Олег Коробченко Федерация Советында сәнәгатьне үстерү буенча тәкъдимнәр белән чыгыш ясады
17 октябрьдә РФ ФҖ Федерация Советында узган парламент тыңлауларында Татарстанның вице-премьеры – ТР сәнәгать һәм сәүдә министры Олег Коробченко сәнәгатьне үстерү өчен кайбер федераль программаларны эшләргә тәкъдим итте. Тыңлаулар Россия сәнәгатенең гражданлык тармакларында мөһим продукцияне, хезмәт күрсәтүләрне һәм технологияләрне импортлауны алмаштыруга ярдәм итүгә багышланган иде.
«2022 елның 8 аенда Татарстан предприятиеләре тарафыннан төяп җибәрү күләме өч триллион сум тәшкил итте. Чагыштыру өчен: узган ел без 2,4 трлн.сумлык продукция төяп җибәрдек, ә 2020 елда – 1,6 трлн.сумлык. Иң зур өлеш нефть продуктлары җитештерү, чыгару, химия, нефть химиясе һәм машина төзелешенә туры килә. Сәнәгый җитештерү индексы 109,3% тәшкил итте», – дип хәбәр итте Олег Коробченко һәм республикада вакыт таләпләренә карамастан гамәлгә ашырылуын дәвам иттерә торган берничә эре инвестпроектны билгеләп үтте.
Алар арасында «Нижнекамскнефтехим»ның ЭП-600 олефин комплексын төзү (390 млрд.сум), поликарбонатлар заводын, этилен заводы цехларын модернизацияләү, «Казан органик синтезы»ның ПГУ-ТЭС төзелеше (72 млрд.сум), «Кулланма катализм үзәге» һәм «Катализаторларның тәҗрибә производствосы» (14 млрд. сум), «Аммоний 2» («Алабуга» МИЗ, 90 млрд.сум), зур габаритлы һәм ЦМК шиннар җитештерү, велошиннар җитештерүне оештыру («Татшина», 37 млрд.сум), шулай ук фитинглар, яңа буын пленка материаллары җитештерү («Техстрой», «Данафлекс», 5 млрд.сум) һәм башкалар.
«Хәзерге шартлар бездән сәнәгать үсеше өчен яңа системалы чишелешләр таләп итә. Иң оптимале булып кластер алымы тора – хакимият, бизнес һәм фәннең үзара бәйләнеше. Мондый алымны тормышка ашыру өчен 23 эшче тармак төркеме булдырылган. Проектлар реестры формалаштырылган, предприятиеләрнең чиктән тыш мәсьәләләре билгеләнгән. Әйтик, компанияләрнең директорлары фикеренчә, үсешне тоткарлаучы факторларның берсе – доллар һәм еврога карата гамәлдәге сум курсы. Без экспортерларга ярдәм итү һәм сәнәгать продукциясен импортлау күләмнәрен киметү өчен уңайлы сум курсы булдырырга тәкъдим итәбез», – диде Олег Коробченко.
Вице-премьер шулай ук чиктән тыш импортның кече серияле продукциясен җитештерүне субсидияләү программасын (70% кадәр) эшләргә һәм гамәлгә кертергә тәкъдим итте.
«Сәнәгатьне үстерү планнарын гамәлгә ашыру өчен генә түгел, компанияләрнең агымдагы эшчәнлеген тәэмин итү өчен дә акча, җитештерү куәтләре һәм персонал кирәк. Бүген Татарстан предприятиеләрендә эшче куллар җитми, шул ук вакытта Россиянең башка төбәкләрендә, мәсәлән, Калуга өлкәсендә машина төзелеше тармагы заводларының эшчәнлеге туктатылган», – дип билгеләп үтте вице-премьер, ул югары дәрәҗәдә эшсезлек һәм аренда торагы булган төбәкләрдән вакытлыча хезмәт миграциясе федераль программаларын эшләргә һәм кабул итәргә, шулай ук эшләүче пенсионерларга пенсияләрне индексацияләргә тәкъдим итте.
Тәкъдимнәр чараның резолюциясенә кертелде.