Татарстан Республикасы Сәнәгать һәм сәүдә министрлыгы башлыгы «Иннопром. Һиндстан» халыкара сәнәгать күргәзмәсендә һинд компанияләре белән очрашулар уздырды
Татарстан Премьер-министры урынбасары – сәнәгать һәм сәүдә министры Олег Коробченко Raslon Tyres Limited автомобиль компонентлары җитештерүче һинд компаниясе, Һинд сәнәгате конфедерациясе җитәкчелеге һәм Һиндстан хөкүмәте каршындагы Метеорология департаменты генераль директоры Мрутюнджай Мохапатра әфәнде белән очрашты.
Ул Татарстанның сәнәгать потенциалы турында сөйләде, шулай ук яклар хезмәттәшлекне алга таба үстерү турында да фикер алыштылар.
Мәсәлән, Мрутюнджай Мохапатра Татарстан компаниясенең метеорология җиһазлары белән кызыксына.
Һинд сәнәгате конфедерациясе белән очрашуда инвестицияләр җәлеп итү һәм экспортны алга җибәрү буенча уртак эш турында сөйләшүләрнең беренче этабын уздырдылар. Бу Һиндстанның иң эре бизнес-ассоциацияләренең берсе. Татарстан өчен хезмәттәшлек Һиндстан базарына һәм тагын 102 илнең эшлекле даирәләренә чыгуның туры каналына әверелергә мөмкин. Һинд компанияләре өчен – республиканың сәнәгать һәм инвестиция потенциалына керү мөмкинлеге.
Моннан тыш, Олег Коробченко һәм ТР Инвестиция үсеше агентлыгы җитәкчесе Талия Миңнуллина катнашында Россия кластерларының эшлекле берләшмәсе һәм Һиндстан сәнәгате конфедерациясе арасында үзара аңлашу турындагы меморандумга кул куелды.
Имзаларны РФ ДОК идарәсе рәисе, Татарстан сәнәгать кластеры идарәсе рәисе Сергей Майоров һәм Халыкара юнәлешнең өлкән директоры Маниш Мохан әфәнде куйды.
«Иннопром. Һиндстан» халыкара күргәзмәсе «Халыкара кооперация һәм экспорт» илкүләм проекты максатларына ирешергә ярдәм итә.