ТР Хөкүмәте Йортында Үзбәкстан Республикасы Премьер-министры киңәшчесе Мәһретдин Хәйретдинов белән очрашу узды
Татарстан Республикасы Президенты Рөстәм Миңнеханов Үзбәкстан Республикасы Премьер-министры киңәшчесе Мәһретдин Хәйретдинов белән очрашты. Очрашуда шулай ук Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов та катнашты.
Рөстәм Миңнеханов Үзбәкстан коллегаларына Россия белән Үзбәкстан арасындагы мөнәсәбәтләрне ныгытуга юнәлдерелгән хезмәттәшлекне үстерүгә игътибары һәм ярдәме өчен рәхмәт белдерде. Ул билгеләп үткәнчә, хәзерге икътисадый шартларда бүген товарлар һәм хезмәт күрсәтүләр белән үзара тәэмин итү күләмнәрен һәм номенклатурасын арттыру өстендә эшләргә кирәк. Делегацияләр белән алмашу, бер-береңнең мөмкинлекләрен өйрәнү мөһим, дип саный Рөстәм Миңнеханов.
Очрашу барышында Рөстәм Миңнеханов искәрткәнчә, 2019 елның ноябрендә Үзбәкстан Республикасында (Ташкент, Сәмәрканд) булган, Үзбәкстан Президенты һәм Премьер-министры белән очрашкан.
Татарстан Президенты искәртеп узганча, Татарстанның алдынгы компанияләре линиясе буенча актив эш алып барыла – Үзбәкстанга КАМАЗ автомобильләре китертү эше киңәйтелә, шулай ук Үзбәкстан базарында «Татнефть» компаниясе эшли – бу күп ягулыклы автозаправка станцияләре, Үзбәкстанның беренче резинотехник заводы белән хезмәттәшлек җайга салынган.
Рөстәм Миңнеханов искәрткәнчә, Татарстанда үзбәкләрнең милли-мәдәни автономиясе эшли, мәгариф өлкәсендәге хезмәттәшлек үсә (республика югары уку йортларында 3,6 мең үзбәк студенты белем ала).
Хезмәт базары һәм хезмәт миграциясе мәсьәләләре буенча фикер алыштылар. Үзбәкстан Татарстанга килгән гражданнар саны буенча беренче урында тора.
Исегезгә төшерәбез, 2017 елда, Үзбәкстаннан хезмәт миграциясен тәртипкә салу максатында, Россия Федерациясе Хөкүмәте һәм Үзбәкстан Республикасы Хөкүмәте арасында РФ территориясендә вакытлыча хезмәт эшчәнлеген башкару өчен Үзбәкстан Республикасы гражданнарын җыю һәм җәлеп итү турында килешү имзаланган. Хезмәт мигрантларын оешкан рәвештә җыю механизмын эшләү буенча сынау проектын апробацияләү территориясе итеп Татарстан Республикасы сайланган, ә ТР Хезмәт, халыкны эш белән тәэмин итү һәм социаль яклау министрлыгы җаваплы башкарма хакимият органы итеп билгеләнгән.
ТР Хезмәт министрлыгы эш бирүчеләргә Үзбәкстан гражданнарын эшкә алу мөмкинлеге турында мәгълүмат җиткерү буенча адреслы эш алып бара.
Очрашуда Россия Тышкы эшләр министрлыгының Казан шәһәрендәге вәкиле Радик Вахитов, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, Татарстан Республикасы Хезмәт, халыкны эш белән тәэмин итү һәм социаль яклау министры вазыйфаларын башкаручы Эльмира Зарипова һәм башкалар катнашты.