ЯҢАЛЫКЛАР
Бу атнада Мексикада Мехико штатының Санта-Лусия шәһәрендәге №1 авиабазада FAMEX аэрокосмик салоны уза. Ул Мексика ВВС тарафыннан оештырылган континентның иң зур аэрокосмик салоны. Анда дөнья буйлап 550 артык компания, шулай ук Латин Америкасы төбәгендәге барлык вәкиллекләрдән әһәмиятле ведомстволарның вәкилләре катнашачак. Күргәзмәдә беренче тапкыр Татарстан компаниясе дә булачак.
"МВЕН" фирмасы күргәзмәгә тиз эшли торган, аварияле хәлләрдә экипажны һәм пассажирларны һава судносы составында коткару өчен билгеләнгән парашют системаларын, шулай ук авиация-химия эшләрен башкару өчен махсус авыл хуҗалыгы самолетларын куйган.
Мексиканың Зумпанго дэ Окапмо-Мигель шәһәре мэры Анхель Гамбоа Монрой күргәзмәдә компаниягә карата кызыксыну белдергән.
МВЕН фирмасы Мексикадан тыгыз хезмәттәшлеккә мәнфәгатьле булган партнерлар белән берләштерелгән экспозициядә катнаша. "Мексика һәм Латин Америкасының төбәк базары Татарстан компаниясе продукциясен алга этәрү өчен перспективалы", – дип саный предприятие партнерлары. Элегрәк алар Казандагы производствода булып киттеләр, нәтиҗәдә FAMEX күргәзмәсендә бергә катнашу турында килешенгәнлек барлыкка килде. Моннан тыш, компания планнарында Мексика компаниясе-партнеры базасында Татарстан компаниясенең дилерлык үзәген ачу да бар.
"МВЕН" фирмасы материаллары буенча
Альберт Кәримов бүген Казанда Илкүләм паруслы Лиганың III этабын оештыру һәм уздыру мәсьәләләре буенча киңәшмә уздырды.
Илкүләм паруслы Лига паруслы спортның иң эре проекты булып тора, ярышлар Россиянең алдынгы яхтчылары катнашында заманча J/70 спорт яхталарында уза.
Бишенче, юбилейлы Илкүләм паруслы Лига сезоны Казанда 2019 елның 19 маеннан 3 июненә кадәрге чорда "Ривьера" кунакханәсенә якын акваториядә булачак. Чараны дивизион премьерында катнашучылар ачып җибәрәчәк, шуннан соң югары һәм балалар дивизионнары яхтчылары эстафетаны кабул итеп алачак. Казан барлыгы 300 артык яхтчыны каршы алырга планлаштыра.
Яхтинг ярышлары ТР Спорт министрлыгы һәм ТР Паруслы спорт федерациясе ярдәмендә узачак, бу хакта 2018 елның июлендә тиешле килешү имзаланган.
Бүгенге көндә әлеге чараны оештыру һәм үткәрү өчен республика оештыру комитеты төзелә, Альберт Кәримов аның рәисе булачак.
Бүген ТР Сәнәгать министрлыгында республикада автоматик судно төзелеше комплексын оештыру буенча инвестиция проекты турында фикер алыштылар. Киңәшмәдә ТР Инвестицияле үсеш агентлыгы, ТР Транспорт министрлыгы, ТР ССП, Горький исемендәге Яшел Үзән заводы вәкилләре һ.б. катнашты. Очрашуны Альберт Кәримов уздырды.
"Симбирская верфь" компаниясе "Елга-диңгез судноларын төзү өчен автоматлаштырылган судно төзү комплексы" проектының авторы һәм инициаторы булып тора. Компания әлеге комплексны Татарстан Республикасы территориясендә урнаштыру мөмкинлеген карый. Проект продукты булып махсус конструктив чишелешле һәм базар өчен минималь бәяле елга-диңгез суднолары тора.
Элегрәк компания комплексны урнаштыруга бәйле берничә вариантны караган, биредә төп әһәмиятле шартларның берсе суга чыгу мөмкинлегеннән гыйбарәт булган. Хәзерге этапта Яшел Үзән һәм Түбән Кама районнарында берничә мәйданчык карала.
Бүген Альберт Кәримов Татарстан Республикасында текстиль эшләнмәләрен арендалау һәм сәнәгый эшкәртү буенча инвестиция проектын тормышка ашыру планнары турында киңәшмә уздырды.
"Коттон Вэй" предприятиесе 2013 елда Татарстан Республикасы белән Килешү имзалаганнан соң 2017 елда "Химград" технополисында җитештерү куәтләрен ачып җибәрде.
Хәзерге вакытта предприятие, сәнәгый предприятиеләр белән хезмәттәшлек өлкәсен җәелдереп, текстиль эшләнмәләрне арендалау һәм профессиональ эшкәртү буенча коммерция һәм бюджет өлкәсе предприятиеләренә хезмәтләр күрсәтә.
Компания хезмәтләренә Татарстан белән чиктәш төбәкләрдән дә ихтыяҗ булуын исәпкә алганда, компания Кама аръягында җитештерү-логистика комплексының икенче чиратын тормышка ашыру турында белдерә.
2019 елның 22 апрелендә Яшел Үзән районының Дубровка поселогында сәнәгать һәм сәүдә министры урынбасары Алексей Савельчев җитәкчелегендә КНИТУ филиалы – Химияне тирәнтен өйрәнү буенча сәләтле балалар өчен лицей-интернатның Химаячеләр советы утырышы булды. Утырышта тармак предприятиеләре һәм оешмалары җитәкчеләре, вәкилләре катнашты.
Чара башында укучыларның төрле темалар буенча фәнни-тикшеренү эшләре һәм проектлары презентацияләнде. Алга таба "Орбиталь" яшьләрнең инновацион иҗат үзәгендә "Аэрокосмос" юнәлеше буенча лицеистларның проект эшләре якланды. Чарада катнашучылар шулай ук Даниянең "Haldоr Topsоe A/S" лабораториясендә дә булдылар, анда алар өчен "Тере системада һәм органик булмаган химиядә катализаторлар" темасына эксперименталь һәм танып белү химиясе буенча мастер-класс уздырылды.
Чарада лицейның партнер-предприятиеләр һәм мәнфәгатьле оешмалар белән нәтиҗәле һәм уңышлы эшләве турында билгеләп үтелде.
КНИТУ филиалы – Химияне тирәнтен өйрәнү буенча сәләтле балалар өчен лицей-интернатның матбугат хезмәте материаллары буенча
"ТАНЕКО"да "Евро-5" экология классына караган TANECO-100 премиаль бензинын җитештерү үзләштерелде.
Автомобильләр өчен TANECO-100 бензины рецептурасы иң яхшы физик-химик, эксплуатацион һәм экологик сыйфатламаларга ирешү мөмкинлеген бирә. Югары сыйфатка ия нефть эшкәртү өлкәсендә дөньяның әйдәп баручы лидерлары – UOP Limited, Chevron Lummus Global, "НПП Нефтехим" ҖЧҖ компанияләренең алдынгы технологияләрен куллану хисабына ирешелә.
Югары октанлы бензин октан саны буенча кимендә 95 пункт таләпләре булган заманча двигательләр өчен билгеләнгән. Ягулык нык көчәйтелгән двигательләргә юнәлдерелгән, алар белән, шул исәптән, спорт классындагы машиналарны да тәэмин итәләр. Мондый автомобильләрнең двигательләре көчәйтелгән режимда югары басымнарга исәпләнгән. Бу исә бик кыска вакыт аралыгында двигательнең яну камерасы аша зур күләмдә ягулык уза, ул янганда максималь әйләндергеч момент барлыкка килә, дигән сүз. Югары октанлы бензинның арттырылган детонация тотрыклылыгы иң экстремаль шартларда да двигательнең тотрыклы эшләвен тәэмин итә. "TANECO-100" бренды белән чыгарыла торган ягулык двигатель өчен югары КПД тәэмин итә, аның ресурсын арттыра һәм ягулык сарыфын шактый киметә.
АИ-100 маркалы бензинда сумала һәм олефин углеводородларының үтә түбән күләме көйрәк барлыкка килүне минимальләштерергә ярдәм итә, тулысынча яну һәм двигатель детальләрендә утырмалар барлыкка килү күренешен азайту мөмкинлеген бирә.
Югары сыйфатлы, октан саны 100 булган бензинны чыгара башлау "Татнефть" нефть эшкәртү комплексының иң заманча техник чишелешләрдән файдалану хисабына прогрессив үсешкә омтылуын тагын бер исбатлады.
"ТАНЕКО" комплексында чыгарыла торган ягулык "Татнефть" автотэмин итү челтәрләре аша сатылачак.
"Татнефть" ГАҖ матбугат хезмәте материаллары нигезендә
Бүген Казан милли тикшеренү технологик университетында (КНИТУ) Эмерсонның яңа уку лабораториясен ачу тантанасы булды. Анда студентлар автоматлаштыруның алдынгы технологияләрен һәм заманча җайланмада эшләү буенча гамәли күнекмәләрне үзләштерәчәк, шулай ук эшләүче белгечләр – квалификация үстерәчәк. Чарада КНИТУ, сәнәгый предприятиеләрнең вәкилләре, Эмерсон компаниясе җитәкчеләре катнашты. ТР Сәнәгать министрлыгыннан чарада министр урынбасары Алексей Савельчев катнашты.
Яңа лабораториядә Plantweb предприятиесенең цифрлы экосистемасы урнашкан, ул сәнәгать предприятиеләрен санлап үзгәртеп кору проектларын тормышка ашырганда чишелешләр нигезе булып тора.
Уку сыйныфында өстәмә рәвештә компаниянең әйдәп баручы экспертларыннан консультацияләр һәм лекцияләр уздыру, нефть химиясе тармагы белгечләренең квалификациясен үстерү, студентларга практикалар һәм стажировкалар уздыру планлаштырыла.
Лаборатория оештыруны шулай ук "Нефть-газ табу, нефть эшкәртү һәм нефть химиясе процессларын үстерү һәм оптимальләштерү өлкәсендә хезмәттәшлек итү өлкәсендә үзара аңлашу турында меморандум" да хуплый, ул 2017 елда Эмерсон белән "Татнефть" ГАҖ компанияләре арасында имзаланган. Килешү юнәлешләренең берсе “Татнефть”кә эшкә урнашу потенциалы булган чыгарылыш укучыларында гамәли күнекмәләр үстерүне үз эченә ала.
"Эмерсон" компаниясе һәм КНИТУ матбугат хезмәте материаллары буенча
Бу атнада Россия дипломатиясенең бишеге булып саналучы МГИМО университеты кысаларында – иң югары дәрәҗәдә Татарстаннан чыккан студентлар белән очрашу булды. Очрашуда министр урынбасары Алмаз Хөсәенов катнашты. Ул яшь буынны республиканың сәнәгый потенциалы белән таныштырды, Татарстанны үстерү стратегиясе һәм аның казанышлары турында сөйләде.
Кызыксындыру белдереп, студентлар Татарстан компанияләренең Россиянең башка төбәкләрендәге һәм чит илләрдәге хезмәткәрләр өчен стажировка үткәрү-үткәрмәве, кирәкле эш стажы, үзләренең уникаль дипломатик күнекмәләренең кулланылыш табу-тапмавы турында сораулар яудырды, аларга очрашуда катнашкан Татарстан предприятиеләре – "Татнефть" ГАҖ, "КАМАЗ" ГАҖ, "Алабуга" МИЗ вәкилләре җавап бирде.
"Очрашу яхшы дәрәҗәдә узды, кызыклы булды һәм Татарстан предприятиеләренең иң яхшы яшь профессионалларга мәнфәгатьле булуына төшенелде", – дип билгеләде Алмаз Хөсәенов.
Визит кысаларында шулай ук министр урынбасары МГИМО ректоры Анатолий Торкунов белән дә очрашты.
ТР Сәнәгать министрлыгында "ТЭМПО" холдинг компаниясе җитәкчеләре булып китте. Топ-менеджментны КППК (көндәшлеккә сәләтле булу дәрәҗәсен үстерүнең корпоратив программасы) шартлары, шулай ук экспортерларга ярдәм чаралары кызыксындыра иде. "ТЭМПО" ХК актив рәвештә экспорт эшчәнлеген киңәйтә, продукция сату базарларының географиясен генә түгел, ә эшчәнлекнең яңа юнәлешләрен дә җәелдерә.
Очрашуны Альберт Кәримов уздырды, предприятеләрнең конкурс нигезендә сайлап алыначагы, ләкин ТР Сәнәгать министрлыгының сораулар булганда, алар буенча аңлатмалар бирергә әзер булуы турында аңлатты.
Исегезгә төшерик, КППК кысаларында предприятиеләргә Россия территориясендә һәм чит илдә экспортка юнәлдерелгән производство оештыруга, шулай ук экспорт финанслауга (предэкспорт, постэкспорт), факторингка, предприятие продукциясен чит илләрдән сатып алучыларга, экспорт кредит иминиятләштерү шартнамәсе буенча иминият премиясен түләүне финанслауга ташламалы кредитлар (кредит ставкасын 4,5%ка кадәр субсидияләү) бирелергә мөмкин.
Катнашучыларга карата таләпләр минималь:
1. Россия Федерациясе Хөкүмәтенең 719 номерлы карарына ярашлы рәвештә җитештерү фактын раслау.
2. Бюджет һәм бюджетка карамаган фондлар каршында түләмәү һәм түләячәк әҗәтләрнең булмавы.
3. Предприятиенең чит ил юридик заты, "офшор" компаниясе булып тормавы, соңгы 3 ел эчендә ликвидацияләнү яки банкротлык процессында булмавы.
КППК карата таләпләр, оешмаларны сайлап алу һәм аларның бердәм реестрын формалаштыру тәртибе РФ Хөкүмәтенең 2019 елның 23 февралендәге 191 номерлы карарында регламентлана.
Апрельдә предприятиеләрдән заявкалар җыеп алыначак.
Заявка тапшыруның иң чик срогы – 2019 елның 15 мае.
Бу атнада Татарстанда, Россиянең башка төбәкләрендәге кебек үк, "ТУРНИКЕТЛАРСЫЗ БЕР АТНА" россиякүләм һөнәри ориентация акциясе узды. Анда Татарстан Республикасыннан 40 артык сәнәгать һәм сәүдә предприятиесе катнашты (2018 елда – 24 предприятие), алар Татарстан Республикасындагы 2000 артык мәктәп укучысы һәм студентлар өчен үз ишекләрен ачты.
Визит кысаларында балалар фәнни-җитештерү бүлекчәләрендә һәм предприятие лабораторияләрендә, җыю цехларында булды, тарих музейлары белән танышты, шулай ук җитәкчелек, уңышлы хезмәткәрләр һәм ветераннар белән очрашуларда катнашты.
Боларның барысы да яшүсмерләрнең һәм яшьләрнең үзебезнең илдә машина төзелеше һәм, тулаем алганда, сәнәгать үсешенә юнәлдерелгән башлангыч һөнәри ориентация системасын формалаштырырга, шулай ук мәктәп укучыларын, студентларны һәм аларның ата-аналарын предприятие эше белән интерактив таныштырырга тиеш иде.
Барлык предприятиеләргә дә актив эш өчен рәхмәт белдерәбез!