Чаллыда Машина төзүчеләр көнен билгеләп үттеләр
4 октябрьдә Орган залында машина төзүчеләрне Россия сәнәгать һәм сәүдә министры Антон Алиханов, Татарстан Рәисе Рөстәм Миңнеханов, республиканың Сәнәгать һәм сәүдә министрлыгы башлыгы Олег Коробченко һәм башка дәрәҗәле кунаклар котлады.
Орган залы каршында урам экспозициясе оештырылган иде. Татарстанның 19 компаниясе – КАМАЗ, ЕлАЗ, Казаньсельмаш, КВЗ, Ремдизель, РИАТ, «Кориб» КТ, РариТЭК һәм башкалар үз техникаларын тәкъдим итте.
Моннан тыш, холлда кунаклар «Элекон заводы», Эникс, «Ак Барс» СК, Эйдос һәм башкаларның продукциясен күрә алды.
«Хәзер безнең икътисадның барлык өлкәләре дә машина төзүчеләрнең уңышлы эшләвенә, чит ил җиһазларын, техниканы, комплектлаучы детальләрне ничек тиз алыштыра алуыбызга бәйле. Биредә сез Татарстанда самолетлар да, вертолетлар да, автомобильләр дә, авыл хуҗалыгы техникасы да төзисез, алардан башка безнең агросәнәгать комплексын үстерү мөмкин түгел. Республиканың әлеге секторны үстерүгә зур игътибар бирүе, әлбәттә, ихтирам уята», – дип билгеләп үтте Россия Сәнәгать һәм сәүдә министрлыгы башлыгы.
Шулай ук Машина төзүчеләр көнен бәйрәм итүдә РФ Президенты Указы белән II дәрәҗә «Ватан алдындагы казанышлар өчен» ордены медале белән бүләкләнделәр:
- «Серго исемендәге завод» җитештерү берләшмәсе махсус җиһазларын көйләүче Васильев Андрей Викторович;
- «Ремдизель» АҖ генераль директоры урынбасары – баш конструкторы Зарахович Игорь Михайлович;
- «Казан вертолет заводы» АҖ калайчысы Зиннәтуллина Фәридә Әхмәтхан кызы;
- «Элекон заводы» АҖ генераль директоры Коротченко Павел Владимирович.
«Россия Федерациясе Атказанган машина төзүчесе» мактаулы исеме бирелде:
- «КАМАЗ» ГАҖ кою заводының технологик мәсьәләләр буенча баш белгече Гыймадиев Наил Федоровичка;
- «Ремдизель» АҖ механик җыю эшләре слесаре Рагузин Владислав Федоровичка.
Татарстан Республикасы Рәисе һәм республика Сәнәгать һәм сәүдә министрлыгы исеменнән бүләкләр тапшырылды, шул исәптән иң яхшы инженерларга да.
Моннан тыш, хезмәт династияләре Кузнецовларны (КАМАЗ), Чекунов-Макаровларны (КАЗ), Котдусовларны (Казан моторлар төзү берләшмәсе), Ерамасовларны (Горький исемендәге Зеленодольск заводы) һәм Зубенко-Ереминнарны (КВЗ) н кыйммәтле бүләкләр белән бүләкләделәр.
Быелның 7 аенда машина төзелеше комплексы предприятиеләре 800 млрд.сумлык продукция төяп озаткан.
Тармакта 133 меңнән артык кеше эшли. Татарстан предприятиеләре махсус техника җитештерүне үзләштерүне дәвам итәләр. Шулай ук электроника, көнкүреш техникасы, станоклар төзү һәм робот техникасы өлкәсендә продукциянең яңа төрләрен үзләштерү алып барыла, медицина эшләнмәләренең яңа төрләре җитештерүгә җибәрелгән.