«2022 елда Татарстан белән Кытайның тышкы сәүдә әйләнеше рекордлы күрсәткечкә җитте – 1 млрд 600 млн доллардан артык»
Бу хакта Татарстан Республикасы сәнәгать һәм сәүдә министры урынбасары Герман Лернер 28 августта РОСТКИ – «Россия-Кытай: үзара файдалы хезмәттәшлек» халыкара форумын үткәрү буенча матбугат конференциясендә хәбәр итте.
Бу 7-8 сентябрьдә Казанда узачак иң эре «Россия - Кытай» халыкара форумы.
«Татарстан Кытай Халык Республикасы белән һәрьяклап мөнәсәбәтләрне актив җайга сала, – диде Герман Лернер. – Хәзерге вакытта республика хөкүмәте һәм Кытай провинцияләре арасында сәүдә-икътисад, фәнни-техник һәм мәдәни хезмәттәшлек турында 7 килешү имзаланды».
Ул шулай ук Кытайдагы хезмәттәшләр белән Татарстанның күп кенә компанияләре дә тыгыз хезмәттәшлек итә, дип өстәде.
Предприятиеләр хезмәттәшлеге кысаларында күп санлы проектлар гамәлгә ашырылган:
- «КАМАЗ ВЕЙЧАЙ» уртак предприятиесе (индустриаль дизель һәм газ двигательләре җитештерүгә махсуслашалар);
- «РариТЭК Холдинг» һәм Кытайның «Фотон» компаниясе арасында шәһәр автобуслары җитештерүне ачу;
- «Аммоний» (технологик линияләрне җыю, шул исәптән China National Chemical Engineering Company компаниясе тарафыннан башкарылган) һәм башкалар.
- «Республика территориясендә гамәлгә ашырыла торган уртак инвестиция проектлары арасында – кер юу машиналары, телевизорлар, суыткычлар, туңдыргыч һәм электр ашханә җиһазлары җитештерү буенча «Хайер» проектын гамәлгә ашыру һәм «КАМАСТАЛЬ» предприятиесе – төргәкле корычны буяу производствосы», – дип билгеләп үтте министр урынбасары.
- Республиканың Сәнәгать һәм сәүдә министрлыгы хәзер «Ростки: Россия һәм Кытай – үзара файдалы хезмәттәшлек» халыкара форумын уздыруга актив әзерлек алып бара. Министрлыкка «Сәнәгать» блогы беркетелгән һәм бу юнәлеш буенча түбәндәге сессияләр эшләнә:
- станоклар төзү һәм инструменталь тармак: үзара файдалы хезмәттәшлек;
- ESG – Көнчыгышка борылу;
- альтернатив энергия чыганаклары: Россия-Кытай уртак проектлары.
«Сессияләр сәнәгатьне үстерү өлкәсендә эшнең өстенлекле юнәлешеннән чыгып сайланды, – диде Герман Лернер. – Станок – инструменталь сәнәгать фондын формалаштыручы төп тармак булып тора, ватан сәнәгате ягыннан югары технологияле заманча җиһазларга ихтыяҗ арта. ESG көн тәртибе (экологик, социаль һәм корпоратив идарә) эшлекле мәйданчыкларда даимилек арту белән тикшерелә».