Казанда Россия һәм Үзбәкстан арасында III Регионара хезмәттәшлек форумы узды
5 октябрьдә Казанга Үзбәкстан Президенты Шәүкәт Мирзиёев килде. Татарстан – ул Россиягә рәсми визит вакытында килгән беренче регион.
Татарстан Рәисе Рөстәм Миңнеханов, РФ Хөкүмәте Рәисе урынбасары, Россия сәнәгать һәм сәүдә министры Денис Мантуров белән берлектә Шәүкәт Мирзиёев «Россия-Үзбәкстан» регионнары форумына йомгак ясады.
Анда Россиянең 19 төбәгеннән һәм Үзбәкстанның 12 төбәгеннән 700 дән артык бизнес вәкиле катнашты. Форум эшлекле даирәләр һәм оешмалар, Россия һәм Үзбәкстан регионнары арасында гамәли хезмәттәшлекне киңәйтү өчен үткәрелде.
Рөстәм Миңнеханов сүзләренчә, узган ел нәтиҗәләре буенча Татарстан-Үзбәкстан товар әйләнеше 50% артып, 290 млн доллардан күбәеп киткән. Агымдагы елның беренче яртыеллыгында үзара сәүдә күләме тагын 30%ка арткан.
Форум кунакларын «Казан Экспо»да киң күргәзмә каршы алды – анда якынча 70 компания катнашты. Проектлар, продукция һәм эшләнмәләр белән Татарстан предприятиеләре таныштырды: Татнефть, Сибур-ТР, Таиф-НК, КАМАЗ, Аммоний, Татхимфармпрепараты, ICL, КВЗ, Эйдос, шулай ук «Алабуга» МИЗ компанияләре, «Химград» технополисы (ГК Bionovatic, «ВР-Пласт» ҖЧҖ, «Наноэкохим», «Ива Холдинг» ҖЧҖ һ.б.), «Мастер» КИП («Кора», «Луч», «Латосс», «Кама» йөк күтәртү механизмнары заводы) һәм башкалар.
Форум программасында Россия-Үзбәкстан һәм Үзбәкстан-Россия эшлекле советлары утырышы, пленар утырыш, хезмәттәшлекнең төрле юнәлешләре буенча панель сессияләр, эшлекле сөйләшүләр булды.
Чарада Татарстан Республикасы Рәисе Рөстәм Миңнеханов, Россия Федерациясе Хөкүмәте Рәисе урынбасары, Россия Федерациясе сәнәгать һәм сәүдә министры Денис Мантуров, Үзбәкстан Премьер-министры урынбасары Жамшид Ходжаев, Татарстан Премьер-министры урынбасары – сәнәгать һәм сәүдә министры Олег Коробченко һәм башкалар катнашты.
Олег Коробченко Үзбәкстан Премьер-министры урынбасары Жамшид Ходжаевны һәм Үзбәкстан энергетика министры Журабек Мирзамахмудовны Татарстанның сәнәгать потенциалы күргәзмәсе белән таныштырды.
«Россия һәм Үзбәкстан сәнәгать паркларын үстерү» панель сессиясендә Татарстан Республикасы Сәнәгать һәм сәүдә министрлыгы башлыгы урынбасары Герман Лернер индустриаль парклар төзүдә Татарстан тәҗрибәсе турында сөйләде. Ул билгеләп үткәнчә, Үзбәкстанның Ташкент, Җиззәх, Нәвап, Бохара өлкәләрендә уртак мәйданчыклар төзү эше дәвам итә.
«Хәзерге вакытта 255 млн АКШ долларына инвестицияләр күләме булган 34 инвестиция проекты өстендә эш алып барыла. Төзелә торган эш урыннары саны – 2041, – дип тасвирлады ул «Чирчик» уңышлы кейсын. – Хезмәттәшлекнең бу уңай тәҗрибәсе яңа проектларга күчте. Әйтик, узган елның октябрендә Җиззәх өлкәсендә «Химград» индустриаль паркын булдыру эше башланды.
Яңа проектны гамәлгә ашыру өчен мисал итеп «Мастер» КИП моделе сайланган. «Навои» СЭЗ территориясендә индустриаль парк төзү Үзбәкстанда бөтен инженер һәм транспорт инфраструктурасы белән гомуми мәйданы 46 мең кв.м булган җитештерү корпусын төзүне күздә тота. Резидентлар арендага әзер җитештерү биналарын алачак.
Форум кысаларында шулай ук Россия Сәнәгать һәм сәүдә министрлыгы башлыгы Денис Мантуров Татарстан сәнәгатенең Азбука комплектын Рәис Рөстәм Миңнехановка тапшырды – шундый ук комплектларны Казанның 35 нче лицееның беренче сыйныф укучылары алачак. Ул Россия Сәнәгать һәм сәүдә министрлыгы тарафыннан Белем көненә әзерләнгән. Азбукада Россиядә җитештерелә торган төрле продукция турында сөйләнә.
Моннан тыш форумда сәнәгатьнең төрле тармакларында 3 төбәкара һәм 7 коммерцияле килешү имзаланды.
Алар арасында:
– уртак проектларны үстерү;
– чаралар уздыру;
– экспорт җиткерүләрне оештыру.
Коммерция килешүләре түбәндәгеләргә кагылды:
– Интернет-сәүдә;
– логистика үзәген төзү;
– су белән тәэмин итү һәм су чыгару буенча тәҗрибә уртаклашу;
– метро вагоннары китертү.
Илләр мәгълүмати технологияләрдә, электрон коммерциядә һәм эшкуарлыкны үстерү турында килештеләр.