Татарстан Республикасы Президенты Рөстәм Миңнеханов җитәкчелегендәге делегациянең Ростов өлкәсенә визиты

2013 елның 7–8 ноябрендә Татарстан Республикасы Президенты Рөстәм Миңнеханов җитәкчелегендәге делегация Ростов өлкәсендә булачак. Визитта Татарстан Республикасы Премьер-министр урынбасары - сәнәгать һәм сәүдә министры Равил Зарипов та катнашачак.
Татарстан Республикасы делегациясе эш визиты кысаларында Ростов өлкәсенең эре сәнәгать предприятиеләре белән танышачак, татар иҗтимагый оешмалары активистлары белән очрашачак.
Татарстан делегациясе "Ростсельмаш" комбайннар заводы” ҖЧҖнең җитештерү мәйданчыкларында булды. Анда урып–җыю техникасы, комбайннар һәм тракторлар күргәзмәсе узды. Кунаклар предприятиенең автоматлаштырылган складында һәм җитештерү цехларында булдылар. Рөстәм Миңнехановка лазерлы металл эшкәртү станокларын күрсәттеләр. Татарстан Президенты Татарстан Республикасы сәнәгать һәм сәүдә министры Равил Зариповка "Ростсельмаш" белән Казанда оештырылучы "КАИ-Лазер" инжиниринг үзәге арасында хезмәттәшлекне булдыру мөмкинлеген карауны йөкләде.
7 ноябрьдә визит кысаларында Сәнәгать һәм сәүдә министрлыгы һәм «МТЕ КОВОСВИТ МАС» ҖЧҖ уртак Россия–Чехия предприятиесе арасында мәгариф өлкәсендә хезмәттәшлек турында килешү имзаланды. Татарстан Республикасы Премьер-министр урынбасары - сәнәгать һәм сәүдә министры Равил Зарипов «Гидропривод» компаниясе вәкилләре белән очрашты. Очрашуда Татарстан Республикасы территориясендә «Итиль-Инвест» компаниясе төркеме белән уртак предприятие төзү мәсьәләсе каралды.
Мәгълүмат өчен:
«МТЕ КОВОСВИТ МАС» ҖЧҖ компаниясе Азов шәһәрендә (Ростов өлкәсе) станоклар төзелеше кластерын формалаштыруда иң алдынгы компания. Әлеге кластерның эшчәнлеген тәэмин итү өчен, Россия вузлары белән үзара нәтиҗәле мөнәсәбәттәшлек төзелгән (СТАНКИН МДТУ, ДДТУ). Проектның тулаем бәясе – 57 миллион евро (=2,3 миллиард сум). Әлеге проектны реализацияләү барышында 300 эш урыны биреләчәк. 2013ел ахырына җитештерүнең локализация дәрәҗәсе 40% җитәчәк дип көтелә.