Россиядә бердәм региональ субсидия механизмы торгызылган
Бердәм региональ субсидия механизмын яңадан гамәлгә кертү кысаларында, Россия төбәкләре бюджетлары сәнәгать предприятиеләренең техник тоташтыру (сәнәгать предприятиеләрен электр челтәрләренә һәм башка челтәрләргә тоташтыру) чыгамнарының бер өлешен каплау, лизинг килешүен төзегәндә, яңа җиһазлар сатып алганда 1 нче кертемне (авансны) түләү мөмкинлеген алачак. Бу хакта ТР Сәнәгать һәм сәүдә министрлыгы матбугат хезмәте хәбәр итә.
«Яңартылган механизмда төбәкләрнең сәнәгать сәясәтен финанс ягыннан стимуллаштыру һәм өстенлекле территорияләргә караган субъектлар сәнәгатен үстерүнең төбәк программаларына ярдәм итү фокуслары каралган», – дип ассызыклады РФ сәнәгать һәм сәүдә министры Денис Мантуров, аның сүзләрен матбугат-хезмәте җиткерә.
Хәбәрдә тәгаенләнгәнчә, яңартылган механизм кысаларында, әйтик, РФ субъекты өстенлекле геостратегик территорияләр исемлегенә яки социаль-икътисадый үсешнең түбән дәрәҗәсе булган субъектлар исемлегенә кергән очракта, артыклык коэффициентларын куллану планлаштырыла. Бердәм региональ субсидия механизмын яңарту өчен, Сәнәгать һәм сәүдә министрлыгы үз акчаларын, Финанс министрлыгы тарафыннан бүлеп бирелгән лимитлар кысаларында, 2021-2023 елларда ел саен 1 млрд.сум күләмендә акча бүлеп бирүне килештергән.
«Алынган гаризалар нигезендә Сәнәгать һәм сәүдә министрлыгы һәр төбәк программасының ахыргы коэффициентын билгеләячәк, ул шул исәптән РФ субъектының икътисадый күрсәткечләрен үз эченә ала торганын да», – дип ассызыклаган Сәнәгать һәм сәүдә министрлыгы башлыгы.
Бердәм дәүләт субсидиясен бирү механизмы сынау режимында эшләтеп каралган һәм 2016 елда гамәлгә ашырылган. Дәүләт ярдәме чаралары Кырым Республикасына, Ставрополь краена һәм Удмуртия Республикасына бирелгән, анда 7 млрд.сумнан артык бюджеттан тыш инвестицияләр җәлеп ителгән. Әлеге механизмны яңарту РФ Пространство үсеше стратегиясендә каралган.