырылган.
Проект Татарстанда 2017 елның декабреннән гамәлгә ашырыла. Агымдагы елның октябрендә старт алган өченче этап һөнәри белем бирү системасында практик юнәлештә эшләүгә һәм предприятиеләрдә остазлыкка багышланган. Проектта барлыгы 26 һөнәри белем бирү оешмалары вәкилләре һәм аларның җитештерү партнерлары – Татарстан Республикасының машина төзелеше комплексы предприятиеләре катнашкан.
Проект башында катнашучылар тарафыннан яңа кирәкле белгечлек буенча практик юнәлешле якын килүне гамәлгә кертү буенча чакырулар билгеләнгән һәм ачыкланган проблемалар өчен чишелешләр тәкъдим ителгән. Беренче очрашу нәтиҗәләре буенча "Заманча автоматлаштырылган җитештерүнең эш принциплары. Мехатроника һәм сәнәгать робот техникасы", "Заманча белем бирү технологияләре", "Предприятиеләрдә остазлык" юнәлешләре буенча тренинглар эшләнгән һәм оештырылган.
Тренинглардан соң һөнәри белем бирү оешмалары вәкилләре үз партнерлары белән берлектә алга таба предприятиеләрдә гамәлгә кертү өчен җитештерү практикасы программаларын эшләгән.
Әзерләнгән программаларны яклау 2019 елның 26 декабрендә Алгарышлы һөнәри әзерлек үзәгендә узган. Проектта катнашучылардан барлыгы 6 проект тәкъдим ителгән. Эшләнгән программаларны бәяләүдә Татарстан Республикасы Мәгариф һәм фән министрлыгы, Татарстан Республикасы Сәнәгать һәм сәүдә министрлыгы, Форд Соллерс техник белгечләре һәм Алгарышлы һөнәри әзерлек үзәге вәкилләре катнашты. Тәкъдим ителгән эш нәтиҗәләре буенча җиһазларны сатып алу өчен җиңүчеләр сыйфатында Зеленодольск механика һәм Казан авиация-техник көллиятләре билгеләнгән.
Ford Sollers матбугат хезмәте материаллары буенча
Татарстан Республикасы Сәнәгать һәм сәүдә министрлыгы белгечләре SICPA Швейцария компаниясе вәкилләре белән очрашу уздырды. Көн тәртибендәге төп мәсьәлә "Алабуга" МИЗ территориясендә компания производствосын гамәлгә ашыру проекты булды.
SICPA гомуми куллану товарлары (тәмәке һәм алкоголь), фармацевтика препаратлары, нефть эшкәртү продуктлары һәм азык-төлек товарлары кебек тармаклар өчен продукцияне маркировкалау, аутентификацияләү һәм күзәтеп тору буенча үз эшчәнлеген башкара.
Татарстан Республикасында SICPA хәләл продукцияне маркировкалау һәм ягулыкны маркировкалау юнәлешләре буенча "Продукцияне Маркировкалау һәм Мониторинглау буенча Экспертиза Үзәге" белән партнерлык килешүен гамәлгә ашыра.
Компания вәкилләре билгеләп үткәнчә, Татарстан территориясендә маркировкалау җиһазлары җитештерүне оештырырга планлаштыралар, бу киләчәктә җирле җитештерүчеләргә хәләл продукция белән экспортка чыгуны җиңеләйтәчәк.
Россиядә SICPA Стратегик үсеш буенча директоры Бари Мортазин фикеренчә, хәләл продукцияне маркировкалау проекты IT-проект булып тора, ул продукцияне җитештерүчедән кулланучыга кадәр күзәтеп торырга мөмкинлек бирәчәк.
Очрашу нәтиҗәләре буенча яклар уртак гамәлләрне координацияләү өчен эш төркеме төзергә, киләчәктә проектны гамәлгә ашыру буенча конкрет адымнарны күрсәтеп, юл картасын имзаларга дигән карар кабул итте.
Сәнәгатьне үстерү фонды Эксперт советының йомгаклау утырышында Татарстан Республикасында проектларны гамәлгә ашыру өчен кредитлар хупланды.
"Джошкуноз Алабуга" 500 млн. сумлык займ ярдәмендә "Алабуга" МИЗ территориясендә "АвтоВАЗ" һәм башка автоҗитештерүчеләр өчен автомобиль шассиларының штампланган детальләрен импортлауны алмаштыручы прогрессив һәм трансфер пресслары цехын эшләтеп җибәрәчәк.
Детальләр Лада һәм Рено автомобильләренең унификацияләнгән платформалары өчен билгеләнгән. Проект шасси, күпер һәм подвеска детальләрен штамповкалауның яңа технологияләрен прогрессив һәм трансфер пресс линияләрендә һәм дугалы сыгылмаларда кертүне күздә тота.
Яр Чаллыдан "Тормоз механизмнары заводы" КҖО 104,5 млн. сум күләмендәге заем ярдәмендә йөк автотранспорты өчен туктату колодкаларын җитештерүне киңәйтәчәк. Предприятие тормоз колодкаларын махсус катафорез өслекле итеп ясау мөмкинлеген бирәчәк җиһаз сатып алачак. Ул физик һәм химик йогынтыларга бирешми һәм эшләнмәләрдә традицион грунтовкалар белән чагыштырганда сигез тапкыр озаграк тора.
Предприятие Европаның йөк автомобильләре өчен комплектлы деталь җитештерүчеләргә 15% продукцияне экспортларга, шулай ук аларны икенчел базарда запас өлеш сыйфатында сатарга ниятли. Калган продукцияне Россия базарында сату планлаштырыла.
Сәнәгатьне үстерү фонды матбугат хезмәте материаллары буенча