Тимер йомычкасы эшкәртү предприятиесендә эшләүчеләр 170%ка күбрәк эшли башлаган
Мондый нәтиҗәләргә «Хезмәт җитештерүчәнлеге һәм халыкны эш белән тәэмин итүгә ярдәм» илкүләм проектын гамәлгә ашыру кысаларында Федераль компетенцияләр үзәге экспертлары ярдәме белән ирешелгән.
Татарстаннан «Промвест» компаниясе төрле төр, категория һәм күләмдәге тимер ватыкларын эшкәртү һәм сату буенча махсуслаша. Предприятие ел саен 1200 тонна тимер эшкәртә. Ярты елда, сакчыл технологияләр кертү дәверендә компаниянең бер хезмәткәре әзер продукцияне 170%ка – якынча 10,5 тоннага күбрәк җитештерә башлаган.
Моннан тыш, мондый йомычканың 5 тоннасын әзерләү вакыты 26%ка – 43 минуттан 30 минутка кадәр кимегән. Проект шулай ук чимал эшкәртүгә чират көтә торган вакытны да– 25 көннән 7 көнгә кадәр, ягъни 72%ка киметү мөмкинлеген биргән. Эшчәнлек процессын оптимальләштерү предприятиегә елына 40-50% күбрәк йомычка җитештерергә мөмкинлек бирәчәк.
«Промвест» предприятиесендә җитештерү процессларын оптимальләштерү дәвам итәчәк. Җитәкчелекнең якындагы планнарында – кара һәм төсле тимер ватыкларын эшкәртү бүлекчәләрендә сакчыл җитештерү принципларын, шулай ук тимер прокатын гамәлгә кертү.
Предприятиедә 21 хезмәткәр сакчыл җитештерү нигезләренә өйрәтелгән инде. Моннан тыш, «Промвест» компаниясенең ике хезмәткәре тирәнәйтелгән профильле укыту узган. Алар сакчыл җитештерү буенча эчке тренер сертификатларын алган һәм, хәзер хезмәттәшләрен, экспертларны җәлеп итмичә, үз көчләре белән укыта алалар.
Бүгенге көндә Татарстанда 90 артык компания «Хезмәт җитештерүчәнлеге һәм халыкны эш белән тәэмин итүгә ярдәм» илкүләм проектында катнаша. 2024 елга бу исемлеккә икътисадның база чималы булмаган тармаклары буенча 260лап төбәк предприятиесе өстәләчәк.