Татарстан Кытай белән хезмәттәшлек буенча лидер булды
Татарстан Кытай белән хезмәттәшлек продуктивлыгы рейтингында Россиянең топ-5 төбәге арасына керде. Аның нәтиҗәләре турында ММЧ вәкилләренә республика Премьер-министры урынбасары – Татарстан Республикасы Сәнәгать һәм сәүдә министрлыгы башлыгы Олег Коробченко сөйләде.
Рейтингны 1 декабрьдә Пекинда Россия бизнес-омбудсмены, Россия-Кытай дуслык, тынычлык һәм үсеш комитеты рәисе Борис Титов тәкъдим итте.
Татарстан ике яклы элемтәләр интенсивлыгы (шул исәптән төбәкара һәм муниципальара дәрәҗәдә дә), тышкы сәүдә элемтәләре структурасы, Кытайдан инвестицияләр җәлеп итү һәм үз территориясендә аерым производстволар урнаштыру сәләте өчен максималь баллар алды.
«Кытайга якын булмаган төбәкләр аеруча игътибарны җәлеп итә, – диде Борис Титов. – Мәсәлән, Татарстан. Монда Кытай продукциясе җитештерү буенча күп заводлар эшли, әмма инвестиция проектлары арасында минем иң яратканнарым – Алабугада төзелә торган Дэн Сяопин исемендәге логистика үзәге. Ул Россиядә иң эресе булачак, атна саен Кытайга ким дигәндә бер поезд кабул итәчәк һәм җибәрәчәк, шулай ук Россиянең калган өлешләре буенча йөкләр җибәрү өчен йөк төяү терминалы булачак. Татарстан Республикасы җитәкчелегенең дөнья тәҗрибәсе белән чын кызыксынуын ассызыкламыйча кала алмыйм: Кытай, Сингапур, Малайзия».
Топ-5 исемлегенә эләгү — төбәк хөкүмәте һәм предприятиеләренең зур һәм уйланылган эше нәтиҗәсе, дип билгеләп үтте министр. Кытай белән актив хезмәттәшлек, тәҗрибә һәм технологияләр алмашу Көнбатыш санкцияләренең нәтиҗәсен киметергә һәм импортны алмаштыра алмаган товарлар һәм эшләнмәләр алырга мөмкинлек бирә.
Ул Татарстанда нинди кирәкле производстволар локальләшүе турында искәртте. «Чаллыда Кытай инвесторлары катнашында суыткычлар, кер юу машиналары, телевизорлар, штампланган әйберләр җитештерү буенча Haier заводлары, суыткыч-туңдыргыч җиһазлар һәм коммерция ларьларын җитештерү буенча акыллы завод төзелде. Электр су җылыткычлары һәм подшипниклар җитештерү буенча заводлар төзелә, ә Зеленодольскида – лифтлар җитештерү буенча. JAC Motors һәм КАМАЗ җиңел йөк машиналарын җыю һәм сату өлкәсендә хезмәттәшлек итә», – дип хәбәр итте Олег Коробченко.
Өстәвенә, ТР Хөкүмәте белән Шандунь, Хунань, Сычуань, Аньхой, Хэйлунцзян, Чжэцзян провинцияләре һәм Үзәк буйсынудагы Чунцин шәһәре арасында сәүдә-икътисад, фәнни-техник һәм мәдәни хезмәттәшлек турында 7 килешү имзаланган. 2023 елда Татарстан Республикасы Сәнәгать һәм сәүдә министрлыгы Кытайга һәм Татарстанга 20гә якын үзара визит оештырды, шул исәптән республика Рәисе катнашында да.