Татарстанда республика энергетикасының кадрлар потенциалы турында фикер алыштылар
Татэнергода «Татарстан энергетикасының кадрлар потенциалы: системалы чаралар һәм нәтиҗәләр» темасына энергетика тармагы кадровиклары клубы утырышы узды. Спикерларның берсе республиканың сәнәгать һәм сәүдә министры урынбасары Марат Миңнебаев булды.
Бүген тармакта 30 меңгә якын кеше эшли.
«Энергия белән тәэмин итүнең ышанычлылыгы, челтәрләрне модернизацияләү, цифрлы чишелешләрне гамәлгә кертү – болар барысы да белгечләрнең квалификациясенә һәм энергетика тармагының кадрлар контурының тотрыклылыгына турыдан-туры бәйле, – диде Марат Миңнебаев. – Энергетика компанияләренең эше территория халкының тормышына йогынты ясый. Шуңа күрә компанияләрдә югары квалификацияле белгечләрнең тотрыклы коллективы булу бик мөһим».
Татарстан компанияләре яңа генерацияләү җайланмаларын һәм электр челтәре хуҗалыгы объектларын төзиләр һәм модернизациялиләр. Соңгы 10 елда республикада 1,9 ГВт яңа куәт тапшырылган.
2030 елга кадәр гомуми куәте 2,3 ГВт булган генерация объектларын төзү һәм модернизацияләү планлаштырыла – болар барысы да көчле кадрлар потенциалын таләп итә.
Министр урынбасары сүзләренчә, сәнәгать тармагына кадрлар җәлеп итүне мәктәп эскәмиясеннән башларга кирәк. Республикада профильле сыйныфлар булдыру буенча «Уңыш» республика программасы эшли. Мәсәлән, төп энергетика компанияләре (Челтәр компаниясе, Татэнерго һәм Татэнергосбыт) катнашында энергетика класслары булдырылды.
Һөнәри юнәлеш бирү чаралары барлык үткәрелә торган чаралар кысаларында тормышка ашырыла: предприятиеләргә экскурсияләр, Ачык ишекләр көннәре, форумнар, «Ел инженеры» конкурсы, «Безнең заман – Наше время» фестивале һәм башкалар.
Очрашу энергетика тармагының һөнәри эшчәнлекләрендә югары нәтиҗәләргә ирешкән 26 хезмәткәрен Татарстан Республикасы Электрон мактау тактасына кертү турында таныклык тапшыру тантанасы белән тәмамланды.