ВТБ һәм Алабуга инфраструктураны 51 млрд.сумга финанслаячак
ВТБ һәм «Алабуга» махсус икътисадый зонасы финанс-икътисадый хезмәттәшлек турында килешүгә имза салдылар. Документта Алабуганы һәм икътисади хезмәттәшлекнең башка юнәлешләрен үстерү планының алдагы этапларын гамәлгә ашыру ниятләре беркетелгән. Шулай ук ВТБ һәм «Алабуга» МИЗ «Алабуга» МИЗның перспектив үсеш проектының беренче этабын финанслау буенча 51 млрд.сум күләмендә кредит килешүе дә төзеделәр. Финанслауның гомуми күләме 2032 елга кадәр 194 млрд тәшкил итә.
Проектның беренче этабы кысаларында банкның кредит акчалары хисабына МИЗ инфраструктурасы объектлары, яңа җитештерү корпуслары, кадрлар һәм персонал әзерләү объектлары комплексы һәм башкалар төзеләчәк.
«Төбәкләрнең, аларның җитештерү мәйданчыкларының тотрыклы үсешенә ярдәм итү, илдә фән сыйдырышлы производстволар күләмен арттыру, сәнәгатьнең яңа юнәлешләрен үстерү – система барлыкка китерүче финанс институты буларак ВТБның төп бурычлары», – дип билгеләп үтте ВТБ идарәсе рәисе урынбасары Валерий Лукьяненко.
«Имзаланган килешү республиканың сәнәгать инициативаларын гамәлгә ашыруда алга таба адымнарны, ВТБның Татарстан белән ышанычлы партнерлыгын ныгыта. «Алабуга» МИЗ проектын гамәлгә ашыру төбәк икътисадына яңа инвестицион проектлар җәлеп итү өчен «мөмкинлекләр тәрәзәсе»н ачачак, эш урыннары санын 24 700 кадәр арттырачак. «Алабуга» махсус икътисадый зонасы базасында конкурентлыкка сәләтле предприятиеләр булдырылачак, аларның җитештерү куәтләре актуаль мәсьәләне – республиканың сәнәгать потенциалын үстерүне хәл итәргә ярдәм итәчәк», – дип шәрехләде ВТБ идарәчесе, вице-президент Мәрьям Дәүләтшина.
«2021 ел нәтиҗәләре буенча Россиягә импорт 22 трлн сумнан артып киткән, шуңа күрә импортны алмаштыручы яңа предприятиеләр булдыру аеруча мөһим. Локальләштерү дәрәҗәсе югары булган ил сәнәгате үсешенең төп шарты – барлык төп инвесторларның «авырту урыннарын» хәл итү өчен тулы инфраструктура төзелеше, шул исәптән инвесторларны just-in-time җитештерү мәйданнары белән тәэмин итү. Әмма, хәл итүне таләп итә торган иң катлаулы мәсьәлә – Россиядә квалификацияле эшче кадрларга кытлык бар. Кадрлар булмаса – яңа проектлар да булмаячак. Шуңа күрә без елына 10 мең кеше сыйдырышлы «Алабуга Политех» квалификацияле эшче кадрлар әзерләү буенча эре үзәк булдырдык. Икътисадтагы турбулентлыкка карамастан, «Алабуга», ВТБ белән бергәләп, «Алабуга»ны үстерү планының беренче этабын финанс белән тәэмин итәчәк, шул исәптән елына 10 мең кеше өчен квалификацияле эшче кадрлар әзерләү өчен кирәкле социаль инфраструктура булдырылачак», – дип шәрехләде «Алабуга» МИЗ генераль директоры Тимур Шаһивәлиев.
Бүгенге көндә «Алабуга»да 33 предприятие эшли, резидентларның инвестицияләренең факттагы күләме 157 млрд.сумнан артып китә, 9 500 артык эш урыны булдырылган, узган елда резидентларның кереме 136 млрд.сум тәшкил иткән. «Алабуга» МИЗ инвестиция проектлары өчен тулы циклның партнеры булып тора, ул иң яхшы инженер, төзелеш, кадрлар һәм социаль инфраструктура белән тәэмин итә. ВТБ һәм «Алабуга» арасында имзаланган килешү МИЗның инвестиция җәлеп итүчәнлеген арттырачак һәм Россиядә импортны алыштыру программасын тизләтәчәк.