Татарстан Республикасы делегациясе Венгриядә булды
2020 елның 28 сентябрендә Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов җитәкчелегендәге Татарстан Республикасы делегациясе эш визиты белән Венгриядә. Татарстан Республикасы делегациясе составында, шулай ук, Татарстан Республикасы Президенты ярдәмчесе Газинур Бакиров, Татарстан Республикасының Инвестиция үсеше агентлыгы җитәкчесе Талия Миңнуллина, Татарстан Республикасының авыл хуҗалыгы министры урынбасары Ленар Гарипов, «Татнефть» ГАҖ генераль директоры Наил Мәганов та бар.
Эш сәфәре барышында Альберт Кәримов MOL компаниясе җитәкчелеге белән очрашты, шулай ук NNG компаниясендә булды һәм HEPA генераль директоры Кристоф Сабо белән ике яклы очрашу уздырды.
«Венгрия белән хезмәттәшлек Татарстан Республикасының тышкы икътисадый эшчәнлегендә өстенлекле юнәлешләрнең берсе булып тора. Без Россия-Венгрия мөнәсәбәтләре кысаларында үзара элемтәләрне үстерүгә һәрвакыт зур игътибар бирдек», – диде Альберт Кәримов үзенең сәламләү сүзендә. Шулай ук, ул билгеләп үткәнчә, үзара багланышлар ике яклы хезмәттәшлекне үстерүнең югары дәрәҗәдә булуын күрсәтә.
Альберт Кәримов Татарстан белән Венгрия арасындагы сәүдә-икътисад, инвестиция һәм фән-техника хезмәттәшлегенең перспектив юнәлешләре буларак сәнәгать, сәламәтлек саклау, мәгариф, туризм, авыл хуҗалыгы өлкәсендә кооперация элемтәләрен алга таба үстерүне, Венгриягә Татарстан Республикасының машина төзелеше һәм нефть химиясе комплексы продукциясен, шулай ук мәгълүмат технологияләре өлкәсендәге продукцияне алга җибәрүне билгеләп үтте.
Венгрия ягы Венгрия фирмаларының технологияләр экспортын арттыру һәм ноу-хау белән дә, Татарстан Республикасы партнерлары белән хезмәттәшлекнең башка рәвешләрендә дә, кызыксынуы барлыгын раслады. Шулай ук яклар AGROMETAL s. r. o. компаниясенең уңышлы проекты турында фикер алышты, ул Татарстан Республикасына сыйфатлы җиһазлар һәм технологияләр керткән.
Будапештта Татарстан Республикасы Сәнәгать һәм сәүдә министрлыгы башлыгы Венгрия хөкүмәте вәкилләре белән, шул исәптән Венгриянең тышкы эшләр һәм тышкы икътисадый багланышлар министры Петер Сиярто белән сөйләште.
Татарстан Республикасы Сәнәгать һәм сәүдә министрлыгы башлыгы Альберт Кәримов Татарстан белән Венгрия арасында сәнәгать, сәүдә-икътисад һәм мәдәни элемтәләрне ныгыту зарурилыгы аеруча әһәмиятле, дип билгеләп үтте.
Яклар киләчәктә хезмәттәшлекне үстерүнең мөһимлеген ассызыклады, шулай ук үзара товар әйләнеше күләмнәрен арттыру, машина төзелеше, авыл хуҗалыгы, нефть химиясе, туризм өлкәсендә тагын да тыгызрак хезмәттәшлек мәсьәләләре буенча фикер алышты һәм предприятиеләр арасында кооперацияне үстерү мөмкинлекләрен карады.
Визит нәтиҗәләре буенча эшлекле даирә вәкилләренең ике яклы очрашулары барышында «Татнефть» ГАҖ һәм Венгриянең «Мол» компаниясе арасында хезмәттәшлек турында килешү имзаланды.