Агымдагы елның 7 аенда Татарстанда электр энергиясен куллану үсеше 3,4% булган
Бу хакта Татарстан Республикасы сәнәгать һәм сәүдә министры урынбасары Марат Миңнебаев Икътисад, инвестицияләр һәм эшкуарлык комитеты һәм Татарстан Республикасы Дәүләт Советының Торак сәясәте һәм инфраструктура үсеше комитетының уртак утырышында хәбәр итте.
Марат Миңнебаев энергия нәтиҗәлелеге өлкәсендә республика үсешенең гомуми стратегиясен тәкъдим итте.
Татарстанда энергияне сак тоту буенча өч программа гамәлгә ашырылган инде, хәзерге вакытта 2024-2029 елларга дүртенчесе гамәлдә.
«Барлык программаларның төп максаты – халыкның тормыш сыйфатын һәм җитештерелә торган продукциянең конкурентлыкка сәләтлелеген бертуктаусыз арттырганда, энергия нәтиҗәлелеге белән идарә итүнең нәтиҗәле системасын формалаштыру, – дип билгеләп үтте министр урынбасары. – Энергия нәтиҗәлелеге һәм энергияне сак тоту дәүләт программаларын гамәлгә ашыру чорында республиканың тулай төбәк продуктының энергия сыйдырышлылыгы төп 2007 ел белән чагыштырганда 27% тәшкил итте. Гомумән алганда, соңгы дүрт елда энергия сыйдырышлылыгының елына уртача 2,7% ка кимүе күзәтелә».
Ягулык-энергетика ресурсларын куллану структурасында беренче урында энергетика тора – 46,2%, икенче урында – эшкәртү сәнәгате, 43,5% өлеш белән. Бу елның җиде аенда электр энергиясен җитештерүнең 10,6% ка артуы күзәтелә. Республикада электр энергиясен куллану беренче ел гына үсми: соңгы биш елда ул 16% ка арткан. 2025 елның гыйнварында куәт куллануның яңа рекорды куелган – 5 616 МВт.
2030 елга 642 МВт яңа куәт кертү планлаштырыла. Моннан тыш, программадан тыш проектлар да эшләнә.
Фото: ТР Дәүләт Советы