ЯҢАЛЫКЛАР

Бүген Татарстан Республикасы Сәнәгать һәм сәүдә министрлыгында "Логио РУС" һәм "LIAZ-Modelarna" компанияләре вәкилләре белән очрашу булды.

Көн тәртибендәге мәсьәләләрнең берсе – Татарстан Республикасында "LIAZ-Modelarna" филиалын ачу мөмкинлеге турында фикер алышу иде.

 "LIAZ-Modelarna" – ЛиАЗ йөк машиналары буенча данлыклы экс-җитештерүче. Бүгенге көндә предприятие автомобиль һәм аэрокосмос сәнәгате һәм энергетика машина төзелеше өчен пресс-формалар һәм җайланмалар җитештерү белән шөгыльләнә. "LIAZ-Modelarna" эшчәнлегенең икенче юнәлеше булып нефть һәм газ үткәргечләргә техник хезмәт күрсәтүне профилактикалау өчен технологик дроннар җитештерү тора.

Шулай ук яклар агымдагы елның мартында "Logio" компаниясе вәкилләре белән узган очрашуда билгеләнгән төп пунктларның үтәлеше турында да фикер алышты.

Татарстан Республикасы сәнәгать һәм сәүдә министры Альберт Кәримов Татарстан территориясендә компания проектларын гамәлгә ашыру буенча уртак нәтиҗәле эшне билгеләп үтте.

"Logio" компаниясе тәэминат чылбырына идарә итү буенча махсуслашкан. Аның проектларының берсе – сәүдә компанияләре һәм автозаправка станцияләре өчен сату күрсәткечләрен арттырырга һәм запасларны киметергә мөмкинлек бирүче программа тәэминаты.

Көн тәртибендәге соңгы мәсьәлә – 2019 елның сентябрендә Машина төзүчеләр көне барышында цифрлы предприятие принцибы буенча "КАМАЗ" ГАҖ презентациясен уздыру кысаларында Чехия компанияләре стендын оештыру мөмкинлекләрен карау булды.

Тэглар: сотрудничество Чехия LIAZ-Modelarna Logio

Бүген Татарстан Республикасы Сәнәгать һәм сәүдә министрлыгында BRB холдингы делегациясе белән очрашу узды.

BRB холдингы вәкилләре ике көнлек визит белән Татарстанга холдинг потенциалын тәкъдир итү һәм хезмәттәшлек мөмкинлеге турында фикер алышу максаты белән килгән.

"BRB International BV" – майлаучы майларга өстәмәләр, силиконнар кулланып технологик чишелешләр тәкъдим итүче компания.

Холдингның баш компаниясе – Reform Spor Sistemleri, 1994 елда синтетик җепләрдән махсус идән капламнары һәм спорт объектлары өчен полиуретан гранулалар җитештерүче буларак оештырылган.

Бүгенге көндә BRB холдингы спорт индустриясе, төзелеш, мебель сәнәгате, балалар өчен уен мәйданчыклары элементларын, ясалма идән япмаларын җитештерү, шулай ук авыл хуҗалыгы кебек тармакларда тәкъдим ителгән 10 компаниядән тора.

Агымдагы очрашуда яклар холдингның республика белән хезмәттәшлек перспективалары, шулай ук Татарстанда спорт объектлары оештыруны финанслау юллары турында фикер алышты.

Тэглар: спорт сотрудничество Турция

29 июльдә Татарстан Республикасына Кыргызстан делегациясе килде. Делегация составында Кыргызстан Республикасының авыл хуҗалыгы, азык-төлек сәнәгате һәм мелиорация министры урынбасары Амангелди Исаев һәм "Балыкчи Алко Трейд" ҖЧҖ гамәлгә куючы Рахат Тургунбаев катнашты.

Бүген делегация әгъзалары ТР Сәнәгать һәм сәүдә министрлыгында булдылар, анда ТР сәнәгать һәм сәүдә министры Альберт Кәримов һәм "Татспиртпром" АҖ вәкилләре белән очраштылар.

Очрашуны ачып, Альберт Кәримов болай дип билгеләп үтте: "Татарстан белән Кыргызстан арасында, бигрәк тә сәүдә һәм авыл хуҗалыгы өлкәсендә, эшлекле мөнәсәбәтләрне киңәйтү өчен потенциал бар".

Очрашу барышында яклар кайбер юнәлешләр буенча, аерым алганда, алкоголь тармагы линиясе буенча үзара файдалы хезмәттәшлек мөмкинлекләре турында фикер алышты. Амангелди Исаев Татарстанда алкоголь продукциясен җитештерү, сату һәм китерү базарын өйрәнү кирәклеге турында белдерде.

Әлеге мәсьәлә буенча фикер алышканда, Альберт Кәримов "Халыкара кооперация һәм экспорт" илкүләм проекты кысаларында гамәлгә ашырыла торган экспортерларга ярдәм итү буенча гамәлдәге республика чаралары турында сөйләде.

Кыргызстан делегациясе әгъзалары шулай ук авыл хуҗалыгы продукциясе һәм авыл хуҗалыгы билгеләнешендәге ашламалар белән тәэмин итү юнәлешләре буенча авыл хуҗалыгы өлкәсендә хезмәттәшлек итү мәсьәләләре белән дә кызыксынды. Моннан тыш, әңгәмә барышында яклар Татарстанның агросәнәгать парклары базасында уртак эш мәсьәләсен дә кузгатты.

Өстәмә:

Татарстан белән Кыргызстан арасындагы мөнәсәбәтләр төрле өлкәләрдә үсеш ала. Татарстан белән Кыргызстан арасында товар әйләнеше соңгы ике елда 2 мәртәбә арткан һәм 2018 елда АКШ доллары белән 61,8 млн. тәшкил иткән.

Татарстан Республикасы Кыргызстанга ягулык, нефть һәм аларны куу продуктлары, пластмасса, каучук, агач һәм аннан эшләнмәләр экспортлый. Татарстанга нигездә җир өсте транспорты һәм аларның өлешләре, җиләк-җимеш һәм чикләвек, таштан ясалган әйберләр кертелә.

Тэглар: сельское хозяйство делегация сотрудничество Кыргызстан

Альберт Кәримов Төркия Республикасы сәүдә министры Рухсан Пекджан ханым һәм Россия Федерациясе энергетика министры Александр Новак рәислегендә сәүдә-икътисадый хезмәттәшлек буенча Россия-Төркия хөкүмәтара катнаш комиссиясенең 16 нчы утырышында катнашты.

Комиссия утырышы барышында яклар Россия һәм Төркия арасында сәүдә-икътисадый хезмәттәшлек мәсьәләләре турында фикер алышты, шулай ук соңгы вакыттагы уртак эшкә йомгак ясалды. 

Комиссия эше кысаларында Россия һәм Төркия эшлекле советларының 20 нче утырышына багышланган Россия-Төркия бизнес-форумы оештырылды.

Әлеге чара кысаларында шулай ук Төркия бизнесы вәкилләре, шул исәптән TTAF компаниясе җитәкчелеге белән дә очрашулар оештырылды. Предприятие электр разъемнары һәм катнашмалар җитештерү белән шөгыльләнә. Алар белән соңгы тапкыр очрашу Төркия делегациясенең Татарстан Республикасына булган визиты кысаларында узган иде.

Тэглар: сотрудничество Турция

Бүген Татарстан Республикасы Сәнәгать һәм сәүдә министрлыгында "Шюлькен Форм Рус" ҖЧҖ һәм Татарстан Республикасы сәнәгать предприятиеләре вәкилләре катнашында киңәшмә узды.

Киңәшмә Татарстан Республикасы Президентының Тюрингиягә (ГФР) визиты нәтиҗәләре буенча Татарстан һәм алман компанияләре арасында хезмәттәшлекне җайга салу турындагы йөкләмәсе кысаларында узды.

Очрашуда "Шюлькен Форм Рус" ҖЧҖ генераль директоры Максим Анисимов компаниягә презентация уздырды һәм аның эшчәнлеге, шулай ук үзара хезмәттәшлек өстенлекләре турында җентекләп сөйләде.

"Шюлькен Форм Рус" компаниясе – ул "Химград" технополисы территориясендә урнашкан пластмасса кою предприятиесе.

Компания прецизион пресс-формалар, кыска вакытлы циклга ия күп урынлы пресс-формалар, төргәкләү өчен күп компонентлы пресс-формалар, медицина эшләнмәләре, автокомпонентлар, электр һәм электрон эшләнмәләр әзерләүгә махсуслашкан.

Моннан тыш, компания шулай ук пресс-формаларны һәм ГКС (кайнар канал системаларын) ремонтлау һәм аларга хезмәт күрсәтү, диагностика һәм җиһазлар инспекциясе буенча да хезмәтләр күрсәтә, пресс-формалар өчен детальләр әзерли, шулай ук пресс-формада басым астында кою процессын компьютерда модельләштерә.

Презентация ахырында очрашуда катнашучылар "Шюлькен Форм Рус" вәкиле белән аралаша һәм кызыксындырган сорауларын бирә алдылар.

Бу атнада Татарстан Республикасына эшлекле визит белән Томск өлкәсе делегациясе килде. Делегация составына берничә блок вәкилләре керә: сәнәгать, авыл хуҗалыгы, социаль, мәдәни, шулай ук инвестицион эшкуарлык блогы. 

Эш визитының бай программасы Татарстан Республикасы министрлыклары һәм ведомстволары белән танышуны һәм икътисадның төрле тармаклары предприятиеләре вәкилләре белән очрашуларны үз эченә ала.

18 июльдә Томск делегациясенең сәнәгать секторы вәкилләре Татарстан Республикасы Сәнәгать һәм сәүдә министрлыгына килде. Алар арасында Томск өлкәсе администрациясе әгъзалары, профильле университет вәкилләре, шулай ук сәнәгать предприятиеләре ("ТЭМЗ" ААҖ, "НИИПП" АҖ, "Микран" ФҖП" АҖ) вәкилләре бар иде.

Әлеге визит кысаларында Томск сәнәгатьчеләре Татарстан Республикасының тармак предприятиеләре вәкилләре белән, аерым алганда, "Казан вертолет заводы" ГАҖ, "Әлмәт Радиоприбор заводы" ААҖ, "Вертолеты-МИ" КФҖП АҖ һәм "Казан электротехника заводы" ГАҖ белән очрашты.

Томск делегациясе әгъзалары үз компанияләренең һәм университетларының эшчәнлеген тәкъдир итте, шуннан соң Татарстанның сәнәгать секторы белән хезмәттәшлек итү мөмкинлекләре турында фикер алыштылар.

Бүген Татарстан Республикасы Сәнәгать һәм сәүдә министрлыгына рәсми визит белән Яһүди автономияле өлкәсе вәкилләре килде. Делегация составында Яһүди автономияле өлкәсе Хөкүмәте Рәисе урынбасары Николай Кандель, Тарифлар һәм бәяләр комитеты рәисе Галина Шлыкова, шулай ук "Облэнергоремонт плюс" директоры Алексей Сысолятин бар.

Кунакларны сәламләп, министр урынбасары Алмаз Хөсәенов Татарстан Республикасының хезмәттәшлеккә һәрвакыт ачык булуы һәм кызыксындырган мәсьәләләр буенча ярдәм күрсәтергә әзер булуы турында билгеләп үтте.

Очрашу торак-коммуналь хуҗалык һәм ягулык-энергетика комплексы ихтыяҗлары өчен үзәкләштерелгән ягулык сатып алуны оештыру өлкәсендә тәҗрибә уртаклашу, шулай ук күрсәтелгән сатып алуларның тариф өлешенә йогынтысы мәсьәләләренә багышланган иде.

Николай Кандель сүзләренә караганда: "Республика үзенең алдынгы казанышлары белән шаккаттыра, илнең башка субъектларына йогынты дәрәҗәсе бик югары. Бигрәк тә безгә технопарклар төзү буенча сезнең тәҗрибә кызыклы. Тыгыз хезмәттәшлек безне тагын да якынайтыр дип уйлыйм".

Бүген Татарстан Республикасы Сәнәгать һәм сәүдә министрлыгында министр урынбасары Алексей Савельчев "ADCO" һәм "Avrasya" компанияләренең идарә рәисе, генераль директор Сельчук Аката әфәнде белән очрашты.

Сельчук Аката әфәнде Казанга Татарстанның нефть сәнәгате базары белән танышу, шулай ук республиканың профильле сәнәгать предприятиеләре белән очрашу өчен эш визиты белән килгән.

Очрашу барышында яклар Төркия компанияләренең Татарстан сәнәгать предприятиеләре белән хезмәттәшлек итү мөмкинлеге турында фикер алышты. Алексей Савельчев республиканың нефть базары эшчәнлеге үзенчәлекләре турында сөйләде һәм Министрлыкның кирәкле мәгълүмати ярдәм күрсәтергә әзер булуы хакында белдерде.

"ADCO", нефть сәнәгате өчен махсус химия белән тәэмин итүче буларак, төбәкнең нефть компанияләренә үз өстәмәләрен, химикатларын һәм башлангыч продуктларын тәкъдим итү, шулай ук Татарстан җитештерүчеләреннән чимал һәм әзер продукция сатып алу белән кызыксына.

"Avrasya" подрядчы һәм сервис компаниясе проектлауда, матди-техник тәэмин итүдә һәм төзелештә, шулай ук төбәктәге нефть-газ секторы өчен җиһазлар белән тәэмин итүдә катнашуда кызыксына.

Бүген Татарстан Республикасы Сәүдә-сәнәгать палатасында Төркиянең Көнчыгыш Кара диңгез төбәге экспортерлары берлеге (DKİB) катнашында икътисадый бизнес-форум узды.

Чараны оештыручылар – Төркиянең Сәүдә министрлыгы, Татарстан Республикасы Сәнәгать һәм сәүдә министрлыгы, Татарстан Республикасы Сәүдә-сәнәгать палатасы һәм Көнчыгыш Кара диңгез экспортерлары ассоциациясе.

Форум кысаларында пленар утырыш узды, анда Төркия вәкилләре Төркиянең Көнчыгыш Кара диңгез төбәгенә презентация үткәрде. Чараның төп тематикасы төзелеш секторы һәм төзелеш материаллары җитештерү иде.

Татарстан Республикасы Сәнәгать һәм сәүдә министрлыгы исеменнән сәламләү сүзе белән Татарстан Республикасы сәнәгать һәм сәүдә министры урынбасары Герман Лернер чыгыш ясады. Ул Татарстан-Төркия хезмәттәшлегенең әһәмиятен билгеләп үтте һәм киләчәктә үзара файдалы сәүдә-икътисадый мөнәсәбәтләрне үстерүгә әзер булуын белдерде.

Шулай ук форум кысаларында бизнес-очрашулар һәм Төркия компанияләре вәкилләре белән ике яклы сөйләшүләр узды. Биредә төрле юнәлештәге Төркия предприятиеләре тәкъдим ителде: автомобиль җиһазлары, мебель продукциясе җитештерүчеләр, төзелеш подрядчылары, бакыр, цинк һәм кургаш продукциясе җитештерүчеләр һәм башкалар.

Бүген Татарстан Республикасы Министрлар Кабинетында Төрекмәнстан Президенты Гурбангулы Бердымөхәммәдов җитәкчелегендәге Төрекмәнстан делегациясенең Татарстан Республикасына булган визиты йомгакларына багышланган брифинг узды. Брифингта Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, Татарстан Республикасы мәдәният министры Ирада Әюпова һәм Казан (Идел буе) федераль университеты ректоры Илшат Гафуров катнашты.

Татарстан белән Төрекмәнстан арасындагы хезмәттәшлек төрле юнәлешләр буенча уңышлы үсә.

Мәсәлән, 2012 елдан бирле ел саен сәүдә-икътисадый, фәнни-техник һәм мәдәни хезмәттәшлек буенча Төрекмәнстан-Татарстан уртак эш төркеме утырышы уза. 2019 елда мондый утырыш 23-24 майда узган. Киләсе утырышны 2020 елда Ашхабад шәһәрендә үткәрү планлаштырыла.

2019 елның 22 июнендә Төрекмәнстанның Министрлар Кабинеты Рәисе урынбасары, чит ил эшләре министры Рәшид Мередов җитәкчелегендәге делегациянең беренче составы Казанга килде. Төрекмәнстан делегациясе составына Төрекмәнстанның профильле министрлыклары һәм ведомстволары, шулай ук эре дәүләт корпорацияләре җитәкчеләре кергән иде.

Төрекмәнстан Президенты Гурбангулы Бердымөхәммәдов Татарстанга 2019 елның 23 июне иртәсендә килде. Татарстан белән Төрекмәнстан Хөкүмәте делегацияләре "Казан" халыкара аэропорты мәйданчыгында сәнәгать предприятиеләре күргәзмәсен карап чыкты. Татарстанның 16 эре предприятиесе техника, җитештерелә торган продукция үрнәкләрен һәм сәнәгать җиһазларын тәкъдим итте.

Шуннан соң Казан Кремлендә киңәйтелгән форматта очрашу булды, анда фикер алышуның төп темасы сәнәгать өлкәсендә хезмәттәшлектән гыйбарәт иде. Яклар Казанда Төрекмәнстанның Генераль консуллыгын ачу һәм төрекмән авиакомпаниясе башкара торган Казан белән Ашхабад арасындагы авиарейслар ешлыгын арттыру мәсьәләсенә аерым игътибар итте.

Ахырда берничә килешү имзаланды:

• "КАМАЗ" ГАҖ һәм "Туркменавтоулаглары" агентлыгы арасында "КАМАЗ" маркалы автотранспорт техникасын китертү һәм 2020-2021 еллар чорында техник ярдәм күрсәтү турында килешү. Килешү шулай ук төбәкләрдә ремонт-эксплуатация базаларын оештыруны, техник хезмәткәрләр өчен уку курслары оештыруны, автотранспорт техникасын эксплуатацияләүне контрольдә тотуның бердәм системасын эшләүне һәм гамәлгә кертүне күздә тота.
• "Татнефть" ГАҖ белән "Туркменнебит" ДК арасында нефть һәм газ скважиналарын бораулау, шулай ук "Туркменнебит" ДК ятмаларында яңа технологияләр кертү өлкәсендә хезмәттәшлек турында Меморандум.
• Төрекмәнстанның химия тармагын ике якка да файдалы һәм озак сроклы нигездә үстерүнең перспектив инвестицион проектларын гамәлгә ашыру турында "КЭР-холдинг" ИК" ҖЧҖ белән "Туркменхимия" ДК арасында Меморандум.

Татарстан-Төрекмәнстан хезмәттәшлегенә багышланган киләсе чаралар арасында түбәндәгеләрне билгеләп үтәргә кирәк.

2019 елның 28 июнендә Ашхабад янәшәсендә Төрекмәнстанның көньягында табигый газдан бензин синтезлау заводы ачылачак. Аны ачу тантанасында "Татнефть" ГАҖ компаниясе вәкилләре катнашачак.

Быел Төрекмәнстанда Беренче Каспий икътисадый форумы узачак. Форум 2019 елның 12 августына билгеләнгән, Татарстаннан делегация катнашу мәсьәләсе хәл ителә.

Төрекмәнстан җыелма командасы "World Skills" – "Яшь профессионаллар" дөнья чемпионатында катнашачак, ул бу елның августында Казанда узачак.