КВЗ РФ Дәүләт Думасы һәм ТР Дәүләт Советы депутатларына җитештерү эшчәнлеген цифрлаштыру тәҗрибәсен тәкъдим иткән
«Вертолеты России» холдингының (Ростех дәүләт корпорациясенә керә) Казан вертолет заводында Татарстан Республикасы Дәүләт Советының Икътисад, инвестицияләр һәм эшкуарлык комитетының күчмә утырышы һәм «Сәнәгать предприятиеләренең конкурентлылык сәләтен үстерү факторы буларак цифрлаштыру («КВЗ» АҖ мисалында)» темасына түгәрәк өстәл утырышы узган. Чарада шулай ук РФ ФҖ Дәүләт Думасы депутатлары һәм Татарстан башкарма хакимияте органнары вәкилләре катнашкан.
Кунаклар өчен предприятиенең төп җитештерү цехлары һәм товар-матди кыйммәтләренең үзәк склады буенча экскурсия оештырылган. Чарада катнашучыларга КВЗда цифрлы трансформация: электрон конструкторлык документлары белән эшләү, комплектлау әйберләре хәрәкәтен оештыру һәм вертолет техникасына сатылганнан соң хезмәт күрсәтү турында сөйләгәннәр.
2020 елның сентябрендә HeliRussia Халыкара күргәзмәсендә Россия һава транспорты федераль агентлыгы (Росавиация) Ансат вертолет тибындагы сертификатка төп үзгәрешне хуплаган. Документ кәгазь документларны интерактивка алыштырырга мөмкинлек бирә. Бу Ансат конструкциясенә үзгәрешләр кертүне тизләтә, шулай ук вертолетларга сервис хезмәте күрсәтүне һәм ремонтлауны гадиләштерә.
Кунакларга шулай ук Ансат, Ми-38, Ми-8/17 вертолетларын җыю эше күрсәтелгән. Ансат вертолетының санитар версиясе өчен медмодуль тәкъдим ителгән. Үпкәләрне ясалма вентиляцияләү аппараты белән җиһазландырылган Ансат медицина вертолетлары бөтен Россия буенча COVID-19га каршы көрәштә актив катнаша.