«Төньяк-Көньяк» халыкара транспорт коридоры буенча йөк агымы 2030 елга 35 млн тоннага кадәр үсәргә мөмкин»
Бу хакта Россия Хөкүмәте Рәисе урынбасары Марат Хөснуллин «Россия – Ислам дөньясы: KazanForum» XIV халыкара икътисадый форумында «Төньяк – Көньяк» халыкара транспорт коридорын үстерү мәсьәләләре буенча түгәрәк өстәл утырышында әйтте. Вице-премьер билгеләп үткәнчә, әлеге маршрут хәзерге геосәяси вәзгыятьтә, илнең логистик чылбырларны һәм агымнарны үзгәртеп корганда, аерым әһәмияткә ия булды.
«Без 2025 елга бу юнәлештә йөк әйләнеше ике тапкыр артыр, 30 млн тоннадан да ким булмаска тиеш, ә 2030 елга 35 млн тоннага кадәр үсәргә тиеш, дип саныйбыз. Бу 2021 елга караганда 155% ка күбрәк», – диде ул һәм Каспий төбәге, Көньяк һәм Көньяк-Көнчыгыш Азия дәүләтләрен, Персия култыгын колачлаган «Төньяк-Көньяк» транспорт коридоры үсешенә 2030 елга кадәр 280 млрд сум кертәчәкләр, дип хәбәр итте.
«Транспорт коридоры Евразия икътисадый берлеге өчен икътисадый үсешнең мөһим альтернатив коридоры һәм Европа берлегенең икътисадый һәм сәяси йогынтысына җавап буларак аерым әһәмияткә ия. «Төньяк–Көньяк» күчәре буйлап урнашкан илләр 2018 елның маеннан башлап, Иран белән ирекле сәүдә турында килешү имзаланганнан бирле, ЕАЭС белән үзара хезмәттәшлеккә кызыксыну белдерә. Ирекле сәүдә турында шундый ук сөйләшүләр ЕАЭС һәм Һиндстан арасында алып барыла. Шулай ук Көньяк Азиянең һәм Фарсы култыгының башка илләрендә дә кызыксыну бар. Моннан тыш, Төньяк-Көньяк коридорын киң транспорт маршрутлары белән тоташтыруның зур потенциалы бар», – диде Татарстан Республикасы Рәисе Р.Н. Миңнеханов.
Республика сәнәгать һәм сәүдә министрлыгы башлыгы Олег Коробченко эшлекле программада һәм форум ачылышында, шул исәптән 30дан артык илдән илчеләр һәм дипломатлар белән очрашуда катнашды. Анда, аерым алганда, Татарстанның ИХО илләре белән товар әйләнеше узган ел 3 млрд АКШ долларыннан артып китүе билгеләп үтелде. Товар әйләнешенең яртысы диярлек БДБ илләре белән сәүдәгә туры килә. Шул ук вакытта ерак чит илләр белән сәүдә күләме 2 тапкыр диярлек арткан. Шулай ук Берләшкән Гарәп Әмирлекләре һәм Төркия белән товар әйләнеше шактый арткан.
»Бүген без Татарстан гына түгел, гомумән Россия сәнәгате һәм сәүдәсе үсеше өчен зур әһәмияткә ия булачак глобаль вакыйгада катнаштык. Бу хакта форумга булган зур кызыксыну дәрәҗәсе таныклый, ә бу – дөньяның 80 дән артык иленнән 15 мең теркәлгән катнашучы. Без сәнәгать кооперациясе, яңа транспорт-логистика чылбырлары булдыру белән кызыксынабыз. Һәм безнең партнерларыбызга тәкъдим итәрлек әйберләребез бар, аерым алганда, бу – «КАМАЗ» автомобильләре, вертолетлар, тиз йөрешле һәм йөк-пассажир суднолары, нефть химиясе, медицина, фармацевтика продукциясе, минераль ашламалар, нефть һәм газ чыгару җиһазлары. Форумның беренче көнендә безнең җитештерүчеләр белән дистәләгән килешүләр һәм контрактлар имзаланды. KazanForum республика икътисады өчен драйвер булыр дип ышанам», – дип чарага аңлатма бирде Олег Коробченко.
Имзаланган килешүләр арасында:
- «ТрансКонтейнер» ГАҖ һәм «Алабуга» МИЗ арасында терминаль һәм транспорт-экспедиция хезмәтләре күрсәтүгә шартнамә. Аңа ярашлы нигездә, төзелә торган контейнер терминалында Дэн Сяопин исемендәге логистик үзәк кысаларында «Алабуга» ГАҖ «ТрансКонтейнер» контейнер сервисларына хезмәт күрсәтү оештырылачак.
- Татарстан Республикасының сәнәгать кластеры белән I5.solutions интеллектуаль җитештерү платформасы арасында килешү. Ул машина төзелеше тармагы предприятиеләрендә җитештерү мөмкинлекләрен автомат рәвештә тикшерү белән яңа заказлар белән тәэмин итүгә кагыла.
- «Комплекс» ҖБ ҖЧҖ һәм «ТАТЛИФТ» ҖЧҖ арасында лифтлар белән идарә итү системаларын бергәләп җитештерү турында килешү.
- «Генемек» ҖЧҖ (Төркия) һәм «ТАТЛИФТ» ҖЧҖ арасында лифт интерфейсы компонентларын җитештерүне оештыру һәм гамәлгә ашыру буенча озак сроклы партнерлык мөнәсәбәтләре турында килешү һәм башкалар.
Өстәвенә, Казан форумны 14 нче тапкыр «Казан Экспо» ХКҮ кабул итә. Быел РФ Президенты Владимир Путин карары буенча чара беренче тапкыр федераль статуста уза.
Форум кысаларында 200гә якын чара – сессияләр, дискуссияләр, ислам финанслары һәм партнерлык банкингы, экспортны үстерү, аңлы куллану, эшкуарлык һәм инвестицияләр, шулай ук креатив индустрия, дипломатия һ.б. темаларга түгәрәк өстәлләр узачак.
Моннан тыш, кунаклар һәм катнашучылар өчен Россия һәм Белоруссия сәнәгате казанышлары күргәзмәсе әзерләнгән. Экспонатлар арасында - «Атом» электрокарының прототибы, «Аурус Комендант» внедорожнигы, Evocargo пилотсыз йөк машинасы һәм башка алдынгы техника.