«Ел инженеры» конкурсының көндезге турында катнашучылар билгеләнде
Бүген Татарстан Сәнәгать һәм сәүдә министрлыгында оештыру комитеты конкурс эшләрен бәяләүгә йомгак ясады.
Абруйлы комиссия 437 гаризадан 126сын сайлап алды. Аларның авторлары «Ел инженеры» V Республика конкурсының көндезге турына үттеләр.
- Конкурс комиссиясе әгъзалары өчен эш әле тәмамланмаган. 10 декабрьдә «Корстон» комплексында конкурсның икенче (көндезге) турында катнашучылар инженерлык эшчәнлеге өлкәсендәге уңышларын күрсәтәчәкләр. Презентацияләр нәтиҗәләре буенча җиңүчеләр билгеләнәчәк. Ә 9 декабрьдә семинар узачак, аның кысаларында пленар сессия, мастер-класслар, тренинглар планлаштырыла, - дип белдерде Татарстан Республикасы сәнәгать һәм сәүдә министрының беренче урынбасары, оештыру комитеты рәисе урынбасары Родион Карпов.
Исегезгә төшерәбез, конкурска узган ел белән чагыштырганда 30% ка күбрәк гариза бирелгән иде. Алар 68 оешмадан, шул исәптән 8 югары уку йортыннан керде.
Өч категориядән («Булачак инженерлар», «Яшьлек, уңыш, перспектива», «Тәҗрибә, казаныш, компетентлылык») гаризалар саны буенча иң массакүләм категория – «Яшьлек, уңыш, перспектива». Анда эшләүче инженерлар һәм югары уку йортларының 35 яшькә кадәрге хезмәткәрләре катнаша.
Конкурс җитештерүнең 12 төп тармагын үз эченә ала. Номинацияләр арасында быел иң популярлары - «Авыл хуҗалыгы, азык-төлек, эшкәртү сәнәгате», «Энергетика» һәм «Машина төзелеше».
Барлык конкурсантларга да быелгы төп акыл көрәше алдыннан уңай кәеф телибез!