Казанда Татарстан нефть-газ химиясе форумы-2023 узачак
Кичә Татарстан Республикасы Премьер-министры урынбасары – сәнәгать һәм сәүдә министры Олег Коробченко җитәкчелегендә Татарстан нефть-газ химиясе форумы-2023 чарасына әзерләнү һәм аны үткәрү мәсьәләсе буенча киңәшмә узды.
Чарада ТР Төзелеш, архитектура һәм торак-коммуналь хуҗалыгы министрлыгы, ТР Транспорт һәм юл хуҗалыгы министрлыгы, ТР Экология һәм табигать ресурслары министрлыгы, «Татнефть», «Газпром», «Татнефтехиминвест-холдинг», «Газпром межрегионгаз Казан», «СИБУР» вәкилләре һәм башкалар катнашты.
Форум «Казан Экспо» территориясендә 31 августтан 2 сентябрьгә кадәр узачак. Ул республикада нефть чыгаруның 80 еллыгына багышланачак.
Татарстан нефть-газ химиясе форумы-2023 чарасында түбәндәгеләр көтелә:
- «TatOilExpo» халыкара күргәзмәсе;
- 4 халыкара һәм 1 бөтенроссия конференциясе;
- «СИБУР» ГАҖнең 2 конференциясе;
- Кытай делегациясе конференциясе;
- 6 түгәрәк өстәл;
- 4 Тәэминатчы көне.
«Татарстан нефть-газ химиясе форумында 160тан артык компания катнашачак, шул исәптән чит илләрдән – Иран, КХР, Беларусь Республикасы, Камерун Республикасы, Үзбәкстан Республикасы һәм башкалар», – дип хәбәр итте киңәшмәдә ТР Сәнәгать һәм сәүдә министрлыгы башлыгы урынбасары Марат Миңнебаев.
Оештыручылар – РФ Сәнәгать һәм сәүдә министрлыгы, РФ Табигать министрлыгы, ТР Рәисе һәм ТР Хөкүмәте ярдәме белән Татарстан Сәнәгать һәм сәүдә министрлыгы һәм «Казан Экспо» АКО.
Тулырак мәгълүматны Татарстан нефть-газ химиясе форумы-2023 сайтында белешергә мөмкин.