ЯҢАЛЫКЛАР
Казан вертолет заводының Директорлар советы карары нигезендә Юрий Пустовгаров предприятиенең яңа генераль директоры итеп билгеләнде. Татарстан Республикасы Президенты Рөстәм Миңнеханов, Ростех дәүләт корпорациясе авиация кластерының индустрия директоры Анатолий Сердюков һәм “Вертолеты России” холдингы генераль директоры Андрей Богинский предприятие коллективын яңа җитәкче белән таныштырды. Заводның генераль директоры вазыйфасын биләгән Вадим Лигай 2007 елдан башлап “Вертолеты России” холдингы генераль директорының инфраструктура үсеше буенча урынбасары вазыйфасына билгеләнде.
Рөстәм Миңнеханов Владимир Лигайга завод җитәкчесе постында уңышлы башкарган хезмәте өчен рәхмәт белдерде. ТР Президенты билгеләп узганча, Вадим Лигай авиация сәнәгате өлкәсендә белгечләр әзерләү мәсьәләләренә һәм, тулаем алганда, республиканың социаль-сәяси тормышына зур игътибар биргән.
“Вадим Александрович Казан вертолет заводын 10 ел җитәкләде. Шушы вакыт эчендә Ансат вертолетларын серияле җитештерү һәм тиешле урынга җиткерү, җитештерү куәтләрен күләмле модернизацияләү өлешендә берничә әһәмиятле мәсьәлә хәл ителде. Әлбәттә инде, уңышлар да, заказлар җитәрлек булмауга бәйле проблемалар да булды. Ләкин мин ышанам, әлеге предприятиенең потенциалы бик зур. Шуңа күрә дә, һичшиксез, Казан вертолет заводы алга таба да “Вертолеты России” системасында алдынгы предприятие булачак”, – диде Татарстан Президенты.
“Вадим Александровичка Казан вертолет заводында күп еллык уңышлы хезмәт иткәне өчен рәхмәт белдерәсем килә. Аның җитәкчелегендә завод шактый уңышларга иреште – Ансат вертолетлары серияле рәвештә җитештерелә һәм тиешле урыннарга җиткерелә башлады, предприятиедә модернизацияләү һәм техник яктан яңача җиһазлау буенча күләмле программа старт алды, бүгенге көндә ул 90%ка үтәлгән. Хәзерге вакытта завод алдында яңа бурычлар тора: серияле рәвештә Ми-38 чыгару, җитештерүне диверсификацияләү, гражданлык продукциясе өлешен һәм санитар авиация программасын үстерү кысаларында җитештерелгән продукцияне тиешле урыннарга җиткерүләрне арттыру. Әле максатларны яңа директор Юрий Пустовгаровка тормышка ашырырга туры киләчәк, ул Күмертау авиация җитештерү предприятиесендә үзен идарәче директор сыйфатында күрсәтте”, – дип билгеләде “Вертолеты России” холдингы генераль директоры Андрей Богинский.
Вадим Лигай Казан вертолет заводында гомере буе эшләгән, предприятиедәге хезмәт эшчәнлеге 1976 елда инженер-конструктор вазыйфасында башланып киткән һәм генераль директор вазыйфасына кадәр юл узган. Аның җитәкчелегендә берничә әһәмиятле проект тормышка ашырылган.
Заводның яңа директоры Юрий Пустовгаров 2015 елның декабреннән башлап, “Вертолеты России” холдингы составына керүче Күмертау АҖП идарәче директоры постын биләгән иде.
Бүген “ТАНЕКО” АҖ хезмәт коллективының конференциясе булды, аның барышында предприятиенең җитештерү эшчәнлегенә, 2017 елгы Коллектив шартнамәсе шартлары үтәлешенә йомгак ясалды, шулай ук 2018 елга бурычлар билгеләнде.
Чарада Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, “Татнефть” ГАҖ профсоюз комитеты рәисе Гомәр Яруллин, Түбән Кама муниципаль районы башлыгы Айдар Метшин катнашты.
2017 елда эш йомгаклары турында доклад белән конференция делегатлары алдында “ТАНЕКО” АҖ генераль директорының икътисад һәм финанслар буенча урынбасары Владимир Федотов чыгыш ясады. Ул билгеләп узганча, хисап чорында 7,848 миллион тонна нефть чималы эшкәртелгән. Тулаем алганда, ел буенча эшкәртү тирәнлеге 99,24% тәшкил иткән, үтәкүренмәле нефть продуктлары чыгару – 87,5%.
“ТАНЕКО” предприятиесендә 50 миллион тонна нефть эшкәртү 2017 елгы әһәмиятле вакыйга булган. 2017 елның 15 апреленнән 14 маена кадәр уздырылган планлы капиталь ремонт барышында зур эш башкарылган. Шушы чорда нефть химиясе һәм нефть эшкәртү комплексына караган җайланмаларның озак, ышанычлы һәм куркынычсыз эшләвен тәэмин итүгә юнәлдерелгән тулы бер чаралар комплексы башкарылган.
Башка нефть эшкәртү заводлары белән “ТАНЕКО” эшчәнлеген чагыштырып, Владимир Федотов беренчел эшкәртү куәтләрен эшләтү (115,25% артык) буенча предприятие Россия Федерациясендә лидер позициясен тота, дип искәртте.
2017 елгы Коллектив шартнамәсен үтәү нәтиҗәләре һәм 2018 елгы Коллектив шартнамәсе проекты турында “ТАНЕКО” АҖ профком рәисе Гөлнара Мөҗипова сөйләде. Хәзерге вакытта предприятиедә өч мең ярымнан артык кеше эшли. “Иң яхшы коллектив шартнамәсе” VII республика конкурсында яуланган беренче урын хезмәткәрләрнең якланганлык дәрәҗәсенең югары булуы турында сөйли. Шулай ук “ТАНЕКО”ның профсоюз оешмасы “Татнефть” ТПП предприятиеләренең иң яхшы беренчел профсоюз оешмасы” конкурсында да җиңеп чыккан.
2018 ел бурычлары турында конференциядә катнашучыларга “ТАНЕКО” АҖ генераль директоры Леонид Алехин билгеләде. Иң әһәмиятлеләре арасында ул җитештерүдә сәнәгый һәм экологик куркынычсызлык тәэмин итүне; чималны үтәкүренмәле нефть продуктларының күләме, тирәнлеге һәм сайлап алынуы буенча расланган планнарга туры китереп эшкәртүне; керосинны гидрочистарту, дизель ягулыгын гидрочистарту, каталитик креикинг, ЭЛОУ-АВТ-6 эшен башлап җибәрүне; автомобильләр өчен Регуляр-92 һәм Премиум-95 бензиннары җитештерә башлауны атады.
Конференция делегатлары тарафыннан 2018 елга “ТАНЕКО”ның Коллектив шартнамәсе кабул ителде. Предприятиенең иң яхшы хезмәткәрләренә республика, муниципаль һәм корпоратив бүләкләр тапшырылды.
“Татнефть” ГАҖ матбугат хезмәте материаллары нигезендә.
2018 елның 19 февралендә Татарстан Республикасы Сәнәгать һәм сәүдә министрлыгы, Татарстан Республикасы Сәүдә-сәнәгать палатасы һәм Татарстан Республикасының Сәүдә үсеше советы ярдәмендә, товар җитештерүчеләр өчен укыту семинары уздырачак.
“Лента”ның рәсми вәкилләре товарлар белән тәэмин итүчеләр белән эшләүдә үз стандартлары турында сөйләячәк һәм сәүдә-сатып алу сессиясе уздырачак. “Alibaba” халыкара сәүдә мәйданчыгы вәкилләре әлеге системаның эш кагыйдәләре һәм аның ярдәмендә Россия компанияләренең бүген ни рәвешле яңа сату базарларына чыгулары турында сөйләячәк.
Чара Казан ш., Пушкин ур., 18 йорт адресы буенча урнашкан Татарстан Республикасы Сәүдә-сәнәгать палатасы бинасында узачак.
Катнашу өчен түбәндәге адрес буенча теркәлү кирәк: https://lenta.sovettorg.ru
Чараның программасы:
13.30 – 14.00 катнашучыларны теркәү, Татарстан Республикасындагы товар җитештерүчеләр күргәзмәсен карау, сәламләү каһвәсе
14.00 — 14.10 кереш сүз
14.10 — 15.00 “Alibaba” электрон сәүдә мәйданчыгы презентациясе һәм Татарстан Республикасында товар җитештерүчеләр өчен мөмкинлекләре
15.00 — 15.10 “Лента” СЧ коммерция хезмәте презентациясе, сораулар һәм җаваплар
15.10 — 15.20 Лента” СЧ сыйфат бүлеге презентациясе, сораулар һәм җаваплар
15.20 — 15.30 Лента” СЧ операцияләр хезмәте презентациясе, сораулар һәм җаваплар
15.30 — 15.40 Лента” СЧ EDI (электрон документ әйләнеше) буенча презентациясе, сораулар һәм җаваплар
15.40 – 17.00 Лента” СЧ белән сәүдә-сатып алу сессиясе, хезмәттәшлек турында беренчел сөйләшүләр
“Римера” компанияләре төркеменә керүче “Алнас” заводы Венесуэланың “PDVSA” дәүләт нефть компаниясенә зур партияле тулы комплектлы, электрны үзәктән куучы насос җайланмалары белән тәэмин итте.
Контракт шартлары буенча, “Римера” КТ Әлмәт предприятиесе Венесуэланың “PDVSA” дәүләт нефть компаниясе өчен зур партияле тулы комплектлы, электрны үзәктән куучы насос җайланмаларын җитештерү һәм төяп озату буенча заказ үтәде. Төяп озатылган техника партиясенә таушалуга каршы торучанлыгы югары булган 5А габаритлы 0615 сериясендәге компрессорлап җыелган насослар һәм тутыгып таушалуга каршы торучанлыгы югары булган 5А габаритлы 0215 сериясендәге насослар кергән. Насослар 117 мм габаритлы 110 кВт куәтендәге тирәнгә үтеп керүче электр двигательләре һәм заказчының техник таләпләре буенча “Алнас” инженерлары тарафыннан махсус эшләнгән һәм насос валыннан 7000 кг кадәр күчәр басымын кабул итәргә сәләтле, тандемлы гидросаклагычлар белән тәэмин ителгән.
“Алнас” җитештергән җайланмалар катлаулы шартларда нефть табуга юнәлдерелгән, югары этем һәм энергетика сыйфатламаларына ия һәм ышанычлы. Төяп озатыр алдыннан продукция заказчы компания таләпләренә җавап бирүе буенча инспекция тикшерүен уңышлы узган.
Татарстанстат мәгълүматлары буенча, 2017 елның гыйнвар – декабрендә республика предпрятиеләре гамәлдәге бәяләрдә җәмгысы 2254180,1 млн сумлык үзләре җитештергән товарларны төяп җибәргән, эшләр башкарган һәм хезмәтләр күрсәткән. 2017 елның гыйнвар – декабрендә сәнәгать җитештерүе индексы 2016 елның гыйнвар – декабре белән чагыштырганда – 101,8%.
Үзбушаткычларның 42 берәмлектән торган беренче партиясе 2017 елның сентябрендә Төрекмәнстан Президенты Гурбангулы Бердымөхәммәдов тарафыннан, илгә Россия Президенты Владимир Путин баргач имзаланган “КамАЗ” йөк автомобильләрен сатып алу турындагы карар кысасында заказчыга озатылды. Бу документ нигезендә, Төрекмәнстанның Автомобиль транспорты юллары министрлыгы Россия автопромы лидерыннан барлыгы 250 берәмлек 20 тонна йөк күтәрешле “КамАЗ-6520” автомобиле сатып алачак. Көпчәк формуласы 6х4 һәм кузов күләме 20 куб.м булган шул ук модельле тагын 208 үзбушаткыч республикага ел дәвамында илтеп тапшырылачак. Техника Автомобиль транспорты юллары министрлыгы предприятиеләренең автопаркын тулыландырачак һәм Төрекмәнстанның барлык вилаятларына бүлеп биреләчәк.
Шуны искәртик: 2008 елның июленнән бирле Ашхабад шәһәрендә 5 мең кв. метрдан артыграк мәйданлы КамАЗ укыту-сервис үзәге эшли. Автомобиль техникасын китерүдән һәм аңа тулысынча (диагностика һәм капиталь төзекләндерүне дә кертеп) техник хезмәт күрсәтүдән тыш, үзәктә төрекмән белгечләрен укыту да оештырылган: КамАЗ техникасының төзелеш, эксплуатацияләү, техник хезмәт күрсәтү, диагностика һәм көндәлек төзәтү үзенчәлекләре өйрәтелә.
“КамАЗ” ГАҖ матбугат хезмәте материаллары буенча
2018 елның 30 гыйнварында Татарстан Республикасы предприятиеләре һәм оешмаларында яшьләр белән иң яхшы эшләүгә “Республика потенциалы” республика бәйгесе җиңүчеләрен бүләкләү тантанасы булды. Бәйгенең оештыручылары булып Татарстан Республикасы Сәнәгать һәм сәүдә министрлыгы, Татарстан Республикасы Яшьләр эшләре һәм спорт министрлыгы, Татарстан Республикасы Мәгариф һәм фән министрлыгы, Татарстан Республикасы Транспорт һәм юл хуҗалыгы министрлыгы, Татарстан Республикасы Төзелеш, архитектура һәм торак-коммуналь хуҗалык министрлыгы, “Татарстан Республикасы предприятиеләре һәм оешмалары яшьләре берлеге” ТИО торды.
Бәйгегә сайлап алганда, Татарстан Республикасының 23 предприятие һәм оешмаларыннан җибәрелгән материаллар карап тикшерелде.
“Кеше саны 100дән алып 1000гә кадәр булган” номинациясендә 10 предприятие һәм оешма катнашты.
7 предприятие “Кеше саны 1000нән алып 3000гә кадәр булган” номинациясендә катнашты.
6 предприятие “Кеше саны 3000нән күбрәк булган” номинациясендә ярышты.
Бәйгедә җиңүчеләрнең материаллары иң яхшылар булып тора һәм предприятиеләрдә яшьләр белән эшләүнең эталоны сыйфатында башкаларга тарату өчен киңәш ителәчәк.
Шулай ук эшләүче яшьләрнең эшчәнлеген активлаштыруга юнәлдерелгән корпоратив программалар һәм регламентларның булуы, аларның яшьләр өчен республика һәм муниципалитет дәрәҗәсендәге чараларда катнашуы, сайтлары, социаль челтәрләрдә битләренең, предприятие сайтында яшьләр вкладкасының булуы, яшьләр берләшмәсенең дипломнары, сертификатлары булу, республика һәм бөтенроссия проектларында катнашу, яшьләр сәясәтен тормышка ашыруга бүлеп бирелә торган финанслау күләме һ.б. кебек күрсәткечләргә дә бәя бирелде.
Бәйгенең призерлары:
“Кеше саны 100дән алып 1000гә кадәр булган” номинациясендә:
1 нче урын – “Татэнерго” АҖ филиалы Түбән Кама ГЭСы;
2 нче урын – “ТГК-16” ААҖ филиалы Казанның ТЭЦ-3;
3 нче урын – “Татэнерго” АҖ филиалы Казанның ТЭЦ-1.
“Кеше саны 1000нән алып 3000гә кадәр булган” номинациясендә:
1 нче урын – В.Д. Шашин исемендәге “Татнефть” ГАҖнең “Җәлилнефть” нефть-газ чыгару идарәсе;
2 нче урын – “Татэнергосбыт” АҖ;
3 нче урын – “Метроэлектротранс” МУП.
“Кеше саны 3000нән күбрәк булган” номинациясендә:
1 нче урын – “Түбән Кама Нефтехим” ГАҖ;
2 нче урын – “ТАНЕКО” АҖ;
3 нче урын – “Таграс – РемСервис” ҖЧҖ.
2018 елның 29 гыйнварында Татарстан Республикасы Сәнәгать һәм сәүдә министрлыгы “Химград” АҖ белән берлектә традицион аралашу мәйданчыгы форматында полимердан эшләнгән автокомпонентларга багышланган Полимерлар көне үткәрде.
Чарада Россиядә полимердан автокомпонентлар җитештерү мәсьәләләре һәм халыкара хезмәттәшлек перспективалары, полимерларны кабельләр җитештерүдә куллану, җитештерү эшчәнлеге алып барганда чыгымнарны киметү мәсьәләләре һәм дәүләт ярдәме чаралары каралды. Шулай ук Полимерлар көне кысасында автомобильләрнең ягулык бакларын җитештерү өчен полиэтиленны бер урынга туплау буенча эшче төркем утырышы да булды.
Сәламләп, Татарстан Республикасы Премьер-министры урынбасары – сәнәгать һәм сәүдә министры Альберт Кәримов чыгыш ясады. Ул полимер автокомпонентлар җитештерү тармагын үстерүнең мөһимлеген һәм полимерларны җитештерүчеләр һәм эшкәртүчеләр арасындагы кооперация бәйләнешләрен ныгыту ярдәмендә базарны киңәйтү зарурлыгын билгеләп үтте. Министр автомобильләрнең ягулык бакларын җитештерү өчен полиэтиленны бер урынга туплау буенча эшче төркем әгъзаларына башкарган эшләре өчен рәхмәт белдерде. Төп мәсьәләләр буенча фикер алышкандагы актив позициясе өчен – “Форд Соллерс” УПны, чит илдән кертелүче Lupolen 4261AG полиэтиленына охшаш полиэтиленның тәҗрибә партиясен уйлап тапкан һәм бу материалны махсуслаштырылган лабораторияләрдә сынаган “Казан Оргсинтез” ГАҖне аерым билгеләп үтте. Альберт Кәримов полимер автокомпонентларның сәнәгать кластеры булдырылганлыгын, аның якындагы берничә елда анда катнашучыларның тизләтелгән үсешен тәэмин итәсен һәм көндәшлеккә сәләтлелеген арттырасын да ассызыклап әйтте.
Чараның шәрәфле кунагы – JVIS USAның бизнесны алга җибәрү буенча директоры Юджин Прусс Америка компаниясе үсешенең төп юнәлешләре, Татарстандагы компаундлар җитештерүче “ТатхимПласт” ҖЧҖ белән хезмәттәшлек итү тәҗрибәсе һәм илебезнең башка предприятиеләре белән хезмәттәшлек перспективалары турында сөйләде.
Полимерлар көнендә беренче тапкыр “МагнаАвтомотив Рус” АҖнең сатып алулар буенча директоры Андрей Дмитриев катнашты. Ул компаниянең пластик детальләр җитештерү өчен материалларны бер урынга туплау буенча тәҗрибәсе белән уртаклашты һәм бу вакытта компанияләрнең нинди каршылыкларга очравы турында сөйләде. Болар: озакка сузыла торган һәм кыйммәтле омологация процессы, ОЕМ таләпләренең төрлелеге, ягъни автомобиль җитештерүчеләрнең материалга карата бердәм стандарты булмау, тестларны чит илдә уздыру зарурлыгы, материал сыйфатының тотрыксызлыгы һәм зур чыгымнар.
“Химпроминжиниринг” ФҖК” АҖнең Инвестиция проектлары департаменты директоры Михаил Филимонов газ белән эшләүче моторлар сәнәгате өчен югары басымга чыдам 4 нче типтагы гадәттән тыш җиңел савытлар җитештерүне бер урынга туплау проектын тәкъдим итте. Алар автотранспорт, компримацияләнгән табигый газны транспортта ташу һәм саклау өчен тәгаенләнгән. Ул югары басымга чыдам 4 нче типтагы савытларның төп өстенлеген билгеләде: ярыклар барлыкка килми, коррозиягә бирешми, бик чыдам, корыч баллоннар белән чагыштырганда 70 процентка җиңелрәк, хезмәт итү срогы – 20 ел, гидравлик сынауларсыз гына тикшерү мөмкинлеге.
“Уралкабель” АҖ нең җитештерү буенча директор урынбасары Евгений Суходоев автомобиль тимерчыбыклары өчен пластикатлар җитештерүне Россиядә туплау зарурлыгын билгеләп үтте, чөнки хәзерге көндә барлык җитештерүчеләр дә – чит илнекеләр. Ул чираттагы Полимерлар көнен кабель сәнәгатендә компаундлар җитештерүгә бәйле мәсьәләләр буенча фикер алышуга багышлап уздыру теләген җиткерде.
Фикер алышуларда шулай ук “Казан Оргсинтез” ГАҖ, “ТатхимПласт” ҖЧҖ, “Ай-Пласт” ҖЧҖ, “ExotestRus” вәкилләре, автокомпонентлар җитештерүче “Автокомпонент” ИК” АҖ һәм “ЯПП Рус Автомобиль Системалары” ҖЧҖ; “Форд Соллерс” УП, “УАЗ” ҖЧҖ, “ГАЗ” төркеме кебек әйдәп баручы автомобиль җитештерүчеләр, фәнни учреждениеләр вәкилләре дә катнашты.
Чара йомгаклары буенча ягулык салу бакларын җитештерү өчен полиэтиленны бер урынга туплау буенча эшче төркем кысасында хезмәттәшлекне дәвам иттерергә һәм автомобильләрнең пластик детальләрен хромлауны бер урынга туплау мөмкинлеген карарга дигән карар кабул ителде. Шулай ук Татарстан Республикасы Сәнәгать һәм сәүдә министрлыгы автомобиль җитештерүчеләргә полиэтиленның чит илдән кертелүче Lupolen 4261AG полиэтиленына охшаш яңа маркасын гамәлгә кертүдә ярдәм күрсәтү буенча Россия Федерациясе Сәнәгать һәм сәүдә министрлыгы белән эшләүне дә дәвам иттерәчәк.
2018 елның 28 мартыннан 30ына кадәр “Казан ярминкәсе” күргәзмәләр үзәгендә TIAF 2018 supportedbyAutomechanika Автомобиль төзү халыкара форумы була. Ул автомобиль төзү һәм автокомпонентлар сәнәгате өчен күргәзмәне, топ-менеджмент өчен зур эшлекле форумны, автоконцерннарның сатып алулар буенча директорлары белән турыдан-туры очрашуларны, шулай ук Татарстан Республикасының җитештерү мәйданчыкларына баруны берләштерә. Күргәзмәдә Кытайдан 150дән артык китерүче һәм җитештерүче компанияләр катнашачак.
Автомобиль төзү халыкара форумы – чаралар оештыруның немецча сыйфаты югары стандартлары, әйдәп баручы – запас частьлар, автокомпонентлар һәм автосервис өчен җайланмалар җитештерүче халыкара компанияләрнең катнашуы, шулай ук традицион рәвештә Automechanika күргәзмәләре кысасында узучы күп мәгълүматлы белем бирү һәм бизнес-программа ул.
Automechanika (Автомеханика) – запас частьлар, автокомпонентлар һәм автосервис өчен җайланмалар җитештерү өлкәсендә әйдәп баручы халыкара күргәзмәләр бренды, аның чаралары инде 45 елдан артык дөньяның 12 илендә уза һәм автобизнес профессионаллары арасында гаять зур популярлыкка ия. “Automechanika” күргәзмәләре – 13000нән артык экспонентлар һәм ярты миллионнан артык килүче-профессионаллар ул. Automechanika бренды күргәзмәләренең уңышын чаралар оештыруның немецча сыйфаты югары стандартлары, әйдәп баручы – запас частьлар, автокомпонентлар һәм автосервис өчен җайланмалар җитештерүче халыкара компанияләрнең катнашуы, шулай ук традицион рәвештә Automechanika күргәзмәләре кысасында узучы күп мәгълүматлы белем бирү һәм бизнес-программа тәэмин итә.
Күргәзмә турында тәфсиллерәк мәгълүматны http://tiaf-forum.ru сайтыннан, шулай ук +7 (843) 202-29-03, +7 (843) 202-29-92 телефон/факслар аша алырга мөмкин.
25 гыйнвар көнне Россия Федерациясе Президенты Владимир Путин һәм Татарстан Республикасы Президенты Рөстәм Миңнеханов видеоэлемтә форматында “Татнефть”нең Түбән Камадагы “ТАНЕКО” нефть эшкәртү комплексында гидрочистарту һәм изомерация буенча җайланмаларны эксплуатациягә кертү тантанасында катнашты.
“ТАНЕКО” проектын үстерү планы 2023 елга кадәр исәпләнгән. Хәзерге вакытта ике җитештерү – 1,1 миллион тонналык нафтны гидрочистарту һәм 420 мең тонналы изомеризация өлешләрен сафка бастырырга әзерләр. Проект Россиядәге проектчылар һәм машина төзүчеләр белән берлектә эшләнгән, эшкә җигеләчәк җайланмаларда үзебезнең илдә җитештерелгән яңа нефть эшкәртү технологияләре урнаштырылган, алар арасында әзер технологик зур блоклар белән җайланмалар китертү дә бар.
Видеоэлемтә режимында РФ Президенты “ТАНЕКО”ның нефтьне тирәнтен эшкәртү буенча нафтны гидрочистарту һәм изомеризацияләү җайланмаларын эшкә җигү буенча команда бирде.
Владимир Путин “Татнефть” җитәкчелегенә, шулай ук Комплекс төзелешендә катнашкан проектчыларга, төзүчеләргә, инженерларга зур эшләре һәм ирешкән нәтиҗәләре өчен рәхмәтен белдерде, “Татнефть” ГАҖ, “ТАНЕКО” АҖ коллективларын зур хезмәт җиңүләре белән котлады һәм алга таба уңышлар теләде.
“Татнефть” ГАҖ матбугат хезмәте материаллары нигезендә